കുടുംബചിത്രം

പൂമറ്റം റബർ തോട്ടത്തിന്റെ ഉടമയും വിവാഹിതനുമായ പുന്നച്ചൻ അവിടത്തെ ഡിസ്പെൻസറിയിലെ നേഴ്സ് ദീനാമ്മയുമായി അടുപ്പത്തിലായി. ഒരു പുത്രിയുമുണ്ടായി, ജെസ്സി.  പുന്നച്ചൻ വേണ്ടുവോളം ധനം നൽകി ദീനാമ്മയെ സഹായിയ്ക്കുന്നുമുണ്ട്. തോട്ടം സൂപ്രണ്ട് ആയ ചാക്കോച്ചന്റെ മകൻ ജോയിയെക്കൊണ്ട് ജെസ്സിയെ കെട്ടിയ്ക്കാമെന്നായി പുന്നച്ചന്റേയും ദീനാമ്മയുടേയും പ്ലാൻ. ജെസ്സിയാണെങ്കിൽ ജോയിയുമായി ചങ്ങാത്തത്തിൽ ആണു താനും. എന്നാൽ പുന്നച്ചന്റെ മകൻ ബാബുവിനോടാണ് അവൾക്ക് തീവ്രപ്രണയം തോന്നിയത്. ഇതറിഞ്ഞ ബാബു ഒന്നു വിട്ടുമാറി നിൽക്കുകയും ചെയ്തു.  ബാബുവുമായി ജെസ്സിയ്ക്ക് അടുപ്പമുണ്ടെന്നറിഞ്ഞ ദീനാമ്മ അവർ സഹോദരീ സഹോദർന്മാരാണെന്ന് പറയേണ്ടി വന്നു. പുന്നച്ചൻ ബാബുവിനോട് ഇക്കാര്യം പറയാതെ മദ്രാസിനയയ്ക്കുകയാണ് ചെയ്തത്. ഇതിനിടയിൽ ജെസ്സിയും ജോയിയുമായുള്ള വിവാഹവും അവർ നടത്തി. ജോയിയുടെ അച്ഛൻ ചാക്കോച്ചൻ തന്നെ മരണഭീഷണി മുഴക്കി  അവനെ സമ്മതിപ്പിച്ച് എടുക്കുകയായിരുന്നു. നവദമ്പതിമാരുടെ ആദ്യരാത്രിയിൽ സ്ഥലത്തെത്തിയ ബാബു ജെസ്സി ഇത്രയും നാൾ അവനെ വഞ്ചിയ്ക്കുയായിരുന്നു എന്നു കരുതി അവളെ തന്റെ കൈത്തോക്കിനിരയാക്കി. അപ്പോഴാണ് പുന്നച്ചൻ സത്യം വെളിവാക്കുന്നത്. പെങ്ങളെ കൊല്ലാനിടയായ ആ കൈത്തോക്ക് കൊണ്ടു തന്നെ ബാബു സ്വന്തം പ്രാണനും വെടിഞ്ഞു.

"ഏഴു പെണ്മക്കളുള്ള സത്യവാൻ ശങ്കുപ്പിള്ള മക്കളെ പരിപാലിക്കാനായി ഉദ്യോഗം രാജിവച്ചയാളാണ്. രണ്ടാമത്തെ മകൾ പദ്മയുടെ ഓഫീസ് ജോലിയാണ് പ്രധാന വരുമാനം. ഓഫീസിലെ മുതലാളിക്ക് പദ്മയുടെ ചേച്ചി കമലയിൽ അഭിനിവേശം ഉണ്ട്.

പദ്മക്ക് കാമുകൻ മധുവിനോടൊപ്പം മദ്രാ‍സിനു പോകാനും അയാളെ കല്യാണം കഴിയ്ക്കാനും താൽ‌പ്പര്യമുണ്ടെങ്കിലും അച്ഛൻ സമ്മതിക്കുന്നില്ല. സ്ഥലം ഉപദേശിയ്ക്ക് കടം കൊടുക്കാനുണ്ട് ശങ്കുപ്പിള്ളയ്ക്ക്. ഉപദേശിയുടെ മകളുടെ കല്യ്യാണത്തിനു പോകാൻ കമൽ കുഞ്ഞമ്മയോട് മാല കടം വാങ്ങി, അതണിഞ്ഞ പദ്മയുടെ കഴുത്തിൽ നിന്നും ഒരു കള്ളൻ മാല മോഷ്ടിച്ചു. കള്ളൻ കുഴിച്ചിട്ട മാല കാലൻ കേശവപിള്ള കണ്ടെടുത്തെങ്കിലും ശങ്കുപ്പിള്ളയോട് മാലയുടെ വില ആവശ്യപ്പെടുകയാണുണ്ടായത്. കടം വീട്ടാൻ കമല മുതലാളിയുടെ അടുക്കൽ സ്വയം സമർപ്പിക്കാൻ ഒരുങ്ങിയെങ്കിലും മുതലാളി തന്റെ ഇംഗിതം തൽക്കാലം ഒളിപ്പിച്ചു. കമലയുടെ സ്വഭാവത്തിൽ സംശയം തോന്നിയ ശങ്കുപ്പിള്ള അവളെ വീട്ടിൽ നിന്നും പുറത്താക്കി. അവൾക്ക് തുണ കുഞ്ഞമ്മ മാത്രമായി. കുഞ്ഞമ്മയ്ക്ക് താൽ‌പ്പര്യം മധുവിനെക്കൊണ്ട് കമലയെ കല്യാണം കഴിപ്പിയ്ക്കുകയാണ്. പദ്മയ്ക്ക് ഇതു തെറ്റിദ്ധാരണജനകമായിരുന്നു. ചില ഉരസലുകൾക്ക് ശേഷം സത്യസ്ഥിതി എല്ലാവർക്കും ബോദ്ധ്യമാവുകയും സദ് വൃത്തനായി മാറിയ മുതലാളി കമലയെ കല്യാണം കഴിയ്ക്കുകയും പദ്മയ്ക്ക് മധുവിനെ വരനായി ലഭിയ്ക്കുകയും ചെയ്യുന്നു. "

രാമൻ നായരും മകൻ ഗോപിയും അയൽ പക്കത്തെ മമ്മുട്ടിയും മക്കളായ റഹിമും ഖദീജയുമായി വളരെ രമ്യതയിലാണ്. കുട്ടൻ വൈദ്യരുടെ മകൾ രാധയെ ഗോപി സ്നേഹിയ്ക്കുന്നു. ഖദീജയെ പ്രാപിക്കാനൊരുങ്ങിയ തട്ടിപ്പുകാരൻ ഹാജിയാരെ ഗോപി ശിക്ഷിച്ചതിന്റെ പ്രതികാരം അയാൽ തീർത്തത് ഗോപിയും ഖദീജയും തമ്മിൽ പ്രേമമാണെന്ന കള്ളക്കഥപ്രചരിപ്പിച്ചാണ്. റഹിമും മമ്മുട്ടിയും ഗോപിയുമായി തെറ്റി. കൽക്കത്തയിൽ ഖനിയിൽ ജോലി ചെയ്യുന്ന ഗോപി റഹിംനേയും അങ്ങോട്ട് വരുത്തി, റഹിം അറിയാതെ. റഹിമിന്റെ തെറ്റിദ്ധാരാനകൾ നീങ്ങിക്കിട്ടി. ഖദീജയുടെ കല്യാണത്തിനു റഹിമും ഗോപിയും നാട്ടിലെത്തിയെങ്കിലും ഹാജിയാർ തീ വച്ച മമ്മുട്ടിയുടെ വീട്ടിൽ നിന്നും എല്ലാവരേയും രക്ഷിക്കേണ്ടതായിട്ടാണ് വന്നത്. എന്നാൽ രാമൻ നായരും മമ്മുട്ടിയും പരസ്പരം രക്ഷിയ്ക്കാൻ ശ്രമിച്ചതിനിടയിൽ ഒരുമിച്ച് മരിയ്ക്കുകയാണുണ്ടായത്.

ബാങ്കുദ്യോഗസ്ഥനായ പ്രേമചന്ദ്രൻ നെടുനാളത്തെ കാത്തിരിപ്പിനു ശേഷം പ്രണയിനി നിർമ്മലയെ കല്യാണം കഴിച്ചു.  ഭർത്താവിന്റെ വീട്ടിൽ അച്ഛനും അനുജൻ പ്രഭാകരനുമുണ്ട്. പ്രഭാകരൻ പ്രേമിക്കുന്നത് സുശീലയെ. നാലുനാളത്തെ ദാമ്പത്യത്തിനു ശേഷം ജോലിയ്ക്കു മടങ്ങിയ പ്രേമചന്ദ്രൻ ഒരു അപകടത്തിൽ മരിയ്ക്കയാണുണ്ടായത്. അത്യാഹിതത്തിനു ബാങ്ക് നൽകിയ പരിഹാരത്തുക കയ്ക്കലാക്കാൻ വന്ന ഗോപിയുടെ വിവാഹാഭ്യർത്ഥന നിർമ്മല നിരസിച്ചു,. അയാൾ പകരം വീട്ടിയത് നിർമ്മലയ്ക്ക് പ്രഭാകരനുമായി ബന്ധമുണ്ടെന്ന അപവാദം പ്രചരിപ്പിച്ചാണ്. സ്വന്തം അനുജത്തി വാസന്തിയെ  അയ്യായിരം രൂപ നൽകി വിശ്വനാഥനെക്കൊണ്ട് വിവാഹം ചെയ്യിപ്പിച്ചു നിർമ്മല. നിർമ്മല സ്വന്തം വീട്ടീൽ അന്യയായി താമസിയാതെ. അനുജൻ ഭാർഗ്ഗവനും, ഭാര്യ ഭാരതി ടീച്ചറും സ്വര്യം കൊടുത്തില്ല അവൾക്ക്. അനിയത്തിയുടെ വീട്ടിൽ അഭയം തേടിയ അവൾക്ക് വിശ്വനാഥനിൽ നിന്നും പ്രണയാഭ്യർത്ഥനയാണൂണ്ടായത്. ഇത് വാസന്തിയെത്തന്നെയും തെറ്റിദ്ധരിപ്പിച്ചു. തിർച്ച് ഭർത്താവിന്റെ വീട്ടിൽ എത്തിയ അവളെ  സുശീലയും തള്ളിപ്പറയുന്നു,  പ്രഭാകരനുമായി അവിഹിതബന്ധമുണ്ടെന്നാരോപിച്ചു കൊണ്ട്. നിർമ്മല തന്റെ പ്രിയനുമായി ചേരാറൂള്ള മരച്ചുവട്ടിൽ അഭയം തേടി. മാനസികവിഭ്രാന്തിയിൽ പെട്ട അവൾ നിരാലംബയായി നടന്നകന്നു.  

കുഞ്ഞാത്തുമ്മയുടെ മക്കൾ കബീറും സുഹ്രയും മദ്രാസിൽ പഠിക്കാനെത്തി. സുഹ്ര ഒസ്സാന്റെ മകൻ കാദറുമായി പ്രണയത്തിലാകുന്നു. ഉമ്മ സമ്മതിക്കുകയില്ലെന്ന് ഭയന്ന് കബീർ സുഹ്രയുടെ വിവാഹം രഹസ്യമായി നടത്തിക്കൊടുത്തു. സൈക്കിൾ അപകടത്തിൽ കാദർ മരിച്ചു, സുഹ്ര ഒരു കുഞ്ഞിനെ പ്രസവിച്ചു. ഉമ്മയ്ക്ക് അസുഖമാണെന്നറിഞ്ഞ് കബീറും സുഹ്രയും നാട്ടിലേക്ക് തിരിച്ചപ്പോൾ കുഞ്ഞിനെ ജോണീ എന്നൊരു സുഹൃത്തിനെ ഏൽ‌പ്പിച്ചു. നാട്ടിൽ വച്ച് സുഹ്രയുടെ രണ്ടാം വിവാഹം നടന്നു-ജമാൽ ആണു വരൻ. കബീറിന്റെ കല്യാണവും കഴിഞ്ഞു. ഷ്രയുടെ മകൻ താജു ജോണിയോടൊപ്പം വളരുന്നു. അവനു പനിയാണെന്നറിഞ്ഞ കബീർ അവനെ ശുശ്രൂഷിക്കാനെത്തി. ഭാര്യ സംശയിച്ചത് കബീറിനു ജോണിയുടെ ഭാര്യയുമായി അവിഹിതബന്ധം ഉണ്ടെന്നാണ്. കബീർ കഥകളെല്ലാം അവളോട് പറഞ്ഞു. അവൾ ശാന്തയായി, താജുവിനെ വളർത്താൻ തയാറായി. എന്നാൽ താജു പെട്ടെന്ന് മരിച്ചപ്പോൾ ഗർഭവതിയായ ഭാര്യ അവനെ കൊന്നതാണെന്ന് കബീർ അധിഷേപിച്ചു. അവൾ ഭ്രാന്തിയായി. ഭ്രാന്താലയത്തിൽ വച്ച് ഒരു കുഞ്ഞിനെ പ്രസവിച്ചു. കുഞ്ഞിനെ സ്നേഹവാനായ ഒരു ഡോക്ടറാണു വളർത്തുന്നത്. ജമാൽ സുഹ്രയെ വൈദ്യപരിശോധനയ്ക്കു വിധേയയാക്കാൻ തുനിഞ്ഞപ്പോൾ നേരത്തെ ഒന്നു പ്രസവിച്ചതാണെന്നു കണ്ടുപിടിയ്ക്കപ്പെട്ടേയ്ക്കുമെന്നു കരുതി ആത്മഹത്യക്ക് ശ്രമിച്ചു. ഡോക്ക്ടർ തക്ക സമയത്ത് അവളെ രക്ഷപ്പെടുത്തി. കബീറിന്റെ കുട്ടിയെ അവൾക്ക് സമ്മാനിച്ചു. സുഹ്രയെ അന്വേഷിച്ച കബീർ പാർക്കിൽ വച്ച് ഈ കുട്ടിയെക്കണ്ട് വെറുതേ അവന്റെ വീട്ടിലെത്തുമ്പോൾ അവിടെ സുഹ്രയെ കണ്ടു. സുഹ്ര വീണ്ടും വഴിപിഴച്ചെന്നു കരുതി കബീർ അവളെ അടിയ്ക്കുമ്പോൾ ഡോക്ടർ കഥകളെല്ലാം പറയുന്നു. കുട്ടിയുടെ യഥാ‍ർത്ഥ അമ്മയെ കാണാൻ എല്ലാവരും കൂടി ഭ്രാന്താശുപത്രിയിൽ എത്തിയപ്പോൾ കബീറിന്റെ ഭാര്യ ഷോക്കേറ്റ് നിലം പതിച്ചു. അതോടെ അവളുടെ ഭ്രാന്തു മാറി. പക്ഷേ കുട്ടിയെ വിട്ടുപിരിയാൻ സുഹ്രയ്ക്കും അവന്റെ അമ്മയ്ക്കും വയ്യ.  സ്നേഹസമ്പന്നനായ ജമാൽ കഥയൊക്കെ അറിഞ്ഞ് സുഹ്രയെ കൂട്ടിക്കൊണ്ടു പോയി. കുട്ടിയെ കാണാഞ്ഞ് സുഹ്ര രോഗവതിയായി. കുട്ടിയും അതീവ രോഗാതുരനായി. കുട്ടിയേയും കൂട്ടി കബീറും ഭാര്യയും സുഹ്രയുടെ വീട്ടിൽ എത്തിയപ്പോൾ അവൾ മരിച്ചു. പെട്ടെന്ന് കുട്ടിയുടെ അസുഖം മാറി.

കറുത്തവളും ചൊവ്വാദോഷക്കാരിയുമായ ശ്യാമളയ്ക്ക് ജീവിതം നിഷേധിക്കപ്പെടുകയാണ്. മൂന്നാം വേളി കഴിഞ്ഞ ചേപ്രം നമ്പൂതിരിയുടെ വിവാഹാഭ്യർത്ഥന അവൾ തള്ളിക്കളഞ്ഞതു കാരണം കഷ്ടതകൾ ഏറെയുണ്ട്.  പട്ടാളത്തിൽ നിന്നും തിരിച്ചെത്തിയ വേണു ശ്യാമളയുമായി അടുപ്പത്തിലായി. കുടിലചിത്തനായ എസ്റ്റേറ്റ് ഉടമ മേനോൻ കെട്ടിച്ചമച്ച കള്ളക്കേസിൽ വേണു ജയിലിൽ ആയി. ആത്മഹത്യയ്ക്കു തുനിഞ്ഞ ശ്യാമള റെയിൽ പാളത്തിൽ നിന്നും ഒരു കുഞ്ഞിനെ കിട്ടിയതിനാൽ ജീവിതത്തിലേക്ക് തിരിച്ചു വരുന്നു. സ്വന്തം അനുജത്തിയുടെ വീട്ടിൽ വേലക്കാരിയായി ജീവിക്കേണ്ടി വരുന്നു അവൾക്ക്.  വെർണ്ണർ എന്ന പാതിരിയുടെ ആതുരാലയത്തിൽ അവൾ രോഗശുശ്രൂഷയിൽ ആനന്ദം കൈ വരിക്കുന്നു. ജയിൽ വിട്ടുവന്ന വേണു ശ്യാമളയെ തെറ്റിദ്ധരിക്കുന്നു. വെർണ്ണർ സത്യം ബോധിപ്പിച്ചതോടെ വേണു ശ്യാമളയെ വിവാഹം കഴിയ്ക്കാൻ തയാറാകുന്നു എങ്കിലും നിസ്വാർത്ഥമായ അവൾ തനിക്ക് ഇനിയും ആതുരസേവനം മാത്രം മതിയെന്നു വയ്ക്കുന്നു.

ഔസേപ്പിന്റെ കൂടെത്താമസിക്കുന്ന തോമയും ഔസേപ്പിന്റെ മകൾ റോസിയും പ്രണയബദ്ധരാണ്. സ്നേഹവാനായ അയൽക്കാരൻ കാസിം റോസിയ്ക്കു വേണ്ടി വാദിച്ചു. ഔസേപ്പ് അവസാനം കല്യാണത്തിനു സമ്മതിച്ചു. കാസിമിന്റെ മകൾ നബീസയുടെ കാമുകൻ സലിമും റോസിയ്ക്ക് പിന്തുണയുണ്ട്.  കല്യാണം കഴിഞ്ഞതോടെ തോമയും റോസിയും മറ്റൊരു മലയോര ഗ്രാമത്തിൽ കുടിയേറി. പോലീസിനെ കാണുമ്പോഴെല്ലം ഭീതിദനാകുന്ന തോമയ്ക്ക് പൂർവ്വചരിത്രത്തിൽ ഒരു രഹസ്യമുണ്ട്. സഹോദരിയെ മാനഭംഗപ്പെടുത്താൻ വന്ന മുതലാളിയുമായി ഏറ്റുമുട്ടിയപ്പോൾ മുതലാളി മരിക്കുകയാണുണ്ടായത്.നിരപരാധി എങ്കിലും കൊലക്കുറ്റം തോമയുടെ തലയിലാണ്. ഗർഭിണിയായ റോസി അവശനിലയിലാണ്. പരിചയക്കാരനായ പോലീസ് ശങ്കരൻ നായർക്ക് തോമയെ അറസ്റ്റ് ചെയ്യാതിരിക്കാൻ വയ്യ. പ്രസവത്തോടെ റോസി മരിയ്ക്കുമ്പോൾ ആ കുഞ്ഞിന്റെ കരച്ചിൽ പ്രതിദ്ധ്വനിക്കുന്ന അന്തരീക്ഷത്തിൽ തോമയെ കൊണ്ടുപോകുന്ന പോലീസ് ജീപ്പ് അകലുന്നു.