നമ്പർ 66 മധുര ബസ്സ്

കൊല്ലം കെ എസ് ആർ ടി സി സ്റ്റാൻഡിലെ നിന്ന് എല്ലാ ദിവസവും പുലർച്ചെ 5 മണിക്ക് തമിഴ് നാട്ടിലെ മധുരയിലേക്ക് ഒരു ഫാസ്റ്റ് പാസഞ്ചർ ബസ്സ് പുറപ്പെടുന്നുണ്ട്. പുനലൂർ, ചെങ്കോട്ട, തെങ്കാശി വഴി പുറപ്പെടുന്ന മധുര ബസ്സിലേക്ക് പുനലൂർ സ്റ്റാൻഡിൽ നിന്ന് വരദരാജൻ (പശുപതി) എന്നൊരാൾ കയറുന്നു. ബസ് സ്റ്റാൻഡിൽ വെച്ച് തന്നെ ആ ബസ്സിൽ യാത്ര ചെയ്യേണ്ടിവരുന്ന ഒരു പെൺകുട്ടിയെ അയാൾ ശ്രദ്ധിക്കുന്നുണ്ട് കാരണം ആ പെൺകുട്ടിയും അവളെ യാത്രയാക്കാൻ വന്ന അച്ഛനും ആരെയോ ഭയപ്പെടുന്ന പോലെ വരദരാജനു തോന്നി. ബസ്സ് പുനലൂരിൽ നിന്നും പുറപ്പെട്ട് കുറച്ച് കഴിയുമ്പോൾ അപ്രതീക്ഷിതമായി ചില ഗുണ്ടകൾ ഈ പെൺകുട്ടിയെ കടന്നു പിടിക്കാൻ ശ്രമിച്ചത് വരദരാജൻ ഇടപെട്ട് പരിഹരിക്കുന്നു. പതിയ വരദരാജനോട് സൌഹൃദം പ്രാപിക്കുന്ന പെൺകുട്ടി തന്റെ പേര് സൂര്യപത്മം(പത്മപ്രിയ) ആണെന്നും ചില പ്രത്യേക സാഹചര്യങ്ങളാൽ തന്റെ ചിത്തിയുടെ നാടായ മധുരയിലേക്ക് പോകുകയാണെന്നും വെളിപ്പെടുത്തുന്നു. സംസാരത്തിനിടക്ക് ഇരുവർക്കും തങ്ങൾ ജയിലിലായിരുന്നു എന്ന് പരസ്പരം മനസ്സിലകുന്നു. സൂര്യപത്മം താൻ ജയിലിൽ പോകാനിടയായ സാഹചര്യവും മറ്റും വിശദമായി വരദരാജനോട് പറയുന്നു. ശേഷം വരദരാജനോട് തന്റെ ജീവിത കഥപറയാൻ ആവശ്യപ്പെടുന്നു. വരദരാജൻ തന്റെ ചെറുപ്പം മുതലേ വിശദമായി കഥപറയാൻ തുടങ്ങുന്നു.
 
തമിഴ് നാട്ടിലെ മായാണ്ടികുപ്പത്തുനിന്നും കേരള തമിഴ് നാട് അതിർത്തിപ്രദേശമായ തെന്മലയിലേക്ക് വളരെ ചെറുപ്പത്തിലെ വന്നെത്തിയതായിരുന്നു കുട്ടികളായ വരദരാജനും സഞ്ജയനും ഭാവയാമിയും. തെന്മലപ്രദേശത്തെ എസ്റ്റേറ്റ് മുതലാളിയും കഞ്ചാവും കള്ളവാറ്റു ബിസിനസ്സുമുള്ള വേട്ടക്കാരൻ വർക്കി (തിലകൻ) യുടെ എസ്റ്റേറ്റിൽ ജോലിക്ക് കൊണ്ടുവന്നതായിരുന്നു ഈ മൂന്നു കുട്ടികളേയും. ഭാവയാമി(മല്ലിക) വർക്കിയുടെ വീട്ടിലെ അടുക്കള ജോലിക്കാരിയായും, സഞ്ജയൻ (മകരന്ദ് ദേശ്പാണ്ഡേ) വർക്കിയുടെ കഞ്ചാവു തോട്ടത്തിലുമായി ജോലിക്ക് നിന്നു. പക്ഷെ സത്യസന്ധനായ വരദൻ പല ജോലികൾ ചെയ്തും പഠനം നടത്തിയും തെന്മല കാട്ടിലെ ഒരു ടൂറിസ്റ്റ് ഗൈഡാകുന്നു. ചെറുപ്പം മുതലേ ഭാവയാമിയും വരദരാജനും ഇഷ്ടത്തിലായിരുന്നു. അവരുടെ പ്രണയത്തിനോട് പക്ഷെ സഞ്ജയനു അത്ര താല്പര്യമുണ്ടായിരുന്നില്ല. സഞ്ജയൻ ചെറുപ്പത്തിലേ തന്നെ തെറ്റുകളിലേക്ക് കടന്നു വന്നിരുന്നു. ഒരു ദിവസം വരദരാജൻ തന്റെ വിദേശ ടൂറിസ്റ്റുകളെ കാട് കാണിച്ചു കൊണ്ടിരുന്നപ്പോളാണ്  ഒരു കൊമ്പനാനയുടെ ചിന്നം വിളി കേട്ടത്. ഫോറസ്റ്റ് ഓഫീസറെ(ലിഷോയ്) ഒരു ഒറ്റയാൻ ആക്രമിക്കാൻ ശ്രമിക്കുന്നത് കണ്ട വരദരാജൻ അദ്ദേഹത്തെ ആനയുടെ മുന്നിൽ നിന്നും രക്ഷപ്പെടുത്തുന്നു. തന്റെ ജീവൻ രക്ഷിച്ചതിനു പ്രത്യുപകാരമായി വരദരാജനെ ഫോറസ്റ്റ് ഗാർഡായി ജോലി തരപ്പെടുത്തിക്കൊടുക്കുന്നു. എന്നാൽ വരദന്റെ സുഹൃത്ത് സഞ്ജയൻ വരദനു എന്നും തലവേദനയായിരുന്നു. കഞ്ചാവ് കടത്തിയും കള്ളവാറ്റ് നടത്തിയും അയാൾ പലപ്പോഴും നിയമത്തിന്റെ മുന്നിൽ പെടുമ്പോൾ അവിടെ നിന്ന് രക്ഷപ്പെടുത്തിയെടുക്കേണ്ടത് വരദരാജന്റെ ഉത്തരവാദിത്വമായി. ഇതിനിടയിൽ വേട്ടക്കാരൻ വർക്കിയുടെ വീട്ടിൽ ജോലിക്ക് നിന്ന ഭാവയാമിയുടെ ജീവിതം നരകതുല്യമായി. അവളെ അവിടെ നിന്നും രക്ഷിച്ച് വിവാഹം കഴിക്കാൻ വരദൻ ആഗ്രഹിച്ചു. അതിനു വേണ്ടി വരദൻ സഞ്ജയന്റെ സഹായം തേടി. പ്രതിബന്ധങ്ങളെ തരണം ചെയ്ത് ഭാവയാമിയും വരദനും വിവാഹിതരാകുന്നു. പക്ഷെ, സഞ്ജയനു ചില ഗൂഡലക്ഷ്യങ്ങളുണ്ടായിരുന്നു. അത് വരദരാജനു അറിയില്ലായിരുന്നു. സഞ്ജയനുമായുള്ള അടുപ്പം വരദന്റെ ജീവിതം അടിമുടി തകർക്കാൻ പോന്നതായിരുന്നു. സഞ്ജയന്റെ ചില ചതിപ്രയോഗങ്ങളിൽ‌പ്പെട്ട് വരദരാജൻ ഒരു കൊലപാതകക്കേസിൽ നിയമത്തിന്റെ പിടിയിലാകുന്നു. തന്റെ നിരപരാധിത്വം തെളിയിക്കാൻ വരദരാജനായില്ല. വരദരാജൻ ജയിലിലേക്ക് പോയി. പുറത്ത് ഭാവയാമിയുടെയും മകന്റേയും ജീവിതം നരകതുല്യമായി. ജയിലിൽ നിന്നും പുറത്തുവന്നാൽ തന്നെയും തന്റെ കുടുംബത്തേയും തകർത്ത സഞ്ജയന്റെ ജീവനെടുക്കുക എന്നതായിരുന്നു വരദന്റെ ലക്ഷ്യം. ജയിൽ വെല്ഫയർ ഓഫീസർ റീത്താ മാമ്മൻ( ശ്വേതാമേനോൻ) വരദരാജനോട് കരുണയോടെ പെരുമാറുന്നു. മൂന്നു ദിവസത്തെ പരോൾ അനുവദിച്ചു കിട്ടിയ വരദരാജൻ ഒരു കാലത്ത് തന്റെ സുഹൃത്തായിരുന്ന സഞ്ജയനെ കാണുക എന്ന ലക്ഷ്യത്തോടേയാണ് മധുര ബസ്സിൽ യാത്രയാകുന്നത്.

തുടർന്ന് അത്യന്തം സസ്പെൻസ് നിറഞ്ഞ സംഭവ മുഹൂർത്തങ്ങൾ.