കോമഡി/ഡ്രാമ

12 വർഷങ്ങൾക്ക് മുൻപ് കുടുംബ പ്രാരാബ്ദത്താൽ അബുദാബിയിൽ ജോലി തേടി വന്നവനാണ് പി മാധവൻ നായർ(മോഹൻ ലാൽ). ആദ്യ വർഷങ്ങളിൽ കാര്യമായ ജോലിയൊന്നുമില്ലാതിരുന്ന മാധവനു കുറച്ചു വർഷങ്ങൾക്ക് ശേഷം ഹൊസൈനി (ശക്തി കപൂർ) എന്ന അറബിയുടെ കമ്പനിയിൽ അക്കൗണ്ടന്റായി ജോലി കിട്ടുന്നു. നാട്ടിലെ സാമ്പത്തിക ബാദ്ധ്യതകളും പഴയ തകർന്ന പ്രണയവുമൊക്കെ കാരണം വിവാഹമേ വേണ്ട എന്നു കരുതിയിരുന്ന മാധവൻ നായർ ഒരു ജ്വല്ലറിയിൽ വെച്ച് ആകസ്മികമായി മീനാക്ഷി (ലക്ഷ്മി റായ്) എന്ന പെൺ കുട്ടിയെ പരിചയപ്പെടുന്നു. അവർ തമ്മിലുള്ള കണ്ടുമുട്ടൽ ഇരുവർക്കും പ്രണയം ജനിപ്പിക്കുന്നു. പക്ഷെ താൽക്കാലികമായി മീനാക്ഷി യു എസ് ലേക്ക് തിരിച്ചു പോകൂന്നു. അതിനിടയിൽ മാധവൻ നായരുടെ പഴയ സുഹൃത്ത് അബ്ദു (മുകേഷ്) ഒരു ജോലി അപേക്ഷയുമായി മാധവൻ നായരുടെ കമ്പനിയിൽ വരുന്നു. സി സി ടി വി ടെക്നീഷ്യനായ അബ്ദുവിനു മുൻപ് ജയിൽ ജീവിതം അനുഭവിക്കേണ്ടിവന്നതുകൊണ്ട് മാധവൻ ജോലി നിരസിക്കുന്നു. അപ്രതീക്ഷിതമായി മീനാക്ഷിയെ വീണ്ടും കണ്ടുമുട്ടിയ മാധവൻ ഇരുവരും തമ്മിലുള്ള വിവാഹത്തിനു തയ്യാറെടുക്കുന്നു. ഇരുവരുടേയും വിവാഹത്തിനു താലപര്യം കാണിക്കുകയും വേണ്ട സൗകര്യങ്ങൾ ഒരുക്കിക്കൊടുക്കുകയും ചെയ്യുന്ന അറബി ഹൊസൈനി മീനാക്ഷിയോട് വളരെ അടുപ്പത്തിൽ പെരുമാറുന്നത് മാധവനു സംശയങ്ങൾ ഉണ്ടാക്കുന്നു. അപ്രതീക്ഷമായി തന്റെ ഫ്ലാറ്റിൽ മീനാക്ഷിയോടൊപ്പം അറബിയെ കണ്ട മാധവൻ മരിക്കാൻ തയ്യാറെടുത്ത് ഹൈവേയിലൂടെ തന്റെ കാറിൽ അതിവേഗം പോകുമ്പോഴാൺ അബ്ദു മാധവനെ ബ്ലാക്ക് മെയിൽ ചെയ്യാൻ ശ്രമിക്കുന്നത്. ഇരുവരുടെയും ബഹളത്തിനിടയിൽ കാർ ലക്ഷ്യം തെറ്റി ഒരു മരുഭൂമിയിലേക്ക് തെറിച്ചു പോകുന്നു. പിന്നീട് വഴിയറിയാതെ മരുഭൂമിയിലലയുന്ന ഇരുവരും ആളില്ലാത്ത ഒരു കാർ കാണുകയും അതിൽ രക്ഷപ്പെടാൻ ശ്രമിക്കുകയും ചെയ്യുമ്പോഴാൺ അതിനുള്ളിൽ ഒരു പെൺകുട്ടി ബന്ധനസ്ഥയായി ഇരിക്കുന്നത് കാണുന്നത്. ഏതോ അഞ്ജാത സംഘം പെൺകുട്ടിയെ കിഡ്നാപ്പ് ചെയ്തതാണെന്ന് മനസ്സിലാക്കിയ മാധവനും അബ്ദുവും ഇലിയാന (ഭാവന) എന്ന പെൺകുട്ടിയെ ഒഴിവാക്കി രക്ഷപ്പെടാൻ ശ്രമിക്കുന്നുവെങ്കിലും ഇലിയാന അവരെ വിട്ടൊഴിയുന്നില്ല. അബ്ദുവും ഇലിയാനയും ഇലിയാനയുടെ കിഡ്നാപ്പിങ്ങും മാധവനു ഒരുപോലെ ഊരാക്കുടുക്കാകുന്നു. അതിൽ നിന്നും രക്ഷപ്പെടാനുള്ള മാർഗ്ഗങ്ങൾ വീണ്ടും കുരുക്കു മുറുക്കുന്നു.

രസകരവും സസ്പെൻസും നിറഞ്ഞ നിമിഷങ്ങൾ പിന്നീടങ്ങോട്ട് സംഭവിക്കുന്നു.

നാട്ടിൽ അല്പം രാഷ്ട്രീയവും പൊതുപ്രവർത്തനവുമായി ജീവിക്കുന്ന ഇരവിക്കുട്ടൻ പിള്ള(കുഞ്ചാക്കോ ബോബൻ)ക്ക് കെ എസ് ആർ ടി സി യിൽ കണ്ടക്ടറായി ജോലി കിട്ടി. പത്തനംതിട്ട ടൌണിൽ നിന്ന് റിസർവ്വ്ഡ് ഫോറസ്റ്റ് ഏരിയായിലുള്ള ഗവി എന്ന കുഗ്രാമത്തിലേക്കുള്ള ബസ്സിലാണ് ആദ്യ നിയമനം. മനസ്സില്ലാമനസ്സോടെയാണെങ്കിലും ഇരവി ജോലിക്ക് കയറി. ഡ്രൈവറായി പാലക്കാട് സ്വദേശി സുകു(ബിജു മേനോൻ)വും. രാവിലെ പത്തനം തിട്ടയിലേക്കും തിരിച്ച് ഗവിയിലേക്കുമുള്ള ട്രിപ്പാണ് ബസ്സ്. രാത്രി ഗവിയിൽ താമസം. മഞ്ഞുമൂടിയ മലനിരകളുള്ള നീർച്ചോലയും തേയിലത്തോട്ടങ്ങളുമുള്ള ഗവി എന്ന ഗ്രാമം ആദ്യമൊക്കെ ഇരവിക്ക് ബുദ്ധിമുട്ടായെങ്കിലും പിന്നീടുള്ള ദിവസങ്ങളിൽ ഇഷ്ടപ്പെട്ടുതുടങ്ങുന്നു. ബസ്സിൽ പലരും ഗവിയിൽ നിന്നുള്ള സ്ഥിരം യാത്രക്കാരാണ്. പത്തനം തിട്ട ടൌണിലെ മാർക്കറ്റിൽ പലതും വിൽക്കാനുള്ളവർ. അവരിൽ പലരുമായും ഇരവി പരിചയത്തിലാകുന്നു. അതിനിടയിൽ ബസ്സിലെ സ്ഥിരം യാത്രക്കാരിയായ കല്ല്യാണി(ശ്രിത)യോട് ഇരവി ചെറിയൊരു ഇഷ്ടത്തിലാവുന്നു. ഡ്രൈവർ സുകു നാട്ടിൽ അത്യാവശ്യം ബാദ്ധ്യതകളുള്ളൊരു കുടുംബത്തിന്റെ ഏക അത്താണിയാണ്. ഗവിയിലെ സ്ഥിരം മദ്യപാനി വക്കച്ചൻ (ബാബുരാജ്) ജോസ് മാസ്റ്റർ (ജിഷ്ണു) സ്ഥലത്തെ പഞ്ചായത്ത് പ്രസിഡന്റും അദ്ധ്യാപകനുമായ വേണുമാഷ് (ലാലു അലക്സ്) അദ്ദേഹത്തിന്റെ കുടൂംബവും മകൾ അന്ന(ആൻ അഗസ്റ്റിൻ) എന്നിവരുമൊക്കെയായി സുകുവും ഇരവിയും നല്ല ബന്ധത്തിലാണ്. ഗ്രാമത്തിലെ അല്പം പരുക്കനായ ഭദ്രൻ (ആസിഫ് അലി) എന്ന റിസർവോയർ ജീവനക്കാരൻ ഗ്രാമീണർക്ക് സഹായിയാണ് ഒപ്പം ഇവരുമായി ചങ്ങാത്തത്തിലാണ്. വേണുമാഷുടെ സുഹൃത്തിന്റെ മകളായ അന്ന മാതാപിതാക്കൾ മരണപ്പെട്ടതുകൊണ്ട് വേണുമാഷുടെ സംരക്ഷണയിലാണ് ജീവിതം. അന്ന നാട്ടിലെ പോസ്റ്റ് വുമൺ കൂടിയാണ്. ജോസ് മാസ്റ്ററും അമ്മയും അന്നയെ ജോസ് മാസ്റ്റർക്ക് വേണ്ടി വിവാഹം ആലോചിക്കുന്നുവെങ്കിലും വേണുമാസ്റ്ററുടെ മകൻ ദേവനു(ഹേമന്ത്)മായി അവളുടെ വിവാഹം തീരുമാനിച്ചിരുന്നു. ഇതിനിടയിൽ ഇരവിയുടേയും കല്യാണിയുടേയും പ്രേമം വളരുന്നു. ഇവരുടെയൊക്കെ ജീവിതം നർമ്മ മധുരമായി ശാന്തമായി പോകുന്നതിനിടയിലാണ് ആകസ്മികമായി മറ്റൊരു സംഭവം അരങ്ങേറുന്നത്.  ഒരു ദിവസം വഴിയിൽ വെച്ച്  ബസ്സ് കേടായതുകൊണ്ട് റിപ്പയറേ വിളിച്ച് ശരിയാക്കുന്നു സുകുവും ഇരവിയും. അമിതമദ്യപാനത്താൽ ക്ഷീണിതനായ സുകുവിനു ഡ്രൈവിങ്ങ് ചെയ്യാൻ പറ്റാത്തതുകൊണ്ട് അന്ന് ഗവിയിലേക്കുള്ള ബസ്സ് ഇരവി ഡൈവ് ചെയ്യുന്നു. പക്ഷെ വഴിയിൽ വെച്ച് ബസ്സ് അജ്ഞാതനായ ഒരു ചെറുപ്പക്കാരനുമായി ആക്സിഡന്റാകുന്നു. പകച്ചു പോകുന്ന ഇരവിയും സുകുവും എന്തു ചെയ്യണമെന്നറിയാതെ നിൽക്കുമ്പോൾ ആ വഴി വന്ന ഒരു ജീപ്പിൽ പരിക്കു പറ്റിയ ആളെ താഴ്വാരത്തെ ആശുപത്രിയിലേക്കെത്തിക്കുന്നു.പക്ഷെ ഈ വിവരങ്ങൾ ഗ്രാമത്തിൽ പങ്കുവെക്കാൻ പറ്റാത്ത ഒരവസ്ഥയിലാകുന്നു ഇരുവരും. കാവിലെ ഉത്സവം കഴിഞ്ഞ് അടുത്ത ദിവസം പുലരുന്നത് സുകുവിനേയും ഇരവിയേയും ഞെട്ടിക്കുന്ന വാർത്തയായിട്ടായിരുന്നു. പിന്നീടുള്ള ജീവിതം പലതും തെളിയിക്കാനും അതിജീവിക്കാനുമുള്ളതായിരുന്നു ഇരുവർക്കും.

ഒറ്റപ്പാലത്തിനടുത്ത് കൃഷ്ണപുരം എന്ന ഗ്രാമത്തിലെ വിദ്യാസമ്പന്നനായ ഒരു ചെറുപ്പക്കാരനാണ്‍ ജയശങ്കര്‍(ജയറാം). അന്തരിച്ച അച്ഛന്റെ ഒരു ആഗ്രഹമായിരുന്നു ജയശങ്കര്‍ ഒരു പോലീസ് ഉദ്യോഗസ്ഥാനാകണമെന്നു. പക്ഷെ, പ്രായമായ അമ്മയും ഇളയ സഹോദരിയും അടങ്ങുന്ന കുടുംബത്തെ സംരക്ഷിക്കുന്നതിനു വേണ്ടി എം എ ബിരുദ ധാരിയും പോലീസ് സബ് ഇന്‍സ്പെക്ടര്‍ പരീക്ഷ എഴുതിയതുമായ ജയശങ്കര്‍ . മണ്ണിനോടും കൃഷിയോടുമുള്ള താല്പര്യത്താല്‍ പൊള്ളാച്ചി ചന്തയില്‍ നിന്നും പച്ചക്കറികള്‍ എടുത്ത് നാട്ടിലെ കച്ചവടസ്ഥാപനങ്ങള്‍ക്ക് വിറ്റ് ജീവിക്കുന്നു, ഒപ്പം സഹായത്തിനു കൂട്ടുകാരന്‍ പപ്പനു(കോട്ടയം നസീര്‍)മുണ്ട്. ചന്തയിലെ ഒരു ധനാഡ്യനായ സദാനന്ദന്‍ മുതലാളി (സാദിഖ്) നാട്ടിലെ തന്റെ ഒരു ഇടപാടുകാരനു വലിയ തുകയൊക്കെ കൊടൂത്തു വിടുന്നത് ജയശങ്കറുടെ കൈവശമാണ്. ജയശങ്കറിന്റെ വിശ്വസ്ഥതയാണ് അതിനു കാരണം. ഒരു ദിവസം ജയശങ്കറുടെ സഹോദരി കല്യാണി(മിത്രാകുര്യന്‍)യെ പെണ്ണൂകാണാന്‍ ബ്രോക്കര്‍ (മാമുക്കോയ) പറഞ്ഞുറപ്പിച്ച ഒരു സംഘം എത്തുന്നു. കല്യാണിയേയും കുടൂംബത്തേയും ഇഷ്ടപ്പെട്ട ചെറുക്കന്റെ വീട്ടുകാര്‍ വിവാഹത്തിനു തയ്യാറാകുന്നു. ജയശങ്കറിന്റെ അമ്മ മാധവിയമ്മ(ശോഭാ മോഹന്‍)യോട് അസൂയയുള്ള അമ്മാവന്‍ (ജനാര്‍ദ്ദനന്‍) അസൂയയോടെ പലതും പറയുന്നെങ്കിലും അമ്മാവനെ ജയശങ്കര്‍ കളിയാക്കി ഓടിക്കുന്നുണ്ട്. ഇതിനിടയില്‍ ഒരിക്കല്‍ സദാനന്ദന്‍ മുതലാളി കൊടുത്തയച്ച 10 ലക്ഷം രൂപ ജയശങ്കറില്‍ നിന്നു ഒരാള്‍ തട്ടിയെടുക്കുന്നു. അവനെ പിന്തുടര്‍ന്നെങ്കിലും ജയശങ്കറിനു ആളെ കണ്ടെത്താനായില്ല. വിവരമറീഞ്ഞു സദാനന്ദന്‍ ജയശങ്കറിനോട് കയര്‍ക്കുന്നു. അടുത്ത ദിവസം തന്നെ മുഴുവന്‍ പണം എത്തിക്കണമെന്നു ഭീഷണി മുഴക്കുന്നു. പണം കൊടുക്കാന്‍ വഴിയില്ലാതെ ജയശങ്കര്‍ കൊച്ചി സിറ്റിയില്‍ വലിയ നിലയിലായിരിക്കുന്നുവെന്ന് കരുതുന്ന അമ്മയുടെ ചേച്ചിയുടെ മകന്‍ സേതുരാമനെ(സുരാജ് വെഞ്ഞാറമൂട്) കാണാനും പണം സംഘടിപ്പിക്കാനും പുറപ്പെടുന്നു. അവിടെയെത്തിയപ്പോളാണ് ജയശങ്കര്‍ സേതുരാമന്റെ സത്യാവസ്ഥ മനസ്സിലാക്കുന്നത്. എറണാകുളം നഗരത്തിലെ തൃക്കര എന്ന സ്റ്റേഷനതിര്‍ത്തിയിലെ ജനങ്ങളെ വിറപ്പിക്കുന്ന ഒരു അധോലോക- ക്വട്ടേഷന്‍ ടീമിന്റെ തലവനാണ് സേതുവെന്നും അവനെ നിയന്ത്രിക്കുന്നത് സ്ഥലം എം എല്‍ എ ബ്രഹ്മദത്തന(സുരേഷ് കൃഷ്ണ)നാണെന്നും ജയശങ്കര്‍ മനസ്സിലാക്കി. സേതുവിന്റെ സംഘത്തില്‍ ചേരാനും മോഷണം തുടങ്ങിയ കാര്യങ്ങള്‍ ചെയ്യാനും സേതു നിര്‍ബന്ധിച്ചെങ്കിലും മനസ്സാക്ഷിയുള്ള ജയശങ്കര്‍ അതിനു തയ്യാറാവാതെ നാട്ടിലേക്കു മടങ്ങാന്‍ തുടങ്ങുന്നു. ആ സമയത്ത് അപ്രതീക്ഷിതമായി എം എല്‍ എ ബ്രഹ്മദത്തന്റെ സംഘത്തില്‍ മുന്‍പ് തന്റെ 10 ലക്ഷം രൂപ തട്ടിപ്പറിച്ച് കടന്നു കളഞ്ഞ മോഷ്ടാവിനെ ജയശങ്കര്‍ കാണുന്നു. അതോടെ തന്റെ തീരുമാനം മാറ്റി ജയശങ്കര്‍ സേതുരാമന്റെ സംഘത്തില്‍ ചേരുന്നു. സംഘത്തില്‍ ചേര്‍ന്ന് നഗരത്തില്‍ പല മോഷണങ്ങളും അതി വിഗദ്ധമായി ജയശങ്കര്‍ ചെയ്തുപോരവേയാണ്‍ എം എല്‍ എ പുതിയ ഒരു സി ഐ -യെ നഗരത്തിലെ പോലീസ് സ്റ്റേഷനില്‍ നിയോഗിക്കുന്നത്. സി. ഐ സാജന്‍ ജോസഫ് (ബിജു മേനോന്‍) മുഖസ്തുതി ഇഷ്ടപ്പെടൂന്ന ഒരു മണ്ടനെന്നു തോന്നിക്കുന്ന ഒരാളായിരുന്നു സാജന്‍ ജോസഫ്. ഒന്നു രണ്ടിടങ്ങളില്‍ വെച്ച് ജയശങ്കറും സാജന്‍ ജോസഫും തമ്മില്‍ കണ്ടു മുട്ടുന്നുവെങ്കിലും പരസ്പരം മാന്യമായ പെരുമാറ്റമായിരുന്നു ഇരുവര്‍ക്കും. അതിനിടയിലാണ് ജയശങ്കറിനു എസ് ഐ സെലക്ഷന്‍ കിട്ടി ട്രെയിനിങ്ങിനു ചെല്ലാനുള്ള ഓര്‍ഡര്‍ വരുന്നത്. ആകെ ശങ്കയിലായ ജയശങ്കര്‍ ഒടുക്കം എസ് ഐ സെലക്ഷന്‍ വിജയിക്കുകയും എറണാകുളം നഗരത്തിലെ തനിക്ക്  കുറച്ച് നാള്‍ മുന്‍പ് പരിചിതമായ തൃക്കര പോലീസ് സ്റ്റേഷനിലെ എസ് ഐ ആയിത്തന്നെ നിയമിതനാവുകയും ചെയ്യുകയാണ്. തുടര്‍ന്ന് രസകരമായ സംഭവങ്ങള്‍ അരങ്ങേറുന്നു.

തന്റെ ഗ്രാമമായ ചിറ്റാരംതൊടിയുടെ ആരെയും ഞെട്ടിക്കുന്ന കഥ ലോകത്തെ അറിയിക്കാനും മൂടിവെക്കപ്പെട്ട സത്യം ബന്ധപ്പെട്ട അധികാരികള്‍  തിരിച്ചറിയാനും വേണ്ടി നന്ദഗോപന്‍ (ദിലീപ്) എന്ന ചെറുപ്പക്കാരന്‍  രണ്ടു വര്‍ഷം കൊണ്ട് താന്‍ പട്ടിണി കിടന്നും കഷ്ടപ്പെട്ടും എഴുതിയുണ്ടാക്കിയ തിരക്കഥയുമായി സൌത്തിന്ത്യന്‍ സൂപ്പര്‍ സ്റ്റാര്‍ സൂര്യ കിരണി(കലാഭവന്‍ മണി)നെ കഥ കേള്‍പ്പിക്കാന്‍ വേണ്ടി ദിവസങ്ങോളമായി അലയുന്നുവെങ്കിലും ഒരു ശ്രമവും നടക്കുന്നില്ല. വഴിയില്‍ വെച്ച് പരിചയപ്പെട്ട കാര്‍ മോഷ്ടാവ് സുഗുണന്‍(സുരാജ് വെഞ്ഞാറമൂട്) വഴി ഒരു രാത്രി സൂര്യകിരണിന്റെ കിടപ്പുമുറിയില്‍ കടന്നു കൂടിയ നന്ദഗോപനു കഥ പറയാന്‍ സൂര്യകിരണ്‍ അവസരം നല്‍കുന്നുവെങ്കിലും നന്ദഗോപനു കഥയായി പറയാനായില്ല. ക്രുദ്ധനായി മുറിയില്‍ നിന്നിറങ്ങിപ്പോകാന്‍ പറഞ്ഞ സൂര്യകിരണിന്റെ മുന്നില്‍ തന്റെ എല്ലാമെല്ലാമായ തിരക്കഥ വലിച്ചെറിഞ്ഞ് നന്ദഗോപന്‍ അപ്രത്യക്ഷനായി. ഒരു കൌതുകത്തിനു വായിച്ചു തുടങ്ങിയ ആ തിരക്കഥ സൂര്യകിരണിനെ അത്ഭുതപ്പെടുത്തുന്നു. തന്റെ മറ്റെല്ലാ പ്രൊജക്റ്റും മാറ്റിവെച്ച് അടൂത്ത സിനിമയായി നന്ദഗോപന്റെ ‘അഭയാര്‍ത്ഥികള്‍’ എന്ന തിരക്കഥ ചെയ്യാന്‍ മാനേജര്‍ സ്വാമിയേട്ടനോട് (ബാബു നമ്പൂതിരി) നിര്‍ദ്ദേശം നല്കുന്നു.

നന്ദന്‍ എഴുതിയപോലെത്തന്നെ ചിറ്റാരംതൊടി എന്ന ഗ്രാമത്തില്‍ തന്നെയായിരുന്നു ഷൂട്ടിങ്ങ് ആരംഭിച്ചത്. ആദ്യമായൊരു സിനിമാ ഷൂട്ടിങ്ങ് നടക്കുന്ന ആ ഗ്രാമത്തിലെ ജനങ്ങള്‍ക്ക് അത് ആവേശമാകുന്നു. ഈ സിനിമയുടെ തിരക്കഥ എഴുതിയത് ഈ ഗ്രാമത്തിലെ തന്നെ നന്ദഗോപന്‍ എന്ന ചെറുപ്പക്കാരനാണ് എന്ന് സൂര്യകിരണും, ചിത്രത്തിന്റെ സംവിധായകന്‍ അരവിന്ദനും(അശോകന്‍) ഗ്രാമത്തെയും നന്ദഗോപന്റെ സഹോദരി ഗൌരി(മുക്ത)യേയും അറിയിക്കുന്നു. ഗ്രാമത്തിലെ അപ്പോയി (വിജയരാഘവന്‍) എന്ന മദ്ധ്യവയസ്കന്‍ ഷൂട്ടിങ്ങിനാവശ്യമായ എല്ലാ സഹായങ്ങളും ചെയ്തു കൊടൂക്കുന്നു.

ആ ഗ്രാമത്തിന്റെ കഥ പറയുമ്പോള്‍ മരിച്ചു പോയ സഖാവ് രാഘവനെ(തലൈവാസല്‍ വിജയ്)ക്കുറിച്ചും പറയേണ്ടിവരുന്നു, ഗ്രാമവാസികളെ പറിച്ചു നടേണ്ടി വന്ന വ്യവസായ ശാലക്കെതിരെ സഖാവ് രാഘവന്‍ നടത്തിയ സമരത്തെക്കുറിച്ചും പറയേണ്ടി വരുന്നു. രാഘവന്റെ ദുരൂഹ മരണത്തെക്കുറീച്ചുള്ള സത്യങ്ങളും ഈ കഥക്ക് പറയേണ്ടി വരുന്നു. അതോടെ സത്യങ്ങള്‍ മൂടി വെക്കാന്‍ ആഗ്രഹിക്കുന്ന ഉന്നത ഭരണാധികാരികള്‍ ഈ സിനിമയെ തടസ്സപ്പെടുത്താന്‍ എല്ലാത്തരത്തിലും ശ്രമിക്കുന്നു. പക്ഷെ അതിനെ നേരിടാന്‍ സൂര്യകിരണ്‍ തയ്യാറായിരുന്നു.

തുടര്‍ന്ന് ചിറ്റാരംതൊടി ഗ്രാമവാസികളുടെ ജീവിതത്തിന്റേയും സൂര്യകിരണിന്റേയും സങ്കീര്‍ണ്ണവും സംഭവബഹുലവുമായ ജീവിത മുഹൂര്‍ത്തങ്ങളുടെ കഥ തുടങ്ങുകയായി.

കൃഷ്ണപുരം കൊട്ടാരത്തിലെ അവസാനത്തെ മൂന്ന് അവകാശികള്‍ക്ക്  ഒരേ ദിവസം ഒരേ സമയം മൂന്ന് പുത്രന്മാര്‍ ജനിച്ചു. മൂന്നു പേരും കുട്ടിക്കാലം മുതലേ പരസ്പരം പാര പണിയുന്നതിനും, തല്ലു പിടിക്കുന്നതിനും ശ്രമിച്ചു. മുതിര്‍ന്നപ്പോളും ഈ മൂന്നുപേര്‍ രാമനുണ്ണി രാജ  എന്ന രാം (കുഞ്ചാക്കോ ബോബന്‍) ടിവി റിയാലിറ്റി ഷോയില്‍ പങ്കെടുത്ത് പണമുണ്ടാക്കാന്‍ ശ്രമിച്ചു. ഭാസ്കരനുണ്ണി രാജ എന്ന ഭാസ്കര്‍ ഇന്ദ്രജിത്) ഐപി എല്‍ ടീമിന്റെ സെലക്ഷനില്‍ പങ്കെടുക്കാനും ശങ്കരനുണ്ണിരാജ എന്ന ശങ്കര്‍ ( ജയസൂര്യ) സീരിയലിനും സിനിമയിലും അഭിനയിക്കാനുള്ള ശ്രമത്തിലും. ഒന്നിലും വിജയിക്കുന്നില്ല എന്ന് മാത്രമല്ല എല്ലാത്തിലും പരസ്പരം പാര പണിയുന്നതിലൂടെ പരാജയപ്പെടുകയും ചെയ്തു. ഇതില്‍ രാമിനെ  രഞ്ജുവും(ആന്‍ അഗസ്റ്റിന്‍) ഭാസ്കറിനെ മഞ്ജുവും (സന്ധ്യ) ശങ്കറിനെ അഞ്ജു(സംവൃത)വും പ്രണയിച്ചുകൊണ്ടിരിക്കുന്നു.

ഇവരുടെ അമ്മമാരുടെ നിര്‍ദ്ദേശപ്രകാരം ഒരു ചാനല്‍ പ്രോഗ്രാം ഡയറക്ടറായ ഇവരുടെ തന്നെ ബന്ധു അശോക് വര്‍മ്മ (അശോകന്‍) യുടെ നിര്‍ദ്ദേശപ്രകാരം ഇവര്‍ ഒരു ബി പി ഓ സ്ഥാപനത്തില്‍ ജോലിക്ക് കയറുന്നുവെങ്കിലും ഇവര്‍ തമ്മിലുള്ള പാരവെയ്പ് കാരണം അന്നു തന്നെ ഡിസ്മിസാകുന്നു. അശോക് വര്‍മ്മ പ്രൊഡ്യൂസറാകുന്ന ഒരു റിലായിറ്റി ഷോയില്‍ പങ്കെടുത്ത് വിജയിയാകാന്‍ പോകുന്ന രാമിനെ രാമിന്റെ കാമുകി വഴക്കിട്ട് കൊണ്ടുപോകുന്നതു മൂലും റിയാലിറ്റി ഷോ ഫൈനലാകാതെ അനിശ്ചിതത്തിലാകുന്നു. ഇതിനിടയില്‍ തങ്ങള്‍ പ്രണയിക്കുന്ന മൂന്നു പേരും സഹോദരികളാണെന്നും തങ്ങളുടെ കൊട്ടാരം പണയത്തിലാക്കിയ പലിശക്കാരനായ കൊട്ടാരത്തിന്റെ പഴയ കാര്യസ്ഥന്റെ (ജഗതി) മക്കളുമാണെന്ന് അറീയുന്നു. കാര്യസ്ഥന്റെ വീട്ടിലെ ലോക്കറിലിരിക്കുന്ന കൊട്ടാരത്തിന്റെ ആധാരം മോഷ്ടിക്കാന്‍ ശ്രമിക്കവേ മൂവരും പോലീസിന്റെ പിടിയിലാവുന്നു.ലോക്കപ്പില്‍ വെച്ച് ഒരു കള്ളനില്‍ നിന്നാണ് പണ്ട് ടിപ്പുവിന്റെ ആക്രമണ കാലത്ത് കൃഷ്ണപുരം കൊട്ടാരത്തിലെ ഒരു തങ്കവിഗ്രഹം മോഷ്ടിക്കപ്പെടൂകയും സാമൂതിരി പടയാളികളാല്‍  മൈസൂരിനടുത്ത് ഒരു വനത്തിലെ ഗുഹയില്‍ ഒളിപ്പിച്ചു വെച്ചിട്ടുണ്ട് എന്ന വിവരവും ലഭിക്കുന്നത്. അത് സ്വന്തമാക്കി പണയം വീട്ടി കൊട്ടാരം സ്വന്തമാക്കാം എന്ന തീരുമാനത്താല്‍ മൂന്നുപേരും തമ്മിലറിയാതെ മൈസൂരിലെ വനത്തിലേക്ക്ക് പുറപ്പെടുന്നു. പിന്നീട് അവരെ കാത്തിരിക്കുന്നത് അപ്രതീക്ഷിതമായ സംഭവങ്ങളായിരുന്നു..

സിനിമാ റിവ്യൂ ഇവിടെ വായിക്കാം