ലളിതസംഗീതം

തരളമാം മൃദു സ്വരം കേട്ടു
ആദ്യമായി കാണാത്ത നിന്‍ മുഖം
കാണാന്‍ കൊതിച്ചു
കേള്‍ക്കാത്ത രാഗത്തിന്‍ ലഹരിയായ്‌ എന്നില്‍ നീ
കരളിലെ ചെപ്പിലെ മാണിക്യമായി

തനിയെ ഒരു നാള്‍ നിന്‍ മുഖം ഓര്‍ത്തിരുന്നു
തപ്തമെന്‍ ഹൃദയത്തില്‍ സ്വപ്നമായ്‌ നീ
പിന്നെ നിന്‍ പാട്ടിന്റെ പല്ലവി കേട്ടപ്പോള്‍
കവിത കുറുമ്പുമായ്‌ കവിളിണ കണ്ടു
(തരളമാം)

ഹൃദയത്തില്‍ അനുഭൂതി വര്‍ണ്ണങ്ങള്‍ ചാലിച്ച
നിമിഷങ്ങളേറെ നീ എനിക്കു നല്‍കി(2)
കാണാത്ത നിന്‍ മന്ദഹാസത്തിന്‍ മധുരിമ
കവിതയായെന്നുള്ളില്‍ നിറഞ്ഞുവല്ലോ
(തരളമാം)

സാന്ത്വനം അരുളുന്ന സാന്നിദ്ധ്യം നീ
രാഗ പരിമള മധുര ഗാനം
ഒരു സ്നേഹ സുരഭില മധു വസന്തം
മാന്‍ മിഴി മലര്‍ മിഴി നീ അനുരാഗ
തേന്‍കനി തേന്‍കനി

നിന്നോര്‍മ്മ മനസ്സില്‍ നറുതേന്‍ കണം
നിന്‍ മന്ദഹാസം നീലാംബരി(2)
അമൃത നിശാന്തിയാം രാഗ സ്വപ്നം നീ
കളമൊഴി കിളിമൊഴി
നീയെന്‍ മധുര തേന്‍ മൊഴി തേന്‍ മൊഴി
(സാന്ത്വനം)

അരികത്തണഞ്ഞാല്‍ ആത്മ ഹര്‍ഷം
നീ അനുഭൂതി പകരുന്ന രോമ ഹര്‍ഷം(2)
നിന്‍ മിഴിപ്പൂകാള്‍ പ്രേമ ഹര്‍ഷം
കണ്‍മണി പൊന്‍മണി
നീ പൊന്നാര തേന്‍കിളി തേന്‍കിളി
(സാന്ത്വനം)

അറിയാതെ വന്നു നീ
കുളിരായെന്‍ മുന്നില്‍
മാഞ്ഞുപോയി നീ ഒരു നിഴലായി
നിന്നെ ഒരു മാത്ര കാണാന്‍
രാവില്‍ നീല നിലാവായെത്തി

ഓരോ നിനവിലും നീ വരുമെന്നോര്‍ത്ത്‌
തനിയെ എത്രനാള്‍ കാത്തിരുന്നു(2)
ഇവിദെ ഈ രാവില്‍ ഈറന്‍ നിലാവില്‍(2)
നിന്നെ ഓര്‍ത്തോര്‍ത്ത്‌ ഞാനിരുന്നു
(അറിയാതെ വന്നു)

ഓരോ പ്രതീക്ഷയും നീ വരും കാലൊച്ച
കേള്‍ക്കും മനസ്സിന്റെ ദാഹമല്ലേ(2)
എവിടെ പ്രിയ തോഴാ എവിടെ നീ(2)
എന്നെ ഒരു നോക്കു കാണാന്‍ അണയുകില്ലേ
(അറിയാതെ വന്നു)

എന്നിണക്കിളിയുടെ നൊമ്പര ഗാനം
കേട്ടിന്നലെയുറങ്ങാതെ ഞാനിരുന്നു
അകലുമാ കാലൊച്ച അകതാരില്‍ നിറയുന്ന
മൂക ദുഖങ്ങളാണെന്നറിഞ്ഞു
(എന്നിണക്കിളിയുടെ)

ശാരദ നിലാവില്‍ നീ ചന്ദന സുഗന്ധമായ്‌
ചാരത്തണഞ്ഞതിന്നോര്‍ക്കാതിരുന്നെങ്കില്‍
ചൈത്ര രജനി കണ്ട സുന്ദര സ്വപ്നം പോലെ
ചാരുമുഖി ഞാനുറങ്ങിയുണര്‍ന്നേനെ
(എന്നിണക്കിളിയുടെ)

എന്‍മനോവാടിയില്‍ നീ നട്ട ചെമ്പക തൈകളില്‍
എന്നേ പൂക്കള്‍ നിറഞ്ഞു
ഇത്ര മേല്‍ മണമുള്ള പൂവാണ്‌ നീയെന്ന്
ആത്മസഖി ഞാനറിയുവാന്‍ വൈകിയോ
(എന്നിണക്കിളിയുടെ)

മനസ്സും മനസ്സും ഒന്നുചേര്‍ന്നാല്‍
മറ്റുള്ളതെല്ലാം പ്രതീക്ഷയല്ലേ
മറക്കുവാനിനിയത്ര എളുപ്പമാണോ
മൗനം മറുപടി ആകരുതേ

മറവിയെ മരുന്നാക്കി മാറ്റിയാലും
മായാ സ്വപ്നങ്ങളില്‍ മയങ്ങിയാലും(2)
മരിക്കാത്ത ഒര്‍മ്മകള്‍ എന്നുമെന്നും
മനസ്സിന്റെ താളം തകര്‍ക്കുകില്ലേ
(മനസ്സും മനസ്സും)

മനസ്സുകൊണ്ടെങ്കിലും മടങ്ങി വരൂ
മണിക്കുയിലാളെന്റെ അരികില്‍ വരൂ(2)
മധുരിക്കും ഓര്‍മ്മ തന്‍ മണിമഞ്ചലില്‍
മനസ്വിനി നിന്നെ ഞാന്‍ കുടിയിരുത്താം
(മനസ്സും മനസ്സും)

മുത്തെ മുത്തിനും മുത്തേ
അനുരാഗ മുത്തെ കരളിന്റെ മുത്തെ
വെറുതെ എന്തിനീ കള്ള പിണക്കം
അറിയാതെ എന്തോ അറിഞ്ഞ ഭാവം
പിന്നെ വാചാലമാം നിന്റെയീ മൗനം...മൗനം
(അനുരാഗ മുതേ)

ഒരു വാക്കില്‍ ഒരു നോക്കില്‍ അരുതാത്തതൊന്നും
ഞാന്‍ ചെയ്തില്ലല്ലൊ....ഓ.....(ഒരു വാക്കില്‍)
തനിച്ചാക്കി എങ്ങും ഞാന്‍ പോയില്ലല്ലോ
ഒരിക്കലും ഒന്നും ഞാന്‍ ഒളിച്ചില്ലല്ലോ
പിന്നെയും എന്തെയീ മൗനം
ഇങ്ങനെ...ഇങ്ങനെ...ഇങ്ങനെ
(മുത്തേ)

ആദ്യ സമാഗമ നാളിലെന്‍ കണ്‍മണി
ആകെ തരളിതയായിരുന്നു (ആദ്യ)
ആ മുഖം രഗാര്‍ദ്രമായിരുന്നു
അവള്‍ അനുരാഗ പുളകിതയായിരുന്നു
(ആദ്യ)

ആരും കൊതിക്കും മുഖ കാന്തിയോദെ
ഏന്നോമലാള്‍ അന്നെന്നരികില്‍ വന്നു (ആരും)
പാല്‍ നിലാ പുഞ്ചിരി തൂകി നിന്നു
പറയാതെ എന്തോ പറഞ്ഞു നിന്നു
അവള്‍ പറയാതെ എന്തോ പറഞ്ഞു നിന്നു
(ആദ്യ)

ആ നിമിഷം മുതല്‍ എന്‍ ഹൃദയത്തില്‍
ഓരോമന കൗതുകം പീലി നീര്‍ത്തീ (ആ നിമിഷം)
മോഹങ്ങള്‍ രാഗ വര്‍ണ്ണങ്ങളായി
ഓര്‍മ്മകള്‍ സൗഗന്ധികങ്ങളായി (2)
(ആദ്യ)

പെയ്തൊഴിയാത വിഷാദം മനസ്സില്‍
പ്രിയമുള്ളതൊക്കെയും നുള്ളി നോവിച്ച നാള്‍
ഏതോ സ്വപ്നത്തിന്‍ മായപോലന്നു നീ
ഒരു സാന്ത്വനമായ്‌ അരികില്‍ വന്നു
എന്നരികില്‍ വന്നൂ
(പെയ്തൊഴിയാത)

ആ നിമിഷം മുതല്‍ എന്റെ വികാരങ്ങള്‍
ആനന്ദഭൈരവിയായ്‌ സ്വപ്നങ്ങള്‍
ആപാദമധുരങ്ങളായ്‌(ആ നിമിഷം)
മൗനങ്ങള്‍ ആലാപനീയങ്ങളായ്‌
മോഹങ്ങള്‍ സൗരഭ്യ പൂര്‍ണ്ണങ്ങളായ്‌(2)
(പെയ്തൊഴിയാത)

രാധ കണ്ണന്റെ കളി തോഴി രാധ
രാധ കണ്ണന്റെ കളി തോഴി രാധ
കാളിന്ദി തീരത്തു തമ്പുരു മീട്ടി
നാമം ജപിക്കുന്ന രധ
കണ്ണന്റെ കളി തോഴി രാധ
(രാധ..)

കാല്‍ ചിലമ്പൊലി തൂകിയവള്‍
മുരളീഗാനത്തിനൊത്തൊരു നൃത്തമാടി(കാല്‍)
രാധാ മാധവ കഥയിലനശ്വര
നായികയല്ലോ പ്രിയ രാധ (രാധാ)
(രാധ കണ്ണന്റെ)

ദേവിമാരിലും ദേവിയവള്‍
പ്രിയതമമാരുടെ മകുടമവള്‍(ദേവി)
അവളുടെ നിശ്വാസം പോലും ഭഗവാന്റെ
തളിര്‍ മേനിയിൽ കുളിരല്ലൊ (അവളുടെ)
(രാധ.. കണ്ണന്റെ)

ശാരദ ചന്ദ്രിക പൂക്കുമീ യാമങ്ങളില്‍
ശാലിനി നിന്‍ ചാരു വദന കുമുദം കണ്ടു ഞാന്‍
അതിനുള്ളിലെ മധു നുകരാന്‍ അനുരാഗ ശലഭം പറന്നു
എന്റെ വികാര ശലഭം പറന്നു
(പ്രണയ രാഗങ്ങള്‍)