പുതുസംഗീത സാ‍ദ്ധ്യതകളാണ് ഇപ്പോൾ സിനിമാ സംഗീതത്തിന്റെ നാൾവഴികൾ. വ്യത്യസ്തതയുടെ പുതിയ ഭാവങ്ങളുമായി അവ നമ്മുടെ ഗൃഹാതുര സങ്കൽ‌പ്പങ്ങളെത്തന്നെ മാറ്റിമറിക്കുന്നു. തങ്ങളിലേക്ക് ആസ്വാദകരെ ആകർഷിച്ചെടുക്കുന്ന കാന്തികതയും നൈർമ്മല്യവുമാണ് അതിന്റെ പ്രത്യേക. പുതിയ അനുഭവങ്ങളിലൂടെ, അനുഭൂതിയിലൂടെ അനുവാചകനെ ആനയിപ്പിക്കാൻ അതിനാകുന്നുവെങ്കിൽ നമുക്ക് തനത് സംഗീതം നഷ്ടമാകുന്നു എന്ന് നിലവിളിക്കുന്നതിലർത്ഥമില്ല.

അങ്ങനെ പരീക്ഷണങ്ങളുമായി നമുക്ക് പ്രതീക്ഷ തരുന്ന ഒരു സൌഹൃദബന്ധമാണ് ബെന്നറ്റ് വീത്‌രാഗിന്റേത്. ബെന്നറ്റ് – വീത്‌രാഗ് എന്ന് കേൾക്കുമ്പോൾ ഒരല്പം കൗതുകം ആർക്കുമുണ്ടാവുക സ്വാഭാവികം. പലരും കരുതിയിരുന്നത് ബെന്നറ്റ് വീത്‌രാഗ് ഒരാളാണെന്നാണ്.എന്നാൽ സംഗീതസംവിധാനരംഗത്ത് ഇതുവരെ തൊട്ടതെല്ലാം പൊന്നാക്കിയ രണ്ട് യുവസംഗീതജ്ഞരാണവർ.ഗാനരചയിതാവും ഗിറ്റാറിസ്റ്റുമാണ് ബെന്നറ്റ്. വെസ്റ്റേൺ ക്ലാസ്സിക്കൽ, ഫ്യൂഷൻ, ഗസലുകൾ എന്നിവയിൽ പ്രാവീണ്യം നേടിയ സംഗീതജ്ഞൻ.വീത്‌രാഗാകട്ടെ കർണ്ണാടകസംഗീതത്തിൽ പരിജ്ഞാനം നേടുകയും പിന്നീട് ഹിന്ദുസ്ഥാനിയുൾപ്പടെ വിവിധ സംഗീതമേഖലകളെ മുറുകെപ്പിടിച്ച് തന്നോട് ചേർത്ത് നിർത്തുകയും ചെയ്തു.സംഗീതരംഗത്തിലെ ഈ വൈവിധ്യങ്ങളെ കോർത്തിണക്കിയപ്പോൾ സംഗീതപ്രേമികൾക്ക് ലഭ്യമായത് ഒരു പിടി നല്ല ഗാനങ്ങളാണ്.

വിശ്വനാഥൻ സംവിധാനം ചെയ്ത് 2006ൽ പുറത്തിറങ്ങിയ “ഔട്ട് ഓഫ് സിലബസ്” എന്ന ചിത്രത്തിനു വേണ്ടിയാണ് ഇവർ ആദ്യമായി സംഗീതമൊരുക്കുന്നത്. അക്കാലത്ത് ഹിറ്റ് ചാർട്ടുകളിൽ മേൽ‌സ്ഥാനം ഉറപ്പാക്കിയ മെലഡികളായിരുന്നു ഔട്ട് ഓഫ് സിലബസിലെ ഗാനങ്ങൾ. ലളിതമായ സംഗീതത്തിൽ രചനയൊരുക്കിയ “പോയ് വരുവാൻ” എന്ന ഗാനത്തിന് അക്കൊല്ലത്തെ മികച്ച ഗാനരചയിതാവിനുള്ള അവാർഡ് കരസ്ഥമാക്കാൻ പ്രഭാവർമ്മയെ സഹായിച്ചിരുന്നു. പിന്നീട് ജോർജ്ജ് കിത്തുവിന്റെ സൂര്യകിരീടം,വിശ്വനാഥന്റെ തന്നെ “ഡോക്ടർ പേഷ്യന്റ്“ എന്നീച്ചിത്രങ്ങൾക്കും സംഗീതമൊരുക്കി. ചിത്രങ്ങളിൽ ഗാനരംഗങ്ങൾ പൂർണ്ണമായി ചിത്രീകരിച്ചില്ലെങ്കിലും റേഡിയോ സ്റ്റേഷനുകളിലും മറ്റ് സംഗീത പ്രോഗ്രാമുകളിലുമായി വീണ്ടും ഹിറ്റ് ചാർട്ടിലിടം പിടിക്കുകയായിരുന്നു “ഈറൻ നിലാവേ”, ഹരിഹരൻ പാടിയ “മഴഞാനറിഞ്ഞിരുന്നില്ല” എന്നീ ഗാനങ്ങൾ.

കമൽ സംവിധാനം ചെയ്ത് 2011ൽ പുറത്തിറങ്ങുന്ന ഗദ്ദാമയാണ് ഇവരുടെ നാലാമത്തെ ചിത്രം. ഗദ്ദാമയ്ക്ക് വേണ്ടി തയ്യാറാക്കിയ ദക്ഷിണേന്ത്യൻ രീതിയിലുള്ള “നാട്ടുവഴിയോരത്തെ”, അറബിക് മൂഡുള്ള “വിധുരമീ യാത്ര” ചിത്രത്തിലുടനീളം ഒരു തീം മ്യൂസിക് പോലെ വരുന്ന “അറിയുമോ” എന്നീ പാട്ടുകൾ ഇതിനോടകം തന്നെ സംഗീതപ്രേമികളുടെ മനസ്സിലിടം പിടിച്ചിട്ടുണ്ട്.

മലബാർ ക്രിസ്ത്യൻ കോളേജിൽ നിന്ന് ബിരുദം നേടി നിലവിൽ സംഗീതപരിപാടികളും മ്യൂസിക് ബാൻഡുമായിക്കഴിയുകയാണ് ബെന്നറ്റ്. കോഴിക്കോട് സർവ്വകലാശാലയിൽ നിന്ന് മാസ്കമ്യൂണിക്കേഷൻ & ജേർണലിസം പഠിച്ച വീത്‌രാഗ് ഗോപി ഇപ്പോൾ ബംഗലുരുവിൽ ടെക്നിക്കൽ റൈറ്ററായി ഐടി രംഗത്ത് ജോലി ചെയ്യുന്നു.സിനിമകൾ ഒരുമിച്ച് ചെയ്യുന്നുവെങ്കിലും സ്വന്തമായി ആൽബങ്ങൾ തയ്യാറാക്കുന്ന തിരക്കിലാണവർ. കാർത്തികുമൊത്തുള്ള ഒരാൽബത്തിനു വേണ്ടി ബെന്നറ്റ് വർക്ക് ചെയ്യുമ്പോൾ വീത്‌രാഗ് തന്റെ സ്വന്തം ആൽബത്തിന്റെ തിരക്കിലാണ്. രണ്ടും ഉടൻ തന്നെ പുറത്തിറങ്ങും.ഈ രണ്ടു പേരും ഒത്തു ചേർന്നതിലും ചെറുകൗതുകമുണ്ട്. കോഴിക്കോട് സർവ്വകലാശാലാ യുവജനോത്സവവേദികളിൽ വച്ചാണ് ഇത്തരമൊരു സംഗീതകൂട്ടുകെട്ടുണ്ടാവുന്നതെന്ന് വീത്‌രാഗ് പറയുന്നു. തന്ത്രിവാദ്യ ഇനത്തിൽ മാൻഡലിൻ വായനയുമായി വീത്‌രാഗ് സ്റ്റേജിലെത്തുന്നതിനു തൊട്ടുപിറകേ ഗിറ്റാറുമായി ബെന്നറ്റുമെത്തിയിരുന്നു. അത്തരമൊരു സൗഹൃദമാണ് സംഗീതരംഗത്തെ ഇത്തരമൊരു കൂട്ടായ്മക്ക് നിദാനമായത്. യുവജനോത്സവവേദികൾ ഇങ്ങനെ പരസ്പര ബഹുമാനത്തിന്റെ വേദികളാവുമ്പോൾ ഇത്തരം കൂട്ടുകെട്ടുകളോടെയുള്ള കലാകാരന്മാരെ ഇനിയും നമുക്ക് പ്രതീക്ഷിക്കാം

മലയാള കവിയും , എഴുത്തുകാരനും , ചലച്ചിത്രഗാന രചയിതാവും പത്രപ്രവർത്തകനും ടെലിവിഷൻ അവതാരകനുമാണ്‌ പ്രഭാവർമ്മ.

മരണത്തിനു കുറച്ചുനാള്‍ മുന്‍പ് മഹാനായ കവി വയലാര്‍ രാമവര്‍മ്മയെ അദ്ദേഹം  അവസാനമായി പങ്കെടുത്ത ഒരു ചടങ്ങില്‍ വെച്ച് പരിചയപ്പെട്ടപ്പോള്‍ എന്തെങ്കിലും രണ്ടു വരി എഴുതിത്തരുവാന്‍  നീട്ടിയ നോട്ടുബുക്കില്‍ “പണ്ടേ തുരുമ്പിച്ച പൊന്നുടവാളുമായ് തെണ്ടാതിരിക്കട്ടെ നാളെയീ ക്ഷത്രിയന്‍” എന്നു കുറിക്കുമ്പോള്‍ വയലാറിലെ ദീര്‍ഘദര്‍ശി നാളെയുടെ സാഹിത്യകാരനെ ,തന്‍റെ പിന്മുറക്കാരനെ തിരിച്ചറിഞ്ഞിരുന്നിരിക്കണം!

ഒരു പക്ഷേ വയലാര്‍ എഴുതിയ അവസാന വരികള്‍ എന്ന് കരുതപ്പെടുന്നതും ഈ വാചകങ്ങള്‍ തന്നെ. പിന്നീട് വയലാര്‍ അവാര്‍ഡ് അടക്കം ഒരുപിടി പുരസ്കാരങ്ങള്‍ വാരിക്കൂട്ടിയ പ്രഭാവര്‍മ്മ മലയാള സിനിമാഗാനരചനാ രംഗത്തേക്ക് കടന്നു വന്നത് ചരിത്രം .

1959ല്‍ പത്തനംതിട്ട  ജില്ലയിലെ തിരുവല്ലയ്ക്കടുത്ത് കടപ്രയില്‍ ആണ് ജനനം ചങ്ങനാശ്ശേരി എൻ.എസ്.എസ്. ഹിന്ദു കോളേജിൽ നിന്ന് ആംഗലേയ സാഹിത്യത്തിൽ ബിരുദവും മധുര കാമരാജ് സർവകലാശാലയിൽ നിന്ന് ബിരുദാനന്തര ബിരുദവും നേടി. തിരുവനന്തപുരം ലോ കോളേജിൽ നിന്ന് എൽ.എൽ.ബി.യും കരസ്ഥമാക്കിയിട്ടുണ്ട്.ഇ.കെ. നായനാർ മുഖ്യമന്ത്രിയായിരിക്കുമ്പോൾ അദ്ദേഹത്തിന്‍റെ പ്രസ്സ് സെക്രട്ടറിയായിരുന്നു. ദേശാഭിമാനി ഡൽഹി ബ്യൂറോ ചീഫ് ആയും  , കൈരളി ടി.വി. ഡയറക്ടറര്‍ ആയും, കേരള സാഹിത്യ അക്കാദമിയുടെ നിർവാഹക സമിതി അംഗമായും സേവനമനുഷ്ടിച്ചിട്ടുണ്ട്. 'ഇന്ത്യാ ഇൻസൈഡ്' എന്ന ഒരു വാര്‍ത്താധിഷ്ടിത പരിപാടി പീപ്പിൾ ടി.വിയിൽ അദ്ദേഹം അവതരിപ്പിക്കുന്നുണ്ട്.

സൗപര്‍ണ്ണിക,അര്‍ക്കപൂര്‍ണ്ണിമ,ചന്ദനനാഴി,ആര്‍ദ്രം,അവിചാരിതം എന്നീ കാവ്യസമാഹാരങ്ങള്‍ പ്രസിദ്ധീകരിച്ചിട്ടുണ്ട്. മറ്റു പ്രസിദ്ധീകരണങ്ങളില്‍ “പാരായണത്തിന്‍റെ രീതി ഭേദങ്ങള്‍” എന്ന പ്രബന്ധ സമാഹാരവും “മലേഷ്യന്‍ ഡയറിക്കുറിപ്പുകള്‍” എന്ന യാത്രാ വിവരണവും ഉള്‍പ്പെടും.

അർക്കപൂർണ്ണിമ എന്ന കവിതാസമാഹാരത്തിന്‌ 1995 ൽ കേരള സാഹിത്യ അക്കാദമി പുരസ്കാരവും 2013 ല്‍ ശ്യാമമാധവം എന്ന കൃതിക്ക് വയലാര്‍ അവാര്‍ഡും ലഭിച്ചു. ഇതുകൂടാതെ ചങ്ങമ്പുഴ അവാര്‍ഡ് , അങ്കണം അവാര്‍ഡ് ,വൈലോപ്പള്ളി പുരസ്കാരം,മികച്ച ജെനറല്‍ റിപ്പോര്‍ട്ടിങ്ങിന് ഉള്ള സംസ്ഥാന സര്‍ക്കാര്‍ അവാര്‍ഡ് എന്നിങ്ങനെ സാഹിത്യരംഗത്തും ,പത്രപ്രവര്‍ത്തന രംഗത്തും ഉള്ള നിരവധി അവാര്‍ഡുകള്‍ അദ്ദേഹം കരസ്ഥമാക്കിയിട്ടുണ്ട് .

സ്വര്‍ഗ്ഗാരോഹണത്തിനു തൊട്ടുമുമ്പുള്ള നിമിഷങ്ങളില്‍ കൃഷ്ണമനസ്സിലൂടെ കടന്നു പോയ പോയകാല ജീവിത ചിത്രങ്ങള്‍ പ്രമേയമാക്കിയ കൃതിയാണ് ശ്യാമമാധവം.ഇതിഹാസ പുരാണങ്ങളില്‍ പ്രത്യക്ഷപ്പെടുന്ന ശ്രീകൃഷ്ണനു പകരം പാപബോധത്താല്‍ നീറുന്ന മറ്റൊരു കൃഷ്ണനെ അവതരിപ്പിച്ച ഈ കാവ്യാഖ്യായിക മലയാള സാഹിത്യചരിത്രത്തില്‍ തന്നെ തികച്ചും വേറിട്ടു നില്‍ക്കുന്ന സൃഷ്ടിയാണ്.

ഭാര്യ:മനോരമ , മകൾ:ജ്യോത്സന.

ചലച്ചിത്ര പുരസ്കാരങ്ങള്‍ : മികച്ച ഗാന രചയിതാവിനുള്ള സംസ്ഥാന പുരസ്കാരം. ചിത്രം നടൻ (2013)

മികച്ച ഗാനരചയിതാവിനുള്ള സംസ്ഥാന പുരസ്കാരം.ചിത്രം സ്ഥിതി (2006)

പ്രഭാവര്‍മ്മ ഗാനങ്ങള്‍ എഴുതിയ ചിത്രങ്ങള്‍ :

റെഫറന്‍സ് : ഡി.സി ബുക്സ് വെബ്‌ , ഉള്ളുതുറന്നു-ACV അഭിമുഖം