ലളിതസംഗീതം

മാലേയമണിയും മാറിൽ രാവിൽ
മയങ്ങി ഞാൻ നിലാവിൽ(2)
മന്മഥചിന്താ ഗന്ധവുമായി
മങ്ങിനടന്നു തെന്നൽ..(മാലേയമണിയും..)

നിന്റെ പീലീക്കണ്ണിനുള്ളിലെ
നീലഗോപുരവാതിലിലെ.. (2)
പിരിയാത്ത പ്രേമ കാവൽക്കാരികൾ(പിരിയാത്ത..)
പ്രിയനെ നോക്കിയിരുന്നു.. മയങ്ങും
പ്രിയനെ നോക്കിയിരുന്നു.. (മാലേയമണിയും..)

എന്റെ ഹൃദയസ്പന്ദനമന്നൊരു
മന്ത്രസംഗീതമായൊഴുകീ.. (2)
അനുതാപ ചലനം പോലെ നിൻ ഹൃദയം(2)
അതിന്റെ ചരണം പാടി.. മൃദുവായ്..
അതിന്റെ ചരണം പാടി.. (മാലേയമണിയും..)

തുയിലുണരൂ തുയിലുണരൂ തുമ്പികളേ
തുമ്പപ്പൂങ്കാട്ടിലെ വീണകളേ
തിരുവോണപ്പുലരി വന്നൂ
തൃക്കാക്കര നട തുറന്നു
കുരവയിട്ടു പാടി വരൂ കുരുവികളേ
കുരവയിട്ടു പാടി വരൂ കുരുവികളേ
 (തുയിലുണരൂ..)

മുക്കുറ്റിപ്പൂ വിരിഞ്ഞൂ
മൂന്നു കോടി പൂ വിരിഞ്ഞു (2)
തെച്ചിപ്പൂങ്കാവുകൾ തറ്റുടുത്തു (20
പൂനുള്ളാൻ തുമ്പി തുള്ളാൻ
പൂവിളി കേട്ടൂഞ്ഞാലാടാൻ
പുതിയ ഭാവധാരകളേ തുയിലുണരൂ
(തുയിലുണരൂ..)

മഴ വന്നു തൊട്ടു മെല്ലെ
മനസ്സിന്റെ ജാലകത്തിൽ
കുളിർമാല പാടി
പുതിയ രാഗം
ഋതുഭേദ ഗീതം (മഴ വന്നു..)
 
 
ഹരിതം മറഞ്ഞൊരിലയും
ദുരിതം കവർന്ന ശിഖയും
സഫലമീ സാന്ത്വനത്തെ
വരവേൽക്കയായി ആരോ...
ആരിരോ...ആരാരോ..രാരിരോ... (മഴ വന്നു...)
 
 
കനിവിന്റെ കണ്ണുനീരോ
മറയുന്ന പാഴ്ക്കിനാവോ
അറിയില്ല ജീവനതിനെ
വരവേൽക്കയായി ആരോ...
ആരിരോ...ആരാരോ..രാരിരോ... (മഴ വന്നു...)

അരയന്നമേ... ആരോമലേ...
ദമയന്തിക്കായ് ദൂതുമായ്‌ പോകയോ...
അരയന്നമേ... ആരോമലേ...
ദമയന്തിക്കായ് ദൂതുമായ്‌ പോകയോ...

പോകുമ്പോൾ അരുവികളുടെ തീരത്തെ
മാന്തോപ്പിൽ കുരുവികൾ കൂടേറും
കിളിമരമതിലങ്ങിങ്ങായ്‌ പൂചൂടും
കുറുമൊഴി മലരിനു സഖിയൊരുവൾ
പൂനുള്ളാൻ പുലരിയിൽ അതുവഴിയെ
വന്നീടിൽ അവളുടെ കവിളുകളിൽ കൂത്താടും
കുറുനിര തടസ്സമിടും കാതിൽ നീ
എൻറെ ആത്മകഥ ചൊല്ലിടേണമതിനിന്നു
നിൻറെ കൃപയേകുമെങ്കിൽ രവിവര്‍മ്മ
നിന്നെ എഴുതി പതിച്ച പടം ഉടനടി തരുമിവൻ
അതിനൊരു പ്രതിഫലമായി..

ഒന്നിനി ശ്രുതി താഴ്ത്തി പാടുക പൂങ്കുയിലേ
എന്നോമലുറക്കമായ് ഉണര്‍ത്തരുതേ
എന്നോമലുറക്കമായ് ഉണര്‍ത്തരുതേ
ഒന്നിനി തിരി താഴ്ത്തൂ ശാരദനിലാവേ
ഈ കണ്ണിലെ കിനാവുകൾ കെടുത്തരുതേ
കണ്ണിലെ കിനാവുകൾ കെടുത്തരുതേ.
(ഒന്നിനി..)

ഉച്ചത്തിൽ മിടിക്കല്ലെ നീയെന്റെ ഹൃദന്തമേ
സ്വച്ഛശാന്തമെന്നോമൽ മയങ്ങിടുമ്പോൾ (2)
എത്രയോ ദൂരമെന്നോടൊപ്പം നടന്ന പദ പത്മങ്ങൾ
തരളമായ് ഇളവേൽക്കുമ്പോൾ
താരാട്ടിൻ അനുയാത്ര നിദ്രതൻ പടിവരെ
താമര മലര്‍മിഴി അടയും വരെ (2)
(ഒന്നിനി...)

മാമാങ്കം പലകുറി കൊണ്ടാടി

നിളയുടെ തീരങ്ങൾ നാവായിൽ

കേരളപ്പഴമ ചരിതമെഴുതിയൊരു

ഭാരതപ്പുഴതന്നരിയ മണൽത്തരികളേ

പറയുക പറയുക നിണമൊഴുകിയ കഥ

അമ്പേന്തി വില്ലേന്തി വാളേന്തിയും

തമ്പേറിൻ താളത്തിൽ പോരാടിയും

നിലപാടുനിന്ന തിരുമേനിമാര്‍

തല കൊയ്തെറിഞ്ഞു പടകൾ നയിച്ച കഥ

ഇന്നെന്റെ ചിന്തയ്ക്കു ചിന്തേരിടാൻ

അരിയ കണ്ണാടിച്ചില്ലൊത്ത തീരങ്ങളേ പറയു

സാമൂരിക്കോലോത്തെ മേൽക്കോയ്മയും

മങ്ങാത്ത മായാത്ത മലയാണ്മയും

നിണനീരിലന്നു മണലാഴിയിൽ

എഴുതാൻ തുനിഞ്ഞ പടനായകന്റെ കഥ

പണ്ടു പാടിയ പാട്ടിലൊരെണ്ണം ചുണ്ടിലൂറുമ്പോൾ
കൊണ്ടു പോകരുതേ എൻ മുരളി..കൊണ്ടു പോകരുതേ.. (2)

പാടിപ്പാടി ചുണ്ടുകൾ നോവും പാതിരാപ്പൂങ്കുയിലുകൾ പോലെ (2)
പാവമീ ഞാൻ അലയുകയല്ലേ..പാടിപ്പാടി വളർന്നവനല്ലേ (2)
അന്നു കണ്ട കിനാവിലൊരെണ്ണം നെഞ്ചിലൂറുമ്പോൾ
കൊണ്ടു പോകരുതേ എൻ ഹൃദയം കൊണ്ടുപോകരുതേ..

ഈ വസന്തനിലാവിലൊരൽ‌പ്പം..ഈണമേകാൻ വന്ന കിനാവേ (2)
നിന്റെ ചുണ്ടോടൊട്ടിയ നേരം (2)
എന്റെ ചുണ്ടിലുണർന്നൊരു ഗാനം
പണ്ടു പാടി മറന്നൊരു ഗാനം വീണ്ടുമോർക്കുമ്പോൾ
കൊണ്ടു പോകരുതേ എൻ മുരളി..കൊണ്ടു പോകരുതേ.. (2)

കളിയാക്കുമ്പോൾ കരയും പെണ്ണിൻ
കണ്ണീർക്കവിളിലൊരുമ്മ
കരിമുകിൽ വേണിയിൽ കൈവിരൽ കോർത്ത്‌
കള്ളക്കവിളിലൊരുമ്മ (കളിയാക്കുമ്പോൾ..)
 
ഒത്തിരിനാളായോർമ്മകൾ തോറും
ഒഴുകി വരുന്നൊരു ഗാനം
ഒരു നിമിഷത്തിൽ ഒഴുകുകയാണെൻ
അധരപുടങ്ങളിലൂടെ (കളിയാക്കുമ്പോൾ..)
 
കരയും പെണ്ണിൻ കൺകളിലെങ്ങനെ
കദളിപ്പൂക്കൾ വിരിഞ്ഞു
കള്ളിപ്പെണ്ണേ നിൻ ചുണ്ടിണയിൽ
കന്നിനിലാവു പരന്നു
 
 

ഒരു കരിമൊട്ടിന്റെ കഥയാണു നീ

ഒരു വീണപൂവിന്റെ കഥയാണു ഞാൻ

ഒരു കരളിൽ സ്വപ്നത്തിൻ കുളിരലകൾ മാത്രം

ഒരു കരളിൽ ദുഃഖത്തിൻ ഇരുളലകൾ മാത്രം [ഒരു കരിമൊട്ടിന്റെ..

അറിയാതെയന്നു ഞാൻ നിന്നെ തിരഞ്ഞു

അഴലിന്റെ തെന്നലായ്‌ അരികത്തണഞ്ഞു

അഴകിന്റെയഴകേ നിന്നാതമാനുരാഗമെൻ

അകതാരിൻ വീണയിൽ വീർപ്പിട്ടു നിന്നു (ഒരു..)

മധുരപ്രതീക്ഷയാൽ മലർവീടു കെട്ടി

മധുവുണ്ടു വീണു മയങ്ങുകെൻ തോഴി

ഇനിയെന്റെ  ജീവനിൽ പുളകങ്ങളില്ല

ഇനിയെന്റെ വേണുവിൽ ഗാനങ്ങളില്ല(ഒരു..)