ആക്ഷൻ/ഡ്രാമാ

കേന്ദ്ര രഹന്വേഷണ റിസർച്ച് വിഭാഗത്തിലെ ഡോ സുദർശനും (നെടുമുടി വേണു) അസിസ്റ്റന്റ് എമ്മ ജോർജ്ജും ദൽഹിയിലെ നഗരവീഥിയിൽ വെച്ച് കൊല്ലപ്പെടുന്നു. ദൽഹി മെട്രോ പോലീസ് ഉദ്യോഗസ്ഥനായ ശങ്കർ (ദേവൻ) തന്നെയാണ് അതിന്റെ പുറകിൽ. ശത്രു രാജ്യത്തിന്റെ ചില സുപ്രധാ‍ന വിവരങ്ങൾ ഡോ സുദർശൻ തിരിച്ചറിഞ്ഞു എന്നതായിരുന്നു കാരണം. ഈ വിവരങ്ങൾ ദൽഹിയിലെ ആൾദൈവമായ ചന്ദ്രമൌലീശ്വരനു ഒറ്റിക്കൊടൂത്ത റിസർച്ച് അസിസ്റ്റന്റ് കിഷോർ ബാലകൃഷ്ണനും (വിജയ് മേനോൻ) കൊല്ലപ്പെടുന്നു. ഈ മരണത്തിൽ ദുരൂഹത തോന്നിയ കേന്ദ്രമന്ത്രി ജി കെ (ജനാർദ്ദനൻ) കേസന്വേഷണത്തിനു ജോസഫ് അലക്സിനെ (മമ്മൂട്ടി) വിളിക്കുന്നു.ജോസഫ് അലക്സ് കേസന്വേഷണവുമായി ചെന്നെത്തിയത് ഇന്ദ്രപ്രസ്ഥത്തിലെ ഉന്നതയിടങ്ങളിലാണ്. രാഷ്ട്രീയ ഒറ്റുകാരുടേയും ഇടനിലക്കാരുടേയും വിവരങ്ങൾ അദ്ദേഹം കണ്ടെടുക്കുന്നു. പ്രധാനമന്ത്രിയെ വധിക്കാനും ഇന്ത്യയെ തകർക്കാനുമുള്ള പാക്ക് ചാര സംഘടനയുടെ ഓപ്പറേഷൻസ് ആണ് ഇതെന്നും അതിനു ഇന്ത്യയിലെ തന്നെ രാഷ്ട്രീയ-പോലീസ്-ആത്മീയ ആളുകളുടെ വൻ പിന്തുണയുമുണ്ടെന്ന് ജോസഫ് അലക്സ് മനസ്സിലാക്കുന്നു. ജോസഫ് അലക്സിനു കേസിൽ അസിസ്റ്റ് ചെയ്യാൻ കേരളാ കേഡറിൽ നിന്നും ഭരത് ചന്ദ്രൻ ഐ പി എസും എത്തുന്നതോടെ സിനിമ ഉദ്വേഗഭരിതമാകുന്നു. പെട്ടെന്ന് ഒരവസരത്തിൽ കേസ് അവസാനിപ്പിക്കാനും റിസൈൻ ചെയ്യാനും പ്രധാനമന്ത്രി ജോസഫ് അലക്സിനോട് ആവശ്യപ്പെടുന്നു. ജി കെയും ജോസഫ് അലക്സും പ്രതീക്ഷിക്കാത്ത ഒരു തീരുമാനമായിരുന്നു അത്. തുടർന്ന് ജോസഫ് അലക്സും ഭരത് ചന്ദ്രനും നടത്തുന്ന പോരാട്ടങ്ങൾ.

പശ്ചിമ കൊച്ചിയിൽ നിന്നും എറണാകുളം നഗരത്തിലേക്ക് വൈദിക പഠനത്തിനു വരുന്ന ഡോൺ ബോസ്കോ(ആസിഫ് അലി)യും കൂട്ടൂകാരും ദിവസവും കൊച്ചിയിലെ 'പത്താംകളം' എന്ന ഗുണ്ടാ - മാഫിയ സംഘത്തിന്റെ ആക്രമണങ്ങൾക്ക് ദൃക്സാക്ഷികളാകുന്നുണ്ട്. സമൂഹത്തിലെ ഇത്തരം തിന്മകൾക്കെതിരെ പ്രവർത്തിക്കാൻ ഡോൺ ബോസ്കോ മനസ്സുകൊണ്ട് തയ്യാറെടുക്കുന്നുവെങ്കിലും സെമിനാരിയിലെ അവന്റെ വിലക്കുകൾ അതിനു വിലങ്ങിടുന്നു. അവിടെ വെച്ച്  അനാഥനെന്നു കരുതിയ തനിക്ക് അച്ഛനും അമ്മയുമുണ്ടെന്ന് അവൻ അറിയുന്നു. സെമിനാരിയിൽ വയലിൻ പഠിപ്പിക്കുവാൻ വരുന്ന ഏയ്ഞ്ചൽ ടീച്ചർ (ലെന) ആണു തന്റെ അമ്മ എന്നു അവൻ തിരിച്ചറിയുന്നു. ടീച്ചറിൽ നിന്നും അവനെ സ്നേഹിക്കുന്ന മറ്റൊരു വികാരി(ബാബുരാജ്)യിൽ നിന്നും അവന്റെ അച്ഛൻ കൊല്ലപ്പെട്ട ഗുണ്ട സാത്താൻ എന്ന ദാവീദ് ആണെന്നു അവൻ മനസ്സിലാക്കുന്നു. ശരിക്കുമൊരു അസുരവിത്താണൂ താനെന്നും അതുകൊണ്ടാണൂ താൻ ഇത്രയും പ്രതികരണ ശേഷിയുള്ളവനാണെന്നും അവനോട് വികാരി പറയുന്നു.

ഡോൺ ബോസ്കോ എന്നും യാത്ര ചെയ്യുന്ന ബോട്ടിന്റെ ഉടമ മാർട്ടി (സംവൃതാസുനിൽ)ക്ക് ഡോൺ ബോസ്കോയോട് പ്രണയമാണൂ. അവൾ അതു പലപ്രാവശ്യം വെളിപ്പെടുത്തുന്നുവെങ്കിലും വൈദിക വിദ്യാർത്ഥിയായതിനാൽ അവൻ അത് തിരസ്കരിക്കുന്നു. ചിത്രകാരികൂടിയായ മാർട്ടി ഇടക്ക് സ്ഥലത്തെ പോലീസ് സ്റ്റേഷനിൽ പ്രതികളെ തിരിച്ചറീയാൻ അവരുടേ രേഖാചിത്രം വരച്ചു കൊടുക്കുന്ന ജോലിയും ചെയ്യുന്നുണ്ട്. നഗരത്തെ ശുദ്ധീകരിക്കാൻ പുറപ്പെട്ട എൻഫോഴ്സ് മെന്റ് ഓഫീസറെ (സിദ്ദിഖ്) പത്താംകളത്തിലെ പ്രധാനി ആരോൺ കൊലപ്പെടൂത്തുന്നത് അപ്രതീക്ഷിതമായി ഡോൺ ബോസ്കോ കാണുന്നു. പോലീസിനും മാർട്ടിക്കും മുൻപിൽ അവൻ അത് വെളിപ്പെടൂത്തുന്നുവെങ്കിലും പ്രതി അയാളല്ല എന്നു പറയാനാണു പോലീസ് അവനെ നിർബന്ധിക്കുന്നത്. അതിനു തയ്യാറാവാത്ത ഡോൺ ബോസ്കോയെ പോലീസ്  തല്ലിച്ചതക്കുന്നു. പിന്നീട് സെമിനാരിയിലും അവനു മൃഗീയ മർദ്ദനമുറകൾ ഏൽക്കുന്നു. എല്ലാം പത്താംകളത്തിന്റെ സ്വാധീനം മൂലമാണെന്ന് അവൻ തിരിച്ചറിയുന്നു. പത്താംകളത്തെ നിയന്ത്രിക്കുന്നത് അബ്ബാ മൊറേ (വിജയരാഘവൻ) എന്ന ജൂത വൃദ്ധനാണ്. അബ്ബായുടെ ഇളയ പേരക്കുട്ടികളുമായി ഒരിക്കൽ സംഘട്ടനത്തിൽ ഏർപ്പെട്ട ഡോൺ ബോസ്കോയെ നശിപ്പിക്കാൻ ആരോണും സംഘവും ശ്രമിക്കുന്നു. അതിൽ നിന്നും സാഹസികമായി രക്ഷപ്പെട്ട ഡോൺ ബോസ്കോ വൈദിക പഠനം ഉപേക്ഷിച്ച് പ്രതികാര ദാഹിയാകുന്നു. പത്താംകളത്തിന്റെ ശത്രുവുമായ സാത്താന്റെ പഴയ സുഹൃത്ത് (ഐ എം വിജയൻ) ഡോൺ ബോസ്കോയ്ക്ക് എല്ലാവിധ സഹായങ്ങളും ചെയ്തു കൊടുക്കുന്നു. അങ്ങിനെ കൊച്ചി അധോലോകത്തിന്റെ പുതിയ ഡോൺ ആയി ഡോൺ ബോസ്കോ മാറുന്നു. തുടർന്ന് ഇരു സംഘങ്ങളുടേയും പോരാട്ടങ്ങളാണ്.

രണ്ട് പ്രധാന കഥകളും അവയുടെ ഉപകഥകളും "മൾട്ടി നരേറ്റീവ്" സങ്കേതമുപയോഗിച്ച് പറഞ്ഞിരിക്കുകയാണു ചിത്രത്തിൽ. സിനിമയുടെ തുടക്കത്തിൽ കാണിക്കുന്ന ഒരപകടത്തിൽ ഈ രണ്ട് കഥകളും കൂട്ടിമുട്ടുന്നു. 

ആദ്യ കഥയിൽ, തമിഴ്നാട്ടിൽ നിന്നും കേരളത്തിലെത്തി കൂലിപ്പണിയെടുക്കുന്നവരെക്കുറിച്ചാണു. തമിഴനായ സ്വർണ്ണവേലിനു (ഇന്ദ്രജിത്ത്) കൂടെ ജോലി ചെയ്യുന്ന മരതകത്തെ (പാർവ്വതി മേനോൻ) ഇഷ്ടമാണു. അവൾക്കും അവനെ ഇഷ്ടമാണെങ്കിലും രണ്ടു പേരും പരസ്പരമുള്ള ഇഷ്ടം മനസ്സിൽ തന്നെ സൂക്ഷിക്കുന്നു. മരതകം വിവാഹിതയും ഒരു കുട്ടിയുടെ അമ്മയുമാണു. അവൾ പോലീസുകാരനും മറ്റു ഭാര്യമാരുമുള്ള ഭർത്താവിന്റെ ഉപദ്രവം സഹിക്കാതെയാണു കുട്ടിയെ പൊള്ളാച്ചിയിൽ പാട്ടിയുടെ അടുത്താക്കി അവൾ കൊച്ചിയിലെത്തിയിരിക്കുന്നത്. മരതകത്തെ ഇഷ്ടപ്പെടുന്ന മറ്റൊരാളായ നാച്ചിമുത്തു (സുധീർ കരമന) തമിഴ് കോളനിയിലെ ലക്ഷ്മിയക്കയുടെ (രോഹിണി) സഹായത്തോടെ അവളെ വിവാഹം കഴിക്കാൻ ശ്രമം നടത്തുന്നു. സ്വർണവേലും മരതകവും തമ്മിലുള്ളത് സഹോദരബന്ധമാണെന്ന് വിശ്വസിപ്പിച്ച് ലക്ഷ്മി മുൻകൈയെടുത്ത് നാച്ചിമുത്തുവിന്റേയും മരതകത്തിന്റേയും വിവാഹം നടത്തുന്നു. പക്ഷേ, ആദ്യരാത്രിയിൽ തന്നെ വരുന്ന പോലീസുകാരിൽ നിന്നും നാച്ചിമുത്തു ഒരു മോഷ്ടാവാണെന്ന് മരതകം അറിയുകയും തിരികെ വേലിന്റെ അടുക്കലേക്ക് പോവുകയും ചെയ്യുന്നു. നിരാശനാകുന്ന നാച്ചിമുത്തു പൊള്ളാച്ചിയിൽ നിന്നും മരതകത്തിന്റെ ആദ്യഭർത്താവിനെ വരുത്തുന്നു. മർദ്ദനമേൽക്കുന്നെങ്കിലും വേൽ മരതകവുമായി രക്ഷപ്പെടാൻ ശ്രമിക്കുന്നു.

രണ്ടാമത്തെ കഥയിൽ പറയുന്നത് കൊച്ചിയിലെ റിയൽ എസ്റ്റേറ്റ് മാഫിയയെ പറ്റിയാണു. ബിസിനസുകാരനായ സോണി വടയാറ്റിലിന്റെ (രാജീവ് ഗോവിന്ദപിള്ള) വലംകൈയ്യാണു ഗുണ്ടയായ ജ്യോതിലാൽ (പൃഥ്വിരാജ്). സോണിയുമായുള്ള ഒരു കച്ചവടത്തിലുണ്ടാകുന്ന പ്രശ്നത്തിന്റെ പുറത്ത് മറ്റൊരു ബിസിനസ്സുകാരനായ പുന്നൂസിനെ ജ്യോതിലാൽ കൊല്ലുന്നു. പുന്നുസിന്റെ വിധവയായ ലിജി പുന്നൂസ് ഭർത്താവിന്റെ ഘാതകരെ വധിക്കാനായി ഷമീമിന്റെ (അരുൺ) സഹായം തേടുന്നു. സോണിയേയും ജ്യോതിലാലിനേയും ഗുണ്ടകളെ വിട്ട് വധിക്കാനുള്ള ആദ്യശ്രമം പാളുന്നെങ്കിലും ലിജി വീണ്ടും കരുക്കൾ നീക്കുന്നു. സോണിയുടെ സുഹൃത്തും ബിസിനസ് പങ്കാളിയുമായ മെഹബൂബിന്റെ (കിഷോർ സത്യ) ഭാര്യയാണു അഭിനേത്രിയായ സൂര്യപ്രഭ. സോണിയുടെ കാമുകിയായിരുന്ന സൂര്യപ്രഭയെ സോണി വിവാഹം കഴിക്കാതെ ഉപേക്ഷിച്ചതാണെങ്കിലും വീണ്ടും അവളെ ലഭിക്കാൻ വേണ്ടിയാണു സോണീ മെഹബൂബിനെ കൂടെ ചേർക്കുന്നത്. സോണിയുടെ കീഴിലുള്ള കെട്ടിടത്തിലുണ്ടാകുന്ന അപകടത്തിൽ ലക്ഷ്മിയും മറ്റു ചില ജോലിക്കാരും കൊല്ലപ്പെടുന്നു. അപകടത്തിന്റെ ഉത്തരവാദിത്തം ഏറ്റെടുക്കേണ്ടിവരുന്ന മെഹബൂബ് പോലീസ് കസ്റ്റഡിയിലായി. സൂര്യപ്രഭയെ ലഭിക്കാൻ സോണിയൊരുക്കിയ കെണിയാണിതെന്നു മനസ്സിലാകുന്ന ജ്യോതിലാൽ മെഹബൂബിനെ രക്ഷപ്പെടുത്താനും സൂര്യപ്രഭയെ ഒഴിവാക്കാനും സോണിയോട് ആവശ്യപ്പെടുന്നു.