സോളമൻ ജോസഫ്, സബ് ഇൻസ്പെക്ടർ. ജോലിക്ക് കയറിയിട്ട് അധിക കാലമായില്ലെങ്കിലും കൈക്കൂലിക്ക് പേരു കേട്ടയാൾ. ആരേയും കൂസലില്ലാത്ത പ്രകൃതം. സോളമൻ രാജാക്കാട് സ്റ്റേഷനിൽ ഇരിക്കുന്ന സമയം അവിടുത്തെ ഒരു വനം കൊള്ളക്കാരനായ വാവഛനുമായി സൌഹൃദത്തിലാവുന്നു. അയാൾക്ക് വേണ്ടി പലതു കണ്ണടക്കുന്ന സോളമൻ പക്ഷേ വാവച്ചന്റെ പ്രധാന എതിരാളി ഉമ്മച്ചന്റെ അനിയൻ ഡെന്നിസുമായി കോർക്കുന്നു. ഉമ്മച്ചന്റെ രാഷ്ട്രീയത്തിലുള്ള സ്വാധീനം വച്ച് സോളമനെ വിരട്ടാൻ ഡെന്നീസ് ശ്രമിക്കുന്നു. ഒരിക്കൽ അവർ തമ്മിലുരസിയപ്പോൾ, പരസ്യമായി മാപ്പ് പറയാൻ ഡെന്നീസ് സോളമനോട് ആവശ്യപ്പെടുന്നു. അയാൾ ഡെന്നീസിനേയും കൂട്ടരെയും ലോക്കപ്പിലടയ്ക്കുന്നു. ഉമ്മച്ചൻ തന്റെ സ്വാധീനം ഉപയോഗിച്ചു് അവരെ പുറത്തിറക്കുന്നു. അടുത്ത ദിവസം തന്നെ, ഡെന്നീസും കൂട്ടരും നാട്ടിലെ ഒരു വേശ്യയുടെ ഒപ്പമുണ്ടെന്നറിയുന്ന സോളമൻ, അവരെ അറസ്റ്റ് ചെയ്യുന്നു. അടുത്ത തിരഞ്ഞെടുപ്പിൽ മത്സരിക്കാൻ തയ്യാറായി നിൽകുന്ന ഉമ്മച്ചൻ, അവരെ രക്ഷിക്കാനായി സോളമനെ സമീപിക്കുന്നു. എന്നാൽ താൻ ആവശ്യപ്പെടുന്ന പണം നൽകാതെ ഡെന്നീസിനേയും കൂട്ടരെയും വിട്ടയക്കില്ല എന്ന് സോളമൻ പറയുന്നു. ഉമ്മച്ചൻ അയാൾക്ക് പണം വാഗ്ദ്ദാനം ചെയ്യുന്നു. എന്നാൽ പണം കൊടുക്കുന്ന സമയത്ത് സോളമനെ ആന്റി കറപ്ഷൻ ഡിപ്പാർട്ട്മെന്റിനെ കൊണ്ട് അറസ്റ്റ് ചെയ്യിക്കുവാൻ ഉമ്മച്ചൻ ശ്രമിക്കുന്നുവെങ്കിലും, സോളമൻ സമർത്ഥമായി രക്ഷപ്പെടുന്നു. പോലീസ് ഓഫീസർക്ക് കൈക്കൂലി നൽകി സ്വാധീനിക്കാൻ ശ്രമിച്ചു എന്ന പേരിൽ ഉമ്മച്ചനെ അറസ്റ്റ് ചെയ്യുന്നു. സോളമനെ കാണുവാൻ അവന്റെ രക്ഷകർത്താവ് കൂടിയായ ഫാദർ പാലത്തിങ്കൽ എത്തുന്നു. ഏതോ ഒരു അനാഥ കുട്ടിയുടെ ചികിസ്തക്കായി പണം ആവശ്യപ്പെട്ടാണു അദ്ദേഹം വരുന്നത്. ആദ്യം മടിക്കുന്നുവെങ്കിലും സോളമൻ ഫാദറിനു പണം നൽകുന്നു. അതിനിടയിൽ ജാമ്യത്തിലിറങ്ങുന്ന ഡെനീസും കൂട്ടരും സോളമനെ ആക്രമിക്കുന്നു. ടെന്നീസിനെ കീഴടക്കി സ്റ്റേഷനിൽ കൊണ്ടുവരുന്ന സോളമൻ, മറ്റു പോലീസുകാർക്കൊപ്പം അയാളെ മർദ്ദിക്കുന്നു. അതിനിടയിൽ ഡെന്നീസ് കൊല്ലപ്പെടുന്നു. സ്റ്റേഷനിലുണ്ടായിരുന്ന ഹെഡ് കോണ്‍സ്റ്റബിളിന്റെ സഹായത്തോടെ സോളമൻ ഡെന്നീസിന്റെ ശവം മറവ് ചെയ്യുന്നു. ഡെന്നീസിനെ കാണാതാകുന്നതോടെ സംശയം സോളമന് നേരെ തിരിയുന്നു. തെളിവുകൾ ഒന്നുമില്ലാതിരുന്നതിനാൽ അയാൾക്കെതിരെയുള്ള നടപടികൾ ഒരു പണിഷ്മെന്റ് ട്രാൻസ്ഫരിൽ ഒതുങ്ങി.

സോളമൻ പുതിയതായി ചെന്നെത്തുന്നത് കേരളത്തിന്റെ വടക്കുള്ള ബദിയടുക്കയിലാണ്. അവിടം ഭരിച്ചിരുന്നത് അബൂബക്കർ ഹാജിയും മകനും കൂടിയാണ്. നാട്ടിലെ പ്രമാണിയായിരുന്ന വലിയ വീട്ടിൽ ബാപ്പൂട്ടിയെ ചതിച്ച് സ്വത്തും ബിസിനസ്സും സ്വന്തമാക്കിയതായിരുന്നു അബൂബക്കർ ഹാജി. ബപ്പൂടിയുടെ ഭാര്യയും മകൾ നാദിയയും അവരുടെ വീട്ടിൽ നിന്ന് തന്നെ കുടിയിറക്കപ്പെടും എന്ന അവസ്ഥയിലായിരുന്നു. അബൂബക്കർ ഹാജി അവരെ സഹായിക്കാൻ വിസമ്മതിക്കുന്നു. സോളമൻ വാടകയ്ക്ക് താമസിച്ചിരുന്നത് നാദിയയുടെ വീടിനു സമീപമായിരുന്നു. അതിനിടയിൽ നാദിയയെ അപമാനിക്കാൻ ശ്രമിച്ച ഹാജിയുടെ മകനെതിരെ അവൾ സോളമന് പരാതി നൽകുന്നു. ഹാജിയുടെ കയ്യിൽ നിന്നും പണം തട്ടാനുള്ള അവസരമായി കണ്ട്, സോളമൻ ഹാജിയുടെ മകനെ സഹായിക്കാം എന്നേൽക്കുന്നു. സമർത്ഥമായി അവർ ഒരുക്കിയ കെണിയിൽ നാദിയ വീഴുന്നു. എന്നാൽ താൻ പ്രതീക്ഷിച്ചതിലും വലിയ കുരുക്കാണ്‌ ഹാജിയുടെ മകൻ നാദിയക്കായി ഒരുക്കിയത് എന്ന് കാണുമ്പോൾ സോളമൻ അവളെ രക്ഷപ്പെടുത്തുന്നു. മറ്റൊരാവസരത്തിൽ നാദിയയെ മാനഭംഗപ്പെടുത്താൻ ശ്രമിക്കുന്ന ഹാജിയുടെ മകനെ സോളമൻ തടയുന്നു അതോടെ അവർ ശത്രുതയിലാവുന്നു. അതേ സമയത്താണു ഡെന്നീസിന്റെ ശവം മറവ് ചെയ്യുവാൻ സോളമനെ സഹായിച്ച കോണ്‍സ്റ്റബിൾ അയാളെ കാണാൻ എത്തുന്നത്. തന്റെ മകളുടെ കല്യാണത്തിനു പണം നൽകണമെന്നും, ഉമ്മച്ചൻ ഡെന്നീസിനെ കുറിച്ചുള്ള കാര്യങ്ങൾ പുറത്ത് പറയുവാൻ നിർബന്ധിക്കുന്നുവെന്നും പറഞ്ഞായിരുന്നു അയാൾ എത്തിയത്. പണം എത്തിക്കാം എന്ന് പറഞ്ഞ് സോളമൻ അയാളെ മറക്കുന്നു. പണത്തിനായി സോളമൻ ഹാജിയുടെ ഓഫീസിൽ എത്തുന്നു. അവിടെയുണ്ടായിരുന്ന ഹാജിയുടെ മകൻ അയാളെ അപമാനിച്ച് വിടുന്നു. ഹാജിക്കായി ചില കള്ളക്കടത്ത് സാധനങ്ങളുമായി വരുന്ന ഒരു ലോറി സോളമൻ പിടിക്കുന്നു. താൻ ആവശ്യപ്പെടുന്ന പണം നൽകിയാലേ ലോറി വിട്ടു നൽകൂ എന്ന് സോളമൻ ഹാജിയോട് പറയുന്നു. ഹാജി അത് സമ്മതിക്കുകയും തന്റെ വീട്ടിൽ വച്ച് സോളമന് പണം നൽകുകയും ചെയ്യുന്നു. എന്നാൽ പണവുമായി മടങ്ങുന്ന വഴിയിൽ ഹാജിയുടെ ക്വട്ടേഷൻ സംഘം സോളമനെ ആക്രമിച്ച് വെട്ടി പരിക്കേൽപ്പിച്ച് പണം തട്ടിയെടുക്കുന്നു. സാരമായി പരിക്കേൽക്കുന്ന അയാൾ അവധിയിൽ പ്രവേശിക്കുന്നു. തനിക്കുണ്ടായ ദുരനുഭവങ്ങളുടെ വെളിച്ചത്തിൽ സോളമനെ വെറുത്തിരുന്ന നാദിയയുടെ മുന്നിലേക്ക് ഫാദർ പാലത്തിങ്കൽ എത്തുന്നു. നാദിയ പഠിപ്പിച്ചിരുന്ന സ്കൂളിലെ ഒരു വിദ്യാർത്ഥിനിയുടെ ഹൃദയ ചികിത്സക്കായി പണം നൽകിയത് സോളമനാണെന്ന് ഫാദർ നാദിയയോട് പറയുന്നു. അതോടെ നാദിയ സോളമനുമായി സൗഹൃദത്തിലാവുന്നു. തിരിച്ച് ജോലിക്ക് കയറുന്ന സോളമൻ പുതിയ ഒരു മനുഷ്യനായി മാറുന്നു. നാദിയയെയും അമ്മയേയും അവരുടെ വീട്ടിൽ നിന്നും ഇറക്കി വിടാനുള്ള പദ്ധതികൾ ഹാജിയുടെ മകൻ ആവിഷ്കരിക്കുന്നു. പോകാനൊരു സ്ഥലം ഇല്ലാത്ത അവരുടെ മുന്നിൽ, നാദിയയെ താൻ വിവാഹം കഴിക്കാം എന്ന് സോളമൻ പറയുന്നു. അവരുടെ വിവാഹത്തിന്റെ അന്ന് രാവിലെ നാദിയയെ കാണാതാവുന്നു. 

കൊച്ചി നഗരത്തിന്റെ കിരീടം വയ്ക്കാത്ത രാജാവ്, ശേഖരേട്ടൻ. ആൾബലം കൊണ്ടും പണം കൊണ്ടും ആർക്കും തൊടാനാവില്ല അയാളെ. മുന്നിൽ നിന്ന് നയിക്കുന്നത് ശേഖരനാണെങ്കിലും അദ്ദേഹത്തിന്റെ വലം കൈയായ മാധവനാണ് അയാളുടെ ശക്തി. മകൾ ശാരദ, ഭർത്താവ്  ടൗണ്‍ പ്ലാനിംഗ് ഓഫീസറായ ശരത് ചന്ദ്രൻ. തന്റെ ലോകത്തു നിന്നും നിർബന്ധപൂർവ്വം അവരെ മാറ്റി നിർത്തിയിരിക്കുകയാണ് ശേഖരൻ. സത്യസന്ധനായ ഒരു ഉദ്യോഗസ്ഥനായ ശരത് ചന്ദ്രന് ശേഖരനോടും മാധവനോടും ഒട്ടും യോജിച്ചു പോകാനും കഴിയുന്നില്ല. കൊച്ചിയിലെ ശേഖരന്റെ പ്രധാന എതിരാളികളാണ് കോട്ടൂരാന്മാർ. കൊച്ചിയിൽ ബിം എം ഡബ്യൂ ഫാക്ടറിക്ക് എന്ന വ്യാജേന ധനകാര്യ മന്ത്രി രഘുറാം വൈദ്യൻ ശേഖരേട്ടന്റെ സഹയാത്തോടെ പാവപ്പെട്ട ജനങ്ങളുടെ ഭൂമി സർക്കാരിനെ കൊണ്ട് ഏറ്റെടുപ്പിക്കുന്നു. എന്നാൽ ഭൂമി കൈവശമാക്കിയ ശേഷം രഘുറാം ആ പ്രൊജക്ട് മുടക്കുകയും, പകരം കോട്ടൂരാന്മാരുമായി ചേർന്ന് ഒരു റിയൽ എസ്റ്റേറ്റ് ബിസിനസ് ആരംഭിക്കുവാനും പ്ലാനിടുന്നു. ഇത് മനസ്സിലാക്കുന്ന ശേഖരനും മാധവനും ആ പ്രോജക്ടിന് തടയിടുന്നു. അതോടെ അതിൽ നിന്നും കിട്ടാൻ സാധ്യതയുണ്ടായിരുന്ന 250 കോടി കോട്ടൂരാന്മാർക്ക് നഷ്ടപ്പെടുന്നു. മാധവനെതിരെ കോട്ടൂരാന്മാരിൽ ഇളയവൻ സുനിൽ തിരിയുന്നു. കില്ലർ ജെയിംസ് എന്നൊരു ഗുണ്ടയെ മാധവന്റെ സഹായിയായ ജോസിനെ വക വരുത്താൻ അയക്കുന്നുവെങ്കിലും മാധവൻ അയാളുടെ കയ്യും കാലും വെട്ടുന്നു. 

ആ സമയം പോലീസ് കമ്മീഷണറായി ചാർജ്ജെടുക്കുന്ന അരുണ്‍ നമ്പ്യാർ മാധവനെ ഒതുക്കാനായി രംഗത്തിറങ്ങുന്നു. മാധവന്റെ സംരക്ഷണയിലുള്ള സുലൈമാൻ ഹാജിയെ, അയാളുടെ സ്ഥലത്തിനു വേണ്ടി കോട്ടൂരാന്മാർ തട്ടിക്കൊണ്ട് പോകുന്നതോടെ അവർക്കിടയിലെ സംഘർഷം മൂർച്ഛിക്കുന്നു. കോട്ടൂരാന്മാരുടെ പിറകിൽ നിന്ന് അവർക്ക് ബുദ്ധി ഉപദേശിച്ചിരുന്നത് ശരത് ആയിരുന്നു. അയാൾ സുലൈമാൻ ഹാജിയെ കൊലപ്പെടുത്തുന്നു. ശേഖരനോ മാധവനോ ശാരദയെ വിധവയാക്കില്ല എന്ന ഉറച്ച വിശ്വാസമായിരുന്നു അതിനു പിന്നിൽ. അയാളെ ഉപദ്രവിക്കില്ല എന്ന് മാധവൻ ശാരദക്ക് വാക്ക് കൊടുക്കുന്നു. സുനിൽ ജോസിനെ കൊലപ്പെടുത്തി തെരുവിൽ തള്ളുന്നു. മന്ത്രി രഘുറാമിന്റെ ഗസ്റ്റ് ഹൗസിൽ വച്ച് മാധവൻ സുനിലിനെ കൊലപ്പെടുത്തുന്നു. മാധവനെ അരുണ്‍ നമ്പ്യാർ അറസ്റ്റ് ചെയ്യുന്നു. ശേഖരേട്ടൻ തന്റെ സ്വാധീനം ഉപയോഗിച്ച് മാധവനെ പുറത്തിറക്കാൻ ശ്രമിക്കുന്നുവെങ്കിലും അത് നടക്കാതെ വരുന്നു. ശാരദയെയും കുട്ടിയേയും കൊലപ്പെടുത്തുമെന്ന ഭീഷണിയിൽ മാധവനെ രക്ഷിക്കുന്നതിൽ നിന്നും ശേഖരേട്ടനെ ശരത് തടയുന്നു. ശരതിന്റെ കാസിനോയിൽ വച്ച് റേപ്പ് ചെയ്യപ്പെട്ട ഒരു പെണ്‍കുട്ടിയുടെ അഭിമുഖം ഷൂട്ട് ചെയ്യുന്ന മാധവന്റെ സഹോദരി ദേവിയേയും അരുണ്‍ നമ്പ്യാരുടെ സഹോദരൻ വരുണിനേയും ശരത് കൊലപ്പെടുത്തുന്നു.