കുടുംബചിത്രം

മുപ്പത്തിയെട്ടു വയസ് മാത്രം പ്രായമായ സുമിത്രയെന്ന (ശ്വേത മേനോൻ) വീട്ടമ്മയുടെ അപ്രതീക്ഷിതമായ മരണത്തെത്തുടർന്നുണ്ടാവുന്ന സംഭവ വികാസങ്ങളാണ് ഇത്രമാത്രം എന്ന സിനിമ പറയുന്നത്.സാമൂഹികമായി ഏറെപ്പേരോട് അടുപ്പമില്ലാത്ത ഭർത്താവ് വാസുദേവനും (ബിജുമേനോൻ) അന്തർമുഖിയായ മകൾ അനസൂയക്കും (മാളവിക) സുമിത്രയുടെ മരണം ഏല്പിക്കുന്ന ആഘാതം ചെറുതൊന്നുമല്ല.ഒരു പക്ഷേ ആ മരണത്തോടെയാണ് തങ്ങൾ എത്രമാത്രമാണ് സുമിത്രയെ ആശ്രയിച്ചിരുന്നതെന്ന് അവർ തിരിച്ചറിയുന്നത്. 80തുകളിൽ വയനാട് ജില്ലയിലെ ഗ്രാമാന്തരീക്ഷം പശ്ചാത്തലമാവുന്ന സിനിമയിൽ സുമിത്രയുടെ മരണാനന്തരവും അവരെ കാണാനെത്തുന്ന നാട്ടുകാരുടെയും ബന്ധുക്കളുടെയും ഓർമ്മകളിലൂടെയാണ് സുന്ദരിയായ സുമിത്രയും അവരുടെ വ്യക്തിത്വവും അനാവരണമാക്കപ്പെടുന്നത്. വയനാടൻ ജീവിതം ഒരു വീട്ടമ്മയുടെ കാഴ്ച്ചകളിലൂടെയും നേർത്ത വികാരങ്ങളുടെ സൂക്ഷ്മമായ നിരീക്ഷണത്തിലൂടെയും ലളിതമായി ചിത്രീകരിക്കപ്പെടുന്നു.

വൃദ്ധനും കുട്ടിക്കും അഭയം നൽകുന്നവൾ, കൂട്ടുകാരിയുടെ സ്വകാര്യങ്ങൾ കേൾക്കുന്നവൾ, ഒരുമിച്ചൊരു വീട്ടിൽ താമസിക്കുമ്പോഴും രണ്ട് സമാന്തരരേഖകൾ പോലെ പോകുന്ന ഭാര്യയുടെയും ഭർത്താവിന്റെയും ജീവിതങ്ങൾ, കൂട്ടുകാരിക്കും വേലക്കാരിക്കും നാട്ടിലെ വേശ്യയ്ക്കും സാന്ത്വനമാകുന്നവൾ, പാത്രക്കാരനുമായി അവിചാരിതമായി വേഴ്ചയിലേർപ്പെടുന്നവൾ അങ്ങനെ പല വേഷങ്ങളിൽ ആടിത്തീർത്ത ജീവിതത്തിനൊടുവിൽ മരണത്തിലൂടെ ജീവിതത്തിന്റെ സൗന്ദര്യം തിരിച്ചറിയുന്നവൾ. അഭയം, സ്വകാര്യം, സമാന്തരം, സാന്ത്വനം, അവിചാരിതം, സ്വച്ഛന്ദം, ആത്മായനം എന്നീ ഭാഗങ്ങളായി വിഭജിച്ചാണ് പൂർവ്വകാലത്തെ ചിത്രീകരിച്ചിരിക്കുന്നത്.

നീണ്ട അഞ്ചു വർഷത്തെ മറുനാടൻ ജീവിതത്തിനു ശേഷം അനന്ത പത്മനാഭൻ (വിനു മോഹൻ) സ്വന്തം നാട്ടിലെ തറവാട്ടിലേക്ക് തിരിച്ചു വരികയാണ്. ജോലിയൊന്നും ചെയ്യാതെ പല പല ബിസിനസ്സുകൾ നടത്തിനോക്കിയെങ്കിലും അതിലൊക്കെ പരാജയപ്പെട്ട് വൻ സാമ്പത്തിക ബാദ്ധ്യത ഉണ്ടായതു കാരണം എങ്ങിനേയും രക്ഷപ്പെടാനുള്ള വ്യഗ്രതയിൽ നാടു വിട്ടു പോയതാണ് അനന്തൻ. ഹൈദ്രാബാദിൽ വെച്ച് പരിചയപ്പെട്ട കാമുകിയെ വിവാഹം കഴിക്കാനുള്ള ആഗ്രഹത്തിലാണ് കാമുകിയുടെ ആന്റിയെ അനന്തൻ അപ്രതീക്ഷിതമായി കാണുന്നത്. അനന്തനും ആന്റിയും മുൻപേ പരിചയമുള്ളവരായിരുന്നു. ഈ വിവാഹത്തിനു സമ്മതമില്ലെന്ന് ആന്റി പറയുന്നു. ആ തിരസ്കരണം അനന്തനെ ഭുതകാലത്തിലേക്ക് കൂട്ടിക്കൊണ്ടു പോകുന്നു. ഗ്രാമത്തിലെ നല്ലൊരു തറവാട്ടിലെ അച്ഛനും അമ്മക്കും ഇളയ സഹോദരിക്കുമൊപ്പം ജീവിച്ചിരുന്ന അനന്തൻ ഒരു ജോലി ചെയ്തു ജീവിക്കുന്നതിനേക്കാൾ സ്വന്തമായി ഒരു ബിസിനസ്സ് തുടങ്ങി പണം സമ്പാദിക്കണം എന്ന് ചിന്താഗതിക്കാരനായിരുന്നു. അതിനുവേണ്ടി പലരുടേയും കയ്യിൽ നിന്നും പണം പലിശക്കും അല്ലാതെയും വാങ്ങിയെങ്കിലും ബിസിനസ്സ് ഒന്നും പച്ചപിടിച്ചില്ല എന്നു മാത്രമല്ല പലർക്കും മുന്നിൽ കടക്കാരനായിത്തീരുകയും ചെയ്തു. ചില പലിശക്കാർ അനന്തനെ ശാരീരികമായി മർദ്ദിക്കാനും തുടങ്ങി. മർദ്ദനമേറ്റാൽ തൊട്ടടുത്ത ഗവ. ആശുപത്രിയിൽ പോയി അഡ്മിറ്റാകുകയും മർദ്ദിച്ച പലിശക്കാർക്കെതിരെ കേസ് കൊടുത്ത് പണം വസൂലാക്കുകയും ചെയ്യുക എന്നതായിരുന്നു അനന്തന്റെ മറ്റൊരു ഉദ്ദേശ്യം. ഗവ. ആശുപത്രിയിൽ സാവിത്രി (മുക്ത) എന്ന നമ്പൂതിരി യുവതിക്ക് അനന്തനോട് പ്രണയമായിരുന്നു. അവൾ മനസ്സുകൊണ്ട് അവനെ പ്രണയിച്ചു. അവളുടെ സാമീപ്യം അനന്തൻ ആഗ്രഹിച്ചുവെങ്കിലും അവന്റെ പ്രണയം തുറന്നു പറഞ്ഞിരുന്നില്ല. ആശുപത്രിയിലെ മറ്റു നഴ്സുമാരിൽ നിന്ന് സാമ്പത്തികമായും അവരുടെ സാലറി സർട്ടിഫിക്കറ്റ് വാങ്ങിയും അനന്തൻ ധന സഹായം നേടിയിരുന്നു. ഇതിനിടയിലാണ് അനന്തൻ പലിശക്കാരിയായ ഏലപ്പാറ ഏലിയാമ്മയെ(ശ്രീലതാ നമ്പൂതിരി) കാണുന്നത്. രണ്ടു മാസം മുൻപ് വിറ്റ തന്റെ തന്നെ ഒരു കൃഷിപ്പറമ്പ് ഏലിയാമ്മയോട് കള്ളം പറഞ്ഞ് വീണ്ടും വിൽക്കുകയും ഒരു ലക്ഷം രൂപ അഡ്വാൻസായി കൈപ്പറ്റുകയും ചെയ്തു. അനന്തന്റെ ആത്മസുഹൃത്തായ ജോബി മാത്യു(കൃഷ്ണ) വിന്റെ നിർബന്ധപ്രകാരം ഒരു മ്യൂസിക് ആൽബത്തിൽ നായകനായി അഭിനയിക്കുകയും ഒരു ലക്ഷം രുപ നൽകി ആൽബം നിർമ്മിക്കുകയും ചെയ്യുന്നു. ഏലിയാമ്മയും ഗുണ്ടകളും അനന്തനെ ആക്രമിക്കാൻ ശ്രമിക്കുന്നു. അനന്തൻ വീണ്ടും അവർക്കുമുന്നിലും കടക്കാരനാകുന്നു. സുഹൃത്ത് ജോബിയുടെ ഒപ്പം തിരുപ്പൂരിൽ നിന്നും തുണിയെടുത്ത് ടെക്സ്റ്റൈൽ ബിസിനസ്സ് തുടങ്ങാൻ ഒരു ശ്രമം തുടങ്ങുന്നു അനന്തൻ അതിനു ഒരു ലക്ഷം രൂപയോളം മുടക്കുമുതൽ വേണമെന്നതുകൊണ്ട് അനന്തൻ സാവിത്രിയുടെ കയ്യിൽ നിന്നും അവളുടെ സാലറി സർട്ടിഫിക്കറ്റ് ചോദിച്ചു വാങ്ങി അതുപയോഗിച്ച് ലോൺ എടുക്കുന്നു. ഇതിനിടയിലാണ് അനന്തൻ യാദൃശ്ചികമായി മറ്റൊരു സുഹൃത്തിനെ കാണുന്നത്. അയാൾക്ക് ന്യൂസിലണ്ടിൽ ബന്ധങ്ങളുണ്ടെന്നും അവിടേക്കുള്ള വിസയുണ്ടെന്നും അറിഞ്ഞതിനാൽ എളുപ്പം എത്രയുംവേഗം പണം സമ്പാദിക്കാൻ ആരേയും അറിയിക്കാതെ ന്യൂസിലണ്ടിലേക്ക് പോകാൻ അനന്തൻ തയ്യാറാകുന്നു. ന്യൂസിലണ്ടിലേക്ക് പോകുന്നത് മറ്റാരും അറിയരുതെന്ന് വീട്ടിൽ ശട്ടം കെട്ടി അനന്തൻ അന്നു തന്നെ ഹൈദ്രാബാദിലേക്ക് വണ്ടി കയറുന്നു. അവിടേക്കുള്ള യാത്രയുടെ തുടക്കത്തിൽ സുഹൃത്ത് ജോബിയുടെ ഫോൺ കാൾ  നിരന്തരം വരുന്നുവെങ്കിലും ആ ഫോൺ വിളികൾ അനന്തൻ അവഗണിക്കുന്നു. അനന്തൻ നാടുവിടുന്നു.

അഞ്ചുവർഷത്തെ അജ്ഞാതവാസത്തിനു ശേഷം തിരിച്ചെത്തിയ അനന്തനെ കാത്തിരുന്നത് ദുരന്തങ്ങളുടെ കഥയായിരുന്നു. തനിക്ക് പണം നൽകിയ ജോബിയുടെ, സന്നിഗ്ദഘട്ടത്തിൽ തന്നെ സഹായിച്ച കാമുകി സാവിത്രിയുടെ.. എങ്ങിനെയും പണം സമ്പാദിക്കാനുള്ള ആ തിരിക്കിനിടയിൽ അനന്തൻ മറന്നു പോയ ചില ജീവിതങ്ങളുടെ ഒരിക്കലും തിരുത്താനാവാത്ത ദുരന്തപൂർണ്ണമായ കഥകൾ.

ഏജീസ് ഓഫീസിലെ വെറുമൊരു ക്ലർക്കായിരുന്ന മുല്ലശ്ശേരി തറവാട്ടിലെ മാധവൻ കുട്ടിക്ക് ( അനൂപ് മേനോൻ) സ്വന്തം ദേശമായ നേമത്ത് ഒരു വീട് പണിയുക എന്നൊരു സാധാരണ സ്വപ്നം മാത്രമേ ഉണ്ടായിരുന്നുള്ളു. പ്രായമായ അമ്മയും(കെ പി ഏ സി ലളിത) സ്നേഹമയിയായ ഭാര്യ സീത(സൊനാൽ ദേവരാജ്)യും ഏകമകളും(ബേബി എസ്തർ) മൊക്കെയായി ഒരുമിച്ച് സന്തോഷ ജീവിതം നയിക്കുകയായിരുന്നു മാധവൻ കുട്ടി. സുഹൃത്തുക്കളോട് വളരെ സ്നേഹവും ആത്മാർത്ഥതയുമുള്ള മാധവൻ കുട്ടിയുടെ സിനിമാ അഭിനയ മോഹിയായ ഒരു സുഹൃത്തിനെ(കലാഭവൻ ഷാജോൺ) ഒരു ഷൂട്ടിങ്ങ് ലൊക്കേഷനിൽ വെച്ച് കാണുകയും അവന്റെ ക്ഷണപ്രകാരം ലൊക്കേഷനിൽ ചെന്ന് ചായ സൽക്കാരം ഏറ്റുവാങ്ങുകയും ചെയ്യുന്നു. ആ സമയത്താണ് ആ സിനിമയുടെ നിർമ്മാതാവ് (നിഷാന്ത് സാഗർ) ലൊക്കേഷനിൽ വരുന്നത്. നിർമ്മാതാവും മാധവൻ കുട്ടിയും മുഖത്തോട് മുഖം നോക്കി. ഇരുവരും തങ്ങളുടെ പഴയ സ്ക്കൂൾ കാലഘട്ടത്തിലേക്ക് പോയി. സ്ക്കൂൾ പഠനകാലത്തിൽ മാധവൻ കുട്ടിയുടെ സുഹൃത്തും അതേസമയം ശത്രുവുമായിരുന്നു ഈ നിർമ്മാതാവ്. എല്ലാ മത്സരങ്ങളിലും പഠനത്തിലും ഒന്നാമനാകുന്ന മാധവൻ കുട്ടിയോട് അന്നും എന്നും അസൂയയായിരുന്നു ആ കൂട്ടുകാരന്. കാലം കടന്നുപോയി കൂട്ടുകാരൻ സിനിമാ നിർമ്മാതാവായെങ്കിലും അയാളുടെ അസൂയയും പകയും കെട്ടടങ്ങിയിരുന്നില്ല. സെറ്റിൽ വെച്ച് അയാൾ മാധവൻ കുട്ടിയെ അപമാനിച്ചു വിടുന്നു. മറ്റൊരു സന്ദർഭത്തിൽ ഒരു ബാറിൽ വെച്ച് മാധവൻ കുട്ടിയെ കാണുന്ന ഈ നിർമ്മാതാവ് വീണ്ടും മാധവൻ കുട്ടിയെ അപമാനിക്കുന്നു. അതിന്റെ ആവേശത്താൽ മാധവൻ കുട്ടി നിർമ്മാതാവിനെ വെല്ലുവിളിക്കുന്നു. “ആറുമാസത്തിനുള്ളിൽ ഞാനൊരു സിനിമ നിർമ്മിച്ച് വിജയിപ്പിച്ച് കാണിക്കുമെന്ന്”

പിറ്റേ ദിവസം സിനിമാ പ്രൊഡ. എക്സിക്യൂട്ടീവ് ശശാങ്കൻ (ഹരിശ്രീ അശോകൻ) മാധവൻ കുട്ടിയെ സമീപിക്കുകയും സിനിമ നിർമ്മിക്കാനുള്ള കാര്യങ്ങൾ നടത്തിക്കുകയാണ്. ടിവി ചാനൽ സാറ്റലൈറ്റ് റേറ്റ് തരാമെന്നു പറഞ്ഞിരുന്നെങ്കിലും ആ തുക ലഭിക്കാത്തതുകൊണ്ട് മാധവൻ കുട്ടി തന്റെ സമ്പാദ്യവും വീടു പണിയാൻ വെച്ചിരുന്ന ലോൺ തുകയുമെടുത്ത് സിനിമ നിർമ്മിക്കുന്നു. സിനിമയിലെ സ്റ്റാർ പ്രേം കുമാർ (ഷാജു) ആണ് നായകൻ. ഇതിനിടയിൽ സിനിമാ സംഘടനകൾ സമരം പ്രഖ്യാപിക്കുന്നു. ഷൂട്ടിങ്ങ് മുടങ്ങുന്നു. സാമ്പത്തിക ബുദ്ധിമുട്ടിലായ മാധവൻ കുട്ടി ആകെ വിഷമ സന്ധിയിലാകുന്നു. ഇതിനിടയിൽ മാധവൻ കുട്ടി നൽകിയ ചെക്ക് ബാങ്കിൽ നിന്നു മടങ്ങിയതുകൊണ്ട് ചെക്കിന്റെ ഉടമയായ മാധവൻ കുട്ടിയുടെ ഭാര്യ സീത(സൊനാൽ ദേവരാജ്)യെ പോലീസ് അറസ്റ്റ് ചെയ്യുന്നു. കുപിതനായ സീതയുടെ അച്ഛൻ (ഇന്നസെന്റ്) സീതയെ ജാമ്യത്തിലെടൂക്കുകയും തന്റെ വീട്ടിലേക്ക് കൊണ്ടുപോകുകയും ചെയ്യുന്നു. തീർത്തും ഒറ്റപ്പെട്ട മാധവൻ കുട്ടിയുടെ മുന്നിൽ അവധൂതനെപ്പോലെ തോന്നിച്ച ഒരാൾ വന്നു ചേരുന്നു. മുൻപ് 28 സിനിമകൾ ചെയ്ത് സാമ്പത്തിക ബുദ്ധിമുട്ടിലായ പഴയ സിനിമാ നിർമ്മാതാവ് അമ്പാട്ട് മാധവമേനോനായിരുന്നു (ജനാർദ്ദനൻ) അത്. അയാളുടെ പരിശ്രമത്താലും ഈ സിനിമ പൂർത്തിയാക്കാൻ മാധവൻ കുട്ടി തീരുമാനിക്കുന്നു.

പലതും ആലോചിച്ചുറപ്പിച്ച മാധവൻ കുട്ടി ദൃഢനിശ്ചയത്തോടെ മുന്നോട്ട് പോകുന്നു.