ലളിതസംഗീതം

 

ഉം ഉം ഉം..ആ..ആ..ആ.ആ
തളിരായ് ചെറു കുളിരായ് 
തനിയേ തേങ്ങലായ്
പറയാൻ വയ്യാതെ  എഴുതാൻ കഴിയാതെ
കഥയറിയാതെ കരയാതെ
(തളിരായ്...)

മായുമീ നിഴലെവിടെ
താരമേ ഇനിയെവിടെ
രാവു പോയ് മറയുമ്പോൾ
സ്നേഹജാലകം താനേ അടയുമോ
ആ...ആ.ആ

താഴെ വീണ നിലാവോ
തേടി വന്ന കിനാവോ
ഏതു രാവിൽ ദൂരെയായീ
കാണുമോ തീരമീ ജന്മം
(തളിരായ്...)

   

 

ആദ്യദർശനം മറന്നുവോ
ആദ്യസ്പർശനം മറന്നുവോ
ആദ്യചുംബനം അമൃതചുംബനം
അധരചുംബനം മറന്നോ
(ആദ്യ...)

ആദ്യമടുത്തപ്പോൾ എന്നോടു ചോദിച്ച
ചോദ്യം മത്സഖീ മറന്നുവോ
അന്നേരം ചെവിയിൽ മറ്റാരും കേൾക്കാതെ
കിന്നാരം പറഞ്ഞതും ഓർക്കുന്നോ
(ആദ്യ...)


കതിർമണ്ഡപത്തിലെ കരബന്ധനത്തിൽ
കയ്യിൽ നുള്ളിയതും ഓർക്കുന്നോ
മണിയറ വാതിലടച്ചപ്പോൾ നാണിച്ചു
മാറിക്കളഞ്ഞതും ഓർക്കുന്നോ
(ആദ്യ....‌)
 

 

മനസ്സെന്ന പ്രതിഭാസം ഒരു മായാവിലാസം (2)
അത് നരകത്തെ സ്വർഗ്ഗമാക്കും
സ്വർഗ്ഗത്തെ നരകമാക്കും
അത്ഭുത സർഗ്ഗവിശേഷം
(മനസ്സെന്ന...)

അന്തരംഗമാണോ ഓഹോ
മസ്തിഷ്കമാണോ ഓഹോ
അന്തരംഗമാണോ മസ്തിഷ്കമാണോ
മനസ്സേ നിന്നുടെ വീട്
മനസ്സേ നിന്നുടെ വീട്
ചിലപ്പോളഴകിന്റെ നാട്
നീ ചിലപ്പോൾ കൊടും ചാല്
(മനസ്സെന്ന...)

നന്മയുടെ ഒളിയും ഓഹോ
തിന്മയുടെ  ഇരുളും ഓഹോ
നന്മയുടെ ഒളിയും തിന്മയുടെ  ഇരുളും
മനസ്സേ നീ ചമയ്ക്കുന്നു (2)
ചിലപ്പോൾ അമൃതിൻ ബിന്ദൂ
നീ ചിലപ്പോൾ വിഷ സിന്ധൂ
(മനസ്സെന്ന...)

 

 

കരളേ കനവേ കണ്മണീ
നിനവേ കനിവേ പെണ്മണീ (2)
കാണുവാനെന്തിനു മുന്നിൽ വേണം
എന്നും നീയെന്റെ കണ്ണിന്റെ ശോഭയല്ലേ
കേൾക്കുവാൻ നീയെന്തിനെന്നരികിൽ വേണം
നീയെന്റെ പ്രാണന്റെ പ്രാണനായ് ഉള്ളിലില്ലേ
(കരളേ കനവേ...)

എന്നും നിനക്കൊരു കുറിമാനമേകുവാൻ
എന്നോട് ചൊല്ലുന്ന കൂട്ടുകാരീ (2)
എന്തു സന്ദേശം നിനക്കേകീടുവാൻ
നീയെന്റെ സന്ദേശകാവ്യമല്ലേ (2)
അഴകേ അനുപമേ ആത്മസഖീ
(കരളേ....)

 

 

സഖീ എൻ  ആത്മസഖീ
ഇന്നോളം ഇന്നോളം ഇന്നോളമെന്നുള്ളിൽ
നീയുണർത്താത്തൊരു സ്വർഗ്ഗീയ
സുന്ദര സുമധുരരാഗം
ഇന്നലെ രാവിൽ ഞാനറിഞ്ഞു
സ്നേഹസുഗന്ധമേ സ്വപ്നസായൂജ്യമേ
ഇന്നലെ രാവിൽ ഞാനറിഞ്ഞു
(സഖീ.....)

അരികത്തണഞ്ഞു നീ
എൻ മാറിൽ വിരിയിച്ച
പുളകങ്ങൾ അനുരാഗ കവിതകളായിരുന്നു
അവയെന്നിൽ ആവേശലഹരി പകർന്നിരുന്നു (2)
വർണ്ണവസന്തമേ അനവദ്യഗാനമേ
എനിക്കെന്നുമുന്മാദ മധുരിമയായിരിക്കൂ (2)
ഉന്മാദ മധുരിമയായിരിക്കൂ
(സഖീ എൻ...)

 

   

 

 

കഥയുറങ്ങുന്നൊരു വീട്
എന്റെ കവിതകൾ തളിരിട്ട വീട് (2)
എന്നനുരാഗം പിറന്ന വീട്
കണ്മണിയവളുടെ കളിവീട് (2)
(കഥയുറങ്ങുന്നൊരു...)

സ്നേഹസുഗന്ധം പരന്ന വീട് എന്നും
ശാന്തിഗീതം കേട്ടുണർന്ന വീട് (2)
മോഹസുമങ്ങൾ വിടർന്ന വീട്
കണ്മണിയവളുടെ പ്രിയവീട് (2)
കണ്മണിയാളുടെ ഇഷ്ടവീട്
(കഥയുറങ്ങുന്നൊരു...)

കനവുകൾ പൂവിട്ട വീട്
നിത്യസ്മരണകൾ തെളിയുന്ന വീട് (2)
രാഗവർണ്ണങ്ങൾ നിറഞ്ഞ വീട്
കണ്മണിയവളുടെ സ്വപ്നവീട് (2)
കണ്മണിയാളുടെ ഇഷ്ട വീട്
(കഥയുറങ്ങുന്നൊരു...)
 

 

പുണ്യദിനമല്ലേ ഇന്നു നിൻ ജന്മദിനമല്ലേ (2)
ആശംസകളുടെ സൗഗന്ധികങ്ങൾ
അനുരാഗിണീ ഞാൻ അർപ്പിക്കട്ടെ
ഒരു പാടു നിമിഷങ്ങൾ ദിവസങ്ങൾ
മാസങ്ങൾ സംവത്സരങ്ങളും
ആയുസ്സും ആരോഗ്യസൗഖ്യവുമായി
വിരിഞ്ഞിടട്ടെ നിൻ ജീവിതത്തിൽ
(പുണ്യദിനമല്ലേ.......)

എന്നിൽ നിറയുന്ന ചൈതന്യമേ
എന്നെ തിരയുന്ന സൗന്ദര്യമേ
എന്നെയുണർത്തുന്ന സംഗീതമേ
എന്നുമെൻ ജീവന്റെ സാരാംശമേ
ഇല്ലെൻ നിഖണ്ടുവിൽ ഒരു വാക്കു പോലും
നിന്നെക്കുറിച്ചിനി ബാക്കി പാടാൻ
സഖീ നിന്നെക്കുറിച്ചിനി ബാക്കി പാടാൻ
(പുണ്യദിനമല്ലേ.......)

 

പൂവു ചോദിച്ചു ഞാൻ വന്നൂ
പൂക്കാലമല്ലോ എനിക്ക് തന്നു നീ
പൂക്കാലമല്ലോ എനിക്ക് തന്നു
പുഞ്ചിരി കാണാൻ കൊതിച്ചു നിന്നൂ
പ്രാണേശനായെൻ അരികിൽ വന്നൂ (2)
നീ പ്രാണേശനായെൻ അരികിൽ വന്നൂ
(പൂവു ചോദിച്ചു...)

സ്നേഹിച്ചിരുന്നു ഞാൻ നിന്നെ
ഒത്തിരി മോഹിച്ചിരുന്നു ഞാൻ എന്നും (2)
ആത്മാവിനുള്ളിലൊരാവേശമായ് നീ
പടർന്നിരുന്നല്ലോ എന്നെന്നും (2)
എന്നോമലായ് എൻ ആരോമലായ്
പടർന്നിരുന്നല്ലോ എന്നെന്നും
(പൂവു ചോദിച്ചു...)

വാനിലെ നന്ദിനി മേലെ പൂനിലാ പാൽ ചുരത്തുമ്പോൾ
എൻ‌ മണിക്കുട്ടനെ മാറോടു ചേർത്തുനീ
അമ്മിഞ്ഞ നൽകുന്നതോർമ്മ വരും
നമ്മളൊന്നിച്ചിരിക്കുന്നതോർമ്മ വരും
ചോലക്കുളിരുള്ള തെന്നൽ ഈ വഴി വന്നണയുമ്പോൾ
പൂവൊത്ത കൈകളാൽ അങ്ങെന്റെ മെയ്യാകെ
പുൽകി തലോടുന്നതോർമ്മ വരും
നമ്മളൊന്നിച്ച രാത്രികൾ ഓർമ്മവരും

ഇന്നുവരും ഭവാൻ നാളെ വരുമെന്ന്
നിത്യവും ഞാനാറ്റ്നോറ്റിരിക്കും
പൊന്നുണ്ണി അച്ഛന്റെ ചിത്രത്തിൽ മുത്തുമ്പോൾ
പിന്നെ ഞാനാകെ തകർന്നുപോകും
മനം സാന്ത്വന കെട്ടറ്റടർന്നു വീഴും
(വാനിലെ നന്ദിനി )

തോഴീ നിനക്കൊരു കവിത
മിഴിനീരിലെഴുതിയ കവിത
ഓർമ്മയിൽ ഓമനിയ്ക്കാൻ പഴയൊരു സുഹൃത്തിന്റെ
ഒരിയ്ക്കലും മരിയ്ക്കാത്ത കവിത
(തോഴീ നിനക്കൊരു)

മനസ്സുകൾ അടുത്തിട്ടും പരിണയമാല്ല്യത്തിൻ
പരിമളമറിഞ്ഞില്ല നമ്മൾ
മാനസമാംഗല്ല്യം നിന്മാറിൽ അണിയിക്കാൻ
അനുമതിതന്നില്ല ദൈവം
ഇനിയും കരിഞ്ഞില്ല മോഹം
അണയാതെ എരിയുന്ന ദാഹം
ദാഹം......
(തോഴീ നിനക്കൊരു)