കുറ്റാലം കുളിരരുവീ
ചിറ്റോളം ചിലമ്പു ചാര്‍ത്തിയ കുളിരരുവീ
ഈ ചിത്രകൂട പൂമുഖങ്ങളില്‍ ഒഴുകിവരൂ
ഒഴുകിവരൂ...
കുറ്റാലം കുളിരരുവീ...

മൂടല്‍ മഞ്ഞു കുളിച്ചു താമസിക്കും
പീരുമേട്ടിലെ മൂകതയില്‍
പതഞ്ഞു പതഞ്ഞു നിറയൂ
തിരി തെറുക്കും തേയിലയ്ക്ക് മുല കൊടുക്കൂ
ചിറകു വച്ച പുഷ്പങ്ങളെ പാടിക്കൂ
മാനത്തെ കൊളുന്തു നുള്ളാന്‍
കൈ നീട്ടും കുന്നിന്റെ
മാറില്‍ നിന്റെ സ്യമന്തകങ്ങള്‍
ചാര്‍ത്തിക്കൂ ഓ....

മയൂരനർത്തനമാടി
മലർ‍ക്കളിചെണ്ടുകള്‍ ചൂടി
മാധവ പൗർണ്ണമി വന്നാലും
പുല്‍വരമ്പിന്‍മേല്‍ ഇരുന്നാലും
മയൂരനർത്തനമാടി

വിസ്മൃതി വാതിലടച്ചാല്‍ തുറക്കുന്ന
തപ്തവിഷാദങ്ങളോടെ
എതോ ഗ്രീഷ്മത്തിന്‍
എകാന്ത നിശ്വാസം
കാതോർത്തു നില്‍ക്കുമീ കാട്ടില്‍
എന്നെ തിരയുന്ന സൗരഭ്യമെ
നിനക്കെന്റെ സാഷ്ടാംഗപ്രണാമം
(മയൂരനർത്തനമാടി..)

വിപ്ലവം ജയിക്കട്ടേ
വിഗ്രഹങ്ങള് തകരട്ടേ
സഹ്യസാനുക്കളുണരട്ടേ
സുപ്രഭാതങ്ങള്‍ ചുവക്കട്ടേ
(വിപ്ലവം..)

കാട്ടുതിരികള്‍ കപ്പല്‍കയറ്റും
തോട്ടമുടമകളേ
തോല്‍ക്കുകില്ലിനി നിങ്ങടെയോട്ട-
ത്തോക്കിനു മുന്നില്‍ തൊഴിലാളി
തോല്‍ക്കുകില്ലിനി തൊഴിലാളി
തൊഴിലാളി ഐക്യം സിന്ദാബാദ്
തൊഴിലാളി ഐക്യം സിന്ദാബാദ്

കല്ലോലിനീ - വനകല്ലോലിനീ നിൻ
തീരത്തു വിടരും ദുഃഖപുഷ്പങ്ങളെ
താരാട്ടുപാടിയുറക്കൂ - ഉറക്കൂ
കല്ലോലിനീ...

തങ്കത്തളിരിലകൾ താലോലം പാടിപ്പാടി
പൊൻതിരി തെറുക്കുന്ന വനഭൂമി
നീലവിശാലതയെ തൊട്ടുഴിയുവാൻ
പച്ചത്താലങ്ങളുയർത്തുമീ തീരഭൂമി
ഇവിടെ നിൻ കാൽത്തളകൾ കരയുന്നുവോ
ഇവിടെ നിൻ കളഗീതമിടറുന്നുവോ
ഇടറുന്നുവോ ഇടറുന്നുവോ
(കല്ലോലിനീ..)

തിരുനെല്ലിക്കാട്ടിലോ
തിരുവില്വാമലയിലോ
തിരുവാതിര ഞാറ്റുവേലപ്പെണ്ണ് ഹോയ്
തിരുമുറ്റം തൂത്തുതളിച്ചിതുവഴി വാ
തീർത്ഥജലക്കുമ്പിളുമായ് ഇതുവഴി വാ
പെണ്ണിതുവഴി വാ
തിരുനെല്ലിക്കാട്ടിലോ

നീലമുകിൽ പാവാട പിഴിഞ്ഞു ചുറ്റി ഈ
നീരില്ലാച്ചോലകളിൽ പെയ്തിറങ്ങി
ഒരു തുള്ളി കുടിനീരിറക്കാത്ത മണ്ണിലേക്ക്
ഒരു പനിനീരുറവയായ് ഒഴുകി വാ
ഒഴുകി വാ ഒഴുകി വാ...
ആ പനിനീരുറവയിൽ അരയിലൊറ്റമുണ്ടുമായ്
അന്നാവണി ചന്ദ്രിക തേച്ചുകുളിക്കും
നമ്മളും തേച്ചുകുളിക്കും - തേച്ചുകുളിക്കും

പന്തയം പന്തയം
ഒരു പന്തയമാണീ ജീവിതം
തോറ്റവര്‍ക്കല്ലാ ജയിച്ചവര്‍ക്കല്ലാ
തുറന്ന മനസ്സിനാണീ ട്രോഫി
(പന്തയം..)

ഇന്നു തോറ്റവര് നാളെ ജയിക്കും
സ്വര്‍ണ്ണമെഡലുകള്‍ വാങ്ങും
ചെറുപ്പക്കാരികളേ....
ഹിസ്റ്ററിക്ലാസില്‍ കൂര്‍ക്കം വലിക്കാം
ഹിന്ദിപ്പാട്ടുകള്‍ പാടിനടക്കാം
സിനിമകാണാം സ്വപ്നംകാണാം
നമുക്കീപ്പന്തയം തുടരാം
(പന്തയം..)

നദികള്‍ നദികള്‍ നദികള്‍
ഞങ്ങള്‍ നര്‍ത്തകികള്‍
നിത്യനര്ത്തകികള്‍
പ്രകൃതിക്കു നീരാട്ടു
പനിനീരുമായ് വരും
പ്രിയ സഖികള്‍
(നദികൾ..)

ഗംഗേ യമുനേ ബ്രഹ്മപുത്രേ
ഗോദാവരീ കാവേരീ
നിങ്ങളൊന്നിച്ചു കൈനീട്ടി
പുല്‍കുമ്പോള്‍
ഒന്നേ ദാഹം ഒന്നേ മോഹം
ഒന്നേ ദേശീയ മന്ത്രം
വന്ദേമാതരം ജയ വന്ദേമാതരം

പാതിരാ തണുപ്പു വീണു.. മഞ്ഞു വീണു...
പാതിരാ തണുപ്പു വീണു മഞ്ഞു വീണു
പാട്ടു നിര്‍ത്തി കിടക്കൂ രാപ്പാടി
(പാതിരാ..)

കാറ്റോടും ജാലകങ്ങള്‍ അടച്ചോട്ടെ
ഈ കാറ്റാടി കുളിര്‍പങ്ക നിറുത്തിക്കോട്ടെ
ആയിരം പുതപ്പിട്ടു പുതച്ചാലും
എത്രയായിരം കിനാവുകള്‍ വിളിച്ചാലും
വരുമോ ഉറക്കം വരുമോ
മറ്റെന്തോ കൊതിക്കുമീ ഹൃദയം
ഒരു ഭര്‍തൃമതിയുടെ ഹൃദയം
ഹേയ്! എന്തിനീ സൌന്ദര്യപ്പിണക്കം
(പാതിരാ..)

പനിനീര്‍മഴ പൂമഴ തേന്‍മഴ
മഴയില്‍ കുതിരുന്നൊരഴകേ
നനയുന്നതു കഞ്ചുകമോ സഖീ നിന്നെ
പൊതിയും യൗവ്വനമോ
(പനിനീര്‍മഴ..)

കണ്‍പീലികളില്‍ തങ്ങി - ചുണ്ടിലെ
കമലക്കൂമ്പുകള്‍ നുള്ളി
മാറില്‍ പൊട്ടിത്തകര്‍ന്നു ചിതറി
മൃദുരോമങ്ങളിലിടറി
പൊക്കിള്‍ക്കുഴിയൊരു തടാകമാക്കിയ
പവിഴ മഴത്തുള്ളി
പണ്ടു ശ്രീപാര്‍വതിയെപ്പോലെ നിന്നെയും
സുന്ദരിയാക്കി- സുന്ദരിയാക്കി
(പനിനീര്‍മഴ..)

ചോര തുടിക്കും ഹൃദയങ്ങള്‍
ചുവന്ന ഹൃദയങ്ങള്‍
പുതിയ കുരുക്ഷേത്രഭൂമികളില്‍
അശ്വരഥം തെളിക്കും ഹൃദയങ്ങള്‍
ഞങ്ങള്‍ രഥം തെളിക്കും ഹൃദയങ്ങള്‍
ചോര തുടിക്കും..)

എഴുപത്തിനാലു വയസ്സു തികഞ്ഞൊരീ
ഇരുപതാം നൂറ്റാണ്ടിന്‍ തറവാട്ടില്‍
സ്വര്‍ണപീഠങ്ങളില്‍ തപസ്സിനിരിക്കും
വന്ദ്യ വയോധികരേ
ഈയുഗം നയിക്കാന്‍ കഴിയാത്ത നിങ്ങള്‍
ഇനിയൊന്നു വിശ്രമിക്കു
ഈ അധികാരമൊഴിഞ്ഞു തരൂ
(ചോര തുടിക്കും..)