ഡ്രാമ

ആകാശ് (കുഞ്ചാക്കോ ബോബൻ) ഷിബു(ബിജു മേനോൻ) എന്നിവരെ മോഷണക്കുറ്റത്തിനു ജയിലിലേക്ക് കൊണ്ടു പോകും വഴി ട്രെയിനിൽ വെച്ച് അവർ പോലീസുകാരെ കബളിപ്പിച്ച് രക്ഷപ്പെടുന്നു. അവർ എത്തിയത് കേരള തമിഴ് നാട് അതിർത്തിയിലുള്ള പൂമല എന്ന ഗ്രാമത്തിലാണ്. ഭുരിഭാഗവും ക്രിസ്ത്യൻ വിശ്വാസികളായ നാട്ടുകാരായിരുന്നു അവർ. വർഷങ്ങളായി അവരുടെ ഇടവകയിലെ പള്ളി ആരാധനയില്ലാതെ അടച്ചിട്ടിരിക്കുകയാണ്. ആ ഇടവകയിലേക്ക് ഒരു പാതിരി വരാൻ തയ്യാറാവാത്തതാ‍യിരുന്നു കാരണം. സ്ഥലത്തെ പ്രധാന പ്രമാണിയായ തൊമ്മിച്ചൻ സഭയിലെ ഉന്നതന്മാരുമായി സംസാരിച്ച് ഇടവകയിലേക്ക് അച്ഛനെ വരുത്താൻ ശ്രമിക്കുന്നു. തൊമ്മിച്ചന്റെ പരിചയമുള്ള ഫാദർ ഗബ്രിയേൽ (വിജയരാഘവൻ) രണ്ടു പേരെ പൂമല പള്ളിയിലേക്ക് അയക്കുന്നു. എന്നാൽ മലയോരപ്രദേശമായ അവിടേക്ക് എത്താൻ പ്രയാസപ്പെടുകയും യാത്രയിൽ ദുർനിമിത്തങ്ങൾ കാണുകയും നിമിത്തം സ്വതവേ നിഗൂഡതയുള്ള ആ ഇടവകയിലേക്ക് പോകാൻ തയ്യാറാകാതെ പറഞ്ഞയക്കപ്പെട്ട രണ്ടു അച്ഛന്മാരും തിരിച്ചു പോകുന്നു. എന്നാൽ മൊബൈൽ റേഞ്ച് ഇല്ലാത്ത സ്ഥലമായതിനാൽ അവരുടേ ഫോൺ സന്ദേശം തൊമ്മിച്ചനു വേണ്ടവിധം മനസ്സിലാകുന്നില്ല. അവർ രണ്ട് അച്ഛന്മാരേയും പ്രതീക്ഷിച്ച് അടിവാരത്തിലേക്ക് കുതിരവണ്ടി അയക്കുന്നു.

ഈ സമയത്താണ് ആകാശും ഷിബുവും അടിവാരത്തിലെത്തുന്നത്. അച്ഛനാണെന്ന് തെറ്റിദ്ധരിച്ച് കുതിര വണ്ടിക്കാരൻ (ജാഫർ ഇടുക്കി) അവരെ ഇടവകയിലേക്ക് ക്ഷണിക്കുന്നു. എന്നാൽ ആകാശും ഷിബുവും അയാളെ ഗൌനിക്കാതെ നടന്നു നീങ്ങി. യാദൃശ്ചികമായി പള്ളിമുറ്റത്ത് എത്തുകയും അവിടെ കിടന്നു ഉറങ്ങുകയും ചെയ്തു. പിറ്റേന്ന് അവരെ കണ്ട നിവാസികൾ സഭ പറഞ്ഞയച്ച അച്ഛന്മാരാണെന്ന് തെറ്റിദ്ധരിക്കുന്നു. ജയിലിൽ നിന്നും ചാടിയ ശേഷം ഒരു താവളം അന്വേഷിക്കുന്ന ആകാശും ഷിബുവും കിട്ടിയ അവസരം മുതലെടുത്ത് അവിടെ അച്ഛന്മാരായി കൂടുന്നു.

ആകാശിന്റെ ചില ജാലവിദ്യകളും അബദ്ധവശാൽ സംഭവിക്കുന്ന ഭാഗ്യങ്ങളും കാരണം പൂമാല നിവാസികൾക്ക് രണ്ടുപേരും പ്രിയപ്പെട്ടവരായിത്തീരുന്നു. അടഞ്ഞു കിടന്ന പള്ളിയും ആരാധനയും വീണ്ടും ആരംഭിച്ചു. വർഷങ്ങളായി മുടങ്ങിക്കിടന്ന പള്ളിപ്പെരുന്നാൾ ഈ വർഷം കൊണ്ടാടാൻ തൊമ്മിച്ചനും നാട്ടുകാരും തീരുമാനിക്കുന്നു. ഫാദർ പോളും ഫാദർ സെബാസ്റ്റ്യനുമായ ആകാശും ഷിബുവും അതിനു സമ്മതം മൂളുന്നു.

അതിനിടയിലാണ് തൊമ്മിച്ചന്റെ നഗരത്തിൽ പഠിക്കുന്ന മകൾ എലീന (നിവേദ തോമാസ്) വീട്ടിലെത്തുന്നത്. പള്ളിയിലെത്തിയ അവൾ ഫാദർ പോളിനെ കണ്ട് അമ്പരക്കുന്നു. ഫാദർ പോളിനെ അവൾക്ക് നേരത്തെ അറിയാമായിരുന്നു. ഇവരുടെ ആഗമനോദ്ദേശം എന്താണെന്നറിയാൽ എലീന അവരെ പിന്തുടരുന്നു. അവർ യാഥാർത്ഥത്തിൽ ആരാണെന്ന് അപ്പനേയും നാട്ടുകാരേയും അറിയിക്കാൻ എലീന തയ്യാറെടുക്കുന്നു. എലീനയുടെ തയ്യാറെടുപ്പ് ഫലിക്കുമോ ആകാശും ഷിബുവും പിടിക്കപ്പെടുമോ എന്ന സസ്പെൻസ് പിന്നീട്...

സർക്കാർ ആശുപത്രിയിൽ ജോലി ചെയ്യുന്ന ഡോ. ഹരികൃഷ്ണൻ എന്ന ആദർശവാനായ വ്യക്തി പ്ലസ്സ് ടു വിദ്യാർത്ഥിയായ മകൾ മീരക്ക് അച്ഛനെന്നതിലുപരി സുഹൃത്തു കൂടിയാണ്. മീരയുടെ കുഞ്ഞുനാളിൽ ഡോ. ഹരികൃഷ്ണൻ ഭാര്യയുമായി വിവാഹ ബന്ധം വേർപ്പെടുത്തിയതാണ്. വേർപിരിഞ്ഞ ദിവസം ഭാര്യം മകളെ ഹരികൃഷ്ണനു കൈമാറി തന്റെ സുഖജീവിതത്തിനു വിദേശത്തേക്കു പോയി. ഓർമ്മയിൽ മാത്രമുള്ള അമ്മയെ മകൾ മീരക്ക് വെറുപ്പാണ്. മദ്ധ്യവയസ്സിലെത്തിയ ഡോ. ഹരികൃഷ്ണൻ മകൾ മീരക്ക് റോൾ മോഡലാണ്. അച്ഛന്റെ ആരോഗ്യം കാത്തുസൂക്ഷിക്കാൻ ഭക്ഷണകാര്യത്തിലും വ്യായാമത്തിലും മകൾ അതീവ ശ്രദ്ധാലുവാണ്. അച്ഛന്റെ ആദർശജീവിതം കൊണ്ടു മാത്രം മകൾ എന്നും അച്ഛനെ അനുസരിക്കുന്ന മകളാകുന്നു. അതുകൊണ്ട് മകൾക്ക് മൊബൈൽ ഫോൺ വാങ്ങിച്ചു കൊടുക്കാ‍ൻ അച്ഛനും അതുപയോഗിക്കാൻ മകൾക്കും താൽ‌പ്പര്യമില്ല. ഹരികൃഷ്ണന്റെ അടുത്ത കൂട്ടുകാരനാണ് ഡോ. രമേജ്. മെറിറ്റിൽ പഠിച്ചു പാസ്സായി എം ബി ബി എസ് എടുത്ത രമേശിനു പക്ഷെ ഹരികൃഷ്ണന്റെപോലെ ആദർശജീവിതം നയിക്കാൻ പറ്റുന്നില്ല. പണത്തിനോടു ആർത്തിയുള്ള ഭാര്യ ഡോ. ചന്ദ്രയുടേ വാശിയാണ് കാരണം. രണ്ടു പെണ്മക്കളുള്ളതുകൊണ്ട് നല്ലകാലത്ത് നന്നായി ജോലിചെയ്ത് മാക്സിമം പണം ഉണ്ടാക്കണം എന്നതാണ് ചന്ദ്രയുടേ ലൈൻ. കുറച്ച് ആരോഗ്യപ്രശ്നങ്ങളുള്ള രമേശനു ഭക്ഷണക്രമവും വ്യായാമവും ഭാര്യ നിഷ്കർഷിക്കുന്നു.

സ്ക്കൂളിൽ മീരയുടേ കൂട്ടുകാരികൾ വളരെ സ്മാർട്ട് ആണ്. അവരോടൊപ്പം ആവശ്യമില്ലാത്ത കൂട്ടുകെട്ടിനു പോകാൻ മീര തയ്യാറല്ല. അച്ഛനു ഇഷ്ടപ്പെടില്ല എന്നതും കാരണമാണ്. കൂട്ടുകാരികൾ എന്നു ഇന്റർനെറ്റ് കഫേയിൽ പോയി ചാറ്റ് ചെയ്യാറുണ്ട്. അതിനു മീരയേയും വിളിക്കുന്നു. പക്ഷേ മീര ആദ്യം തയ്യാറാകുന്നില്ല. നിർബന്ധം സഹിക്കവയ്യാതായപ്പോൾ ഒരുദിവസം മീര അവർക്കൊപ്പം കഫേയിൽ പോകുന്നു. അവിടേനിന്ന് അച്ചനു ഫോൺ ചെയ്ത് താൻ മറ്റൊരിടത്താണെന്നു നുണ പറയുന്നു. ഇത് കേൾക്കുന്ന കഫേയിലെ മറ്റൊരു ചെറുപ്പക്കാരൻ അവരെ ഉപദേശിക്കാൻ ശ്രമിക്കുന്നു. ഒരു സത്യം മറയ്ക്കാൻ ഒരു നുണ പറഞ്ഞാൽ ആ നുണ സത്യമാക്കാൻ ഒരുപാട് നുണകൾ പിന്നേയും പറയേണ്ടിവരും എന്നും ഇത്  പി പി പ്രശാന്ത് കുമാർ എന്നൊരാൾ പറഞ്ഞതാണെന്നും പറയുന്നു. പി പി പ്രശാന്ത് കുമാർ ആരാണെന്ന കുട്ടികളുടെ ചോദ്യത്തിനു അത് താൻ തന്നെയാണെന്ന് ചെറുപ്പക്കാരൻ (ആസിഫ് അലി) ചിരിയോടെ പറയുന്നു.

പി പി പ്രശാന്ത് കുമാറിന്റെ പെരുമാറ്റം മീരക്ക് ഇഷ്ടപ്പെടുന്നു. മറ്റു ചില ദിവസങ്ങളിലും പ്രശാന്ത് കുമാർ മീരയേയും കൂട്ടുകാരികളേയും കഫേയിൽ വെച്ച് കാണുന്നു. അപ്പോഴും അയാൾ ഇവരെ തമാശ കലർന്ന ഭാഷയിൽ ഉപദേശിക്കുന്നുണ്ട്. കൂട്ടുകാരികൾക്ക് അതിഷ്ടപ്പെടുന്നില്ലെങ്കിലും മീരക്ക് എന്തോ ഒരു താല്പര്യം അയാ‍ളോട് ഉണ്ടാവുന്നു. മറ്റൊരു ദിവസം ഒരു റെസ്റ്റോറന്റിൽ വെച്ച് മീരയും കൂട്ടുകാരികളും പ്രശാന്ത് കുമാറിനെ കാണുന്നു. ഒരുമിച്ച് ഐസ് ക്രീം കഴിച്ച അവർ അടുത്ത പരിചയക്കാരാവുന്നു. മീരയുടേ മൊബെൽ നമ്പർ തന്ത്രത്തിൽ കൈവശപ്പെടുത്താൻ പ്രശാന്ത്കുമാർ ശ്രമിച്ചെങ്കിലും തനിക്ക് മൊബൈൽ ഇല്ലാത്തതുകൊണ്ട് കൂട്ടുകാരിയുടെ നമ്പർ മീര പറയുന്നു. ഒരു ദിവസം പ്രശാന്ത് കുമാർ കൂട്ടുകാരിയുടെ മൊബൈലിലേക്ക് വിളിച്ച് മീരയെക്കുറിച്ച് അന്വേഷിക്കുന്നു. മീരയ്ക്ക് കൌതുകവും ഇഷ്ടവും തോന്നുന്നു. വേണമെങ്കിൽ പ്രശാന്തിനു മീരയുടെ വീട്ടിലെ ലാന്റ് ഫോൺ നമ്പർ കൊടുക്കാമെന്നു പറയുന്നു. പ്രശാന്ത് കുമാറിനെക്കുറിച്ച് മീര തന്റെ ഡയറിയിൽ എഴുതുന്നു.

പ്രശാന്ത് കുമാറിനെ പരിചയപ്പെട്ടതുമുതൽ മീരയിൽ മാറ്റം ഉണ്ടാകുന്നു. ഒറ്റക്കിരിക്കാനും ചിന്തിക്കാനും അച്ഛനിൽ നിന്ന് ഒഴിഞ്ഞുമാറാനുമൊക്കെ അവൾ തുടങ്ങുന്നു. ഒരുദിവസം രാത്രിയിൽ ലാന്റ്ഫോണിൽ ഒരു കാൾ വരുന്നു. അത് അറ്റന്റ് ചെയ്ത മീരയിൽ ഒരു ഭാവമാറ്റം ഉണ്ടാകുന്നു. ഫോണിൽ ആരാണെന്ന അച്ഛന്റെ ചോദ്യത്തിനു അവൾ റോങ്ങ് നമ്പറാണെന്ന് നുണ പറയുന്നു. മീരയുടേ ഈ മാറ്റം ഹരികൃഷ്ണൻ ശ്രദ്ധിക്കാൻ തുടങ്ങുന്നു. മറ്റൊരുദിവസം പകലിൽ സ്ക്കൂൾ സമയത്ത് മീരയെ ഒരു ഷോപ്പിങ്ങ് മാളിന്റെ മുന്നിൽ ഹരികൃഷ്ണൻ കാണുന്നു. അത്ഭുതപ്പെട്ട ഹരികൃഷ്ണൻ അവളറിയാതെ പിന്തുടരുന്നു. മാളിൽ വെച്ച് മീര പ്രശാന്ത് കുമാറുമായി സംസാരിക്കുന്നതും അടുപ്പത്തിൽ ഇടപെടുന്നതും ഹരികൃഷ്ണൻ കാണുന്നു. അത് അയാളെ അസ്വസ്ഥനാക്കുന്നു. മകളിൽ വന്ന ഭാവമാറ്റവും ഈ ചെറുപ്പക്കാരനുമായുള്ള അടുപ്പവും ഹരികൃഷ്ണനെ അസ്വസ്ഥനാക്കുന്നു. ഈ കാര്യം അയാൾ ഡോ. രമേശൂം ഭാര്യയുമായി സംസാരിക്കുന്നു. അന്ന് രാത്രി മദ്യപിച്ച് വീട്ടിലെത്തിയ ഹരികൃഷ്ണൻ മീരയുടേ മുറിയ്ക്കു മുൻപിലെത്തിയപ്പോൾ അവൾ ആരോടോ സംസാരിക്കുന്നതായി കേൾക്കുന്നു. ആരാണെന്നറിയാനുള്ള ആഗ്രഹവും ദ്വേഷ്യവും കൊണ്ട് മീരയുടേ മുറിക്കകത്തേക്ക് കടന്ന ഹരികൃഷ്ണൻ കണ്ടത് മകൾ മീര മൊബൈൽ ഫോണിൽ ആരോടോ സംസാരിക്കുന്നതാണ്. സകല നിയന്ത്രണവും നഷ്ടപ്പെട്ട ഹരികൃഷ്ണൻ മീരയുടേ കവിളത്ത് ആഞ്ഞടിക്കുന്നു ഒപ്പം ആ മൊബൈൽ വാങ്ങി തറയിൽ എറിഞ്ഞ് നശിപ്പിക്കുന്നു.

പിറ്റേ ദിവസം നേരം വെളുത്തത് അപ്രതീക്ഷിതമായൊരു വാർത്തയുമായാണ്. മീരയെ കാണാനില്ല. ഹരികൃഷ്ണനും കാര്യസ്ഥൻ അയ്യപ്പനും (നന്ദു ലാൽ) വീടും പരിസരവും മുഴുവൻ തിരഞ്ഞെങ്കിലും മീരയെ കണ്ടെത്താനായില്ല.

മനക്കൽ തറവാട്ടിലെ കൃഷ്ണനുണ്ണി (കൃഷ്ണ) ഉണ്ണിമായയെ(പ്രതിഷ്ഠ) വിവാഹം കഴിച്ചെങ്കിലും ആദ്യരാത്രിയിൽ തന്നെ അപമൃത്യുവിനു ഇരയാകുന്നു. തന്റെ ജാതകത്തിൽ വിവാഹത്തോടെ മരണയോഗമുണ്ടെന്നും അതിനാൽ വിവാഹം വേണ്ടെന്നു വെയ്ക്കേണ്ടതാണെന്നും ജ്യോത്സർ കൃഷ്ണനുണ്ണിയുടെ അച്ഛൻ നമ്പൂതിരി(കലാശാല ബാബു)യോടും അമ്മ സാവിത്രിയമ്മ(ഊർമ്മിള ഉണ്ണി)യോടും പറഞ്ഞിരുന്നുവെങ്കിലും അവർ അത് മറച്ചു വെച്ചാണ് കൃഷ്ണനുണ്ണിയുടെ വിവാഹം നടത്തിയത്.

വൈധവ്യദോഷങ്ങൾ തറവാടിനുണ്ടെന്നും അത് പരിഹരിക്കാൻ നല്ലൊരു പൂജാരിയെ വരുത്തണമെന്നുമുള്ള ആലോചനയിലാണ് തിരുമേനി പുതുപ്പള്ളി സ്വാമിയാരെ ഇല്ലത്തേക്ക് വിളിക്കുന്നത്. സ്വാമിയാരെ സഹായിക്കാൻ പരികർമ്മിയായി ദേവൻ (ദർശൻ) എന്ന ചെറുപ്പക്കാരനും കൂടെയുണ്ട്. വിധവയായി ഇല്ലത്തെ അകമുറിയിൽ ഇരിക്കുന്ന ഉണ്ണിമായ അപ്രതീക്ഷിതമായി ദേവനെക്കാണുകയും മനസ്സിലൊരു ഇഷ്ടം തോന്നുകയും ചെയ്തു.  ഒരു ദിവസം കുളി കഴിഞ്ഞെത്തിയ ഉണ്ണിമായ കാൽ വഴുതി മുറിയിൽ വീണപ്പോൾ സഹായിക്കാൻ ഓടിയെത്തിയത് ദേവനായിരുന്നു. ദേവനും ഉണ്ണിമായയോട് മനസ്സിൽ ഇഷ്ടം തോന്നുന്നു.

നമ്പൂതിരിയുടേ അനന്തരവൻ ഹരികുമാറും (ടോണി) ഭാര്യ ശ്രീജയും കൽക്കട്ടയിൽ നിന്ന് തറവാട്ടിലെത്തുന്നു. ഉണ്ണിമായയുടെ ഈ അവസ്ഥയോട് ഹരികുമാറിനു സഹതാപവും പൂജാകർമ്മങ്ങളിൽ എതിർപ്പും ഉണ്ടെങ്കിലും അമ്മാവനോടുള്ള സ്നേഹവും ബഹുമാനവും കാരണം അത് കൂടുതലായി പ്രകടിപ്പിക്കുന്നില്ല.

ഇതിനിടയിൽ ഉണ്ണിമായയും ദേവനും തമ്മിൽ അനുരാഗത്തിലാകുന്നു. 41 ദിവസത്തെ പൂജാവേളയിൽ ആഭരണങ്ങളും അലങ്കാരങ്ങളും മാറ്റി വിധവയായി ഇരുട്ടുമുറിയിൽ കഴിയേണ്ട ഉണ്ണിമായ ഒരു ദിവസം തന്റെ തിളങ്ങുന്ന വസ്ത്രങ്ങളും ആഭരണങ്ങളും എടുത്തണിഞ്ഞത് അപ്രതീക്ഷതമായി അച്ഛൻ നമ്പൂതിരി കാണുന്നു. അതയാളെ ക്ഷുഭിതനാക്കുന്നു. വിധവക്കുള്ള ശിക്ഷവിധിക്കുന്നു.

തറവാടിന്റെ ദോഷം തീർക്കുന്ന പൂജാവേളയിലാണ് ഉണ്ണിമായയും പൂജാരിയുടെ സഹായി ദേവനും തമ്മിൽ പ്രണയത്തിലാണെന്ന് തറവാട്ടിലുള്ളവർ അറിയുന്നത്. അത് തറവാട്ടിൽ വലിയൊരു സ്ഫോടനം സൃഷ്ടിക്കുന്നു.

ആലപ്പുഴ പട്ടണത്തിന്റെ പ്രാന്തപ്രദേശത്തെ പ്രാരാബ്ദക്കാരനായൊരു ഓട്ടോഡ്രൈവറാണ് കൊങ്കണിജാതിയിൽ‌പ്പെട്ട കൃഷ്ണ ബാലു (ഫഹദ് ഫാസിൽ) ഒരു ദിവസം (11.11.11) രാവിലെ തന്റെ ഓട്ടോറിക്ഷാ ഡ്രൈവർ ജോലിക്ക് പോകാനൊരുങ്ങുന്ന ബാലുവിന്റെ വീടിന്റെ മേൽക്കുര ഒരു ചക്ക വീണ് തകരുന്നു. പപ്പടം ഉണ്ടാക്കി ജീവിക്കുന്ന മാതാപിതാക്കളും ഓട്ടൊ ഓടിച്ചു കിട്ടൂന്ന തുച്ഛവരുമാനവുമുള്ള പ്രാരാബ്ദ കുടൂംബം അതിൽ വ്യസനിക്കുന്നു.

അതേ ദിവസം കായൽ പ്രദേശത്തു നിന്ന്  ആലപ്പുഴ പട്ടണത്തിലേക്കുള്ള ഒരു ബോട്ട് യാത്രയിൽ വൃദ്ധനായ പുരുഷുവും (നെടുമുടിവേണു) കുടുംബവുമുണ്ട്. തന്റെ ചെറുമകൾ അശ്വതിയുടെ വിവാഹത്തിനു വസ്ത്രങ്ങളും സ്വർണ്ണാഭരണങ്ങളും വാങ്ങാനുള്ള യാത്രയിലാണ് അവർ. പിറന്നുവീണ തന്റെ കുഞ്ഞിനെക്കാണാനുള്ള ആഗ്രഹവുമായി സർക്കാരാശുപത്രിയിലേക്ക് ഒരു കർഷകനായ ചെറുപ്പക്കാരനുമുണ്ട് ബോട്ടിൽ.ഒപ്പം നഗരത്തിലെ കോളേജിൽ പഠിക്കാനെത്തുന്ന ജിൻസി എന്ന കോളേജ് വിദ്യാർത്ഥിനിയുമുണ്ട്.

പുരുഷുവും കുടൂംബവും നഗരത്തിൽ പർച്ചേസിങ്ങ് നടത്തവെ വിവാഹിതയാകാൻ പോകുന്ന അശ്വതിക്ക് (നിമിഷ) ഭാവിവരൻ ജയകൃഷ്ണന്റെ (ടിനി ടോം) ഫോൺ കോളുകൾ ഇടക്ക് വരുന്നുണ്ട്. ജയകൃഷ്ണനും നഗരത്തിൽ ഷോപ്പിങ്ങിനു വന്നതാണ്.

നഗരത്തിലൊരിടത്ത് ഒരു ഓർഫനേജിലേക്കുള്ള യാത്രയിൽ സമ്പന്നരായ അരുണും (പ്രകാശ് ബാരെ) ഭാര്യ പാർവ്വതി(ആശാ ശരത്)യും തങ്ങളുടെ കുഞ്ഞില്ലാത്ത അവസ്ഥയെക്കുറിച്ച് വേവലാതിപ്പെടുന്നു. ദത്തെടുക്കുന്നതിൽ അരുണിനു അത്ര തൃപ്തിയില്ലെങ്കിലും പാർവ്വതിയുടെ നിർബന്ധവും വാശിയും അയാളെ സമ്മതിപ്പിക്കുന്നു. പക്ഷെ ഓർഫനേജിൽ വെച്ച് അവർ സബ്മിറ്റ് ചെയ്ത പേപ്പേഴ്സിൽ പ്രധാനപ്പെട്ടൊരു സർട്ടിഫിക്കറ്റ് ഇല്ലാത്തതിനാൽ നിയമ തടസ്സമുണ്ടെന്ന് ഓർഫനേജ് ഉടമ പറയുന്നു. അതിനു പരിഹാരമായി ഇടവകയിലെ പള്ളിവികാരി ഫാദർ പോളച്ചനുമായി(മണികണ്ഠൻ) ബന്ധപ്പെടാൻ അരുണിനും ഭാര്യക്കും അവസരമൊരുക്കുന്നു. ഫാദർ പോളച്ചൻ ഈ പ്രശ്നത്തെ രമ്യമായി പരിഹരിച്ചു തരാമെന്നു പറയുന്നു.

പുരുഷുവും കുടുംബവും നഗരത്തിലെ ഷോപ്പിങ്ങ് കഴിഞ്ഞ് ഉച്ചയൂണ് കഴിക്കാൻ കയറുന്നു. ഭാവിവരൻ ജയകൃഷ്ണന്റെ നിരന്തരമായ ഫോൺ കാരണം പുരുഷു അശ്വതിയുടേ മൊബൈൽ തന്റെ ബാഗിൽ ഒളിപ്പിച്ചു വെക്കുന്നു. തിരികെ മറ്റൊരു ഷോപ്പിലേക്ക് പോകാൻ വേണ്ടി അവർ ഒരു ഓട്ടൊറിക്ഷയിൽ കയറുന്നു. ബാലുവിന്റെ ഓട്ടോറിക്ഷയായിരുന്നു അത്. ഓട്ടോ ചാർജ്ജിനെപ്പറ്റി ബാലുവും പുരുഷുവും ചെറിയ തർക്കമുണ്ടാവുന്നു. ജയകൃഷ്ണൻ തന്റെ വീട്ടിലേക്കുള്ള വിവാ‍ഹ സാധനങ്ങളും വാങ്ങി വരുമ്പോൾ ബാലുവിന്റെ ഓട്ടോ കാണുകയും അതിൽ വീട്ടിലേക്ക് പുറപ്പെടുകയും ചെയ്യുന്നു. യാത്രാമദ്ധ്യേ ജയകൃഷ്ണൻ അശ്വതിയെ പല പ്രാവശ്യം വിളിക്കുന്നുണ്ടെങ്കിലും മൊബൈലിൽ കിട്ടുന്നില്ല.

ഇതിനിടയിൽ രാവിലെ വന്ന ബോട്ടിനു ചെറിയൊരു തകരാറുണ്ടെന്നതിനാൽ അത് റിപ്പയർ ചെയ്യാൻ സ്റ്റേഷൻ മാസ്റ്ററുമായി ബോട്ടിന്റെ ജീവനക്കാർ ബന്ധപ്പെടുന്നു. ബോട്ട് റിപ്പർ ചെയ്യാനൊരുങ്ങുന്നു. എന്നാൽ പിടിവാശിക്കാരനും മദ്യപാനുമായ റിപ്പയർ പപ്പൻ ബോട്ടിന്റെ പണി വൈകിക്കുന്നു.

ഇതിനിടയിൽ പുരുഷുവിന്റെ കയ്യിലുണ്ടായിരുന്ന സ്വർണ്ണാഭരണങ്ങളടങ്ങിയ ബാഗ് കാണാതാകുന്നു. അത് ഓട്ടോയിൽ വെച്ച് മറന്നു പോയതാണെന്ന് അനുമാനിക്കുന്നു. സ്ഥലം സർക്കിൾ ഇൻസ്പെക്ടറുടെ(വിജയരാഘവൻ) നേതൃത്വത്തിൽ ഓട്ടോക്കാരനെ കണ്ടുപിടിക്കാൻ അന്വേഷണം തുടങ്ങുന്നു.

യാദൃശ്ചികമായി തന്റെ ഓട്ടൊയിൽ നിന്ന് ബാഗും സ്വർണ്ണവും കണ്ട ബാലു അത് സ്വന്തമാക്കാനാഗ്രഹിക്കുന്നു. തന്റെ സാമ്പത്തിക പ്രശ്നങ്ങൾ അതോടെ തീരുമെന്ന് കരുതുന്ന ബാലു ആ ബാഗ് വീട്ടിൽ ഒളിപ്പിച്ചു വെക്കുന്നു.

നഗരം സന്ധ്യയാകുന്നതോടെ പലരും കൂടണയാൻ ശ്രമിക്കുകയാണ്. അതിനിടയിൽ നഗരത്തിൽ പല ആകസ്മിക സംഭവങ്ങൾ നടക്കുന്നു. പരസ്പരബന്ധിതമല്ലാത്ത ആളുകൾ പലപ്പോഴായി കൂട്ടിമുട്ടേണ്ടിവരികയും നന്മതിന്മകളുടെ മാറ്റങ്ങളായും ജനന മരണങ്ങളുടെ ജീവിത സ്വപ്നങ്ങളുടെ കയറ്റിറക്കങ്ങളായും. സന്ധ്യ കനക്കുന്നതോടെ പലരും ജെട്ടിയിൽ നിന്നുള്ള അവസാനത്തെ ബോട്ടിൽ വീടുകളിലേക്ക് യാത്രയാവുകയാണ്.

ദുബായിൽ യാതൊരു സാമ്പത്തിക അച്ചടക്കമില്ലാതെ അടിച്ചുപൊളിച്ച് ജീവിതം നയിക്കുന്ന ഡോക്ടറാണ് അരുൺകുമാർ (ഫഹദ് ഫാസിൽ) അവിവാഹിതനായ അരുൺ കുമാർ ഉത്സാഹഭരിതനായ അരുൺകുമാർ പൊതുവേ എല്ലാവരുടേയും പ്രീതി സമ്പാദിക്കുന്ന വ്യക്തിയാണ്. യാദൃശ്ചികമായി തന്റെ ആശുപത്രിയിൽ ആദ്യമായി ജോലിക്കെത്തുന്ന ലക്ഷ്മി (ഗൗതമി നായർ) എന്ന തമിഴ് നാട് സ്വദേശിയായ നഴ്സിനെ പരിചയപ്പെടുന്നു. ലക്ഷ്മിയുടെ സ്മാർട്ട്നസ്സ് അരുൺകുമാറിനു ഇഷ്ടപ്പെടുന്നു. പതിയെ ഇരുവരും പ്രണയത്തിലാകുന്നു. അരുണിന്റെ സഹോദരി തുല്യയായ സുഹൃത്തും സീനിയർ ഡോക്ടറുമാണ് സാവിത്രി അക്ക (രോഹിണി) പല ഘട്ടങ്ങളിലും സാവിത്രി അരുണിനെ ഉപദേശിക്കുകയും സാമ്പത്തികമായി സഹായിക്കുകയും ചെയ്യുന്നുണ്ട്. കൂടാതെ നാട്ടുകാരനായ വേണുവേട്ടൻ(ശ്രീനിവാസൻ) അരുണിന്റെ ദുബായിലെ പരിചയക്കാരനാണ്. അരുണിന്റെ ജീവിതം പക്ഷെ ഒരു ഘട്ടത്തിൽ അതീവ സാമ്പത്തിക പ്രതിസന്ധിയിലാകുന്നു. പ്രൈവറ്റ് ബാങ്കിലെ ക്രെഡിറ്റ് കാർഡ് ലിമിറ്റ് കവിഞ്ഞതിനാൽ ബാങ്കിൽ നിന്നും വാണിങ്ങുകൾ ലഭിക്കുകയും പ്രതിസന്ധിയിലാകുകയും ചെയ്യുന്നു.ആ സമയത്താണ് നാട്ടിലുള്ള അമ്മക്ക് അസുഖം കൂടിയെന്നും ആശുപത്രിയിലാണെന്നും വിവരം അറിയുന്നത്. പക്ഷെ ബാങ്കുകളുമായി സാമ്പത്തിക ബാദ്ധ്യതയുള്ളതിനാൽ അത് തീർക്കാതെ നാട്ടിലേക്ക് മടങ്ങാനാവില്ലായിരുന്നു അരുണിന്. ബാങ്ക് മാനേജറുമായി (മണിയൻ പിള്ള രാജു) സംസാരിക്കുകയും ബാങ്ക് മാനേജർ, അരുണിന്റെ പ്രതിസന്ധി താൽകാലികമായി പരിഹരിക്കുകയും നാട്ടിലേക്ക് പോകാനുള്ള അവസരം ഒരുക്കിക്കൊടുക്കുകയും ചെയ്യുന്നു. നാട്ടിലെത്തിയ അരുൺ അമ്മയെ കാണുകയും കളിക്കൂട്ടൂകാരനുമായി ദിവസങ്ങൾ ചിലവിടുന്നു. അതിനിടയിൽ ബാങ്ക് മാനേജർ തന്റെ തറവാട്ടിൽ നിന്ന് ഒരു വിവാഹാലോചനയുമായി അരുണിന്റെ വീടുമായി ബന്ധപ്പെടുന്നു.അരുണിന്റെ സാമ്പത്തിക പ്രതിസന്ധിയും, അമ്മയുടെ സമ്മർദ്ദവും സങ്കടവും അരുണിനെ ആശയക്കുഴപ്പത്തിലാക്കുന്നു. കലാമണ്ഠലം രാജശ്രീ (അനുശ്രീ) എന്ന പെൺകുട്ടിയുമായി വിവാഹ നിശ്ചയം നടത്തുന്നു. അതിനിടയിൽ ദുബായിൽ നിന്ന് അരുണിന്റെ കാമുകി ലക്ഷ്മി അരുണിനെ ഫോണിൽ വിളിക്കുന്നു. വിഷമത്തിലും പ്രതിസന്ധിയിലുമായ അരുൺ തന്റെ വിവാഹ വിവരം ലക്ഷ്മിയോട് മറച്ചു വെക്കുന്നു. പക്ഷേ, അരുണിന്റെ ഓരോ തീരുമാനങ്ങളും പിന്നീടുള്ള ജീവിതവും പ്രതിസന്ധികളെ അഴിക്കുകയല്ല മറിച്ച് ഓരോ പ്രശ്നങ്ങളിലേക്ക് കുരുക്കുകയാണ് ചെയ്തത്.