ലളിതസംഗീതം

മാവുകള്‍ പൂത്തു മണം പരത്തുന്നൊരീ
രാവില്‍ , പുരാതനമീ പുരിയില്‍
കാത്തിരിക്കുന്നുവോ നര്‍ത്തകീ, എന്‍ ഗസല്‍
കേള്‍ക്കുവാന്‍ നീയും നിന്‍ കാല്‍ച്ചിലമ്പും

(മാവുകള്‍ പൂത്തു ....)

സ്വീകരിക്കൂ നീ പ്രണയസുഗന്ധിക-
ളാകുന്നൊരീ ഗസല്‍പ്പൂക്കള്‍ സഖീ
ഇന്നതിന്‍ തീക്ഷ്ണസുഗന്ധലഹരിയില്‍
നിന്നെ മറന്നൊന്നു നൃത്തമാടൂ
എന്‍ സ്വരധാരയും നിന്‍ പദതാളവും
ഒന്നിച്ചിണങ്ങുന്ന ലാസ്യലയം
ഇതെന്തൊരപൂര്‍വ്വമാം  ലാസ്യലയം

(മാവുകള്‍ പൂത്തു ....)

പുതിയൊരു രാഗം പാടുക താന്‍സെന്‍
മധുമഴ, കുളുര്‍മഴ പെയ്യിക്കൂ
ഇണചേരും ഇരുരാഗങ്ങള്‍ തന്‍
പ്രണയം പൂക്കും നവരാഗം

(പുതിയൊരു രാഗം....)

അരുതേ 'ദീപക്' രാഗാലാപനം
ഇനിയും തുടരരുതേ
താനേ കത്തിക്കാളുകയാണീ
രാജാങ്കണ മണിദീപങ്ങള്‍
പടരുകയായീ ഗ്രീഷ്മജ്ജ്വാലകള്‍
ഉടലുകളുരുകുകയായീ
പാടും പക്ഷീ, നിനക്കറിയാമോ ഈ
കാടിനു കെടുതീയാവാന്‍

(പുതിയൊരു രാഗം....)

"സുഖരാത്രിയൊടുങ്ങുകയായീ
എവിടേ നീയെന്നറിവീലാ"
പ്രിയഗായകാ, നീ പാടുകയാണെന്‍
ഉയിരില്‍ സുഖനൊമ്പരമായ്-എന്‍
ഉയിരില്‍ സുഖനൊമ്പരമായ്

(സുഖരാത്രിയൊടുങ്ങുകയായീ.........)

സ്നേഹാകുലമെന്‍ ജീവനില്‍ നിന്നൊരു
പ്രാവു പിടഞ്ഞുണരും പോല്‍ -നിന്‍
വിഷാദമധുര സ്വരമുയരുന്നെന്‍
വിജനകുടീരം തന്നില്‍
കരളില്‍ തിരുമുറിവാര്‍ന്നവര്‍ ഞങ്ങള്‍ -
ക്കരികില്‍ നീയുണ്ടെന്നും-സ്വാന്തന
മധുരം നീയേ പകരുന്നൂ

(സുഖരാത്രിയൊടുങ്ങുകയായീ.........)

"ഈശ്വര്‍, അല്ലാഹ്, തേരേനാം
മന്ദിര്‍, മസ്ജിദ്, തേരേഘര്‍"
ഭാരതഹൃദയനികുഞ്ജം തന്നില്‍
പാടുക നീയെന്‍ ബാന്‍സൂരീ
ആര്‍ദ്രം മധുരം ധീരമുദാരം
ആലപിക്കുക ബാന്‍സൂരീ

(ഈശ്വര്‍, അല്ലാഹ്....)

സ്നേഹയമുനകള്‍ വറ്റിയ ഭൂമി
ദാഹത്താല്‍ വരളുന്നൂ,
പകരൂ, പകരൂ, കാര്‍മുകിലുകളേ
കനിവിന്‍ അമൃതം നീളേ

(ഈശ്വര്‍, അല്ലാഹ്....)

കേവലര്‍ നാമീ ഭൂവിലുണര്‍ത്തുക
സ്നേഹത്താലൊരു സ്വര്‍ഗ്ഗം
മതങ്ങള്‍ മതിലുകള്‍ കെട്ടാതുള്ളൊരു
മധുര മനോഹര സ്വര്‍ഗ്ഗം

(ഈശ്വര്‍, അല്ലാഹ്....)

എന്തിനേ കൊട്ടിയടയ്ക്കുന്നു കാലമെന്‍
ഇന്ദ്രിയ ജാലകങ്ങള്‍?--എന്‍
ഇന്ദ്രിയ ജാലകങ്ങള്‍

ജാലകച്ഛായയില്‍ പാടാന്‍വരും
പക്ഷിജാലം പറന്നു പോയോ?
പാടവരമ്പത്ത് ചീവീട് രാക്കത്തി
രാകുന്നൊരൊച്ചയുണ്ടോ?
പാതിരാക്കോഴിതന്‍ കൂകലുണ്ടോ?
കാവല്‍മാടത്തിന്‍ ചൂളമുണ്ടോ?
ആരോ കോലായില്‍ മൂളും "രമണന്റെ"
ഈരടി കേള്‍ക്കുന്നുണ്ടോ?

(എന്തിനേ കൊട്ടിയടയ്ക്കുന്നു.....)