ലളിതസംഗീതം

പിണങ്ങരുതേ നീ പിണങ്ങരുതേ
പരിഭവമോ അരുതേ
എഴുതാം ഞാന്‍ പാടാം
നിനക്കു വേണ്ടി ഒരു പ്രേമഗീതം
പ്രേമഗീതം
(പിണങ്ങരുതേ)

ഓര്‍ത്തിരിയ്ക്കാന്‍ നിന്‍ മുഖം മാത്രം
കണ്ടിരിയ്ക്കാന്‍ നിന്‍ ചിത്രം മാത്രം
പറഞ്ഞിരിയ്ക്കാന്‍ നിന്‍ കഥ മാത്രം
കേട്ടിരിക്കാന്‍ നിന്‍ സ്വരം മാത്രം
(പിണങ്ങരുതേ)

എന്നരികില്‍ നിന്‍ നിഴല്‍ മാത്രം
എന്‍ മനസില്‍ നിന്‍ മൊഴി മാത്രം
എനിയ്ക്കു പാടാന്‍ നിൻ ഗീതം മാത്രം
കാത്തിരിയ്ക്കാന്‍ നിന്നെ മാത്രം
(പിണങ്ങരുതേ)

ഇഷ്ടം എനിക്കിഷ്ടം
ആരോടും തോന്നാത്തൊരിഷ്ടം
ആദ്യമായ് തോന്നിയൊരിഷ്ടം
ഇഷ്ടം എനിക്കിഷ്ടം
ആരോടും പറയാത്തൊരിഷ്ടം
ആരാരും അറിയാത്തൊരിഷ്ടം
ഇഷ്ടം എനിക്കിഷ്ടം
ആശകള്‍ പൂക്കുന്നൊരിഷ്ടം
ആനന്ദം തോന്നുന്നൊരിഷ്ടം

പൂവോ നിന്‍ ചിരി പൂപ്പന്തലോ
തേനോ നിന്‍ മൊഴി തേന്‍ പുഴയോ
ചെമ്പരത്തി പൂവിന്‍ ചന്തമല്ലേ
ചെമ്പകപ്പൂവിന്‍ സുഗന്ധമല്ലേ
ചെണ്ടുമല്ലിപ്പൂവിന്‍ നിറമല്ലേ
ചെന്താമരപ്പൂ പോല്‍ ചുണ്ടല്ലേ
അറിയില്ല എനിക്കറിയില്ല
എങ്ങിനെ ഞാനൊന്നു വര്‍ണ്ണിക്കും
അറിയില്ല എനിക്കറിയില്ല
എങ്ങിനെ ഞാന്‍ നിന്നെ പ്രണയിക്കും
(ഇഷ്ടം )

എന്നും എന്നെന്നും കാണുവാന്‍
എന്നോടിഷ്ടം കൂടുവാന്‍ (2)
എന്നെന്നും എന്‍ മാറില്‍ മയങ്ങാന്‍
എന്നോടു പരിഭവം ചൊല്ലാന്‍
എന്‍ പ്രിയതേ നീ അണയുകില്ലെ
(എന്നും..)

ആദ്യമായി ഞാന്‍ നിന്നെ കണ്ട നേരം
ഏഴു വര്‍ണ്ണങ്ങളും വിരിഞ്ഞു നിന്‍ കണ്ണില്‍
നിന്റെ കവിളിലെ നുണക്കുഴി കണ്ടപ്പോള്‍
ആയിരം ആശകള്‍ പീലി വീശി
(എന്നും..)

മധുരമാം നിന്‍ സ്വരം കേട്ട നേരം
ആയിരം കവിതകള്‍ തളിരണിഞ്ഞുള്ളില്‍
നിന്റെ ചുണ്ടിലെ കൊഞ്ചലില്‍ പുഞ്ചിരി
പ്രേമത്തിന്‍ ജാലകം തുറന്നു വച്ചു
(എന്നും..)

എന്‍ മനം അറിഞ്ഞീല എന്‍ ബാല്യമൊന്നും
അരുതാത്തതൊരുപാടു ചെയ്തെന്റെ ബാല്യം
അരുതെന്നു ചൊല്ലിയ അമ്മയെ പോലും (2)
അറിയാതെ ഞാനന്നവഗണിച്ചു
ഒന്നുമറിയാതെ ഞാനന്നവഗണിച്ചു
(എന്‍ മനം)

ഇനി ഉണ്ടോ ആ ബാല്യം
ഇനി ഉണ്ടോ ആ ഭാഗ്യം (2)
എന്‍ പുഴയോരത്തെ തങ്ക ചൂടും
എന്‍ കളിയോരത്തെ മണ്‍ വീടും
എന്‍ കനവോരത്തെ തുമ്പപ്പൂവും പൂവും
എന്‍ മിഴിയോരത്തെ മഴവില്ലും
ഇനിയുണ്ടോ ആ ബാല്യം
ഇനിയുണ്ടോ ആ ഭാഗ്യം
(എന്‍ മനം)

അരുളാന്‍ മടിക്കുന്ന സര്‍വേശ്വരി നീ
സര്‍വാംഗ സുന്ദരിയല്ലോ
അണയാന്‍ മടിക്കുന്ന തമ്പുരാട്ടി നീ
സര്‍വാംഗ സുന്ദരിയല്ലോ
സുന്ദരിയല്ലോ
അണയാന്‍ മടിക്കാതെ സര്‍വേശ്വരീ

അറിയാം എനിക്കു നിന്നുള്ളം
മൊഴിയാത്തതെന്താണു നീ
എങ്ങിനെ ചൊല്ലുമെന്നോര്‍ത്തോ
എങ്ങിനെ നല്‍കുമെന്നോര്‍ത്തോ
അല്ലാതെ തന്നെയെന്നുള്ളില്‍
സര്‍വാംഗ സൗന്ദര്യം നീ
ദേവാംഗ സൗന്ദര്യം നീയല്ലൊ
(അരുളാന്‍)

 

പാലലകൾ തേടി വരും  പാട്ടു പാടുമ്പോൾ
നീ പാട്ടു പാടുമ്പോൾ
പഞ്ചബാണനമ്പെടുക്കും പുഞ്ചിരിക്കുമ്പോൾ
നീ പുഞ്ചിരിക്കുമ്പോൾ
(പാലലകൾ...)

വാനഗംഗ നീന്തി വന്ന ഹംസകന്യകേ
എന്റെ മാനസത്തിൽ തീർത്തു നീയൊരോണപ്പൂക്കളം
നല്ലോരോണപ്പൂക്കളം
മോഹദീപമേന്തി വന്ന സ്നേഹഗായകാ (2)
എന്റെ പ്രാണവീണ മീട്ടി രാഗസാന്ദ്രമാക്കി
രാഗസാന്ദ്രമാക്കി നീ
പഞ്ചബാണനമ്പെടുക്കും പുഞ്ചിരിക്കുമ്പോൾ
നീ പുഞ്ചിരിക്കുമ്പോൾ
പാലലകൾ തേടി വരും  പാട്ടു പാടുമ്പോൾ
നീ പാട്ടു പാടുമ്പോൾ

മാമല നാടേ മാവേലി നാടെ
വരവായ് വീണ്ടും പൊന്നോണം
വരമായ് ചിങ്ങത്തിരുവോണം
പ്രിയദിനമൊരു ദിനം ഉണരുകയായ്
പ്രമദങ്ങൾ കുരവയിട്ടണയുകയായ്
(മാമല...)

കരിമീനോ മിഴി മലർത്തേനോ മൊഴി
അതിൽ കനവോ നിനവോ രതിയോ കഥയെഴുതി
വില്ലടിച്ചാൻ പാട്ടൊഴുകി
അതിന്നലയെൻ മെയ് തഴുകി
മുകിൽ പോയ് മഴ പോയ് വെയിലിൻ മനം വിടർന്നാടി
കലയുടെ കതിരൊളിയുതിരുകയായി
കസവുടയാടകൾ അണിയുകയായീ
(മാമല..)

 

കാലമേ നിനക്കഭിനന്ദനം അഭിനന്ദനം
ചുടുബാഷ്പബിന്ദുവെ മാണിക്യക്കല്ലാക്കും
കലാവിലാസമേ വന്ദനം
(കാലമേ....)

ഇന്നലെ വാനിൽ മദിച്ചു നീന്തി
കരിമുകിൽ ജഡയുള്ള കർക്കിടകം
ഇന്നു വെളുത്തപ്പോൾ ആവണിത്തെളിവാനിൽ
വെണ്മുകിൽ വൈജയന്തി നിരന്നു നിന്നു
(കാലമേ...)

കാർമുകിൽ ചൊരിയും കണ്ണീരിൽ നീന്തി
മന്ദാരമലർക്കൊടി വിറച്ചു നിന്നു
ചിങ്ങമണഞ്ഞപ്പോൾ പൊൻ വെയിലുണർന്നപ്പോൾ
പൊന്നിട്ടു മലർച്ചെടി ചിരിച്ചു നിന്നു
(കാലമേ...)
 

 

പുഷ്യരാഗക്കമ്മലണിഞ്ഞു പൂവാംകുരുന്നില (2)
പാരിൻ മാറിൽ മണിമാല ചാർത്തി
പാതിരാമഞ്ഞിൻ കുളിരല
(പുഷ്യരാഗ...)

തിരുവോണമുറ്റത്തു മലർക്കളം പോലെ
ഹൃദയത്തിൽ വർണ്ണങ്ങൾ നിറഞ്ഞു (2)
ആവണി വാനിൽ പൗർണ്ണമി പോലെ (2)
അഭിലാഷ മഞ്ജരി വിരിഞ്ഞു
(പുഷ്യരാഗ...)

വീണ്ടുമൊരോണത്തിൻ വില്ലടിച്ചാൻ പാട്ടിൽ
കൈരളി കൈവല്യം നുകർന്നു (2)
കുന്ന നാട്ടിൽ കുമ്മിയടി പാട്ടിൽ
ആനന്ദപുളകങ്ങൾ തെളിഞ്ഞു
(പുഷ്യരാഗ...)
 

 

ദൂരെ....ദൂ‍രെ...
ദൂരെയാണു കേരളം പോയ് വരാമോ
പ്രേമദൂതുമായ് തെന്നലേ പോയ് വരാമോ
അവിടെയെല്ലാ മുറ്റത്തും പൂക്കളം കാണാം
എന്റെ അങ്കണത്തില്‍ മാത്രം കണ്ണുനീര്‍ക്കണം കാണാം
(ദൂരെയാണു ....)

മാബലിയെ വരവേല്‍ക്കും നാടുകാണാം
പ്രാണപ്രിയയെന്നേ കാത്തിരിക്കും വീടുകാണാം
വീടു പോറ്റാന്‍ നാടു വിട്ട നാഥനേയോര്‍ക്കേ
കണ്ണീര്‍ വീണ പൂങ്കവിളുമായെന്‍ കാന്തയേ കാണാം.
കാന്തയേ കാണാം
(ദൂരെയാണൂ........)