ചന്ദ്രമൗലീ ചതുർത്ഥിയാമിനീ
ചാരുരൂപിണീ നിന്റെ
വർണ്ണശബളമാം വസന്തമേടയിൽ
വാടകയ്ക്കൊരു മുറി തരുമോ
ഒരു മുറി തരുമോ
ചന്ദ്രമൗലീ ചതുർത്ഥിയാമിനീ

നിന്റെ കൈയ്യിലെ കളിമലർക്കുമ്പിളിൽ
നീ നിറച്ച പാനീയം
എൻ ചുണ്ടുകളിൽ മദം പകരും
ചുവന്ന പാനീയം
എന്തിനിത്ര കൂടുതൽ കുടിച്ചു
എന്റെ തരളമാം ഹൃദയം
ചന്ദ്രമൗലീ ചതുർത്ഥിയാമിനീ

നിന്റെ മാറിലെ ചിറകുള്ള ചേലയിൽ
നീ മറയ്ക്കുമാവേശം
എൻ ചുടുഞരമ്പിൻ പടംകൊഴിക്കാൻ
തുടിക്കുമാവേശം
എന്തിനിന്നു പുൽകുവാൻ കൊതിച്ചു
എന്റെ ചപലമാം ദാഹം
ചന്ദ്രമൗലീ ചതുർത്ഥിയാമിനീ

അറുപത്തിനാലു കലകൾ
അവയുടെ മുഖങ്ങളിൽ നവരസങ്ങൾ
കലകളിൽ കാമമൊരപ്സര സ്ത്രീ
രസങ്ങളിൽ ശൃംഗാരം ചക്രവർത്തി ചക്രവർത്തീ

കൗമാരം കഴിയുമ്പോൾ കന്യകമാരുടെ
കവിളിലാ കലയുടെ കൊടി കാണാം
ആ കൊടി പറക്കാൻ ആ ചൊടി തളിർക്കാൻ
ആശ്ലേഷലഹരിയിൽ പൊതിയൂ
പൊതിയൂ പൊതിയൂ അനുരാഗപൗരുഷമേ (അറുപത്തിനാലു..)

മംഗല്യം കഴിയാത്ത മദിരാക്ഷിമാരുടെ
മനസ്സില്ലാ രഥത്തിന്റെ രഥമോടും
ആ രസം തുടുക്കാൻ ആ രഥം നയിക്കാൻ
ആയിരം മനമെന്നിൽ ഉണർത്തൂ
ഉണർത്തൂ ഉണർത്തൂ
അനുരാഗപൗരുഷമേ (അറുപത്തിനാലു..)

പോകാം..പോകാം....(2)

പോകാം നമുക്കു പോകാം
പോകാം നമുക്കു പോകാം
ഏകാന്തതയുടെ ഗോമേദകമണി
ഗോപുരം തേടി പോകാം അവിടെ-
പഞ്ചഭൂതങ്ങൾ തുന്നിത്തന്നൊരീ
പഴയ ചിറ്റാടകൾ മാറാം
പോകാം നമുക്കു പോകാം
പോകാം നമുക്കു പോകാം

വാസരസ്വപ്നങ്ങൾ
വാടകയ്ക്കെടുത്തൊരീ-
വഴിയമ്പലമീ ഭൂമി ഇവിടെ-
ജനനമരണങ്ങൾക്കിടയിൽ വിടരും
ക്ഷണികവികാരമാണനുരാഗം (വാസര..)
വലിച്ചെറിയൂ..വലിച്ചെറിയൂ
മാംസച്ചുമടിതു വലിച്ചെറിയൂ

പോകാം നമുക്കു പോകാം
പോകാം നമുക്കു പോകാം

ഓം ഹ്രീം ഓം ഹ്രീം
ഓംകാളി മഹാകാളി ഭദ്രകാളി
ഓംകാരത്തുടി കൊട്ടും രുദ്രകാളി
ജയഭദ്രകാളീ ജയഭദ്രകാളീ
ഓം ഹ്രീം ഓം ഹ്രീം

ചെഞ്ചിടയിൽ മണിനാഗഫലങ്ങളാടി
ചെത്തിപ്പൂ അസ്ഥീപൂമാലകളാടി
ദാരുകശിരസ്സിലെ രുധിരം നിറയും
താമരത്തളികകൾ പന്താടീ
താണ്ഡവമാടും രക്തേശ്വരീ
ജയരക്തേശ്വരീ ജയരക്തേശ്വരീ
(ഓംകാളി..)

ഓം മഹാരുദ്രായെ നമഃ
ഓം ഭദ്രായൈ നമഃ
ഓം കാന്താരവാസിനൈ നമഃ
ഓം രക്താംബരധാരിണ്യൈ നമഃ

ഇപ്പോഴോ സുഖമപ്പൊഴോ സുഖം
ഇക്കിളിപ്പൂവേ നീ
സ്വപ്നം കണ്ടുറങ്ങുമ്പോഴോ
രാത്രികൾ സ്വർണ്ണക്കൈ
വലയത്തിലൊതുക്കുമ്പോഴോ
(ഇപ്പോഴോ..)

ഇളംമഞ്ഞു നൽകിയ രണ്ടാംമുണ്ടും
കളിയരഞ്ഞാണവുമുലയുമ്പോഴോ
കാറ്റിലുലയുമ്പോഴോ ലലാലാലാ..
ചന്ദനലതയുടെ നഖമുള്ള കൈവിരൽ
ചികുരഭാരങ്ങളിൽ ഇഴയുമ്പോഴോ
ലലാലലാലലാലലാലലാലലാ
(ഇപ്പോഴോ..)

ഒരു വൈൻ ഗ്ലാസ്സിൽ നീന്തിക്കയറിയ
കരിവണ്ടിൻ ചിറകുകൾ
പൊതിയുമ്പോഴോ -നിന്നെ
പൊതിയുമ്പോഴോ
മന്ദാരമലരിന്റെ മണമുള്ള പൂമ്പൊടി
മൃദുകേസരങ്ങളിലലിയുമ്പോഴോ
(ഇപ്പോഴോ..)

കടാക്ഷമുനയാൽ കാമുകഹൃദയം
കവർന്നെടുക്കും സ്ത്രീ സൗന്ദര്യമേ നിൻ
കവിൾത്തടത്തിൽ കുളിരളകങ്ങൾ
കുറിച്ചതേതൊരു കാവ്യം -കാമകാവ്യം

കുലച്ച വില്ലിലെ മൃദുഞാൺ ചരടിൽ
തൊടുത്തു നിർത്തിയ പൂവമ്പോ
നിറഞ്ഞ മാറിലെ വേരുകളുള്ളൊരു
വിരിഞ്ഞ പുഞ്ചിരിയോ
കാമുകനാക്കി എന്നെ നിൻ പ്രിയ കാമുകനാക്കി

തുടുത്ത യൗവനസിരകൾക്കുള്ളിലെ
തുടിച്ചുണർന്നൊരു സൗരഭമോ
വിലാസവതി നിൻ പൂമെയ്യണിയും
വികാരലഹരികളോ
കാമുകനാക്കി എന്നെ നിൻ പ്രിയകാമുകനാക്കി

സ്വപ്നാടനം എനിക്കു ജീവിതം
സ്വർഗ്ഗങ്ങളെന്റെ നിശാസദനങ്ങൾ
പ്രാണേശ്വരി ഇഷ്ടപ്രാണേശ്വരി നിന്റെ
നാണങ്ങൾ വളകിലുക്കും സൗധങ്ങൾ
സ്വപ്നാടനം എനിക്കു ജീവിതം

പിച്ചളക്കുമിള കൊത്തിയ വാതിലുകൾ
പകുതി തുറന്നു മെല്ലെ പകുതി തുറന്നൂ ഒരു
നഗ്നബന്ധശില്പം പോലെ
നിലാവു നിന്നൂ പൂനിലാവു നിന്നൂ
പ്രകൃതീ - പ്രകൃതീ - നിന്റെ പുഷ്പമേടയിൽ
എന്റെ യൗവനം പുളകമണിഞ്ഞൂ
പുളകമണിഞ്ഞൂ (സ്വപ്നാടനം..)
ആഹാ..ആഹാ..ആഹാ...

ഉം...ഗുരുവായൂരപ്പൻ...
ഗുരുവായൂരപ്പൻ തന്ന നിധിക്കല്ലോ
പിറന്നാൾ പൂക്കൾ
അരുമച്ചൊടിയിൽ പുഞ്ചിരിയാടും
തിരുന്നാൾ പൂക്കൾ
വിളിച്ചാൽ മിണ്ടാത്തൊരു ബിംബം അതിനെന്തിനലങ്കാരം
അതിനെന്തിനു തേവാരം
(ഗുരുവായൂരപ്പൻ..)

സ്വർഗ്ഗത്തിന്റെ സുവർണ്ണപ്പടവിലെ
സ്വപ്നക്കതിരല്ലേ
വിശ്വപ്രകൃതി വിളിച്ചിട്ടെത്തിയ
വിസ്മയമല്ലേ നീ
തുറന്നൂ വിണ്ണിൻ ഗോപുരം
തെന്നൽ വീശീ ചാമരം
കൈകൾ നീട്ടീ ഭൂതലം
ഋതുക്കൾ നൽകി സ്വാഗതം
മനുഷ്യൻ മാത്രം നിന്നരികിലെത്തുമ്പോൽ
മനസ്സിനെന്തിനീ പൊയ്‌മുഖം
(ഗുരുവായൂരപ്പൻ..)

സപ്തമിചന്ദ്രനെ മടിയിലുറക്കും
സുരഭീമാസമേ നിന്റെ
സ്വപ്നം വിടർത്തും രോമാഞ്ചമല്ലേ
നക്ഷത്ര പുഷ്പങ്ങൾ
നക്ഷത്ര പുഷ്പങ്ങൾ
(സപ്തമിചന്ദ്രനെ..)

ഭൂമിയിൽ വീഴുമവയുടെ സ്വർണ്ണ
പൂമ്പൊടികൾ പൂനിലാപൂമ്പൊടികൾ
വാരിയണിയും വസന്തലക്ഷ്മിക്ക്
വയസ്സു പതിനേഴ് എന്നും
വയസ്സു പതിനേഴ്
രജനീ രജനീ നിന്റെ പതിനേഴാം വയസ്സിലെ
ദാഹം തീർക്കും രഹസ്യകാമുകനാര്
മറ്റാര് - മറ്റാര്
(സപ്തമിചന്ദ്രനെ..)

എനിക്കു ദാഹിക്കുന്നൂ
എനിക്കു ദാഹിക്കുന്നൂ
എന്റെ അസ്ഥികൾക്കുള്ളിൽ
പുതിയൊരു ഗന്ധം നിറയുന്നു
ഈ ഗന്ധം നുകരൂ ഈ ദാഹം തീർക്കൂ
എനിക്കു ദാഹിക്കുന്നൂ

പഞ്ചേന്ദ്രിയങ്ങളെ കൊത്തിയുണർത്തും
പാമ്പുകളെപ്പോലെ
പുളയുമെന്നുള്ളിലെ ഞരമ്പുകൾക്കെങ്ങിനെ
ഫണം കിളിർത്തു - നഗ്ന ഫണം കിളിർത്തു
പുതിയൊരു മോഹത്തിൻ മുഖങ്ങളാവാം അത്
പുരുഷലാളനമേറ്റു തളിർത്തതാവാം
(എനിക്കു ദാഹിക്കുന്നൂ..)