ലളിതസംഗീതം

വിജന പഥങ്ങളിലെങ്ങോ ഒരു 

വിധിയുടെ കാല്പ്പെരുമാറ്റം

ഹൃദയത്തിന്റെ ഇടനാഴിയിലൊരു

ഇണയുടെ പ്രേമവിഷാദ വിലാപം

പാതി വഴിയിൽ തളർന്നുവീണൊരു

പാരിജാത പുഷ്പമേ... പ്രണയമേ….

എന്റെ ഹൃദന്തം നിലച്ചാൽ പോലും 

നിന്റെ സുഗന്ധം മറക്കുവതെവിടെ!!

കഥയറിയാതൊരു പാവം കനവെൻ

കരളൊടു ചേർന്നു മയങ്ങുമ്പോൾ

എന്നും പിന്തുടരുന്നൊരു വിധിതൻ

ശാപത്തിനു ഞാൻ കീഴടങ്ങട്ടേ...

കവിതകളാമെൻ കടലാസുകിളികൾ

കൂട്ടിൽ പാടി തളരുമ്പോൾ

ആളിപ്പടരും ചിതയിലെൻ സ്വപ്നങ്ങൾ  

എരിയുമ്പോളവയും കൂടെരിയട്ടേ...!!!

വിരുത്തം

[ആരുവാൻ മുലയൂട്ടിത്താരാട്ടിവളർത്തിയോൾ

ആരുവാനുരിയാടാൻ ആദ്യമായ് പഠിപ്പിച്ചോൾ

ആരുവാൻ പിച്ചപ്പിച്ച നടത്തിക്കാണിച്ചോൾ, അ-

ക്കാരുണ്യാകാരം, മാതൃപാദങ്ങൾക്കർപ്പിക്കുന്നേൻ]

ഒരുജന്മം ഭജനമിരുന്നാലും

ഒരുകോടി നാമങ്ങൾ ജപിച്ചാലും

അമ്മേ എന്നൊന്നു വിളിച്ചാൽ നേടുന്ന

പുണ്യത്തിനോളം വരുമോ, മോക്ഷ

മാർഗ്ഗങ്ങളാ ഭാഗ്യം തരുമോ?

പ്രേമപ്രവാഹത്തെ ജീവനായ് ജഠരത്തിൽ

പേറുന്ന ധാത്രിയാണമ്മ

പുതുമഴ പെയ്തു തോർന്ന സന്ധ്യേ…

നിനക്കെന്റെ പെണ്ണിന്റെ നാണം

ചന്തം, സുഗന്ധം, വിരൽ

തൊട്ടാൽ പൂക്കുന്ന പ്രായം…!

രാത്രി ലില്ലികൾ പൂക്കും, അനു-

രാഗവല്ലി തളിർക്കും

ആദ്യസ്പർശന നിർവൃതി പുൽകി

രാക്കടമ്പിതൾ നീട്ടും

ഇതാണോ…ഇതാണോ… പ്രേമമെന്ന്

കവികൾ പാടിയ ലഹരി…!?!

ഓമർഖയാമിലൂടെ വയ-

ലാറിൻ മടിത്തട്ടിലൂടെ

യവനമുന്തിരിത്തോപ്പുകൾ താണ്ടി

കാളിന്ദിതൻ മാറിലൂടെ

ഇതാണോ… ഇതാണോ….ആദവും ഹവ്വയം

അന്നാദ്യമൊന്നായ ഭൂമി..!?!

അതിമനോഹരം ആദ്യത്തെ ചുംബനം
അതിമനോഹരം ആത്മഹർഷോത്സവം
മദനസൗഗന്ധികങ്ങളാമാശകൾ
മധുരമുണ്ണും മരന്ദ വർഷോത്സവം (അതിമനോഹരം..)

അലകൾ ചുംബിച്ചും ആലിംഗനം ചെയ്തും
അണിച്ചിലങ്കയായ് തീരത്തു തല്ലിയും
ഒഴുകുമാ കാട്ടുകല്ലോലിനിയുടെ
കരയിൽ സംഗീതം പൂക്കളായ് മാറവേ
ചെറിയ കോളാമ്പിപ്പൂവുകൾ കണ്ടു നീ
വെറുതെ നിൻ ചൊടിപ്പൊന്നിതൾ നീട്ടവേ
കുസൃതി കാണിച്ചു പോയി ഞാൻ കാറ്റു പോൽ
കുറുമൊഴികൾ ചിരിച്ചു കൊഴിഞ്ഞു പോയ് (അതിമനോഹരം..)

ഉദയം കഴിയാറായ് പ്രിയതമനേ
കാലമെത്ര പിറകേ പോയ് അറിയില്ലയോ
ഈന്തപ്പനക്കാടുകളില്‍ പൊന്നുരുകും നാടുകളില്‍(2)
ഈടു വച്ച നമ്മുടെയീ മോഹപുഷ്പമെത്രവട്ടം വാടിക്കൊഴിഞ്ഞു
സദയം കഥ കേള്‍ക്കൂ പ്രിയതോഴീ
കാലം തലനാരില്‍ നര ചേര്‍ത്തൂ
പൊന്നുരുകും നാട്ടിലെന്റെ നെഞ്ചുരുകും നൊമ്പരങ്ങള്‍ ഓമലാള്‍ക്കുമറിയില്ലല്ലോ
പിന്നെയെന്തിനീ വിഷാദ ചിന്തകളെല്ലാം

പുത്തിലഞ്ഞിക്കാവിപ്പോള്‍ പത്തു വട്ടം പൂത്തുലഞ്ഞൂ
പൂത്തുലഞ്ഞ യൗവനത്തില്‍ ദാഹമങ്ങറിഞ്ഞില്ലെന്നോ
കാലത്തിന്റെ കൈ വിരലാല്‍ പ്രായത്തെ തഴുകുമ്പോഴും
കാത്തിരിപ്പിന്‍ നാളുകളില്‍ കണ്ണേ മടങ്ങുക നീ

ശ്രാവണ സന്ധ്യേ അറിയുമോ, എൻ
ശാരിക പോയതെവിടെ?
ഓർമ്മകൾ തൻ ചുടു ചുംബനമേകിയെൻ
ഓമന പോയതെവിടെ, എവിടെ?
ഓമന പോയതെവിടെ
 
ആ സുഖ മാദക ഗന്ധമുണർത്തി
ആതിരയിതിലെ വരുമ്പോൾ
ആ പൊൻ വിരലുകൾ പുളകം ചാർത്തിയ
എൻ മിഴി സാഗരമായി
ഓരോ നിമിഷം തോറും ഹൃദയം
അവളെ തേടുകയായി, വീണ്ടും
അവളെ തേടുകയായി
 
ഈ പൊൻവെയിലും ഈ പൂന്തൊടിയും
ഈറനണിഞ്ഞൊരുഷസ്സും
തേടുകയായ് കള മൊഴികളുണർത്തിയ
ഈരടിതൻ ശ്രുതിയെങ്ങും
തഴുകിയുണർത്താൻ എന്നിലലിയാൻ
വരികില്ലേയവളിനിയും, വീണ്ടും
വരികില്ലേയവളിനിയും

ഗാനം ഇവിടെ കേൾക്കാം - http://onam.eenam.com/ml/node/20

ആരോ കാതിൽ പാടി ആരോ കാതിൽ പാടി
ആരോ കാതിൽ പാടി, ഓണപ്പാട്ടിനോർമ്മകൾ
കായൽ തീരം തേടി, കാണാക്കാറ്റിനീണങ്ങൾ
ആത്മാവിലെ സംഗീതമായ് ,
അറിയുന്നു നാം ഈ സന്ധ്യയിൽ
ഒഴുകിയൊഴുകിവരുമൊരരിയ സുരഭില പദമിയുമിനിയു-
മാരോ... കാതിൽ പാടി
ആരോ കാതിൽ പാടി.

പൂവേ..പൊലി പൂവേ..പൊലി പൂവേ..പൊലി പൂവേ….
പൂവേ..പൊലി പൂവേ..പൊലി പൂവേ…പൊലിപൂവേ….

മലയാളത്തൊടിനീളേ.. പൂത്തിരുവോണം
മാവേലിക്കരയാകേ പൂവിളിപൊടിപൂരം
കാണിപ്പൊന്നൂതിയുരുക്കി
കസവാടകൾ ചാർത്തിയൊരുങ്ങി
ഇലയിട്ടൊരു സദ്യയൊരുക്കാം പോരൂ കിളിമകളേ…
മലനാടിൻ കളമൊഴിയേ… 

ഉതൃട്ടാതി വള്ളംകളി കാണാൻ പോയപ്പോൾ
തിത്തിത്താരാ തിത്തെയ്യം പാടിപ്പോകുമ്പോൾ
ആറാട്ടുപുഴക്കടവിൽ അരയൊപ്പം വെള്ളത്തിൽ
നീരാടും മറിമാന്മിഴിയാളെക്കണ്ടേ പോയ്, ആ-
മാറെയ്തോരമ്പേറ്റെൻ നെഞ്ചു തകർന്നേ പോയ്
പോയ്.. പോയ്.. പോയ്,
ആ പോയ്.. പോയ്.. പോയ്
ഉതൃട്ടാതി വള്ളംകളി കാണാൻ പോയപ്പോൾ
തിത്തിത്താരാ തിത്തെയ്യം പാടിപ്പോകുമ്പോൾ….