"താമരശ്ശേരി തറവാട്ടിൽ രവിയാണ് മൂത്തസന്താനം. വത്സലയും അപ്പുവും രവിയുടെ പരിചരണത്തിലാണ് വളരുന്നത്. വത്സലയുടെ വിവാഹദിവസം തന്നെ വരനായ വിജയനെ ഒരു കൊലക്കുറ്റം ചാർത്തി പോലീസ് അറെസ്റ്റു ചെയ്തുകൊണ്ടു പോയി. അപ്പുവിനേയും വത്സലയേയും ബന്ധുവായ ശങ്കരക്കുറുപ്പിനെ ഏൽ‌പ്പിച്ച് രവി മദ്രാസിൽ ജോലി അന്വേഷിച്ച് പോയി. താമരശ്ശേരിക്കാർ പണ്ട് സഹായിച്ചതുകൊണ്ട് മാത്രം ഡോക്ടറായിത്തീർന്ന ഈശ്വരപിള്ളയുടെ അടുത്ത് രവി ചെന്നെങ്കിലും അയാൾ രവിയെ നിഷ്കരുണം ആട്ടിപ്പായിച്ചു. എന്നാൽ ഈശ്വരപിള്ളയുടെ മകൾ കാഞ്ചന രവിയ്ക്ക് ഒരു ബാ‍ങ്കിൽ ഉദ്യോഗം തരപ്പെടുത്തിക്കൊടുത്തു. മോഹൻ എന്നൊരാളുടെ പിടിയിലാണ് ഡോ.ഈശ്വരപിള്ള. വാഹിനി എന്നൊരു സമർഥയെ അയാൾ ഈശ്വരപിള്ളയ്ക്ക് പരിചയപ്പെടുത്തിക്കൊടുത്തു; ഈശ്വരപിള്ള വാഹിനിയുടെ സ്വാധീനത്തിലുമാ‍യി. കാഞ്ചനയ്ക്ക് രവിയോട് അടുപ്പമുണ്ടന്നറിഞ്ഞ് അത് തകർക്കുകയായിരുന്നു അവളൂടെ പ്ലാ‍ൻ. കാഞ്ചനയെ മോഹനോട് അടുപ്പിച്ച് അയാളും വാഹിനിയും സ്വത്തു തട്ടാനാണ് പ്ലാനിട്ടത്. വാഹിനി ഒരു കള്ളക്കത്ത് അയച്ച് അപ്പുവിനേയും വത്സലയേയും ശങ്കരക്കുറുപ്പിനേയും മദ്രാസിലേക്ക് വരുത്തി. വത്സലയെ ഒരു മുറിയിൽ പൂട്ടിയിട്ട് ഈശ്വരപിള്ളയ്ക്ക് കാഴ്ച്ച വച്ചു. വത്സല വഴങ്ങിയില്ല. ഒരു മുഖം മൂടി അവളെ രക്ഷിച്ചു. ഇതിനിടെ രവിയുടെ ജോലിയും മോഹനും വാഹിനിയും കൂടി നഷ്ടപ്പെടുത്തി. നിരാശനായ രവിക്ക് കാഞ്ചന മോഹനെയാണ് സ്നേഹിക്കുന്നെ തെന്നും തോന്നി, അയാൾ ആത്മഹത്യക്കൊരുങ്ങി. ഒരു മുഖം മൂടി രവിയെ രക്ഷപ്പെടുത്തി. ഈശ്വരപിള്ളയെ വധിച്ച് പണം തട്ടാനായി മോഹനും വാഹിനിയും ഉദ്യമിച്ചു. അവിടെയും മുഖംമൂടി ഈശ്വരപിള്ളയെ രക്ഷപെടുത്തി. വേലക്കാരായ മുഴുവൻ-സമ്മതം ജോഡികൾ പല സത്യങ്ങളും ഡോക്റ്ററെ അറിയിച്ചു. കാഞ്ചനയ്ക്കും പലതും ബോദ്ധ്യം വന്നു. ഒരു ഏറ്റുമുട്ടലിൽ മുഖം മൂടി മോഹനേയും വാഹിനിയേയും പിടി കൂടി. മുഖം മൂടി ജയിൽ ചാടിയ വിജയൻ ആയിരുന്നു. വാസ്തവത്തിൽ വിജയന്റെ മേലുള്ള കൊലക്കുറ്റം മോഹന്റെ മേലായിരുന്നു ചാർത്തേണ്ടിയിരുന്നത്. തെറ്റിദ്ധാരണകൾ മാറി കാഞ്ചനയെ രവിയ്ക്കു കല്യാണം കഴിച്ചു കൊടുത്ത് ഈശ്വരപിള്ള. വത്സല വിജയനോടും ചേർന്നു."
ഈ സിനിമാ അഞ്ചോ ആറോ ദിവസം മാ‍ത്രമേ ഓടിയുള്ളു. പറഞ്ഞാൽ തീരാത്ത, അവിശ്വസനീയമായ കഥ പ്രേക്ഷകർക്ക് ദഹിച്ചില്ല. പ്രശസ്ത നാടക നടീനടന്മാരായിരുന്നു അഭിനയിച്ചത്. പാട്ടുകളും നിലവാരം താണതായത് പരാജയത്തിനു മറ്റൊരു കാരണം. പിന്നീട് പല പ്രശസ്ത സിനിമകളും നിർമ്മിച്ച ആർ. എസ്. പ്രഭു ഒരു ചെറിയ വേഷം ചെയ്തുകൊണ്ട് സിനിമാരംഗത്തെത്തി.
മണിനഗരത്തിലെ രാജാവിനെ കുടിലനായ റീജന്റ് ചന്ദ്രവർമ്മൻ രാജഗുരുവെന്ന സന്യാസിയുടേയും പ്രതാപൻ എന്ന സൈനികോദ്യോഗസ്ഥന്റേയും സഹായത്തോടെ സ്ഥാനഭ്രഷ്ഠനാക്കി. റീജന്റിന്റെ അസഹ്യമായ ദുർഭരണത്തിനെതിരേ നിന്ന സേനാപതി രാജേന്ദ്രനെ റീജന്റ് ജയിലിലാക്കി. ജയിൽ ചാടിയ രാജേന്ദ്രനെ പോലീസുകാർ വെടിവച്ച് കടലിൽ വീഴ്ത്തി. മരിച്ചുവെന്നു കരുതിയ രാജേന്ദ്രൻ ഭൂഗാർഭത്തിൽ ഒരു ഒളിത്താവളമുണ്ടാക്കി “കേരളകേസരി’ എന്ന പേരിൽ ഒരു ജനകീയ നേതാവായി പ്രത്യക്ഷപ്പെട്ടു. അയ്യപ്പസന്നിധിയിൽ ആയൂധപരിശീലനവും ഭജനയുമൊക്കെയായി കേസരി റീജന്റിനെതിരായി ഒരു ജനവിഭാഗം സജ്ജീകരിച്ചു. റീജന്റിന്റെ പീഡനത്താൽ മൃതിയടഞ്ഞ ഒരു സാധുവൃദ്ധന്റെ മകൾ ഭാമിനി കേസരിയ്ക്ക് ശക്തിയായി കൂടെയുണ്ട്. നാട്ടിലെ കരിഞ്ചന്തക്കാരനായ ഭാസ്കരവർമ്മയുടെ മകൾ ഹേമയുമായി രാജേന്ദ്രനു പണ്ടേ അടുപ്പമുണ്ട്.
കേസരിയും ഹേമയുമായുള്ള രഹസ്യസമാഗമങ്ങൾ അറിഞ്ഞ ചന്ദ്രവർമ്മൻ ഭാസ്കരവർമ്മനെ സ്വാധീനിച്ച് ഹേമയെ കൈവശപ്പെടുത്താനായി ശ്രമം. കേസരി ഹേമയെ രക്ഷപ്പെടുത്തി. നിരാശയായ ഭാമിനി പാടുന്ന ശോകഗാനം കേട്ട് അവളെ സമാശ്വസിപ്പിക്കുന്ന കേസരിയെ കണ്ട് ഹേമയ്ക്ക് തെറ്റിദ്ധാരണയായി. ഹേമയുടെ വീടിനു ആരോ തീ വച്ചു. അച്ഛൻ മരിച്ചെന്നു കേട്ട ഹേമ ഒളിവിൽ നിന്നും പുറത്തുവന്നു. റീജന്റിന്റെ ആൾക്കാർ അവളെ പിടി കൂടി.രഹസ്യങ്ങൾ വെളിപ്പെടുത്താൻ തയാറാകാത്ത അവളെ സ്വതന്ത്രയാക്കി, കേസരിയുടെ സങ്കേതത്തിലേക്ക് പോയ അവളെ പിന്തുടർന്ന് എത്തിയ റീജന്റിന്റെ ആൾക്കാ‍രും കേസരിയുമായി യുദ്ധം നടന്നു. ഭാ‍മിനിയുടെ വാളേറ്റു പ്രതാപൻ നിലം പതിച്ചു. അപ്പോൾ അയാൾ കേസരിയുടെ നേർക്ക് നിറയൊഴിയിച്ചു. വെടിയുണ്ട തടുക്കാൻ ഹേമയെത്തി, അവൾ മരിച്ചു. നിമിഷനേരത്തേക്ക് അസ്തശക്തിയായിത്തീർന്ന കേസരിയെ പ്രതാപന്റെ ആൾക്കാർ പിടിച്ചു കെട്ടി.കേസരിയുടെ കേസു വിസ്തരിക്കുമ്പോൾ പണ്ട് സ്ഥാനഭ്രഷ്ഠനാക്കപ്പെട്ട രാജാവ് പെട്ടെന്ന് പ്രത്യക്ഷപ്പെട്ട് സത്യങ്ങളെല്ലാം തുറന്നു പറയുന്നു. രാജഗുരുവും റീജന്റും ശിക്ഷിക്കപ്പെടുന്നു, കേസരിയും ഭാമിനിയും കല്യാണം കഴിച്ച് എല്ലാം ശൂഭമായി കലാശിയ്ക്കുന്നു.
"തമിഴ് രീതിയിലെടുത്ത ഈ സിനിമ വൻ പരാജയമാണ് ഏറ്റുവാങ്ങിയത്. നാടകരംഗത്ത് തിളങ്ങി നിന്നിരുന്ന വൈക്കം വാസുദേവൻ നായരും ഭാര്യ തങ്കവും പ്രധാനഭാഗങ്ങൾ ചെയ്തുവെങ്കിലും പ്രേക്ഷകർ അവരെ കയ്യൊഴിഞ്ഞു. തങ്കം വാസുദേവൻ നായരെ ( ഇവർ ആറന്മുള പൊന്നമ്മയുടെ അനുജത്തിയാ‍ണ്) നായികയായി അവതരിപ്പിക്കുക എന്നതും സിനിമാ നിർമ്മിതിയുടെ ഒരു ലക്ഷ്യമായിരുന്നു. കിടപ്പാടം വിറ്റ് കടം തീർക്കേണ്ടി വന്നു ഈ ദമ്പതികൾക്ക്.
ആദ്യമായി ഗസൽ അവതരിപ്പിക്കപ്പെട്ട സിനിമ, ആദ്യമായി അയ്യപ്പഭക്തിഗാനം ഉൾപ്പെടുത്തിയ സിനിമ എന്നതൊക്കെ പുതുമയായിരുന്നു.
സിനിക്ക് തന്റെ നിരൂപണത്തിൽ ഇങ്ങനെ എഴുതി “..........കേരളകേസരിയെ നിയമത്തിന്റെ കയ്യിൽ നിന്നും കേസരിയേക്കാൾ തുലോം നിരപരാധിയായ പ്രേക്ഷകനെ 17260 അടി നീളമുള്ള ഈ ബോറിൽ നിന്നും രക്ഷിക്കുന്നു..........1951 ആയിട്ടും കേരളത്തിൽ നിന്നും ഇത്തരം ഒരു പുതിയ മലയാളപടം പുറപ്പെട്ടുവല്ലൊ എന്നോർത്തു ലജ്ജിയ്ക്കുകയും കേരളത്തിലെ ചലച്ചിത്രവ്യവസായം ആർജ്ജിക്കുന്ന ഈ ‘അദ്ഭുത’ പുരോഗതിയോർത്തു കുണ്ഠിതപ്പെടുകയും ചെയ്തു......എന്തിനാ അമ്മാവാ എന്നെ തല്ലുന്നത്; ഞാൻ നന്നാവില്ല എന്ന പഴയ കഥയാണ് ‘കേരളകേസരി‘ കണ്ടു മനം മടുത്ത എനിക്ക് ഈ നിരൂപണമെഴുതാൻ ഇരുന്നപ്പോൾ തോന്നിയത്”."
