ലളിതസംഗീതം

പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്

മൂവന്തിനേരത്ത് പേരാലിൻ‌കൊമ്പിന്മേൽ
ഗന്ധർവ്വന്മാരുടെ വരത്തുപോക്ക്
തെരണ്ടുകുളിച്ചുവരും കുന്നത്തെ പൂവാലിക്ക്
ചെമ്മാനം കൂട്ടുന്നു ചാന്തുപൊട്ട്, മാറിൽ
മിന്നിത്തിളങ്ങുന്ന വൈരക്കല്ല്

പൂക്കൈതപ്പാടത്തെ പൂമൈനപ്പെണ്ണുങ്ങൾ
ചിരിക്കുന്നതും പാട്ട്, കരയുന്നതും പാട്ട്

നാടായ നാടെല്ലാം ചിങ്ങക്കുരുത്തോല   
തോരണം കെട്ടുന്നു ഓണരാവ്
ആരാരും കാണാതെ ഇക്കിളികൂട്ടീടും
കള്ളനെയോർത്തെന്നും കാത്തിരിപ്പ്, നെഞ്ചിൽ
തുള്ളിത്തുളുമ്പുന്നു പ്രേമനോവ്

തിരുവോണക്കതിരൊളിചാർത്തി പൂക്കളമുണരുകയായ്
തിരനോക്കും ഹരിതവസന്തം പൂപ്പടകൂട്ടുകയായ്
മലയാളത്തിരുമുറ്റത്ത് മാവേലിത്തമ്പ്രാനെത്തും
നാളായെടി കളമൊഴിയേ പൂനുള്ളെടി പൈങ്കിളിയേ

തിരുവോണക്കതിരൊളിചാർത്തി പൂക്കളമുണരുകയായ്
പൂപ്പടകൂടുകയായ്

തുമ്പിപ്പാട്ടിന്നീണം തുള്ളിത്തൂവുമ്പോൾ
വരമഞ്ഞൾ തേച്ചുകുളിച്ചുവരുന്നൂ പുലർകാലം
ഉപ്പേരി വറുത്തുകൊറിക്കാം കളിമാവുകുഴച്ചതുരുട്ടാം
തിരുമൂലച്ചക്കരയിട്ടുവരട്ടിയൊരുക്കീടാം
കദനങ്ങൾക്കവധികൊടുത്തീ ഹൃദയങ്ങൾ കൂട്ടിച്ചേർക്കാം
എവിടാകിലുമൊന്നായ്ച്ചേർന്നില വെട്ടിനിരത്തീടാം, ഓണ-
സ്സദ്യവിളമ്പീടാം

പൂത്തുമ്പീ തുള്ളാൻ വാ തുള്ളാൻ വാ
ആതിരപ്പൂ നുള്ളാൻ വാ നുള്ളാൻ വാ
മാവേലിയെഴുന്നെള്ളും മലയാളക്കരയിൽ
മണിമുത്തുക്കുടചൂടും ചെന്തെങ്ങിൻ തോപ്പിൽ
അണിഞ്ഞൊരുങ്ങിയൊരഴകിലോമനപ്പാട്ടുമൂളി നീ
വാ വാ വാ വാ….

പൂത്തുമ്പീ തുള്ളാൻ വാ തുള്ളാൻ വാ
ആതിരപ്പൂ നുള്ളാൻ വാ നുള്ളാൻ വാ

ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ
നെഞ്ചിലെ പാട്ടുതരാം മാറിലെ ചൂടുതരാം
എന്നുമെൻ സ്നേഹമാലകൾ ചാർത്തിടാം
       
ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ

ആവണിപ്പൂന്തൊടിയിൽ ആതിരതൻ പാൽക്കടവിൽ
ആയിരം ജന്മമായ് ഞാൻ കാത്തുനിൽക്കയായ്
കേട്ടില്ല നിൻ കൊലുസിൻ കൊഞ്ചലെങ്ങും ഈ വഴിയിൽ
പെയ്തെന്റെ നൊമ്പരത്തിൻ നീർപ്പളുങ്കുകൾ…

ഓർമ്മകൾ പൂക്കുമെന്റെ പൂവനങ്ങളിൽ
നീ വരൂ ചുണ്ടിലോണപ്പൂവുമായ് സഖീ …

തെയ്തെയ് തക തെയ്തെയ് തക തെയ്തെയ് തക തെയ്തെയ് തക
തെയ്തെയ് തക തെയ്തെയ് തക തിത്തിത്തകതാരോ

തത്തക്കിളിച്ചുണ്ടൻ തത്തിക്കളിക്കണ പുന്നമടക്കടവിൽ, ഒരു
കൊച്ചുകൊതുമ്പു തുഴഞ്ഞു നടക്കണ ചിന്തൂരപ്പൊട്ടുകാരീ
എന്നെയും കൂട്ടാമോ എന്നോടിഷ്ടം കൂടാമോ
മുട്ടിയിരിക്കാമോ ഒന്ന് കെട്ടിപ്പിടിക്കാമോ
മൂവന്തി മുത്തിച്ചുവന്നൊരച്ചുണ്ടിലെ
മുന്തിരിച്ചാറുണ്ണാൻ സമ്മതം മൂളുമോ

ഓർമ്മയിൽ ആദ്യത്തെ ഓണം
ഓമനിക്കാനെന്തു മോഹം
പൂക്കസവാടയും പൂത്തുമ്പിയും
പൂപ്പൊലിച്ചിന്തുമാ പൂമരവും
അൻപോടെ മുത്തശ്ശിനീട്ടിയ
പാലടയ്ക്കോടിയടുക്കും കുറുമ്പും

തൊടിയിലെ തുമ്പയോടിത്തിരിപ്പൂകെഞ്ചി
ഓടിനടക്കുന്ന നേരം
ഒരു കൈക്കുടന്ന പൂവുമായ് നീയെന്റെ
പൂക്കുമ്പിളൂട്ടിയ നേരം
കോലങ്ങളെഴുതിയ മുറ്റത്ത് പിന്നെ നാം
പൂക്കളം നെയ്തൊരാക്കാലം

ഓളങ്ങൾ താളം പിടിക്കുമീ കായലിൻ
തീരത്ത് ഞാൻ മാത്രമാകെ...
ഇനിയുമൊരോണത്തിൻ ആത്മഹർഷങ്ങളിൽ
അലിയുവാനാകാതെ നിൽക്കേ
അരികിൽ നിന്നോർമ്മയും മുഗ്ദ്ധമാകാലവും
അറിയുന്നു തെന്നലും ഞാനും

അഞ്ജനക്കണ്ണെഴുതി, കവിളിലി-
ന്നമ്മച്ചി പൊട്ടുകുത്തി
അച്ഛൻ മുടിയൊതുക്കീ, കരിവള-
യിട്ടുനിൻ കൈയൊരുക്കി
പട്ടുടുപ്പിട്ടുതരാൻ പുലരിളം-
പൂവണിപ്പൊൻ വെയില്
ഊയലിലാട്ടിത്തരാനോലത്തുമ്പ-
ത്താടും കിളിമകള്

മഞ്ഞൾക്കുറിവരയ്ക്കാൻ തൊടിയിലെ-
മന്ദാരപ്പൂങ്കതിര്
മാറിലണിഞ്ഞിടാനായ് തിരുവോണ
മാലയായ് മാരിവില്ല്
കുഞ്ഞുകാല്പ്പാടുകളാവണിപ്പൂക്കളം
തീർക്കുമീപ്പൂന്തൊടിയിൽ
മണ്ണപ്പംചുട്ടുകളിക്കുവാനമ്പാടി-
ക്കണ്ണനുമുണ്ടുകൂട്ട്

ചിങ്ങപ്പൂക്കളവർണ്ണം ചാർത്തിയൊരോണപ്പുലർകാലം
തങ്കപൊല്ക്കുടമൻപിൽത്തൂകിയൊരോമൽ തൂവെട്ടം
കണികാണാൻ വാ മകളേ, മലയാളക്കിളിമകളേ
പുതുകോടിയിൽ നീ പുതുമോടിയുമായിതിലേ... ഇതിലേ...
 
പാടക്കതിരണിമഞ്ഞൾക്കുറിയതുചാർത്തുകയായ് പുലരി
ആടിക്കാറ്റിൻ ഹംസദ്ധ്വനിയിൽമയങ്ങുകയായവനീ
പിറന്നൊരീ നാടിൻ ചിത്രം മിഴികൾക്കുകൂട്ടായെത്തും
ഉറങ്ങുന്ന നേരം പോലും എവിടായിരുന്നാലെന്നും
ഇതുവഴിയിനിവരുമവളുടെ മലയജ
മണമൊഴുകുകയായി, മധുവുതിരുകയായി
 
കാവും കളവും കളകളമൊഴുകും കാട്ടാറും കടവും
കാണും കണ്ണിൽ നിറയും നാടിൻ വർണ്ണപ്പൂക്കാലം