കുടുംബം

ഇരട്ടക്കൊലപാതകത്തിനു ശിക്ഷയേന്തുന്ന ജയരാജൻ വയറ്റിൽ അസുഖം കാരണം ആശുപത്രിയിൽ ആക്കപ്പെട്ടിരിക്കയാണ്. ഭാര്യയേയും അവളുടെ കാമുകനേയും ആണ് ജയരാജൻ കൊന്നുകളഞ്ഞത്. ശിക്ഷയുടെ കാലാവധി കഴിഞ്ഞാൽ ഭാര്യയുടെ കാമുകന്റെ കുടുംബത്തേയും വകവരുത്താനാണ് ജയരാജന്റെ തീരുമാനം. സ്നേഹത്തിനു വേണ്ടി ദാഹിക്കുന്ന ജയരാജന് ആശുപത്രിയിൽ വച്ച് പരിചയപ്പെട്ട മറ്റൊരു രോഗിയായ കുട്ടി-രവി-യിൽ നിന്നും വേണ്ടുവോളം അത് ലഭിയ്ക്കുന്നു. രവിയുടെ അമ്മ ലക്ഷ്മി ടീച്ചറുമായും അയാൾ സൌഹൃദത്തിൽ ആയി. പക്ഷേ ലക്ഷ്മി ടീച്ചറിന്റെ ഭർത്താവാണ് താൻ കൊലപ്പെടുത്തിയ ഭാര്യാ കാമുകൻ എന്നും താൻ നശിപ്പിക്കാൻ ഉദ്ദേശിച്ചിരുന്നത്  ലക്ഷ്മിയേയും കുട്ടിയേയുമാണെനും അറിയുമ്പോൾ ജയരാജൻ ഹൃദയാഘാതത്താൽ മരിയ്ക്കുന്നു.

അമേരിയ്ക്കക്കു പോകുന്നതിനു മുൻപ് ഡോക്റ്റർ ജോണി ലോനച്ചന്റെ മകളായ മേരിയെ പെണ്ണുകാണാൻ പോയി.ദേശക്കുറിക്ക് വികാരിയച്ചനെ സമീപിച്ചപ്പോൾ മേരി ലോനച്ചന്റെ വളർത്തുപുത്രി മാത്രമാണെന്ന് അറിഞ്ഞു. കല്യാണം മുടങ്ങിയെന്നറിഞ്ഞ് മേരി ആത്മഹത്യ ചെയ്തു. മേരിയുടെ  സഹോദരി ആനിയെ തനിച്ചാക്കി ലോനച്ചൻ മരിച്ചു. അനാഥരോട് അനുകമ്പ തോന്നിയ ആനി മുടന്തനായ വേണു എന്ന കുട്ടിയെ ചേർത്തുകൊണ്ട് ഒരു അനാഥാലയം തുടങ്ങി. ആനി വഴങ്ങാത്തതിനാൽ സ്ത്രീലമ്പടനായ തോമാച്ചൻ അനാഥാലയം നശിപ്പിക്കാനൊരുങ്ങി. വേലക്കാരി അന്നമ്മ അയാളിൽ നിന്നും ഗർഭിണിയായി നാടു വിടുകയും ചെയ്തു.  അമേരിക്കയിൽ നിന്നും തിരിച്ചെത്തിയ ജോണിയ്ക്ക് ആനിയോട് പ്രേമം തോന്നിയെങ്കിലും ആനി ഒരു കുടുംബജീവിതത്തിനു തയാറാകുന്നില്ല. കാറപകടത്തിൽ കാഴ്ച നഷ്ടപ്പെട്ട ആനിയെ ചികിത്സിച്ചു കാഴ്ച വീണ്ടെടുക്കാൻ ജോണി ഉത്സുകനായി. അതേ ആശുപത്രിയിൽ വച്ചു പ്രസവിച്ച അന്നമ്മ മരിച്ചതിനാൽ ആ കുഞ്ഞുമായാണ് ആനി തിരിച്ചെത്തിയത്. ജോണിയ്ക്ക് ആനിയിലുണ്ടായ കുഞ്ഞാണിതെന്ന് തോമാച്ചൻ വാർത്ത പരത്തി. അന്നമ്മയുടെ സഹോദരൻ തോമാച്ചനെ പിടികൂടി സത്യം തെളിയ്ച്ചെങ്കിലും  ജോണിയുടെ അമ്മയും അവളെ ആക്ഷേപിച്ചപ്പോൾ ആനി ആത്മഹത്യയിൽ അഭയം തേടി.
 

കേശവക്കുറുപ്പിന്റെ അനുജത്തി മാധവിയെ ഉത്സവത്തിനിടെ പിണങ്ങിയ ആനയിൽ നിന്നും രക്ഷിച്ചത് കുമാർ എന്ന ചെറുപ്പക്കാരനാണ്. താഴ്ന്ന ജാതിക്കാരനായ അയാളുമൊത്ത് ശിഷ്ടജീവിതം കഴിക്കാൻ തീരുമാനിച്ച മാധവിയെ കേശവക്കുറുപ്പ് വീട്ടിൽ  നിന്നും പുറത്താക്കി. ബാങ്കിൽ ജോലിയുള്ള  കുമാറിന്റെ ഔദാരാധിക്യം മൂലം ബാങ്കു പൊളിഞ്ഞു, ചെയ്യാത്ത കുറ്റത്തിനു അയാൾ ജയിലിലും ആയി. മാധവി മക്കളായ ബാബുവും ഇന്ദിരയുമായി ഒരു പാതിരിയച്ചന്റെ ആശ്രയത്തിലായി. കേശവക്കുറുപ്പ് കല്യാണം കഴിച്ചത് കുഞ്ഞമ്മയെ-അവർക്ക് രണ്ടു കുട്ടികളുണ്ട്, ബാലനും പദ്മയും. ബാബു വേലക്കാരൻ ജോലികളാണു ചെയ്യുന്നത്. ഒരു ഹോട്ടൽ മുതലാളിയുമായി തൊഴിലിന്റെ മേന്മ്മയെക്കുറിച്ച് തർക്കിച്ചതിനാ‍ാൽ അയാളുടെ ജോലി പോയി. ഒരു ധനാഢ്യനെ രക്ഷിച്ചതിനാൽ ബാബുവിനെ അയാൾ കൂടെക്കൂട്ടി, തോട്ടത്തിൽ ജോലിയും കൊടുത്തു. കേശവക്കുറുപ്പായിരുന്നു ഈ ധനവാൻ. ബാബു തന്റെ അമ്മാവനാണിത് എന്ന് അറിയുന്നില്ല. കുഞ്ഞമ്മ ഇതിനകം മരിച്ചിരുന്നതിനാൽ കേശവക്കുറുപ്പ് പങ്കജത്തെ കല്യാണം കഴിച്ചിരുന്നു. അവളാകട്ടെ തന്റെ സഹോദരൻ ആണെന്ന മട്ടിൽ കാ‍മുകനായ ചന്ദ്രനേയും കൂടെ പാർപ്പിക്കുന്നുണ്ട്.  ബാബുവും പദ്മയും പ്രണയത്തിലാണ്. മനശ്ശാന്തിയ്ക്ക് ശബരിമല ദർശനം കഴിഞ്ഞ് വന്ന ബാബു തന്റെ സഹോദരി ഇന്ദിര ബാലന്റെ കരവലയത്തിലമരുന്നത് കണ്ട് അവരെ കൊല്ലാനൊരുങ്ങി. മാധവി ഇടപെട്ട് അതിൽ നിന്നും അവനെ പിൻ തിരിപ്പിച്ചു. പങ്കജവും ചന്ദ്രനും കൂടി കേശവക്കുറുപ്പിന്റെ സ്വത്തുക്കൾ അടിച്ചു മാറ്റാൻ കള്ള ആധാരമുണ്ടാക്കി. ബാബു കൃത്യസമയത്ത് അത് കണ്ടു പിടിച്ചു. കേശവക്കുറുപ്പിനു സത്യാവാസ്ഥ ബോദ്ധ്യമായി. പങ്കജത്തേയും ചന്ദ്രനേയും പുറത്താക്കി. മാധവിയേയും മക്കളേയും സ്വീകരിച്ചു. ബാബു പദ്മയേയും ബാലൻ ഇന്ദിരയേയും കല്യാണം കഴിച്ചു.

ജമീന്ദാരായ പുഷ്പനാഥൻ ഒരു മിൽ തുടങ്ങിയത് അയാളെ കളിപ്പിക്കുന്ന മനോഹറിന്റെ പ്രേരണയാലാണ്. ഭാനുമതി എന്ന വേശ്യയെ പരിചയപ്പെടുത്തിക്കൊടുത്തതും മനോഹർ തന്നെ.  അവളോട് ബന്ധം തുടരുമ്പോൾ തന്നെ  മിൽ ജോലിക്കാരനായ നീലമേഘം പിള്ളയുടെ പൌത്രി ആയ കാഞ്ചനയെ പുഷ്പനാഥൻ വിവാഹം ചെയ്തു. കാഞ്ചനയുടെ സഹോദരൻ ഡോ. സഭേശന്റെ കൂടെ ജോലി ചെയ്യുന്ന, അയാളുടെ കാമുകിയായ ഡോ. സീതയുടെ മേലും പുഷ്പനാഥനു കണ്ണുണ്ട്. സീതയുടെ മുൻപിൽ വച്ച് കാഞ്ചനയെ അടിയ്ക്കാൻ വരെ മടി കാണിച്ചില്ല പുഷ്പനാഥൻ. ഭാനുമതിയാകട്ടെ അമ്മയായ വേശ്യയുടെ തൊഴിൽ അതേ പടി തുടരാതെ പുഷ്പനാഥനെ സേവിച്ച് ജീവിക്കുകയാണ്. കാഞ്ചനയുടെ കുഞ്ഞ് മോഹനനെ അവൾ സ്വന്തം കുഞ്ഞിനെപ്പോലെയാണ് സ്നേഹിക്കുന്നത്. മനോഹറീന്റെ പ്രവൃത്തി മൂലം പുഷ്പനാഥന്റെ ബിസിസ്നസ്സ് പൊളിഞ്ഞു. കാഞ്ചനയും കുട്ടിയും നേരത്തെ വീട് വിട്ടിരുന്നു. അവർ വേലക്കാരി കണ്ണമ്മയുടെ  കുടിലിലാണ് താമസം.  ഡോ സീതയും പുഷ്പനാഥനും ആയി ബന്ധപ്പെടുന്നു എന്ന് തെറ്റിദ്ധരിച്ച് ഡോ സഭേശൻ അവളിൽ നിന്നും അകന്നു. അലഞ്ഞു തിരിയുന്ന പുഷ്പനാഥനു ഭാനുമതി ആശ്രയം കൊടുക്കാമെന്ന് ഏറ്റെങ്കിലും അയാൾ സമ്മതിച്ചില്ല. രോഗാതുരയായ ഭാനുമതി മുഴുവൻ സ്വത്തും  കാഞ്ചനയുടെ കുഞ്ഞ് മോഹനനു എഴുതി വച്ച് മരിച്ചു, അവൾ എഴുതിയ ഒരെഴുത്തിൽ നിന്നും സത്യാവസ്ഥകൾ ബോദ്ധ്യപ്പെട്ട പുഷ്പനാഥൻ പശ്ച്ചാത്താപവിവശനായി കാഞ്ചനയെ വീണ്ടും സ്വീകരിച്ചു. ഡോ സഭേശന്റെ തെറ്റിദ്ധാരണ നീങ്ങി; അയാൾ ഡോ സീതയെ വിവാഹം കഴിച്ചു.