ഫാമിലി/ഡ്രാമാ/ത്രില്ലർ

നഗരത്തിലെ തോപ്പിൽ ശാലയെന്ന മാലിന്യ നിക്ഷേപത്തിൽ നിന്ന് ഉപേക്ഷിക്കപ്പെട്ട വസ്തുക്കൾ പെറുക്കിയെടുത്ത് ചില കൌതുകവസ്തുക്കളുണ്ടാക്കി കടപ്പുറത്ത് കൊണ്ടു നടന്ന് വിൽക്കുന്ന വെറുമൊരു സാധാരണക്കാരനാണ് വിഷ്ണു, ഭാര്യ രമണിയും രോഗിയായ അമ്മയും രണ്ടു പെൺകുട്ടികളുമടങ്ങുന്ന ദരിദ്ര കുടുംബമാണയാളുടേത്. മുൻപ് പലിശക്കാശിനാൽ ഓട്ടോയെടുത്തെങ്കിലും അത് ഫലവത്തായില്ല മുതലും പലിശയുമായി രണ്ട് ലക്ഷത്തിലധികം തുക നഗരത്തിലെ പലിശക്കാരനും ഗുണ്ടാനേതാവുമായി വാട്ട്സണു കൊടുക്കാനുമുണ്ട്. നഗരത്തിനടുത്തുള്ള അഗ്രഹാരത്തെരുവിലെ സുന്ദര സ്വാമിയുടെ വാടകവീട്ടിലാണ് വിഷ്ണുവും കുടുംബവും താമസിക്കുന്നത്. കുറച്ചു നാളുകളായി നഗരത്തിൽ വലിയൊരു കൊലപാതക പരമ്പര തന്നെ സംഭവിക്കുന്നു. നഗരത്തിൽ ഒറ്റക്ക് താമസിക്കുന്ന വൃദ്ധരെ കേന്ദ്രീകരിച്ചായിരുന്നു കൊലപാതകവും മോഷണവും. ഈ കേസുകളുടെ ചുമതല സിറ്റി പോലീസ് കമ്മീഷണർ ടോം ചെറിയാൻ ആയിരുന്നു. പക്ഷെ സ്കോട്ട് ലാന്റിലെ പോലീസ് പരിശീലനം ഉള്ള ടോമിനു കേസിനു തുമ്പുണ്ടാക്കാൻ കഴിയുന്നില്ല.

നഗരത്തിലെ ഒരു ആശുപത്രിയുടെ ഉടമയായ അജയ് കുര്യൻ പ്രത്യേക മാനസികാവസ്ഥയുള്ളയാളാണ്. ബോളിവുഡിൽ മുൻ ബി ഗ്രേഡ് ചിത്രങ്ങളിലഭിനയിച്ച ഭാര്യ മാധുരിയുമായി അയാൾ സ്വരച്ചേർച്ചയിലല്ല. മകനെയോർത്ത് മാധുരി അയാളുടെ എല്ലാ പീഡനങ്ങളും സഹിച്ച് കഴിയുന്നു. മാധുരിക്ക് തന്റെ വിഷമങ്ങൾ പറയാൻ സാധിക്കുന്നത് മുംബൈയിലെ തന്റെ പഴയ സുഹൃത്തും ഫെമിനിസ്റ്റുമായ ടി വി റിപ്പോർട്ടർ രൂപയോടാണ്. ഇതിനിടയിൽ മാധുരിയുടെ മൊബൈലിലേക്ക് പലപ്പോഴും ഒരു ചെറുപ്പക്കാരൻ വിളിക്കുന്നു. ഉത്തരേന്ത്യക്കാരനായ ആ ചെറുപ്പക്കാരനു മാധുരിയുമായി ബന്ധം സ്ഥാപിക്കാനാണു ആഗ്രഹം. പക്ഷെ മാധുരി ആദ്യമൊക്കെ അതിനെ എതിർത്തു നിൽക്കുന്നു. ഒടുവിൽ തന്റെ സ്വാതന്ത്ര്യം തടവിലാക്കിയ ഭർത്താവിനോടുള്ള പ്രതികാരത്തിൽ അവനുമായി ഫോണിലൂടെ ചങ്ങാത്തം ആരംഭിക്കുന്നു. അവൻ വിടുകയാണെന്നും അതിനു മുന്നേ മാധുരിക്കൊപ്പം ഒരു ഡിന്നർ കഴിക്കണമെന്നും അയാൾ പറയുന്നു. ആദ്യം മടിക്കുന്നുവെങ്കിലും പിന്നീട് മാധുരി അതിനു സമ്മതിക്കുന്നു. ഒടുവിൽ തന്റെ അമ്മയുടെ വീട്ടിൽ വച്ച് കാണാമെന്ന് അവൾ അവനെ അറിയിക്കുന്നു. ഇതിനിടയിൽ വാട്ട്സന്റെ ഗുണ്ടകൾ പണത്തിനുവേണ്ടി വിഷ്ണുവിനെ ഉപദ്രവിക്കാൻ തുടങ്ങി. തന്റെ എല്ലാ സാമ്പത്തിക ബാദ്ധ്യതയും  തീർക്കാൻ വേണ്ടി എങ്ങിനേയും പണമുണ്ടാക്കാൻ ശ്രമിക്കുന്നു. ഒരു വൃദ്ധ ഒറ്റക്ക് താ‍മസിക്കുന്ന വീട്ടിൽ മോഷണത്തിനു കയറുന്ന വിഷ്ണു എത്തിപ്പെടുന്നത് മാധുരിയുടെ അമ്മ താമസിക്കുന്ന വീട്ടിലാണ്.

അപ്രതീക്ഷിക്തമായി  വിഷ്ണു കടന്നു വരുമ്പോൾ ആ ചെറുപ്പക്കാരനും വിഷ്ണുവും തമ്മിൽ പിടിവലിയുണ്ടാകുന്നു. ഒരു പ്രതിമ തലയിൽ വീണ് അയാൾ മരിക്കുന്നു. ആ ചെറുപ്പക്കാരനെ വാട്ട്സണൊപ്പം കണ്ടിട്ടുള്ള വിഷ്ണു, തിരച്ചിലിനിടയിൽ മാധുരിയുടെ മുറിയിൽ നിന്ന് ഒരു ഒളിക്യാമറ കണ്ടെത്തുന്നു. മോഷ്ടിക്കാൻ വന്നതാണു താനെന്ന് തുറന്നു പറയുന്ന വിഷ്ണു, ആ ശവശരീരം തോപ്പിൽ ശാലയിൽ മറവ് ചെയ്യാൻ മാധുരിയെ സഹായിക്കുന്നു. അതേ ദിവസം തന്നെ മാധുരിയുടെ അമ്മയുടെ വീടിനടുത്ത വീട്ടിൽ ഒരു കൊലപാതകം സംഭവിക്കുന്നു. അതോടെ ടോം ചെറിയാന്റെ മുകളിൽ സമ്മർദ്ദമേറുന്നു.  എന്നാൽ ആ ചെറുപ്പക്കാരന്റെ മരണത്തിന്റെ പേരിൽ മാധുരിയുടെ മനസ്സിൽ കുറ്റബോധം തോന്നി തുടങ്ങുന്നു. സംഭവിച്ചതെല്ലാം അവൾ രൂപയോട് പറയുന്നു. അവൾ രൂപയുടെ വീട്ടിൽ ചെല്ലുന്ന സമയം ടോം അവിടെ ഉണ്ടായിരുന്നുവെങ്കിലും അയാൾ ഒന്നും അറിയുന്നില്ല. അജയിന്റെ സുഹൃത്തു കൂടിയായ ടോം വീട്ടിൽ ഡിന്നറിനായി എത്തുന്നു. താൻ രൂപയെ വിവാഹാം ചെയ്യുന്ന കാര്യം ടോം ഡിന്നറിനിടയിൽ പറയുന്നതോടെ മാധുരി ആകെ അങ്കലാപ്പിലാകുന്നു. 

കോഴിക്കോട് നഗരപ്രാന്തത്തിലെ ഫുട്ബോള്‍ കളിക്കാരായ ഏഴു സുഹൃത്തുക്കളാണ് ശ്യാം (കുഞ്ചാക്കോ ബോബന്‍) ആസിഫ് അലി (സൂരജ്) നിവിന്‍ പോളി (ഷൌക്കത്ത്) വിജേഷ് (സന്തോഷ്)‌ രജിത് മേനോന്‍ (ശരത്) അജു (അരുണ്‍) സ്റ്റേറ്റ് ടീമില്‍ സെലക്ഷന്‍ കിട്ടാതെ പോയ ഇവരുടെ മുന്നിലേക്ക് ഫുട്ബോള്‍ ട്രെയിനറൂം സിറ്റി ട്രൈക്കേഴ്സ് ഉടമസ്തരുമായ ഉസ്മാന്‍ കോയ(മാമുക്കോയ)യും, കണാരനും (വിജയന്‍ കാരന്തൂര്‍) ഫൈനല്‍ ദിവസം ഒരു ആവശ്യവുമായി വരുന്നു. ഫൈനലില്‍ വരുന്ന എതിര്‍ ടീമിലെ പതിനൊന്നാം നമ്പര്‍ കളിക്കാരന്‍ കളിക്കിടെ തങ്ങളുടെ ടീമിലെ പലരേയും ആക്രമിക്കുന്നുവെന്നും അതുകൊണ്ട് അവനെ പ്രതിരോധിക്കാന്‍ ഈ ഏഴുപേരും ഫൈനല്‍ കളിക്കണമെന്നും. തങ്ങള്‍ ഏഴു പേരുടേ ഡിമാന്റ് അംഗീകരിച്ചതുകൊണ്ട് ഫൈനല്‍ ഇറങ്ങുന്ന ഈ ഏഴു ആത്മാര്‍ത്ഥസുഹൃത്തുക്കളെ കണ്ട് എതിര്‍ ടീമിലെ 11ആം നമ്പര്‍ കളിക്കാരന്‍ ജസ്ഴി മറ്റൊരു പുതുമുഖ കളിക്കാരന്‍ അരവിന്ദനു (വിനീത് കുമാര്‍) കൈമാറി കളിക്കളത്തില്‍ നിന്നും പിന്മാറുന്നു. ഇവരുടെ നീക്കം അറിയാത്ത ഈ ഏഴു സുഹൃത്തുക്കളും കളിക്കിടെ പതിനൊന്നാം നമ്പര്‍ ഫുട്ബോളറെ ആക്രമിക്കുന്നു. ഗ്രൌണ്ടില്‍ തലയടിച്ച് വീണ്‍ ഗുരുതരമായി പരിക്കേറ്റ് പുതുമുഖ കളിക്കാരന്‍ അരവിന്ദന്‍ ആശുപത്രിയിലാവുന്നു. തങ്ങള്‍ ചെയ്തത് ആളുമാറിയാണെന്ന് തിരിച്ചറിഞ്ഞ ഈ ഏഴുപേരും പശ്ചാത്താപം കൊണ്ട് ദരിദ്രനായ അരവിന്ദന്റെ ചികിത്സാ ചിലവിനു വേണ്ടി പണം സമ്പാദിക്കാന്‍ വേണ്ടി തുനിഞ്ഞിറങ്ങുന്നു. ഇവരുടേ അവസ്ഥകണ്ട് സഹായിക്കാന്‍ എത്തിയ ബ്രോക്കര്‍ ഹബീബ് (മണിയന്‍ പിള്ള രാജു) ഒരു ക്വൊട്ടേഷന്‍ പണി ഏല്‍പ്പിക്കുന്നു. ഇതിനോട് താല്പര്യമില്ലാത്ത ഈ ഏഴുപേരും ആദ്യം അതിനു തയ്യാറായില്ലെങ്കിലും പണത്തിന്റെ ആവശ്യം കൊണ്ട് അത് ചെയ്യുന്നു.

ഇതിനിടയില്‍ ഒരു ഷൂ സ്റ്റോഴ്സിലെ സെയിത്സ് ഗേള്‍ ഗൌരി(ഭാമ)യുമായി പ്രണയത്തിലാകുന്നു ശ്യാം. പക്ഷെ ഒരു ഗുണ്ടയായ അവളുടേ സഹോദരന്‍ (മിഥുന്‍) ശ്യാമിനെ ശാരീരികമായി ആക്രമിക്കുന്നു.

വീണ്ടും ഒരു സാമ്പത്തികാവശ്യത്തിനായി ഈ ഏഴു പേരും ഹബീബ് പറഞ്ഞതനുസരിച്ച് മറ്റൊരു ക്വട്ടേഷന്‍ ജോലിക്കിറങ്ങുന്നു. അത്തവണ നഗരത്തിലെ കുപ്രസിദ്ധ ഗുണ്ടാ നേതാവ് ബേപ്പൂര്‍ പ്രഭാകരന്റെ അനിയനും സംഘത്തിനും നേരെയായിരുന്നു. ശേഷം മറ്റൊരു ക്വട്ടേഷന്‍ ജോലിയുമായി ഹബീബ് വരുന്നുവെങ്കിലും അവര്‍ അത് സ്വീകരിക്കുന്നില്ല. പക്ഷെ നല്ല ഒരു തുക ഓഫര്‍ ആയതുകൊണ്ടും സാമ്പത്തികമായി ആവശ്യമുള്ളതുകൊണ്ടും ഈയൊരു പ്രാവശ്യം കൂടി ഇത് ചെയ്ത് അവസാനിപ്പിക്കാം എന്ന തീരുമാനത്തില്‍ അവര്‍ ആ ജോലി ചെയ്യാന്‍ തയ്യാറാവുന്നു. വാഹന വില്പന കേസില്‍ കള്ളത്തരം ചെയ്ത ഒരു വ്യക്തിയെ ഒരു ഗ്യാങ്ങിനു ഏല്‍പ്പിച്ച് കൊടുക്കുക എന്നതായിരുന്നു ക്വട്ടേഷന്‍.  ഒരു റെയില്‍ വേ ഗേറ്റില്‍ വെച്ച് അവരത് ഭംഗിയായി ചെയ്യുന്നെങ്കിലും അപ്രതീക്ഷിതമായി ആ വ്യക്തി കൊല ചെയ്യപ്പെടുന്നു. ഏഴംഗ സംഘം അതൊരിക്കലും പ്രതീക്ഷിച്ചിരുന്നില്ല. ആ കൊലപാതകത്തില്‍ ഈ ഏഴംഗസംഘം കുറ്റാരോപിതരാക്കുന്നു. തങ്ങളുടേ നിരപരാധിത്വം വെളിപ്പെടുത്താനും കൊലപാതകികളില്‍ നിന്ന് രക്ഷപ്പെടാനും അവര്‍ സിറ്റി പോലീസ് കമ്മീഷണര്‍  അമല വിഷ്ണുനാഥിനെ (നാദിയാ മൊയ്തു) സമീപിക്കുന്നു. പോലീസ് അധികാരികളും മീഡിയയും ഈ ഏഴുപേരാണ് കൊലപാതകികള്‍ എന്ന് ആരോപിക്കുന്നു. അത് മൂലം അവരുടെ ജീവിതത്തില്‍ അപ്രതീക്ഷിത സംഭവങ്ങള്‍ ഉണ്ടാക്കുന്നു.

പ്രേതബാധയുണ്ടെന്ന് വിശ്വസിക്കപ്പെടുന്ന മാടമ്പള്ളി തറവാട്ടിലേക്ക് താമസത്തിനു വരുന്ന യുവദമ്പതികളാണു നകുലനും (സുരേഷ് ഗോപി) ഗംഗയും (ശോഭന). അതു വരെ അവിടത്തെ കാര്യങ്ങൾ അന്വേഷിച്ചിരുന്നത് നകുലന്റെ കുഞ്ഞമ്മയായ ഭാസുരയുടെ (കെപി‌എസി ലളിത) ഭർത്താവ് ഉണ്ണിത്താനായിരുന്നു (ഇന്നസെന്റ്). സഹോദരനായ തന്നെ ഏല്‍പ്പിക്കാതെ ബന്ധുവായ ഉണ്ണിത്താനെ കാര്യങ്ങൾ നകുലന്റെ അമ്മ ഏല്‍പ്പിച്ചതിൽ  അമ്മാവനായ തമ്പിക്ക് (നെടുമുടി വേണു) വിഷമമുണ്ട്. അതു പോലെ തമ്പിയുടെ മകളും നകുലന്റെ മുറപെണ്ണുമായ ചൊവ്വാ ദോഷമുള്ള ശ്രീദേവിയെ (വിനയ പ്രസാദ്) നകുലനെ കൊണ്ട് വിവാഹം കഴിപ്പിക്കാൻ കരുതിയിരുന്നെങ്കിലും നകുലന്റെ അമ്മയുടെ എതിർപ്പിനാൽ അത് നടന്നിരുന്നില്ല. എങ്കിലും വിവാഹത്തിനു ശേഷം ആദ്യമായി നാട്ടിലേക്ക് വരുന്ന നകുലനേയും ഗംഗയേയും എല്ലാവരും സന്തോഷത്തോടെ സ്വീകരിക്കുന്നു. പ്രേതബാധയുള്ള മാടമ്പള്ളിയിൽ താമസിക്കേണ്ടെന്ന താക്കീത് വില വെക്കാതെ നകുലനും ഗംഗയും അവിടെ താമസമാരംഭിക്കുന്നു.
 
തമ്പിയുടേയും ഭാസുരയുടേയും മകളായ അല്ലിക്ക് (രുദ്ര) കോളേജ് അധ്യാപകനും അറിയപ്പെടുന്ന എഴുത്തുകാരനുമായ മഹാദേവനുമായി (ശ്രീധർ) വിവാഹം നിശ്ചയിച്ചിരിക്കുകയാണ്. മാടമ്പള്ളിയുടെ അടുത്തുള്ള മഹാദേവന്റെ വീട് മഹാദേവന്റെ കൃതികളെ ഇഷ്ടപെടുന്ന ഗംഗക്ക് അല്ലി കാണിച്ചു കൊടുക്കുന്നു. തന്റെ പുസ്തകങ്ങൾ സൂക്ഷിക്കാനായി മുറി അന്ന്വേഷിക്കുന്ന ഗംഗ കണ്ടെത്തുന്ന് മന്ത്രവിധികളാൽ പൂട്ടിയിരിക്കുന്ന തെക്കിനിയാണ്. പരേതാത്മാക്കൾ വസിക്കുന്ന അവിടം തുറക്കരുതെന്ന തമ്പിയുടെ ഉപദേശം അവഗണിച്ച് ഗംഗ അല്ലിയുടേയും തമ്പിയുടെ മകനായ ചന്തുവിന്റേയും(സുധീഷ്) സഹാ‍യത്തോടെ മറ്റൊരു താക്കോൽ പണിയിച്ച് അത് തുറന്ന് അവിടം വൃത്തിയാക്കുന്നു. തെക്കിനി തുറന്നതോടെ പല അനർത്ഥങ്ങളും സംഭവിക്കാനാരംഭിക്കുന്നു. ഇതറിഞ്ഞ ശ്രീദേവി ചന്തുവുമായി നിർബന്ധമായി തന്നെ മാടമ്പള്ളിയിലേക്ക് താമസം മാറ്റുന്നു. തമ്പി മന്ത്രവാദിയായ കാട്ടുമ്പറമ്പനും (കുതിരവട്ടം പപ്പു) ദാസപ്പൻ‌കുട്ടിയും (ഗണേഷ്) ചേർന്ന് രാത്രിയിൽ തെക്കിനി വീണ്ടും പൂട്ടാൻ വരുന്നെങ്കിലും അവിടെ നിന്നിറങ്ങി വരുന്ന നാഗവല്ലിയുടെ പ്രേതത്തിനെ ഭയന്ന് ഓടി രക്ഷപ്പെടുന്നു.
 
വർഷങ്ങൾക്കു മുമ്പ് മാടമ്പള്ളിയിലെ ഒരു കാ‍രണവർ തമിഴ് നാട്ടിൽ നിന്നു കൊണ്ടുവന്ന ഒരു നൃത്തക്കാരിയാണ് നാഗവല്ലി. പക്ഷേ, നാഗവല്ലി ഇപ്പോൾ മഹാദേവൻ താമസിക്കുന്ന വീട്ടിൽ താമസിച്ചിരുന്ന നർത്തകനായ രാമനാഥനുമായി അടുപ്പത്തിലാകുന്നു. ഇതറിയുന്ന കാരണവർ നാഗവല്ലിയേയും രാമനാഥനേയും വധിക്കുന്നു. നാഗവല്ലിയുടെ പ്രേതം കാരണവരെ വധിക്കാൻ ശ്രമിക്കുന്നെങ്കിലും കാരണവർ മന്ത്രവാദികളെ ഉപയോഗിച്ച് നാഗവല്ലിയെ തെക്കിനിയിൽ ബന്ധിക്കുന്നു. എങ്കിലും കാരണവർ പിന്നീട് ഒരപകടമരണത്തിലൂടെ കൊല്ലപ്പെടുന്നതു കൊണ്ട് കാരണവരുടെ പ്രേതത്തേയും തെക്കിനിയിൽ ബന്ധിച്ചിരിക്കുകയാണ്. പഴങ്കഥകളെ ഇഷ്ടപ്പെടുന്ന ഗംഗ ഈ കഥകളെല്ലാം ഭാസുരകുഞ്ഞമ്മയിൽ നിന്നും അറിയുന്നു.
 
മാടമ്പള്ളിയിൽ നടക്കുന്ന പല അനർത്ഥങ്ങൾക്കും കാരണമായി എല്ലാവരുടേയും സംശയത്തിന്റെ മുന നീളുന്നത് ശ്രീദേവിയിലേക്കാണ്. അവിവാഹിതയായ ശ്രീദേവി ഇത്രയും നാൾ പുറത്തിറങ്ങാതെ വീട്ടിൽ തന്നെയിരുന്നിട്ട് പെട്ടെന്ന് കാര്യങ്ങളിൽ ഇടപെടുന്നത് എല്ലാവരിലും സംശയം ജനിപ്പിക്കുന്നു. പാത്രങ്ങൾ തകരുക, അല്ലിയെ ശ്വാസം ലഭിക്കാത്ത മുറിയിൽ പൂട്ടിയിടുക, ഗംഗയുടെ സാരിക്കു തീ പിടിക്കുക തുടങ്ങിയ പല പല സംഭവങ്ങൾ നടക്കുന്നതോടെ നകുലൻ സുഹൃത്തായ മനശാസ്ത്രജ്ഞൻ സണ്ണിയെ അമ്മാവന്റെ എതിർപ്പോടെയാണെങ്കിലും വരുത്താൻ തീരുമാനിക്കുന്നു. മനശസ്ത്രത്തിൽ പ്രശസ്തമായ ധാരാളം പ്രബന്ധങ്ങൾ അവതരിപ്പിച്ചിട്ടുള്ള സണ്ണി അമേരിക്കയിലെ പ്രശസ്ത മനശാസ്ത്രജ്ഞനായ ബ്രാഡ്‌ലിയുടെ ശിഷ്യനുമാണ്. നകുലന്റെ ആവശ്യപ്രകാരം സണ്ണി മാടമ്പള്ളിയിൽ എത്തുന്നു. തന്റേതായ രീതിയിൽ അന്ന്വേഷണം ആരംഭിക്കുന്ന സണ്ണിയെ നകുലനും ഗംഗക്കും ഒഴികെ ആർക്കും തന്നെയിഷ്ടപ്പെടുന്നില്ല.