നാടകഗാനങ്ങൾ

ഹൃദയമൊരു ഘടികാരം മന്ത്ര
മധുരം പാടും ഘടികാരം
ഉതിരും നിമിഷമണൽത്തരിയെണ്ണി
ഉണർന്നിരിക്കും ഘടികാരം

ഇരു കൈവിരലാൽ ജപമണിമാലകൾ
തഴുകും ഘടികാരം
അതിന്നൊരേയൊരു താളം പക്ഷേ
ഹൃദയത്തിന്നതവതാളം
വികാരതരളം പല താളം

ഇരവും പകലും വെറുമൊരു ഗദ്ഗദ
മുണരും ഘടികാരം
അതിന്നൊരേയൊരു മന്ത്രം പക്ഷേ
ഹൃദയം പാടും മന്ത്രം
വികാര വിധുരം പല മന്ത്രം

ഒരു വഴി മാത്രം കൈവിരൽ ചുറ്റി
തിരിയും ഘടികാരം
അതിന്നൊരേയൊരു മാർഗ്ഗം പക്ഷേ
ഹൃദയം പായും മാർഗ്ഗം
വികാര നദിയൊഴുകും മാർഗ്ഗം
 

 

അരിമുല്ലച്ചിരി തൂകും അയലത്തെപ്പെൺകിടാവേ
അഴകിന്റെയോമല്‍പ്പെൺ കിടാവേ
അരയന്നമായ് നിന്റെ അരമനയ്ക്കുള്ളിലാരും
അറിയാതെ ഞാൻ നടന്നണയും
താ‍മരവള ചാർത്തും ഓമനക്കൈകൾ നീട്ടി
ഓടി വന്നെന്നരികിൽ നിൽക്കും നീ
ഓടി വന്നെന്നരികിൽ നിൽക്കും
(അരിമുല്ല...)

മിഴികളിൽ ദാഹവുമായി മൊഴികളിലീണവുമായ്
പിറകേ എൻ പിറകേ നീയണയും
മാതളക്കനി തുള്ളും മാറത്ത് ചേർന്നിരുന്നെൻ
മാനസഹംസമൊന്നു പാടും
എന്റെ മാനസഹംസമൊന്നു പാടും
(അരിമുല്ല....)

 

പ്രവാഹമേ പ്രവാഹമേ
ജീവിതഗംഗാപ്രവാഹമേ
നിന്നിലെ സൗവർണ്ണബിന്ദുക്കൾ ഞങ്ങൾ
നിന്നിലെ രാഗബിന്ദുക്കൾ

അനാദിയായൊഴുകുന്നു നീ
അനന്തമായൊഴുകുന്നൂ
അണകൾ തകർത്തല തല്ലുന്നൂ നീ
അവിരാമമൊഴുകുന്നൂ

വിലക്കുകൾ പിഴുതെറിയുന്നു
വെളിച്ചമായൊഴുകുന്നൂ
യുഗതാമരകൾ വിടർത്തുന്നു നീ
ജലദീപമണിയുന്നൂ

നിന്നിൽ സൃഷ്ടി സ്ഥിതിലയശക്തികൾ
നീന്തി നീരാടുന്നു
നിന്നിരുപാടുമിരുന്നു കളിപ്പൂ
ജന്മശതങ്ങൾ ജനിമൃതികൾ

ആ മല ഈ മല കേറിയിറങ്ങി
ആ പൂ ഈ പൂ ചൂടിയൊരുങ്ങി
ആ കിളി ഈ കിളി പാടുന്ന പാട്ടു
കേട്ടാരാരിക്കിളി കൊള്ളുന്നു
ഞാനല്ല ഞാനല്ല ഞാനല്ല

ആന വരും മലയ്ക്കപ്പുറത്ത്
ആടുമേയും മലയ്ക്കപ്പുറത്ത്
ആയിരം കാന്താരി പൂവിട്ട നേര
ത്താരെ കാണാനൊരാളു വന്ന്
എന്നെയല്ലെന്നെയല്ലെന്നെയല്ല

ആറ്റിലെത്തോണിക്കടവത്ത്
ആതിരക്കാറ്റിന്റെ കുളിരേറ്റ്
ആരോം പാടിയ പാട്ടു കേട്ടിന്നലെ
ആരുടെ കൈവള താളമിട്ടു
എന്റെയല്ലെന്റെയല്ലെന്റെയല്ല

 

കാറ്റുപായത്തോണിയിലേറി
കാലത്തിൻ കരകാണാക്കടലിൽ
അജ്ഞാതകാമുകാ നിന്നെത്തേടി
അലയുന്നു ഞാനലയുന്നൂ

സ്വർഗ്ഗത്തിൻ ച്ഛായാശകലങ്ങൾ പോലെ
സ്വപ്നത്തിൻ ദ്വീപുകൾ കണ്ടൂ
പുഷ്യരാഗപ്പൂമാലകൾ പോലെ
പുഷ്പിതതീരങ്ങൾ കണ്ടൂ
അവിടെ ഞാൻ നിന്നെക്കണ്ടു
അരുണമാം നിൻ മുഖം കണ്ടു
(കാറ്റുപായ....)

നീർക്കളി പാടും പുളിനങ്ങൾ കണ്ടൂ
നിർവൃതിപ്പൂവുകൾ കണ്ടൂ
നിന്നനുരാഗം പൂവിട്ടു നിൽക്കും
കുങ്കുമപ്പൂവുകൾ കണ്ടൂ
അവിടെ നിന്നെന്നെ വിളിച്ചു
നിന്നരികിലേക്കോടി ഞാൻ വന്നു
(കാറ്റുപായ...)

 

 

ആകാശമേ നീലാകാശമെ
ആരെയോർത്തു ചിരിക്കുന്നു നീ
ആരെയോർത്തു കരയുന്നു
(ആകാശമേ...)

താഴത്തെ വനങ്ങളെയോ
താലവനങ്ങളെയോ
അവിടെ ഭാരം ചുമന്നു കയറും
മനുഷ്യപുത്രനെയോ
(ആകാശമേ...)

ഏലക്കൊടികളെയോ
ഏഴിലം പാലയെയോ
അവിടെയാരും കാണാതലയും
അജ്ഞാതകന്യയെയോ
(ആകാശമേ...)
 

 

സ്വർണ്ണരേഖാനദിക്കക്കരെ നിന്നൊരു
പൊന്നരയന്നം പറന്നു വന്നു
കിന്നരിച്ചിറകുള്ള കിങ്ങിണിക്കാലുള്ള
പൊന്നരയന്നം പറന്നു വന്നു

കുടമുല്ലപ്പൂവിനെത്താരാട്ടും കാറ്റിന്റെ
കുളിരു നുകർന്നിരുന്നു
ഒരു പാരിജാതത്തിൻ പാനപാത്രത്തിലെ
മദിര നുകർന്നിരുന്നു

കളമൊഴിയാമൊരു പെണ്ണിന്റെ കൗതുകം
കരപുടം നീട്ടി വന്നു
കമലദളങ്ങളിലെന്ന പോലാക്കൈയ്യിൽ
കളഹംസം ചേർന്നിരുന്നു

 

പൊന്നമ്പലനട തുറന്നു ഞാനെന്റെ
കണ്ണനെക്കാണാൻ പോകുന്നൂ
എങ്ങനെ ഞാനുടുത്തൊരുങ്ങേണം
എന്തു കാണിയ്ക്ക വയ്ക്കേണം

പട്ടിൽ പൊതിഞ്ഞൊരീ പൈമ്പാൽക്കുടങ്ങൾ
കാഴ്ച വെയ്ക്കും ഞാൻ
ഉമ്മ വെച്ചാൽ വിരിയും പൂവിതു
കാൽക്കലർപ്പിക്കും

ആ മധുമുരളിക കൈയ്യിലെടുത്തതി
ലാഹാ ചുംബിക്കും
നിർവൃതിപൂവിതളുകളാത്തിരു
മെയ്യിൽ ചൂടിക്കും

 

തീരം തീരം തീരം
അഗാധനീലിമയലിയും തീരം
അപാരസാഗരതീരം
തിരകൾ ചിരിക്കും പാടും
തേങ്ങിക്കരയും തീരം തീരം

ശബ്ദം നാഗഫണങ്ങൾ വിടർത്തും
രൗദ്രകേളികളാടും
പൊട്ടിക്കരയും കാറ്റുകൾ ഉൽക്കട
ദുഃഖജ്വാലകളെരിയും

ശാന്തസാഗര ഹൃദയതലം ഞാൻ
കണ്ടിട്ടില്ലല്ലോ
കനിവാർന്നവിടേക്കെന്നെ നയിക്കൂ
കടത്തു തോണിക്കാരാ
 

 

നീലപ്പളുങ്കുള്ള നീൾമിഴിയിതൾ കൂമ്പി
നീയുറങ്ങൂ നീയുറങ്ങൂ നീയുറങ്ങൂ
കണിമലർത്തിരിയല്ലാ കനകമല്ലാ നീയൊരു
കരിമുത്തായെന്റെ കൈയ്യിലടർന്നു വീണു
കണ്ണീർക്കരിമുത്തായെന്റെ കൈയിലടർന്നു വീണു

ഒരു മരുഭൂവിലൂടെ നടന്നു പോകും എന്റെ
തിരുമുറിവുകൾ മുത്തും കുളിർകാറ്റല്ലേ നീയെൻ
തിരുമുറിവുകൾ മുത്തും കുളിർകാറ്റല്ലേ

കളിക്കുഞ്ഞായിരുന്ന നാൾ കിനാവു കണ്ടു നീയെൻ
കരളിന്റെ മലർമുറ്റത്തിഴഞ്ഞു വന്നു
കുഞ്ഞിക്കവിത തന്മധുരം ഞാൻ നുണഞ്ഞിരുന്നു

ഇളം ചുണ്ടിൽ ചെറുതേനും വയമ്പും തന്നു
താരാട്ടിളനീരും ചെറുചൂടും പകർന്നു തന്നു
കുഞ്ഞി വിരൽ നുണഞ്ഞുറങ്ങൂ നീയുറങ്ങുറങ്ങൂ