വീട്ടുകാർ നിശ്ചയിച്ച വിവാഹത്തെ നിഷേധിച്ചുകൊണ്ട് തലേദിവസം ഇഷ്ടപ്പെട്ട പുരുഷനോടൊത്ത് ഇറങ്ങിത്തിരിച്ച ഇടത്തരം നായർ കുടുംമ്പത്തിലെ അംഗമായ രുഗ്മിണി എത്തിയത് ഒരു ഗ്രാമത്തിലാണ്. കാർത്തികേയനുമായി പുതിയൊരു ജീവിതം ആരംഭിക്കുമ്പോൾ രുഗ്മിണി അറിഞ്ഞിരുന്നില്ല സ്വത്ത് കണ്ടുകൊണ്ടാണ് കാർത്തികേയൻ അവളെ വിവാഹം കഴിച്ചതെന്ന്. രണ്ട് പെണ്‍കുട്ടികൾ അവർക്ക് ജനിച്ചിട്ടും സ്വത്തിന്റെ കാര്യത്തിൽ ഒരു തീർപ്പും ആകാതെ വരുമ്പോൾ കാർത്തികേയന്റെ തനി സ്വഭാവം പുറത്തുവരുന്നു. ഇനി ഒരിക്കലും സ്വത്ത്‌ കിട്ടില്ല എന്ന് തിരിച്ചറിഞ്ഞ കാർത്തികേയൻ താൻ ജോലി ചെയ്യുന്ന കയർ കമ്പനിയിലെ ദേവു എന്ന സ്ത്രീയുമായി നാടുവിടുമ്പോൾ രുഗ്മിണി ഗർഭിണിയായിരുന്നു. എല്ലാ അർഥത്തിലും രുഗ്മിണി ഒറ്റപ്പെട്ടു പോകുന്നു. 3 കുട്ടികളെ പോറ്റാൻ ഒരു മർഗവുമില്ലാതായ രുഗ്മിണി ഒടുവിൽ കാർത്തികേയൻ ജോലിചെയ്തിരുന്ന കയർ കമ്പനിയിൽ ജോലിക്ക് പോകുന്നു. തുടർന്ന് അവളനുഭവിക്കുന്ന ദുരിതങ്ങളുടെ ദൃശ്യങ്ങളാണ് മനോജ്‌ ആലുങ്കൽ സംവിധാനം ചെയ്ത 'ഇതിനുമപ്പുറം' ചിത്രത്തിൽ പറയുന്നത്. 

ഒരു മനുഷ്യനിലെ സ്നേഹം, ആർദ്രത , സാമൂഹ്യപ്രതിബദ്ധത ഇതിനൊക്കെ പ്രാധാന്യം നൽകുന്ന ചിത്രമാണ് നിർണ്ണായകം

ബാബുരാജ് ഗാനങ്ങളുടെ ആരാധകനായ അച്ഛൻ ഹരിദാസന്റെയും ബോബ് മാർളിയുടെ ആരാധകനായ മകൻ ബാലുവിന്റെയും കഥ പറയുകയാണ്‌ നെല്ലിക്ക ചിത്രം. രണ്ടു തലമുറയുടെ സംഗീതത്തിന്റെ കാഴ്ചപ്പാട്‌ വിലയിരുത്തുകയാണ് 'നെലിക്ക' ചലച്ചിത്രം .

ചന്ദ്രമോഹന്‍ തിരുവനന്തപുരം സെക്രട്ടറിയേറ്റില്‍ പെറ്റീഷന്‍ കമ്മിറ്റിയിലെ ജോലിക്കാരനാണ്. ഭാര്യ സുഷമ തൃശ്ശൂരില്‍ ബി.എസ്.എന്‍.എല്ലില്‍ ഉദ്യോഗസ്ഥ. ഏക മകന്‍ അച്ചു.  സുഷമ തൃശ്ശൂരായതിനാൽ ചന്ദ്രമോഹന്‍ തിരുവനന്തപുരത്ത്  ബാച്ചിലര്‍ ലൈഫ് ആഘോഷിക്കുകയാണ്. എപ്പോഴും പ്രണയമനസ്സുമായി കഴിയുന്ന പ്രായമുള്ള ശേഖരേട്ടന്‍, ജ്യോതിഷി ബ്രഹ്മശ്രീ നാരായണ ഇളയത്, സുമേഷ് എന്നിവരാണ് ചന്ദ്രമോഹന്റെ സുഹ്രുത്തുക്കൾ.  നാട്ടിലെത്തുന്ന ചന്ദ്രേട്ടൻ കുടുംബമായി തഞ്ചാവൂരിലേക്ക് ഒരു യാത്ര പോകുന്നു. ആ യാത്രക്കിടയിൽ ഒരു നാഡീ ജോതിഷിയുടെ അടുത്തെത്തുന്ന അവർ ചന്ദ്രന്റെ പൂർവ്വ ജന്മത്തെക്കുറിച്ച് അയാളുടെ ഓലയിൽ നിന്നും അറിയുന്നു. കഴിഞ്ഞ ജന്മത്തിൽ ചോളരാജ്യത്തെ വേൽക്കൊഴുപ്പൊട്ടുവൻ എന്ന കവിയായിരുന്ന ചന്ദ്രമോഹനെ തേടി ആ ജന്മത്തിലെ കാമുകി വസന്തമല്ലിക എത്തുമെന്ന് അയാൾ പറയുന്നു. അത് കേൾക്കുന്നതോടെ സുഷമക്ക് ചന്ദ്രനെ സംശയമാകുന്നു. ഈ കഥ സുഹ്രുത്തുക്കളോട് പറയുന്ന ചന്ദ്രനെ അവർ ആശയക്കുഴപ്പത്തിലാക്കുന്നു. പിന്നീട് ഒരിക്കല്‍ ഒരു പരാതിയെ സംബന്ധിച്ച സംസാരിക്കാനായി ഗീതാഞ്ജലി എന്നൊരു ഒരു പെണ്‍കുട്ടി ചന്ദ്രമോഹന്റെ അടുക്കലെത്തുന്നു. ആ വരവ് ചന്ദ്രമോഹന്റെ വ്യക്തിജീവിതത്തില്‍ മാത്രമല്ല, ദാമ്പത്യ ജീവിതത്തിലും പ്രശ്‌നങ്ങള്‍ സൃഷ്ടിച്ചു.

അഴകിയ രാവണന്‍’ എന്ന ഹിറ്റ് ചിത്രത്തിലെ അംബുജാക്ഷന്‍ എന്ന കഥാപാത്രം ഈ സിനിമയിലൂടെ വീണ്ടും വരികയാണ്. വര്‍ഷങ്ങള്‍ക്ക് ശേഷം ചിറകൊടിഞ്ഞ കിനാവുകള്‍ സിനിമയാകുന്നു. അംബുജാക്ഷന്റെ കഥയിലെ പോലെ തന്നെ തയ്യല്‍ക്കാരനും മരംവെട്ടുകാരന്റെ മകളും ധനികനായ പ്രവാസിയെ വിവാഹം കഴിക്കാന്‍ ആഗ്രഹിക്കുന്ന സുന്ദരിയായ പെണ്‍കുട്ടിയുമായുള്ള പ്രണയമാണ് നര്‍മ്മത്തിന് പ്രാധാന്യമുള്ള ചിത്രത്തിന്റെ ഇതിവൃത്തം.

സാധാരണക്കാരനായ സതീശന്‍. തന്റെ കുടുംബത്തെ അഗാധമായി സ്‌നേഹിക്കുന്ന സതീശന്റെ ലോകം ഭാര്യ ജലജയും മകന്‍ കുട്ടുവുമാണ്‌. സതീശന്റെ ആത്മസുഹൃത്താണ് മണിയൻ. എല്ലാ സങ്കടവും സന്തോഷവും സതീശന്‍ പങ്കുവയ്‌ക്കുന്നത്‌ മണിയനോടാണ്‌. സതീശന്റെ കടുംബത്തിലെ ഒരംഗത്തെപ്പോലെയായിരുന്നു മണിയന്‍. സതീശന്റെ മകന്‍ കുട്ടുവിന്‌ ഒരു ഓപ്പറേഷനു വേണ്ടി പണം ആവശ്യമായി വന്നപ്പോള്‍ തളർന്നുപോയ അയാളെ  സഹായിക്കാൻ ദിവസജോലിക്കാരനായ മണിയന്‍ മാത്രമേ ഉണ്ടായുള്ളൂ. ഇവര്‍ക്കിടയിലേക്ക് ജയയെന്ന പെണ്‍കുട്ടി കടന്നുവരുന്നു. ജയയും ഇവരുടെ സൗഹൃദവലയത്തിലെ കണ്ണിയാകുന്നു. കുട്ടുവിന്റെ ചികിത്സയ്‌ക്കായി എല്ലാ സൗകര്യങ്ങളുമൊരുക്കുന്ന മള്‍ട്ടി സ്‌പെഷ്യാലിറ്റി ഹോസ്‌പിറ്റലിലെ ഡോ. രേണു ഇവര്‍ക്കൊക്കെ ആശ്വാസമാവുന്നു. സ്‌നേഹത്തിന്റെ വൈവിധ്യമാര്‍ന്ന തലത്തിലൂടെ റിയലിസ്‌റ്റിക്‌ സറ്റയര്‍ ഫാന്റസിയായാണ്‌ സ്വര്‍ഗത്തേക്കാള്‍ സുന്ദരം കടന്നുപോകുന്നത്.

ആംബുലൻസ് ഡ്രൈവറാണ് ക്രിസ്റ്റി. പ്രത്യേകിച്ച് ഉതരവാദിത്വങ്ങളൊന്നുമില്ലാതെ ജീവിതത്തെ നിസംഗ ഭാവത്തോടെ കാണുന്ന ക്രിസ്റ്റി ആംബുലൻസിൽ ഒരു മൃതദേഹവുമായി ഹൈറേഞ്ചിലേയ്ക്ക് യാത്ര തിരിയ്ക്കുന്നു. മരിച്ചയാളുടെ ബന്ധുക്കളും ഒപ്പമുണ്ട്. പതിവ് തെറ്റിയുള്ള യാത്രയിൽ ക്രിസ്റ്റി നേരിടുന്ന പ്രതിസന്ധികളും സംഭവബഹുലമായ അനുഭവങ്ങളുമാണ് സാരഥി ചിത്രം പറയുന്നത്.

ജീവിക്കാൻ സ്വന്തമായി ഒരു തുണ്ട് ഭൂമിക്കായി പോരാടുന്നാവരുടെ കഥയാണ്‌ ജലം പറയുന്നത്. ചെങ്ങറ സമരമടക്കമുള്ള സാമൂഹിക വിഷയങ്ങൾ ചർച്ചയാകുന്ന ചിത്രത്തിൽ സർക്കാർ സംവിധാനങ്ങളെ ബാധിച്ചിരിക്കുന്ന ചുവപ്പു നാടയുടെ കടുപ്പം തുറന്നു കാണിക്കുന്നുണ്ടെന്ന് സംവിധായകൻ പറയുന്നു. പട്ടയ വിതരണത്തിന്റെ പേരിൽ ജനങ്ങളെ കബളിപ്പിക്കുന്ന അധികാരികളുടെ പൊള്ളത്തരവും ചിത്രം വെളിപ്പെടുത്തുന്നു.

ഇതുവരെ പുരുഷന്മാര്‍ മാത്രം ചെയ്തിരുന്ന ഒരു ജോലി. കാലത്തിന്റെ വിധിക്കടിപ്പെട്ട് കുടുംബം പോറ്റാന്‍ ആ ജോലി ഏറ്റെടുത്തപ്പോള്‍ ഒരു സ്ത്രീ നേരിടേണ്ടിവന്ന ചില സംഭവവികാസങ്ങളും അതിനെ തുടര്‍ന്നുണ്ടാകുന്ന ജീവിതദുരിതങ്ങളും ദൃശ്യവത്കരിക്കുന്ന ചിത്രമാണ് 'അക്കല്‍ദാമയിലെ പെണ്ണ്'

മാതാപിതാക്കളുടെ സമ്മര്‍ദ്ദത്താല്‍ ഇന്നത്തെ കുട്ടികള്‍ അനുഭവിക്കേണ്ടിവരുന്ന മാനസിക പ്രശ്‌നങ്ങളും തുടര്‍ന്ന്‌ അവരുടെ ജീവിതത്തിലുണ്ടാകുന്ന സംഭവബഹുലമായ മുഹൂര്‍ത്തങ്ങളുമാണ്‌ 'മൈ ഗോഡി'ല്‍ ചിത്രീകരിക്കുന്നത്‌