കോമഡി/ഡ്രാമ

അഡ്വക്കേട് ജെറിതോമാസ് (ഇന്ദ്രജിത്), മുരളീ മുകുന്ദൻ(ജയസൂര്യ) അർജുൻ(ആസിഫ് അലി) എന്നിവർ സുഹൃത്തുക്കളും ഇവരുടെ കുടുംബങ്ങൾ തമ്മിൽ അടുപ്പവുമാണ്. മൂന്നുപേർക്കും തങ്ങളുടെ ഭാര്യമാരെ പേടിയുമാണ് ഒരുതരത്തിൽ ഒരു ഭർത്താവുദ്യോഗം പോലെയാണ് ഇവരുടേ ജീവിതം. അഡ്വ ജെറിയാണെങ്കിൽ അടുക്കളയിൽ കയറാത്ത തന്റെ ഭാര്യ ടീന(റീമ കല്ലിങ്കൽ)ക്ക് വേണ്ടീ ഭക്ഷണം ഉണ്ടാക്കുകയും വീട്ടിലേക്കുള്ള സാധനങ്ങൾ വാങ്ങിച്ചുകൊണ്ടുവരികയുമാണ് പതിവ്. അതുകൊണ്ട് തന്നെ കോടതി കാര്യങ്ങളിൽ പോലും ഇടപെടാൻ സാധിക്കുന്നില്ല. മുരളി മുകുന്ദന്റെ ഭാര്യ അഭിരാമി (ഭാമ) കടുത്ത ദൈവവിശ്വാസിയാണ്. തങ്ങൾക്ക് കുട്ടികളില്ലാത്തതിനാൽ ക്ഷേത്രങ്ങളിൽ ഭർത്താവിനെക്കൊണ്ട് ശയനപ്രദക്ഷിണം ചെയ്യിക്കുകയും വീട്ടിൽ പൂജ നടത്തുകയുമാണ് പതിവ്. മുകുന്ദനു ഇതൊന്നും ഇഷ്ടമല്ലെങ്കിലും ഭാര്യയെപ്പേടിച്ച് ഇതൊക്കെ ചെയ്യുന്നു. തന്റെ ഭർത്താവായ അർജുനെ ഐ എ എസ് എഴുതിക്കണമെന്നാണ് ഭാര്യയും സ്വകാര്യ ഇംഗ്ലീഷ് അക്കാദമി നടത്തുന്നവരുമായ വീണ(രമ്യാ നമ്പീശൻ)യുടേ ആഗ്രഹം. അതിനു വേണ്ടി തന്റെ ഇംഗ്ലീഷ് ക്ലാസ്സിൽ ഭർത്താവിനേയും പങ്കെടുപ്പിക്കുന്നുണ്ടെങ്കിലും അർജുന് അതൊക്കെ ബോറഡിയും പീഡനവുമായി. എങ്ങിനെയെങ്കിലും ഇതിൽ നിന്നൊക്കെ രക്ഷപ്പെടണമെന്നാണ് ഈ ഭർത്താക്കന്മാരുടെ മനസ്സിലിരുപ്പ്. ഒരു ദിവസം മുകുന്ദന്റെ വീട്ടിൽ ഐശ്വര്യത്തിനു വേണ്ടീ ഒരു പൂജയൊരുക്കുന്നു അഭിരാമി. പൂജയിൽ ഈ മൂന്നുപേരുടേയും കുടുംബങ്ങൾ പങ്കെടുക്കുന്നു. പൂജ നടക്കുമ്പോൾ മൂന്നു ഭർത്താക്കന്മാരും കൂടി ഈ ഭാര്യമാരുടെ നിർബന്ധങ്ങളിൽ നിന്ന് എങ്ങിനെയെങ്കിലും കുറച്ചു ദിവസമെങ്കിലും രക്ഷപ്പെടണം എന്ന് പങ്കുവെക്കുന്നു. അവരുടേ കൂടിയാലോചനയിൽ മൂന്നുപേർക്കും ഒരാഴ്ച ഏതെങ്കിലും ടൂറിസ്റ്റ് പ്ലേസിൽ പോയി നിൽക്കാം എന്നൊരു തീരുമാനത്തിലെത്തുന്നു. അതിനു ഗോവ ആണ് നല്ല സ്ഥലം എന്ന തീരുമാനത്തിൽ അതിനുള്ള പദ്ധതികൾ അവർ ആലോചിക്കുന്നു. മൂവരും ഓരോ കാരണങ്ങൾ പറഞ്ഞ് മൂന്ന് സ്ഥലത്തേക്ക് എന്ന രീതിയിൽ പുറപ്പെടുന്നു. ഗോവയിലേക്കുള്ള ട്രെയിനിന്റെ സെക്കന്റ് ക്ലാസ്സ് എ സി റൂമിൽ യാത്ര ചെയ്യവേ സിനിമയുടേയും പരസ്യ ചിത്രങ്ങളുടേയും ക്യാമറാമാനയ സണ്ണി എബ്രഹാ(ലാൽ)മിനെ പരിചയപ്പെടുന്നു. മുഴുവൻ സമയ മദ്യപാനിയും ഓരോ നിമിഷങ്ങൾ ആഘോഷിക്കുന്നവനുമായ സണ്ണി ഈ മൂന്നു പേരുടേയും കാഴ്ചപ്പാടുകളെ മാറ്റുന്നു. മൂവരും ഗോവയിൽ അടിച്ചു പൊളിച്ച് ആഘോഷിക്കാൻ തീരുമാനിക്കുന്നു. വഴിയിൽ വെച്ച് മൂന്ന് പെൺകുട്ടികൾ ഗോവക്കുള്ള ട്രെയിനിൽ സീറ്റ് കിട്ടാതെ വിഷമിക്കുമ്പോൾ സ്ത്രീകളോടുള്ള താല്പര്യം കൊണ്ട് ഇവർ മൂവരും അവരെ തങ്ങളുടെ ബർത്തിൽ യാത്ര ചെയ്യാൻ അനുവദിക്കുന്നു. ഗോവയിൽ ഇവർ ആഘോഷിക്കുന്നു. ഒരു ദിവസം ഈ മൂന്നു പെൺകുട്ടികളേയും ഇവർ വിളിക്കുന്നു. മൂന്നു ഭർത്താക്കന്മാരും മൂന്നു പെൺകുട്ടീകളും സണ്ണിയും കൂടെ ഗോവയിൽ ആഘോഷിക്കുമ്പോൾ ഒരു ചാനലിന്റെ ടൂറിസ്റ്റ് പ്രോഗ്രാമിന്റെ ലൈവ് പ്രോഗ്രാം ടിം ഇവരെ പരിചയപ്പെടുന്നു. ഇവരുമായി ഇന്റർവ്യൂ ചെയ്യുന്നു. മദ്യവും പെൺകുട്ടികളുമായി ഗോവയിൽ ഇവർ ആഘോഷിക്കുന്നതിന്റെ ദൃശ്യങ്ങൾ ഇവരുടെ ഭാര്യമാർ യാദൃശ്ചികമായി ടിവിയിൽ കാണുന്നു. ഇവരുടെ ദാമ്പത്യ ജീവിതം തകരാറിലാകാൻ പിന്നെ അധികം സമയമുണ്ടായില്ല.  അവർ അവരുടെ ഭർത്താക്കന്മാരെ അന്വേഷിച്ച് ഗോവക്ക് യാത്രയാകുന്നു. ഗോവയിൽ ഒരു ബീച്ചിൽ വച്ച് സണ്ണിച്ചനും ചില ഗുണ്ടകളും തമ്മിൽ അടിയുണ്ടാവുന്നു. എല്ലാവരേയും പോലീസ് അറസ്റ്റ് ചെയ്യുന്നു. ഇൻസ്പെക്ടർ മലയാളിയായതിനാൽ രക്ഷപ്പെടാനായി, അവർ സ്നേഹിച്ച് ഒളിച്ചോടിയതാണെന്നും അടുത്ത ആഴ്ച അവരുടെ കല്യാണമാണെന്നും സണ്ണിച്ചൻ കള്ളം പറയുന്നു. എന്നാൽ വിശ്വാസം വരാത്ത പോലീസ് ഇൻസ്പെക്ടർ സണ്ണിച്ചനോട് കല്യാണ സർട്ടിഫിക്കറ്റ് വേണം എന്ന് പറയുന്നു. അതുമായി സണ്ണിച്ചൻ വരുന്നു, അതോടെ അവരെ വിട്ടയക്കുന്നു. എന്നാൽ കല്യാണത്തിനു അയാളും ഉണ്ടാകും എന്ന് പറയുന്നതോടെ അവർ കുഴയുന്നു. സണ്ണിച്ചനോട് വഴക്കിട്ട് അവർ തിരിച്ച് പോകാനായി റെയിൽ വേ സ്റ്റേഷനിൽ എത്തുന്നു. അവിടെ ചെല്ലുന്ന അവർ കാണുന്നത് ട്രെയിനിൽ നിന്ന് ഏതാനും ചെക്കന്മാർക്കൊപ്പം ഇറങ്ങുന്ന ഭാര്യമാരെയാണ്. അവർ ഗോവയിൽ ബോയ് ഫ്രണ്ട്സിനൊപ്പം അടിച്ചു പൊളിക്കാൻ വന്നതാണെന്ന് അവർ തെറ്റിദ്ധരിക്കുന്നു. അവർ അവരുടെ ഭാര്യമാരെ പിന്തുടരാൻ ശ്രമിക്കുന്നു. അതേ സമയം, അവർ തങ്ങളുടെ ഭർത്താക്കന്മാരെ തിരഞ്ഞു തുടങ്ങുന്നു. അവരുടെ ഭർത്താക്കന്മാർ താമസിക്കുന്ന അതേ ഹോട്ടലിൽ തന്നെ അവർ  താമസിക്കുന്നു. അവരെ തിരഞ്ഞ് ഭർത്താക്കന്മാർ ഗോവ മുഴുവൻ അലയുന്നു. പക്ഷേ അവരെ കണ്ടെത്താനാവാതെ മൂവരും തിരിച്ച് സണ്ണിച്ചന്റെ അടുത്തെത്തുന്നു. അവർ ഭർത്താക്കന്മാരെ ചതിക്കുകയാണോ എന്നറിയാൻ, ഗോവിന്ദ് അഭിരാമിയെ വിളിക്കുന്നു. താൻ അമ്പലത്തിലാണെന്ന് അഭിരാമി പറയുന്നതോടെ ഭാര്യമാർ തങ്ങളെ വഞ്ചിക്കുകയാണെന്ന് മൂവരും ഉറപ്പിക്കുന്നു.ഭാര്യമാരും ഭർത്താക്കന്മാരും പരസ്പരം കണ്ടുപിടിക്കാനുള്ള ശ്രമം തുടങ്ങുന്നു. അതിനിടയിൽ അവർ സണ്ണിച്ചന്റെ ഭാര്യ ആനിയെ ഗോവയിൽ വച്ച് കാണുന്നു. മൂന്നു പേരുടെയും ഭാര്യമാരാണ് ആനിയെ ഗോവയിലേക്ക് വിളിച്ച് വരുത്തിയത്. ഹോട്ടലിൽ വച്ച് അവർ കണ്ടുമുട്ടുന്നു. അവർ കാര്യങ്ങളെല്ലാം തുറന്നു പറയുന്നതോടെ അവരോട് ഭാര്യമാർ ക്ഷമിക്കുന്നു. 

കടലിൽ പോയി മീൻ പിടിച്ച് ജീവിതം നയിക്കുന്ന കടപ്പുറം നിവാസിയാണ് ശങ്കരൻ (സിദ്ദിഖ്) ശങ്കരനു കൂട്ടായി മകൾ താമര(നമിത പ്രമോദ്) മാത്രമേയുള്ളൂ. അമ്മയില്ലാ‍ത്തതുകൊണ്ട് മകൾ താമരയെ നിറഞ്ഞ വാത്സല്യത്തോടെയാണ് ശങ്കരൻ വളർത്തുന്നത്. പക്ഷെ കരയിൽ നടക്കുന്ന പല സംഭവങ്ങളും കേൾക്കുമ്പോൾ മകളെ ഒറ്റക്ക് കരയിൽ നിർത്തി കടലിൽ മീൻ പിടിക്കാൻ പോകുവാൻ ശങ്കരനു പേടിയായതുകൊണ്ട് മകൾ താമരയെ ചെറുപ്പത്തിലേ തന്നെ തന്റെയൊപ്പം കടലിൽ മീൻ പിടിക്കാൻ കൊണ്ടു പോകുന്നു. വളരെ ചെറുപ്പത്തിലേ തന്നെ പുറം കടലിൽ പോകാനും പേടിയില്ലാതെ മീൻ പിടുത്തം ചെയ്യാനുമൊക്കെ താമര പഠിക്കുന്നു. ഒരു ദിവസം അപ്രതീക്ഷിതമായി ശങ്കരൻ പോയിരുന്ന വള്ളം കടലിൽ വെച്ച് മറിയുകയും ചിലർ മരണപ്പെടുകയും ചെയ്യുന്നു. മരണപ്പെട്ടവരിൽ ഒരാൾ ശങ്കരനായിരുന്നു. അച്ഛനും കൂടെ നഷ്ടമായതോടെ താമര ഒറ്റക്കാവുന്നു. എങ്കിലും കടപ്പുറത്തെ മറ്റുള്ളവരുടേ സ്നേഹവും വാത്സല്യവും താമരക്ക് ലഭിച്ചതുകൊണ്ട് കടപ്പുറത്ത് അനാഥയാണെന്ന തോന്നലില്ലാതെ ജീവിക്കാൻ കഴിയുന്നു.

താമര മുതിർന്നു കൌമാരം കടന്ന പെൺകുട്ടീയായി. അച്ഛൻ ശങ്കരന്റെ സുഹൃത്ത് ഉണികണ്ടന്റെ (ചെമ്പിൽ അശോകൻ) മകൻ മോഹനൻ (നിവിൻ പോളി) താമരയുടെ സുഹൃത്താണ്. ടി ടി സിക്ക് പോകണമെന്ന് ആഗ്രഹിച്ചെങ്കിലും അച്ഛൻ കടലിൽ പോകാത്തതുകാ‍രണം മോഹനനു പഠിപ്പ് ഉപേക്ഷിക്കേണ്ടി വന്നു. അവനും ഇടക്കൊക്കെ കടലിൽ പോയിത്തുടങ്ങി. താമരയും കടലിൽ മീൻ പിടിക്കാൻ പോകുന്നത് മുടക്കിയില്ല. കടപ്പുറത്ത് പുറം കടലിൽ മീൻ പിടിക്കാൻ പോകുന്ന ഏക പെണ്ണായി മാറി താമര. ഒപ്പം കൂട്ടിനു ശാർങ്ങധരനും (ധർമ്മജൻ ബോൾഗാട്ടി) ആലപ്പി അപ്പച്ചനു(സിദ്ധാർത്ഥ്)മുണ്ട്. ആലപ്പി അപ്പച്ചൻ ഒരു നാടക നടൻ കൂടിയാണ്.

ഇതിനിടയിൽ ഒരു ദിവസം അപ്രതീക്ഷിതമായി കടലിൽ മരണവെപ്രാളത്തോടെയുള്ള ഒരാളെ താമര കാണുന്നു. താമരയും നാട്ടൂകാരും അയാളെ രക്ഷപ്പെടുത്തുന്നു. ആരുമില്ലാത്ത പ്രായമായ ഒരു വ്യക്തിയായിരുന്നു അത്. സാഹചര്യങ്ങൾ കൊണ്ട് താമര അയാളെ തന്റെ വീട്ടിൽ താമസിപ്പിക്കുന്നു. തന്റെ പേരു കുമാരപണിക്കർ ആണെന്നും കെ പി എന്നു ചുരുക്കി വിളിക്കും എന്ന് മാത്രമേ അയാൾ വിശദീകരിച്ചുള്ളു. അയാളിലൊരു ദുരൂഹത ഉള്ളത് താമരക്കും അവളൂടെ കൂട്ടുകാരായ മോഹനനും അപ്പച്ചനും ശാർങ്ങധരനും തോന്നി. അവർ അയാളുടെ രഹസ്യങ്ങൾ അറിയാൻ പല വഴികൾ നോക്കിയെങ്കിലും അതൊന്നും ഫലവത്തായില്ല.

അച്ഛൻ നഷ്ടപ്പെട്ട താമര കെ പി യെ അച്ഛനെപ്പോലെ കരുതി. കെ പി അതുപോലെത്തന്നെ താമരയെ മകളായും. പക്ഷെ അപ്രവചീനമായ പല പ്രവൃത്തികളും കെ പി യിൽ നിന്നുണ്ടായി. അത് താമരയേയും സുഹൃത്തുക്കളേയും അസ്വസ്ഥരാക്കി. ദിവസങ്ങൾ കഴിയുന്തോറും കെ പി, താമരക്ക് ഒരു ബാദ്ധ്യതയാകുന്നു. ഇതിനിടയിൽ താമരക്കൊരു വിവാഹാലോചന കെ പി കൊണ്ടുവരുന്നു. എന്നാൽ താമരയോട് ഉള്ളിൽ ഇഷ്ടമുണ്ടായിരുന്ന മോഹനനു ഇത് ഇഷ്ടപ്പെടുന്നില്ല. പക്ഷെ ചില കാ‍രണങ്ങൾ കൊണ്ട് ആ വിവാഹത്തിൽ നിന്ന് ചെറുക്കന്റെ വീട്ടുകാർ പിൻ വാങ്ങി. അതേ രാത്രിയിൽ ചെറുക്കന്റെ കടപ്പുറത്തെ വള്ളപ്പുരക്ക് ആരോ തീ കൊടുക്കുന്നു.

പിറ്റേ ദിവസം കടപ്പുറത്തെത്തിയ പോലീസ് മോഹനനേയും, അപ്പച്ചനേയും, ശാർങദരനേയും ഒപ്പം താമരയേയും അറസ്റ്റ് ചെയ്യുന്നു.

താമരയും കൂട്ടുകാരും കെ പി യുടെ ദുരൂഹതകൾ അറിയാൻ പുറപ്പെടുന്നു.

പശ്ചിമ കൊച്ചിയിൽ കായലിന്റെ തീരത്ത് സ്ഥിതി ചെയ്യുന്ന പുരാതനമായൊരു ലോഡ്ജാണ് ട്രിവാൻഡ്രം ലോഡ്ജ്. ലോഡ് ജ് ഉടമ നാട്ടിലെ സമ്പന്നനും ബിൽഡേർസ് ബിസിനസ്സുകാരനുമായ രവിശങ്കർ (അനൂപ് മേനോൻ) ആണ്. ഭാര്യ മാളവിക (ഭാവന) യുടെ അകാല മരണത്തിനു ശേഷം മകൻ അർജുനുമായി ഒറ്റക്ക് ജീവിക്കുന്നു. ഭാര്യയുടേ ആഗ്രഹപ്രകാരം അവൾക്ക് കൊടുത്ത വാക്കായിരുന്നു ഈ ലോഡ്ജ് ഇതുപോലെ നിലനിർത്തുമെന്നത്.

ലോഡ്ജിലെ നിരവധി സ്ഥിരം അന്തേവാസികളുണ്ട്. അബ്ദു (ജയസൂര്യ) അതിലൊരാളാണ്. തന്റെ ഭൂതകാലത്തെക്കുറിച്ചോ മറ്റോ അയാൾക്കൊരു ഓർമ്മയുമില്ല. അന്തർ മുഖനും പേടിത്തൊണ്ടനുമായ അബ്ദു അടങ്ങാത്ത ലൈംഗിക ദാഹമുള്ള ചെറുപ്പക്കാരനാണ്. പോൺ സ്റ്റോറീസ് അടങ്ങുന്ന കൊച്ചു പുസ്തകങ്ങളാണ് അയാളുടെ താല്പര്യം. ഒരു തരത്തിൽ ഒരു സെക്സ് മാനിയാക്. എന്നാൽ സ്ത്രീകളെ പ്രാപിക്കാനുള്ള ധൈര്യമൊന്നും അബ്ദുവിനില്ല. ലോഡ്ജിലെ മറ്റൊരു അന്തേവാസിയായ ഷിബു വെള്ളായണി (സൈജു കുറുപ്പ്) ഒരു സിനിമാവാരികയിലെ റിപ്പോർട്ടറാണ്. സിനിമയിൽ അവസരങ്ങൾ നൽകാമെന്നു പറഞ്ഞ് ജൂനിയർ ആർട്ടിസ്റ്റുകളെ വളച്ചെടുക്കുകയാണ് കക്ഷി. സിനിമാ അഭിനയമോഹം തലക്ക് പിടിച്ച് ഷിബു വെള്ളായണിയെ വിശ്വസിച്ച് കൂടെ താമസിക്കുന്നു സതീശൻ(അരുൺ) എന്ന ചെറുപ്പക്കാരൻ. പിന്നെ കുറേ മിമിക്രി കലാകാരന്മാർ. ലോഡ്ജിൽ പിയാനോ ക്ലാസ് നടത്തുന്ന വൃദ്ധനായ റിൽട്ടൻ അങ്കിൾ (ജനാർദ്ദനൻ) ലോഡ്ജിൽ മെസ്സ് നടത്തുന്ന പെഗ്ഗി ആന്റി (സുകുമാരി) ജീവിതത്തിൽ 999 സ്ത്രീകളുമായി ലൈംഗിക ബന്ധത്തിൽ ഏർപ്പെട്ടിട്ടുണ്ടെന്നും 1000 തികക്കാൻ ഒരു വനിതാപോലീസുകാരിയെ വേണമെന്നും പൊങ്ങച്ചം പറയുന്ന വക്കീൽ കോരസാർ (പി ബാലചന്ദ്രൻ) ഇങ്ങിനെ നിരവധി അന്തേവാസികളുടെ വർഷങ്ങളായുള്ള താമസവും അവരുടെ അറ്റാച്ച് മെന്റും ഈ ലോഡ്ജിലാണ്.

അതിനിടയിൽ മുംബൈയിൽ നിന്ന് ധ്വനി നമ്പ്യാർ (ഹണി റോസ്) എന്നൊരു യുവതി കൊച്ചിയിലേക്ക് വരുന്നു. ഭർത്താവുമായി വിവാഹമോചനം നേടിയതിന്റെ സ്വാതന്ത്ര്യത്തിലാണ് ചിത്രകാരിയും എഴുത്തുകാരിയുമായ ധ്വനി കൊച്ചിയിലേക്ക് വരുന്നത്. കൊച്ചിയും പരിസരപ്രദേശങ്ങളും പശ്ചാത്തലമാക്കി ഒരു നോവൽ രചികണം എന്നതാണ് ഉദ്ദേശം. നഗരത്തിൽ അവരെ സഹായിക്കുന്നത് സുഹൃത്തായ സെറീന (ദേവി അജിത്)യാണ്. ഭർത്താവുമൊത്ത് സുഖ ദാമ്പത്യം അനുഭവിക്കുകയാണ് സെറീന. അവരുടെ നിർദ്ദേശപ്രകാരം ധ്വനിക്ക് താമസിക്കാൻ ട്രിവാൻഡ്രം ലോഡ്ജ് സെറീന നിർദ്ദേശിക്കുന്നു. അതു പ്രകാരം ധ്വനി അവിടെ താമസം തുടങ്ങുന്നു. ലോഡ്ജ്ജിലെ അന്തേവാസികൾക്ക് അതൊരു അത്ഭുതവും ആഗ്രഹവുമായിത്തീരുന്നു. ധ്വനിയെ ശാരീരികമായി സമീപിക്കാൻ ഷിബു വെള്ളായണിയൊക്കെ ശ്രമിച്ചെങ്കിലും ശക്തമായ മറുപടീ കൊണ്ട് ധ്വനി അവനെ മടക്കുന്നു. അതിനിടയിലാണ് അബ്ദുവും ധ്വനിയും തമ്മിൽ പരിചയത്തിലാവുന്നത്. അബ്ദുവിന്റെ ഹോണസ്റ്റി അവൾക്ക് ഇഷ്ടമാകുന്നു. രവിശങ്കറിന്റെ ദുരൂഹമായ ജീവിത രീതി ധ്വനിയെ അൽഭുതപ്പെടൂത്തുന്നുണ്ട്. രവിശങ്കറിന്റെ ഭൂതകാലത്തെക്കുറിച്ചറിയാൻ ധ്വനി ശ്രമിക്കുന്നു.

അമ്പലക്കര പഞ്ചായത്തിലെ വലിയ തറവാട്ടുകാരായ രാജഗോപാലൻ തമ്പിയും(നെടുമുടി വേണുവും) മക്കളായ ബാബുരാജ് (ബിജുമേനോൻ) ഇളയ മകൻ അശോക് രാജും (ദിലീപും) ഇന്നൊരു വലിയൊരു ബാങ്ക് കടക്കെണിയിലാണ്. മലബാർ ബാങ്കിൽ നിന്നും വലിയ തുക കടമെടുത്ത് ബാബുരാജ് ഒരു വ്യവസായ സ്ഥാപനം തുടങ്ങിയെങ്കിലും സമരം മൂലം സ്ഥാപനം അടച്ചിടേണ്ടിവന്നു. കലാകാരനായ അച്ഛൻ തുടങ്ങി വെച്ച ഭരതകലാക്ഷേത്രം എന്ന നാടക സമിതി പുനരുജ്ജീവിപ്പിക്കുന്നതിനു വേണ്ടി മകൻ അശോക് രാജും ചേട്ടൻ ബാബുരാജും ബാങ്കിൽ നിന്ന് തറവാടിന്റെ ആധാരം വെച്ച് വലിയ തുക ലോൺ എടൂത്തിരുന്നു. തിരിച്ചടക്കാൻ സാധിക്കാത്തതുകൊണ്ട് ബാങ്ക് വീട് ജപ്തി ചെയ്യാനുള്ള നടപടിക്കൊരുങ്ങി. എന്നാൽ അതിനെ ബാബുരാജ് പ്രതിരോധിച്ചു നിന്നു. ബാങ്കിന്റെ നടപടികൾ പൂർത്തിയാക്കാൻ ബാങ്ക് ഒരു ഓംബുഡ്സ് മാനെ നിശ്ചയിക്കുന്നു. പാലക്കാട് സ്വദേശി ബാലസുബ്രഹ്മണ്യം(ഭാഗ്യരാജ്) ഇതിനായി നിയോഗിക്കപ്പെട്ട് ഗ്രാമത്തിൽ വന്നപ്പോഴാണ് അറിയുന്നത് രാജ ഗോപാലൻ തമ്പി തന്റെ സുഹൃത്തും ആരാധ്യപുരുഷനുമാണെന്ന്. രാജഗോപാലൻ തമ്പിക്ക് ലോൺ തിരിച്ചടക്കാൻ ബാലസുബ്രഹ്മണ്യം സാവകാശം നൽകുന്നു. രാജഗോപാലൻ തമ്പിയുടേ ആതിഥേയത്വം സീകരിക്കുന്നതിനിടെ തമ്പി ബാല സുബ്രഹമണ്യത്തിന്റെ പഴയൊരു വാഗ്ദാനം ഓർമ്മിപ്പിക്കുന്നു. ബാലസുബ്രഹ്മണ്യത്തിന്റെ മകളെ തന്റെ മകനെക്കൊണ്ട് വിവാഹം കഴിപ്പിക്കാം എന്ന വാഗ്ദാനം. അത് കേട്ടതും അശോക് രാജ് തന്റെ ഓർമ്മകളിലേക്ക് പോകുന്നു. സുബ്രഹ്മണ്യത്തിന്റെ മകൾ രാജലക്ഷ്മി തന്റെ കളിക്കുട്ടുകാരിയായിരുന്നെങ്കിലും വർഷങ്ങളായി അവളെ കണ്ടിട്ട് എന്നതും ഇപ്പോഴും ഒരു പ്രണയം ഉള്ളിലുള്ളതും അശോക് രാജിനെ വല്ലാതെ മോഹിപ്പിക്കുന്നു. എന്നാൽ രാജലക്ഷ്മി ഇപ്പോൾ സമ്പന്നയും അവൾ സുബ്രഹ്മണ്യത്തിന്റെ ഭാര്യ രാജമല്ലികക്കും അമ്മൂമ്മ രാജകോകിലക്കുമൊപ്പമാണ് താമസിക്കുന്നതെന്നു അറിയുന്നു. നാട്ടിലെ വലിയ ബിസിനസ്സ് ഗ്രൂപ്പായ രാജാസ്-ന്റെ ഉടമസ്ഥരിലൊരാളാണ് രാജലക്ഷ്മി എന്നതും അവളെ വിവാഹം കഴിക്കുക വഴി തന്റെ സാമ്പത്തിക ബാദ്ധ്യത അവസാനിക്കുമെന്നും മനസ്സിലാക്കിയ അശോക് രാജ് അവളെ പരിചയപ്പെടാനും പ്രണയിക്കാനുമുള്ള ശ്രമങ്ങൾ തുടങ്ങുന്നു.

എന്നാൽ ഭർത്താവ് ബാ‍ലസുബ്രഹ്മണ്യവുമായി തെറ്റിപ്പിരിഞ്ഞ് അമ്മയോടൊപ്പം താമസിക്കുന്ന രാജമല്ലിക അഹങ്കാരിയും തന്റേടിയുമായിരുന്നു. തന്റെ തീരുമാനങ്ങളെ മാനിക്കാതിരുന്ന തന്റെ ലീഗൽ അഡ്വൈസർ കെ വി പണിക്കരെ (ബാബുരാജ്) അവർ ഡിസ് മിസ് ചെയ്യുന്നു. അതിൽ പക തോന്നിയ അഡ്വ. പണിക്കർ രാജമല്ലികക്കെതിരെ പ്രതികാര നടപടികൾ ചെയ്യാനൊരുങ്ങുന്നു. രാജാസ് റിസോർട്ടിൽ താമസമാക്കിയ അശോക് രാജിന്റെ ഉദ്യമം ബാലസുബ്രഹ്മണ്യം മനസ്സിലാക്കുന്നു. തന്റെ മകളെ അശോക് രാജ് വിവാഹം കഴിക്കുന്നത് ഇഷ്ടമുള്ള ബാലസുബ്രഹ്മണ്യം അശോക് രാജിനെ എല്ലാ കാര്യത്തിലും സപ്പോർട്ട് ചെയ്യുന്നു. രാജാസ് കമ്പനിയിൽ ഒരു ലീഗൽ അഡ്വൈസറുടേ ഒഴിവുണ്ടെന്നറിഞ്ഞ നിയമ പഠനം പൂർത്തിയാക്കിയിട്ടൂള്ള അശോക് രാജ് ഇന്റർവ്യൂവിനു പങ്കെടുക്കുകയും അവിടെ വക്കീലായി ജോലി ചെയ്യുകയും ചെയ്യുന്നു.

എന്നാൽ അപ്രതീക്ഷിത സാഹചര്യങ്ങളിൽ അമ്മൂമ്മ രാജ കോകില(ഷീല)യുമായും കൊച്ചുമകൾ രാജലക്ഷ്മി(സനുഷ)യുമായും അശോക് രാജിനെ എതിരിടേണ്ടീവന്നു. ഇത് അശോക് രാജിനെ അവരുടെ ശത്രുക്കളാക്കി. രാജമല്ലിക അശോക് രാജിനെ അവിടേ നിന്നും ഡിസ് മിസ് ചെയ്തു. എങ്കിലും അശോക് രാജ് പിൻ വാങ്ങിയില്ല. അയാൾ അവർക്ക് കൂടുതൽ കൂടുതൽ ശല്യങ്ങളുണ്ടാക്കി. രാജമല്ലികയുടെ അഹങ്കാരം ശമിപ്പിക്കാനും രാജലക്ഷ്മിയെ പ്രണയിക്കാനും ബുദ്ധിമാനായ അശോക് രാജ് എല്ലാ അടവുകളും പ്രയോഗിക്കുന്നു.  അങ്ങിനെ അശോക് രാജിന്റേയും ബാലസുബ്രഹ്മണ്യത്തിന്റേയും കൌശലപ്രയോഗത്താൽ അശോക് രാജിനു രാജലക്ഷ്മിയെ വിവാഹം കഴിക്കാൻ സാധിക്കുന്നു. എന്നാൽ വിവാഹ മണ്ഠപത്തിൽ സംഭവിച്ചത് പ്രതീക്ഷിക്കാത്ത കാര്യങ്ങളായിരുന്നു. അവിടെ നിന്ന് കാര്യങ്ങൾ പലതും മാറിമറയുകയാണ്.

വീട്ടിലെ പ്രാരാബ്ധങ്ങളിൽ നിന്നും രക്ഷപ്പെടാൻ ഗ്രൂപ്പ് വിസയിൽ സ്പെയിനിലെത്തുന്ന മിമിക്രി ആർട്ടിസ്റ്റ് ആയ ചാർളിയെ (ദിലീപ്)  ഒരു ഇന്ത്യൻ റെസ്റ്റോറന്റെ ഉടമ മജീദ് (ഗോപാലകൃഷ്ണൻ) താൽക്കാലികമായി സഹായിക്കുന്നു. മജീദിനു വേണ്ടി റെസ്റ്റോറന്റിന്റെ പുറത്ത് വിവിധതരം ദോശകൾ ഉണ്ടാക്കുന്ന ഓപ്പൻ റെസ്റ്റോറന്റ് ആയി ചാർളി ജോലി തുടങ്ങുന്നു. പതിനാറു വർഷങ്ങൾക്ക് മുൻപ് ഇന്ത്യയിലെ സ്പാനിഷ് അംബാസഡറായിരുന്ന ക്ലെമന്റ് (ഫെർണാണ്ടസ്) ഏക മകൾ കമീല (ഡാനിയേല സാക്കേരി)യുമായി സ്വദേശത്തു വിശ്രമ ജീവിതം നയിക്കുകയാണ്. യാദൃശ്ചികമായി കമീല തങ്ങളുടെ മാനേജർ മേനോനുമായി (ബിജു മേനോൻ) യാത്രാമദ്ധ്യേ ഈ റെസ്റ്റോറന്റും ദോശയും കാണുകയും അത് കഴിക്കാൻ ആഗ്രഹം പ്രകടിപ്പിക്കുകയും ചെയ്യുന്നു. ചാർളിയുടേ സ്പാനിഷ് മസാല കഴിച്ച കമീല, എന്നും ബ്രേക്ക് ഫാസ്റ്റിനു സ്പാനിഷ് മസാല വേണമെന്നു നിർബന്ധം പിടിക്കുന്നു. അതിനുവേണ്ടി മേനോൻ ചാർളിയെ കൊട്ടാരത്തിലെ കുക്ക് ആയി നിയമിക്കുന്നു. അപോഴാണ് ചാർളി അറിയുന്നത് കമീല ഒരു കാഴ്ച മങ്ങിയ (അന്ധയായ) ഒരു പെൺ കുട്ടിയാണെന്ന്. മറ്റൊരു കുക്ക് ആയ പപ്പനിൽ(നെൽസൺ) നിന്നും കൊട്ടാരത്തിലേയുംകമീലയുടേയും കഥകൾ അറിയുന്നത്. കമീലയെ വളർത്തിയ ആയമ്മ (വിനയപ്രസാദ്)യുടേ മകൻ രാഹുലു(കുഞ്ചാക്കോ ബോബൻ)മായി കമീല പ്രണയത്തിലായിരുന്നു. ഈ ബന്ധത്തെ എതിർത്ത കാമിലയുടെ പപ്പ ക്ലമന്റ് അവരെ അകറ്റാൻ വേണ്ടി രാഹുലിനെ തന്റെ പോർച്ചുഗലിലെ എസ്റ്റേറ്റ് നോക്കാൻ പറഞ്ഞയക്കുന്നു. അവിടെ വെച്ച് ഒരു ആക്സിഡന്റിൽ രാഹുൽ മരണപ്പെട്ടു. അതിന്റെ ഷോക്കിൽ പപ്പയോട് ദ്വേഷ്യപ്പെട്ട കാമില കൊട്ടാരത്തിലെ സ്റ്റെയർ കേസിൽ നിന്നും താഴെ തലയടിച്ച് വീണു രോഗബാധിതയാകൂന്നു. ആ അപകടത്തിൽ കമീലക്ക് അന്ധത സംഭവിക്കുകയും രാഹുലിന്റെ വിരഹത്തിൽ വിഷാദത്തിലാകുകയും ചെയ്യുന്നു. ആ അവസരത്തിലാണ് ചാർളി അവിടെ കുക്ക് ആയി ജീലിക്കെത്തുന്നത്. പിന്നീട് ചാർളിയുടെ സാന്നിദ്ധ്യം കമീലയെ സന്തോഷവതിയാക്കുന്നു. കമീലക്കു വേണ്ടി ചാർളി മിമിക്രി അവതരിപ്പിക്കുകയും മരിച്ചു പോയ രാഹുലിന്റെ ശബ്ദത്തിൽ സംസാരിക്കുകയും ചെയ്യുന്നു. കമീല വീണ്ടും സന്തോഷവതിയായി ജീവിക്കുന്നു. കമീലയുടെ സന്തോഷത്തിനു കാരണം ചാർളിയാണെന്നു മനസ്സിലാക്കിയ ക്ലമന്റ് കമീലയെ ചാർളിയെക്കൊണ്ട് വിവാഹം കഴിപ്പിക്കാൻ ആഗ്രഹിക്കുന്നു. ആ വിവരം നാട്ടിൽ അമ്മയോട് പറയാനും അമ്മയെ സ്പെയിനിലേക്ക് കൊണ്ടുവരാനും വേണ്ടി ചാർളി നാട്ടിലേക്ക് പോകുന്നു. കണ്ണു ചികിത്സയിലായിരുന്ന കമീലക്ക് കാഴ്ച തിരിച്ച് കിട്ടുന്ന ഒരു സന്തോഷ വേളയിലാണ് കൊട്ടാരത്തിൽ വലിയൊരു ദുരന്തം സംഭവിക്കുന്നത്. ആ ദുരന്തത്തിന്റെ പരിസമാപ്തിയിൽ സാക്ഷ്യം വഹിക്കാൻ എത്തുന്ന മറ്റൊരു അതിഥിയെക്കണ്ട് എല്ലാവരും നടുങ്ങി.

പപ്പു എന്ന പത്മനാഭനും (ജയറാം) ഇടിക്കുള(ബിജു മേനോന്‍)യും മുന്ന(മനോജ് കെ ജയന്‍)യും  റെക്സും(കുഞ്ചാക്കോ ബോബന്‍) ആത്മാര്‍ത്ഥ സുഹൃത്തുക്കളാണ്. 12 വര്‍ഷങ്ങള്‍ക്ക് മുന്‍പ് നഗരത്തിലെ മഹാത്മാ കോളേജിലെ ബിരുദ വിദ്യാര്‍ത്ഥികളുമായിരുന്നു. ആ പഠനകാലത്ത് സഹ വിദ്യാര്‍ത്ഥിയായിരുന്ന ലക്ഷ്മി(മീരാ നന്ദന്‍)യുടെ കൊലപാതകവുമായി ബന്ധപ്പെട്ട് ജയിലിലായിരുന്ന പപ്പു ജയില്‍ മോചിതനായി തിരികെയെത്തി. അപ്പോഴേക്കും ഇടിക്കുളയും മുന്നയും വിവാഹിതനായിക്കഴിഞ്ഞിരുന്നു. ശാരിരിക വൈകല്യമുള്ള സഹോദരിക്കു വേണ്ടി റെക്സ് അവിവാഹിതനായി തുടര്‍ന്നു. തിരിച്ചുവരവിന്റെ ഉദ്ദേശ്യം പപ്പു തന്റെ കൂട്ടുകാരോട് അവതരിപ്പിച്ചു. “ മുന്‍പ് പഠിച്ച അതേ കോളേജില്‍ വിദ്യാര്‍ത്ഥികളായി നമ്മള്‍ നാലു പേരും  വീണ്ടും  പഠിക്കാന്‍ പോകുന്നു”. പപ്പുവിന്റെ നിര്‍ദ്ദേശം മറ്റു മൂന്നുപേരും ആദ്യം നിരസിച്ചെങ്കിലും ആത്മാര്‍ത്ഥതയുള്ള, മുന്‍പ് കൊലപാതകത്തില്‍ മറ്റുള്ളവര്‍ക്ക് വേണ്ടി ത്യാഗം ചെയ്ത പപ്പുവിന്റെ നിര്‍ദ്ദേശം അവര്‍ അനുസരിച്ചു. നാലുപേരും വിദ്യാര്‍ത്ഥികളായി തിരികെ കോളേജിലെത്തി. പഴയ കാലഘട്ടത്തിലേയും പുതിയ കാലഘട്ടത്തിലേയും കോളേജ് വിദ്യാര്‍ത്ഥികളുടെ കാഴ്ചപ്പാടുകളും പെരുമാറ്റവും ചിത്രത്തിന്റെ നര്‍മ്മ മുഹൂര്‍ത്തങ്ങളാണ്.

കോളേജിലെ വിദ്യാര്‍ത്ഥിനി ജെനി (അനന്യ)യും കൂട്ടുകാരും ഈ നാലുപേരോടും കൂട്ടുകൂടുകയും ജെനിക്ക് പപ്പുവിനോട് സൌഹൃദത്തിനപ്പുറമുള്ള ഒരു ബന്ധമുണ്ടെന്ന് കോളേജില്‍ സംസാരമുണ്ടാവുകയും ചെയ്യുന്നു.  പണ്ട് പപ്പുവിന്റെ സഹപാഠിയായിരുന്നു ഇന്ദു (പത്മപ്രിയ) ആ കോളേജില്‍ അദ്ധ്യാപികയാണിപ്പോള്‍. പണ്ട് പപ്പുവിനു ഇന്ദുവിനോട് ഒരു മൌനപ്രണയം ഉണ്ടായിരുന്നു.  പക്ഷെ ആ കൊലപാതകത്തിനുശേഷം ഇന്ദു പപ്പുവിനോട് അകല്‍ച്ച പാലിച്ചു.

എന്നാല്‍ നീണ്ട 12 വര്‍ഷങ്ങള്‍ക്ക് ശേഷം അതേ കോളേജില്‍ പഠനത്തിനു വന്ന പപ്പു എന്ന പത്മനാഭനു ചില ലക്ഷ്യങ്ങള്‍ ഉണ്ടായിരുന്നു. അന്ന് ആ കലോത്സവത്തില്‍ ലക്ഷ്മിയെ കൊന്നത് ആര്‍ എന്നറിയാനുള്ള ലക്ഷ്യം. 12 വര്‍ഷങ്ങള്‍ക്ക് ശേഷം ആ കൊലപാതകി വീണ്ടും അതേ കോളേജില്‍ ഉണ്ടെന്നുള്ള തിരിച്ചറിവില്‍ നിന്നായിരുന്നു പപ്പുവിന്റെ ആ തീരുമാനം..

കോളേജില്‍ വീണ്ടും കലോല്‍ത്സവം വന്നെത്തി. 12 വര്‍ഷങ്ങള്‍ക്ക് മുന്‍പ് നടന്ന കൊലപാതകശ്രമം വീണ്ടും സംഭവിച്ചു. അന്ന് ലക്ഷ്മിയായിരുന്നെങ്കില്‍ ഇന്ന് ആ സ്ഥാനത്ത് ജെനിയായിരുന്നു. കോളേജ് മുഴുവന്‍ വീണ്ടും ഈ നാലുപേരെ തന്നെ സംശയിച്ചു. പക്ഷെ നിരപരാധിയായ പപ്പുവിനെ തിരിച്ചറിയുന്ന ഉണ്ണിത്താന്‍ സാറടക്കമുള്ള പലരും ആ കോളേജില്‍ ഉണ്ടായിരുന്നു. അവരെല്ലാവരും പപ്പുവിനോടൊപ്പം ചേര്‍ന്ന് യഥാര്‍ത്ഥ കൊലപാതകിയെത്തേടിയുള്ള തന്ത്രപരമായ നീക്കങ്ങള്‍ തുടങ്ങി.