സ്ഥലത്തെ പ്രമാണിയായ ഒരു നമ്പൂതിരിയുടെ കാര്യസ്ഥനാണ് വിശ്വനാഥൻ. ഭാര്യ സരസ്വതിയും അനുജൻ രാജശേഖരനും ആയി വീടിനു സസുഖാന്തരീക്ഷമാണ്. രാജശേഖരനെ ചേട്ടൻ പഠിപ്പിച്ച് വക്കീലാക്കി, പ്രണയിച്ചിരുന്ന മാലതിയുമായി കല്യാണവും നടത്തി. മാലതി വിശ്വനാഥന്റെ സുഹൃത്തും പണക്കാരനുമായ ഒരാളുടെ മകളാണ്. ആദ്യരാത്രിയിലാണ് അറിയുന്നത് അവൾ ഹൃദ്രോഗി ആണെന്ന്. ഇക്കാര്യം അറിഞ്ഞുകൊണ്ടു തന്നെ സ്വാർത്ഥലാഭത്തിനായി വിശ്വനാഥൻ ഈ കല്യാണം നടത്തിച്ചതാണെന്ന ഒരു വിചാരം സുഭദ്ര അമ്മായി രാജശേഖരന്റെ മനസ്സിൽ കടത്തി വിട്ടു. അമ്മായി കൊണ്ടു വന്ന മറ്റൊരു വിവാഹാലോചന നടക്കാത്തതിലെ പകപോക്കുകയായിരുന്നു അവർ. മാലതി ഗർഭം ധരിക്കരുതെന്ന ഡോക്റ്ററുടെ നിർദ്ദേശം അനുസരിച്ചു, സരസ്വതിയുടെ മകൻ ബാബുവിനെ സ്വന്തം മകനെപ്പോലെ കരുതി. ബാബുവില്ലാതെ ഒരു ജീവിതം അവൾക്കില്ലെന്ന മട്ടായി. അമ്മായി മകൻ സുഗുണനുമായി അവിടെത്തന്നെ സ്ഥിരതാമസമായി. ബാബു വികൃതിയും ദുഷ്ടനുമായ സുഗുണനുമായി ചങ്ങാത്തത്തിലായി. ബാബുവിന്റെ തെറ്റുകൾ മാലതി സരസ്വതിയെ അറിയിക്കുകയും വാക്കുതർക്കത്തിനു ശേഷം അവർ തമ്മിൽ പിണങ്ങുകയും ചെയ്തു. ബാബുവിനെ കാണാഞ്ഞ് മാലതിയുടെ രോഗം മൂർച്ഛിച്ചു. മാലതിയെക്കണ്ടാൽ അവൾ മരിച്ചു പോകുമെന്ന് സുഭദ്ര അമ്മായി ബാബുവിനെ ധരിപ്പിച്ചു. മകൻ സുഗുണനെ ആ വീട്ടിൽ വാഴ്ത്താനുള്ള കുടിലതന്ത്രം. ബാബുവിനെ കാണാൻ മാലതി സ്കൂളിലെത്തി, ബാബു ഓടിക്കളഞ്ഞു. മാലതി അതീവ രോഗിണിയായി. സുഗുണൻ ബാബുവിനോട് ചോദിച്ച് സത്യം മനസ്സിലാക്കി. അമ്മായിയുടെ കള്ളി വെളിച്ചത്താക്കി. പശ്ചാത്താപ വിവശരായ സരസ്വതിയും മറ്റും ബാബുവോടൊപ്പം മാലതിയുടെ അടുക്കൽ എത്തിയെങ്കിലും അപ്പോഴേയ്ക്കും അവൾ ഇഹലോകവാസം വെടിഞ്ഞിരുന്നു.
യന്ത്രത്തിനടിയിൽ‌പ്പെട്ട് മുടന്തനായ മോഹൻ ഉദാരമതിയായ എസ്റ്റേറ്റുടമ കേശവൻ മുതലാളിയെ സമീപിച്ചു. എസ്റ്റേറ്റിന്റെ ചുമതല അത്രയും മോഹനെ ഏൽ‌പ്പിച്ച് മുതലാളിയും മകൾ ലീലയും കൂടെ യാത്രപോയി. ഒപ്പിട്ടുകൊടുത്തിരുന്ന ചില കടലാസുകളിൽ തിരിമറികൾ കാണിച്ച് മോഹൻ എസ്റ്റേറ്റു സ്വത്തുക്കൽ കൈവശപ്പെടുത്തി. കരടി ശങ്കരൻ എന്നൊരാൾ ഇതിനു കൂട്ടും നിന്നു. മോഹന്റെ ഭാര്യ ലക്ഷ്മിയും രണ്ട് കുട്ടികളും കൂടി എസ്റ്റേറ്റിൽ എത്തിയപ്പോൾ കണ്ടത് മോഹൻ വിമല എന്നൊരുവളായുമായി വിളയാടുന്നതാണ്. ഉപേക്ഷിക്കപ്പെട്ട ലക്ഷ്മി കുട്ടികളുമായി അലഞ്ഞു, മകൾ സുമം മരിയ്ക്കുകയും ചെയ്തു. മകൻ ഗോപി പത്രം വിറ്റു കാലയാപനം ചെയ്തു, ഒരു പത്രം ഏജെന്റായിത്തീർന്നു. സ്വത്ത് മോഹൻ അടിച്ചെടുത്തെന്നറിഞ്ഞ മുതലാളി ഹൃദയം പൊട്ടി മരിച്ചു. ബാല്യകാലതോഴനായ ഗോപി മാത്രം ലീലയ്ക്കു തുണ. ലീല എസ്റ്റേറ്റു വിവരം അന്വേഷിക്കാൻ ഗോപിയോടൊപ്പം ചെന്നപ്പോൾ മോഹൻ അയാളെ ദേഹോപദ്രവമേൽ‌പ്പിച്ചു. മോഹനെ കബളിപ്പിച്ച് സ്വത്തുക്കൾ കൈ വശപ്പെടുത്താൻ കരടി ശങ്കരനും വിമലയും ശ്രമിച്ചു, വിഷം കൊടുത്ത് കൊല്ലാൻ വരെ തീരുമാനിച്ചു.. അതു മനസ്സിലാക്കിയ മോഹൻ ശങ്കരനെ കൈത്തോക്കിനിരയാക്കി, തത്സമയം അവിടെയെത്തിയ ഗോപിയുടെ മേൽ ആ കൊലക്കുറ്റം ചുമത്തി. തൂക്കാൻ വിധിക്കപ്പെട്ട ഗോപി നിരപരാധിയാണെന്ന് ജഡ്ജിയുടെ വീട്ടിൽ ഇതിനകം വേലക്കാരിയായിത്തീർന്ന വിമല വിശദമാക്കി. ഗോപി യുടെ വധശിക്ഷ ജഡ്ജി നീട്ടിവച്ചു. സ്വന്തം മകനെയാണ് തൂക്കുമരത്തിലേക്കു വലിച്ചെറിഞ്ഞത് എന്നറിഞ്ഞ മോഹൻ പശ്ചാത്താപഭരിതനായി ജയിലിൽ എത്തി. ഗോപി വധിക്കപ്പെട്ടു എന്ന് കരുതി മോഹൻ തല കല്ലിൽ തല്ലി മരിച്ചു. മോഹന്റെ കൃത്രിമരേഖകളുടെ കള്ളി വെളിച്ചായതോടെ ലീലയ്ക്ക് സ്വത്തു തിരിച്ചു കിട്ടി. ഗോപി ലീലയെ വിവാഹം കഴിച്ചു.
കുഞ്ചാക്കോയുമായി തെറ്റിപ്പിരിഞ്ഞ കെ. വി. കോശി മെരിലാൻഡിലെത്തി എടുത്ത സിനിമയാണിത്. കുഞ്ചാക്കോ ചിത്രങ്ങളിൽ അഭിനയിക്കുന്നവർ മെരിലാന്റിലെ ചിത്രങ്ങളിൽ അഭിനയിക്കരുതെന്ന് വിലക്കും ഏർപ്പെടുത്തി. തിക്കുറിശ്ശിയൊഴിച്ച് മറ്റു വൻ താരങ്ങൾ ഒഴിവാക്കപ്പെട്ടതിനാൽ പുതുമുഖങ്ങളെ പ്രധാന വേഷത്തിൽ അഭിനയിപ്പിച്ചു. കോമാളിത്തം പോരെന്നു വിചാരിച്ച് കോമഡി സീനുകൾ കൂട്ടിച്ചേർത്ത് ഈ സിനിമ രണ്ടാഴ്ചയ്ക്കു ശേഷം വീണ്ടും റിലീസ് ചെയ്തു. പക്ഷേ സിനിമ പച്ച പിടിച്ചില്ല.
"ബി.ഏക്കാരൻ ജോർജ്ജ് നാടകനടനുമാണ്. ഭിക്ഷക്കാരനായി വേഷമെടുത്തപ്പോൾ ചട്ടിയിൽ എല്ലാരും പണമിട്ടപ്പോൾ പ്രൊഫസർ ഫ്രാൻസിസിന്റെ മകൾ സെലിൻ ഒരു പട്ടുതൂവാലയാണ് ഇട്ടത്. നാടകാഭിനയം വെറുത്തിരുന്ന ജോർജ്ജിന്റെ അമ്മാവൻ അയാളെയും കുടുംബത്തേയും വഴിയാധാരമാക്കി. നാടകമാനേജർ പോത്തപ്പിയെ മാണി എന്നൊരാൾ കുത്തിക്കൊന്നു, പട്ടുതൂവാല എടുക്കാൻ ചെന്ന ജോർജ്ജിനെയാണ് അമ്മ-പെങ്ങൾ അടക്കം എല്ലാവരും കൊലപാതകി എന്ന് തെറ്റിദ്ധരിച്ചത്. ചിട്ടിക്കാരൻ ഫിലിപ്പിന്റെ
കണക്കപ്പിള്ളയായി ചേർന്ന ജോർജ്ജിന്റെ പിന്നാലെയാണ് ഫിലിപ്പിന്റെ മകൾ റീത്ത. പോത്തപ്പിയുടെ കള്ളനോട്ടുകൾ കരസ്ഥമാക്കി മാണി നാടകമാനേജർ ആയി വിലസി. വേഷപ്രച്ഛഹ്ന്നാ‍യി നടക്കുന്ന ജോർജ്ജിനെ പിടിയ്ക്കാൻ പോലീസിനും മാണിയ്ക്കും കുടിലനായ ഡോക്റ്റർ ഗ്രെഗറിയ്ക്കും കഴിയുന്നില്ല. മാണി കള്ളനോട്ടുകൾ മാറ്റുന്നത് കടലാസുപൂക്കൾ വിൽ‌പ്പനക്കാരി ‘മാ’ വഴിയാണ്. ഇവരുടെ പൂക്കൾ വിൽക്കുന്ന ആമിനയാണ് തക്കത്തിൽ കള്ളനോട്ടുകൾ മാറ്റിയെടുക്കുന്നത്. ആമിനയെ പ്രാപിക്കാനൊരുങ്ങിയ ഡോക്റ്റർ ഗ്രെഗറിയിൽ നിന്നും അവളെ രക്ഷിച്ചത് ഭിക്ഷക്കാരൻ വേഷം കെട്ടിയ ജോജ്ജ് ആണ്. ആമിനയെ സംശയിക്കുന്ന മാ അവളെ കൊല്ലാൻ മാണിയുടെ ആൾക്കാരെ ചട്ടം കെട്ടി. ആമിനയാവട്ടെ മാണിയുടെ ആൾക്കാർക്ക് മുന്നിൽ ഭിക്ഷക്കാരന്റെ രഹസ്യം വെളിവാക്കാൻ കൂട്ടാക്കുന്നുമില്ല. പോലീസിൽ വിവരം അറിയിച്ച ജോർജ്ജ് തെറ്റിദ്ധരണാവിമുക്തനാകുന്നു. ആമിന മരണക്കിടക്കയിൽ വച്ച് ജോർജ്ജ്-സെലിൻ മിഥുനങ്ങൾക്ക് ആശീർവാദം നൽകി. "
