തങ്കക്കാല്‍ത്തളമേളമൊരുക്കിയ
രംഗവിതാനമിതാ
മഴവില്ലണിമണി ഗോപുരവാതിലില്‍
മറഞ്ഞു നില്‍ക്കരുതേ ഇനിയും
മറഞ്ഞു നില്‍ക്കരുതേ
മാധവമാസം നിന്‍ തിരുമുടിയില്‍
മലര്‍ക്കിരീടം ചാര്‍ത്തും
നീ വരുമീ വഴി നീലക്കാടുകള്‍
പീലിക്കുടകള്‍ നിവര്‍ത്തും (തങ്കക്കാല്‍..)

നീരദനിരയാല്‍ വര്‍ഷം നിന്‍ പദ
താരില്‍ പനിനീര്‍ തൂകും
ശാരദചന്ദ്രിക ചാര്‍ത്തും കസവൊളി
ഹാരം നിന്‍ തിരുമാറില്‍ (തങ്കക്കാല്‍..)

കുമ്പിളില്‍ നിറയേ കുളിരും കൊണ്ടേ
കുമ്പിട്ടണയും ശിശിരം
ഹിമവാഹിനിയുടെ ഹൃദന്തരാഗം
പകരും നവ ഹേമന്തം (തങ്കക്കാല്‍..)

എന്തിനു പാഴ് ശ്രുതി മീട്ടുവതിനിയും
തന്ത്രികള്‍ പൊട്ടിയ തംബുരുവില്‍
ഈ തംബുരുവില്‍

താമരമലരേ താമരമലരേ
താളം തെറ്റുവതെന്തേ
താലവനങ്ങൾക്കിടയില്‍ പകലിന്‍
താഴികക്കുടമുടഞ്ഞൂ (എന്തിന്‍...)

ഗാനമുറങ്ങീ ഗാനമൂറങ്ങീ
മാനസപുഷ്പ വനത്തില്‍
വീണകള്‍ മീട്ടിയ കാനന മൈനകള്‍
കേണു കേണു മയങ്ങീ ( എന്തിനു...)

പൂക്കാരാ പൂക്കാരാ
കൈക്കുമ്പിളില്‍ നിന്നൊരു പൂ തരുമോ
പൂക്കാരാ പൂ തരുമോ

ഈ കിളിവാതിലിനരികില്‍ നില്പൂ
നിന്നെയും തേടി നിന്നെയും തേടി (2)
ഇതു വഴി വരുമോ ഇതു വഴി വരുമോ
ഒരു പനിനീര്‍ പൂ തരുമോ
നീ തരുമോ (പൂക്കാരാ...)

കൈവിരലുണ്ടു മയങ്ങീ
പാവക്കുഞ്ഞു മയങ്ങീ എന്‍ കുഞ്ഞുറങ്ങീ (2)
കള്ളനു കണി കാണാന്‍ കണി കണ്ടുണരാന്‍
ഒരു പനിനീര്‍ പൂ തരുമോ
നീ തരുമോ (പൂക്കാരാ...)

ആ... ആ.. ആ..

പൊന്നിന്‍ ചിലങ്കയണിഞ്ഞപ്പോള്‍ ഇന്നെന്റെ 
കണ്ണ് നിറഞ്ഞുവല്ലോ - എന്തിനോ
കണ്ണ് നിറഞ്ഞുവല്ലോ 
നര്‍ത്തനശാലയില്‍ വന്നപ്പോളെന്തിനോ 
പൊട്ടിക്കരഞ്ഞുവല്ലോ - ഹൃദയം 
പൊട്ടിക്കരഞ്ഞുവല്ലോ 
(പൊന്നിന്‍... )

കാണാനൊരാളില്ല കൈകൊട്ടാനാളില്ല 
കോണിലൊരാള്‍ മാത്രം നിന്നിരുന്നു - ഒരു 
കോണിലൊരാള്‍ മാത്രം നിന്നിരുന്നു
വേദന തീര്‍ക്കുവാന്‍ മാത്രമവന്‍ തന്റെ 
വേണു വായിച്ചു കൊണ്ടങ്ങിരുന്നു - എന്‍ 
വേദന തീര്‍ക്കുവാന്‍ മാത്രമവന്‍ തന്റെ 
വേണു വായിച്ചു കൊണ്ടങ്ങിരുന്നു 
(പൊന്നിന്‍... )

എന്നാണേ നിന്നാണേ ഏമൂരത്തേവിയാണേ
പൊന്നോണനിലാവൊരു കോടി നെയ്തൂ -
ഒരു കോടി നെയ്തൂ

(എന്നാണേ... )

നെയ്തെടുത്ത കോടി മുണ്ടിന് കാട്ടാറില്‍ പൊന്തിയ
നെയ്യാമ്പല്‍ പൂവുകൊണ്ടു കസവും വെച്ചു - നല്ല
കസവും വെച്ചൂ

(എന്നാണേ... )

നീലനിഴല്‍ക്കീറ ചുറ്റും നാട്ടിന്‍പുറങ്ങള്‍ (2)
നാലുമുഴം കോടികൊണ്ടു നാണം മറച്ചൂ (2)
പുത്തരിക്കു കൊയ്ത്തുതീര്‍ന്ന പുഞ്ചവയലോ (2)
പുത്തനായ ചേല മേലേ ചുറ്റി രസിച്ചൂ (2)

(എന്നാണേ... )

വരണൊണ്ട് വരണൊണ്ട് മണവാളന്‍ - നല്ല
വാകപ്പൂങ്കുലയ്ക്കൊത്ത മണവാട്ടി (2)
വെയിലത്ത് വാടല്ലേ മണവാട്ടീ - നീല
മയിലിന്റെ പീലിയാല്‍ മഞ്ചല്‍ തരാം (2)
വരണൊണ്ട് വരണൊണ്ട് മണവാളന്‍ - നല്ല
വാകപ്പൂങ്കുലയ്ക്കൊത്ത മണവാട്ടി

മഞ്ചലെടുക്കാന്‍ ആര് വരും - പച്ച
മഞ്ചാടിക്കാട്ടിലെ കാറ്റ് വരും
വഴിക്കൊന്ന് പാടാന്‍ ആര് വരും - ഒരു
വണ്ണാത്തിക്കിളിപ്പെണ്ണ് പറന്നു വരും (2)
വരണൊണ്ട് വരണൊണ്ട് മണവാളന്‍ - നല്ല
വാകപ്പൂങ്കുലയ്ക്കൊത്ത മണവാട്ടി

കേളടീ നിന്നെ ഞാൻ കെട്ടുന്ന കാലത്ത്
നൂറിന്റെ നോട്ടു കൊണ്ടാറാട്ട്
കണ്ണാണെ നീയെന്നെ കെട്ടിയില്ലെങ്കിലോ
കൺനീരിലാണെന്റെ നീരാട്ട്

(കേളടീ ..)

അപ്പനുമമ്മയ്ക്കും ആയിരം വീതം
അച്ചായൻമാർക്കൊക്കെ അഞ്ഞൂറു വീതം
അയലത്തുകാർക്കൊക്കെ അമ്പതു വീതം
അച്ചാരം നൽകീട്ടു കല്യാണം

(കേളടീ ..)

ആസാമിൽ ഞാൻ പോയതാരിക്കു വേണ്ടി
കാശങ്ങു വാരിയതാരിക്കു വേണ്ടി
വട്ടിക്കു നൽകിയ സമ്പാദ്യമൊക്കെയും
ചിട്ടിയിൽ കൊണ്ടിട്ടതാരിക്കു വേണ്ടി

(കേളടീ ..)

വണ്ടീ..... പുകവണ്ടി
വണ്ടീ വണ്ടീ നിന്നെപ്പോലെ
വയറിലെനിക്കും തീയാണേ (2)
തെണ്ടി നടന്നാൽ രണ്ടു പേർക്കും
കൈയ്യിൽ വരുന്നതു കായാണേ (2) 
കായാണേ.... വണ്ടീ
വണ്ടീ... പുകവണ്ടി

പള്ള വിശന്നാൽ തൊള്ള തുറക്കും
തൊള്ള തുറന്നാൽ കൂക്കി വിളിക്കും (2)
എല്ലാ ഭാരവുമേറ്റി നടക്കും
ചെല്ലുന്നേടം തണ്ണി കുടിക്കും (2)
(വണ്ടീ ...)

ചക്രത്തിന്മേൽ നിന്റെ കറക്കം
ചക്രം കിട്ടാനെന്റെ കറക്കം (2)
വെള്ളം കിട്ടാൻ നിനക്കു മോഹം
കഞ്ഞി കുടിക്കാനെനിക്കു ദാഹം (2)
(വണ്ടീ ...)

ആ... 

വിരലൊന്നുമുട്ടിയാല്‍ പൊട്ടിച്ചിരിയ്ക്കുന്ന
മണിവീണക്കമ്പികളേ (2)
ആനന്ദമാധുരിയില്‍ ഞാനലിഞ്ഞാടുമ്പോള്‍
ഗാനം നിര്‍ത്തരുതേ നിങ്ങളുടെ ഗാനം നിര്‍ത്തരുതേ
(വിരലൊന്നുമുട്ടിയാല്‍... )

ഓ......
കാലൊന്നനങ്ങിയാല്‍ കൈകൊട്ടിത്തുള്ളുന്ന
കനകച്ചിലങ്കകളേ... കനകച്ചിലങ്കകളേ (2)
കലയുടെവാനില്‍ ഞാന്‍ പാറിപ്പറക്കുമ്പോള്‍
കാലില്‍ പിടിയ്ക്കരുതേ - നിങ്ങളെന്നെ
മാടിവിളിയ്ക്കരുതേ
(കലയുടെ... )

കിനാവിന്റെ കുഴിമാടത്തില്‍ 
നിലാവത്തു നില്‍പ്പോളേ
ഒരുതുള്ളിക്കണ്ണീരില്‍ നിന്‍ 
കദനക്കടലൊതുങ്ങുമോ
കിനാവിന്റെ കുഴിമാടത്തില്‍ 
നിലാവത്തു നില്‍പ്പോളേ

പദങ്ങളില്‍ ചോരയൊലിക്കേ 
പാടിയാടി നിന്നു നീ
തീ പിടിച്ചു ചിറകെന്നാലും 
പാട്ടുപാടി രാക്കിളീ.. 
രാക്കിളീ... രാക്കിളീ
കിനാവിന്റെ കുഴിമാടത്തില്‍ 
നിലാവത്തു നില്‍പ്പോളേ