പുതിയൊരു രാഗം പാടുക താന്‍സെന്‍
മധുമഴ, കുളുര്‍മഴ പെയ്യിക്കൂ
ഇണചേരും ഇരുരാഗങ്ങള്‍ തന്‍
പ്രണയം പൂക്കും നവരാഗം
(പുതിയൊരു രാഗം....)
അരുതേ 'ദീപക്' രാഗാലാപനം
ഇനിയും തുടരരുതേ
താനേ കത്തിക്കാളുകയാണീ
രാജാങ്കണ മണിദീപങ്ങള്‍
പടരുകയായീ ഗ്രീഷ്മജ്ജ്വാലകള്‍
ഉടലുകളുരുകുകയായീ
പാടും പക്ഷീ, നിനക്കറിയാമോ ഈ
കാടിനു കെടുതീയാവാന്‍
(പുതിയൊരു രാഗം....)
കുളിരിന്നുറവാം യമുനയൊരുഷ്ണ-
പ്രവാഹമാവുകയോ?
മറ്റൊരു രാഗം പാടുക, ഗഗനം
ഹര്‍ഷാശ്രുക്കളുതിര്‍ക്കട്ടെ
അണിമുകിലുകള്‍ തന്‍ അകിടില്‍ നിന്നിനി
അമൃത് ചുരന്നൊഴുകട്ടെ
അന്തിച്ചോപ്പിന്‍ അഗ്നിജ്ജ്വാലയെ
ബന്ധുരചന്ദ്രികയാക്കൂ
(പുതിയൊരു രാഗം....)
