നാടകഗാനങ്ങൾ

 

ഒരു വഴിത്താരയിൽ
ഒറ്റയ്ക്കു നിന്നു ഞാൻ
ഇരുളിൽ കൂരിരുളിൽ
ഒരു മരുഭൂമിയിൽ
ദാഹിച്ചു നിന്നു ഞാൻ
വെയിലിൽ തീ വെയിലിൽ

ആകാശക്കൂടാരം തന്നിൽ നിന്നും
ആ വെള്ളിത്താരമിറങ്ങി വന്നു
ബെത്‌ലഹേമിന്റെ വെളിച്ചമെന്റെ
നെറ്റിയിൽ തങ്കക്കുറി വരച്ചൂ
(ഒരു വഴിത്താരയിൽ..)

മാലാഖ പോലൊരു തെന്നലന്നു
മാമലയേഴും കടന്നു വന്നൂ
മേലേത്തൊടികളിൽ മേഞ്ഞു നിന്ന
മേഘത്തിൻ പാല് കറന്നു തന്നൂ
(ഒരു വഴിത്താരയിൽ..)

 

വയനാടൻ മഞ്ഞളു മുറിച്ചതു പോലൊരു
മലനാടൻ പെണ്ണ്
അവളെ കൊല്ലാൻ വിളിച്ചാലും വളർത്താൻ വിളിച്ചാലും
കുളക്കോഴിയെപ്പോലൊരോട്ടം
അവൾ കൊക്കിക്കുണുങ്ങിയൊരോട്ടം

വരിനെല്ലു ചേറി വിളിച്ചു ഞാൻ അപ്പോൾ
കരളിന്മേൽ കൊത്തുന്ന നോട്ടം
പിന്നാലെ ചെന്നു വിളിച്ചു ഞാൻ അപ്പോൾ
തെന്നിപ്പിടഞ്ഞങ്ങൊരോട്ടം
(വയനാടൻ മഞ്ഞള്...)

ഒരു വാക്കു മിണ്ടാൻ കൊതിച്ചു ഞാൻ
അപ്പോൾ കളിയാക്കിക്കൊണ്ടൊരു നോട്ടം
പാലും പഴവുമായ് ചെന്നു ഞാൻ അപ്പോൾ
വാലും കുലുക്കിയൊരോട്ടം
(വയനാടൻ മഞ്ഞള്...)

 

വള വള വളേയ്
വള വേണോ വള വേണോ
വള വള വേണോ
തരിവള കരിവള കുപ്പിവള
വള വേണോ

കരിവളയുണ്ടേ തരിവളയുണ്ടേ
കണ്ണാടിവളയുണ്ടേ
ചെല്ലക്കണ്ണാടി വളയുണ്ടേ
മിനു മിനെ മിനുങ്ങണ
മിന്നിത്തുടിക്കണ
മീനിന്റെ ശേലുള്ള വളയുണ്ടേ
വെളുവെളെ ചിരിക്കണ
വെട്ടിത്തിളങ്ങണ
വെണ്ണക്കല്ലൊളിയുള്ള വളയുണ്ടേ
(വള വേണോ...)

കന്യാകുമാരിയിലെ ശംഖുവള
കാശീന്ന് കൊണ്ടു വന്ന പാശിവള
കൊച്ചിക്കമ്പോളത്തിലെ ശീമവള
ചെത്തവും ചേലുമുള്ള കുപ്പിവള
(വള വേണോ...)

 

മണ്ണിൽ പിറന്ന ദേവകന്യകേ
മഞ്ഞിന്റെ പട്ടുടുത്ത്
മഞ്ചാടിമാല കോർക്കും
മണ്ണിൽ പിറന്ന ദേവകന്യകേ

ആരോടും മിണ്ടാതെ
ആരാരും കാണാതെ
ആരെക്കിനാവ് കണ്ടു നിന്നു നീ
(മഞ്ഞിന്റെ....)

മേനകയെവിടെ നൊന്തു പെറ്റൊരു
മേനകയെവിടെപ്പോയ്
കണ്വനെവിടെ പോറ്റി വളർത്തിയ
കണ്വനെവിടെപ്പോയ്
(മഞ്ഞിന്റെ...)

തോഴികളെവിടെ കളിവാക്കോതും
തോഴികളെവിടെപ്പോയി
മാനുകളെവിടെ മയിലുകളെവിടെ
താമരവിശറികളെവിടെ
(മഞ്ഞിന്റെ...)

 

പൊട്ടിച്ചിരിച്ചു ഞാൻ എങ്കിലുമെൻ മനം
പൊട്ടിക്കരയുകയായിരുന്നു
പൂത്തു വസന്തങ്ങൾ എങ്കിലുമെന്നുള്ളിൽ
കത്തുന്ന തീ വെയിലായിരുന്നു
(പൊട്ടിച്ചിരിച്ചു...)

കൊട്ടിയടച്ചൊരു സ്വർഗ്ഗകവാടത്തിൽ
മുട്ടി വിളിക്കുവതെന്തിനു ഞാൻ
ഇത്തിരി തീർത്ഥജലത്തിനായിനിയും
കൈക്കുമ്പിൾ നീട്ടുവതെന്തിനു ഞാൻ
(പൊട്ടിച്ചിരിച്ചു....)

നട്ടു നനച്ചൊരീ മുന്തിരിത്തോപ്പുകൾ
കൈപ്പുനീർ മാത്രം പകർന്നു തന്നൂ
മൊട്ടിട്ട മോഹങ്ങളൊക്കെയുമെൻ മുന്നിൽ
ഞെട്ടറ്റു ഞെട്ടറ്റു വീണടിഞ്ഞു
(പൊട്ടിച്ചിരിച്ചു....)

 

 

വരിക സോളമൻ തൻ പൊൻ കിനാവേ
നീ വരൂ യരൂശലേം പുത്രിയാം കന്യകേ

എന്നെ വിളിക്കൂ എന്നെ വിളിക്കൂ
പൊന്നോണക്കുഴലൂതി നിൻ
പൊന്നോണക്കുഴലൂതി
നഗ്നപാദങ്ങളിൽ നീയണിയിച്ചൊരു
തങ്കച്ചിലമ്പു ചാർത്തി വരാം
തപത മനസ്സിൽ നീ വിരിയിച്ചൊരു
താമരമലരുകൾ കോർത്തു തരാം

ദേവദാരുത്തണലിൽ
ലെബണോണിലെ പുൽ മേടിൽ
ആടു മേച്ചു കളിച്ചു നടന്നൊ
രിടയപ്പെൺ കൊടി ഞാൻ
ജീവനായകാ
ജീവനായകാ നീയാ
മുരളീരവത്താലന്നെൻ
ജീവനിൽ കുളിർ പാകിയെനിക്കാ
രാഗകിരീടം തന്നൂ
(എന്നെ വിളിക്കൂ‍ൂ...)

 

മുൾച്ചെടിക്കാട്ടിൽ പിറന്നു ഞാൻ
ഒരു മുൾമുടി ചൂടി വിടർന്നു ഞാൻ
നിൻ കാൽ കഴുകാൻ പനിനീരുമായ് രണ്ടു
കണ്ണുകൾ കാത്തു നില്പൂ

ഇനിയും വരില്ലേ
ഇതിലേ വരില്ലേ
ഇവളുടെ മിഴിനീരിന്നർച്ചന കൈക്കൊള്ളാൻ
ഇനിയും ഇതിലേ വരില്ലേ
(മുൾച്ചെടി....)

കുളിർ കാറ്റു പോലെ
പുലർകാന്തി പോലെ
കുരിശിന്റെ വഴി തോറും
ദുഃഖിതർക്കാശ്വാസം
അരുളാനിനിയും വരില്ലേ
(മുൾച്ചെടി...)

 

 

 

വീണക്കമ്പി മുറുക്കി വീണ്ടുമിവിടെ
പ്പാടാൻ വരുന്നൂ ഭവദ്ഗാനത്തിന്നമൃതം
നുകർന്നവനിയിൽ ദേവത്വമാർന്നോരിവർ
നാനാഭാവമനോജ്ഞമാനവകഥാ
ഖ്യാനങ്ങളിൽ തൂകി
നീയാനന്ദക്കുളിർവെണ്ണിലാവതിലുണർന്നി
കൊച്ചു രാപ്പാടികൾ

വീണക്കമ്പികൾ മീട്ടി പാടുക
വീണ്ടും ഗായകരേ
ജീവിതം പോലവിരാമം ഈ
ജീവിതകഥാനുഗാനം
സ്നേഹസ്പന്ദിത ഹൃദയം ചൂടിയ
മോഹമലർക്കുലകൾ
തേൻ കിനിയട്ടെ തഴുകെത്തഴുകെ
ത്തേങ്ങും തന്തികളിൽ
(വീണക്കമ്പികൾ...)

 

കാറ്റിന്റെ തോണിയിൽ പൂമണമേറ്റി
അക്കരെയിക്കരെപ്പോണോരേ
നിന്നേ പോ ഒന്നു നിന്നേ പോ
ഒരു നുള്ളു പൂമണം തന്നേ പോ
കാണാത്ത തീരത്തെ കനകാംബരത്തിന്റെ
കൈമണിച്ചെപ്പിലെ മണമുണ്ടോ
കാനനറോജകൾ കവിളത്തു പൂശിടും
അത്തറിൻ മണമുണ്ടോ
(കാറ്റിന്റെ....)

നാണം കുണുങ്ങുന്ന മാതളപ്പൂവിന്റെ
മണിയറക്കുള്ളിലെ മണമുണ്ടോ
പാതിരാപ്പൂവുകൾ പാഴ് മണ്ണിൽ തൂവുന്ന
പനിനീരിൻ മണമുണ്ടോ
(കാറ്റിന്റെ....)

ഈറൻ ചുറ്റി നിന്നിളവെയിൽ കൊള്ളുന്ന
താമരപ്പൂവിന്റെ മണമുണ്ടോ
കുടുകുടെച്ചിരി തൂകും കുടമുല്ലപ്പെണ്ണിന്റെ
കുമ്പിളിൻ മണമുണ്ടോ മണമുണ്ടോ
(കാറ്റിന്റെ...)

 

ആരുടെ മാനസപ്പൊയ്കയിൽ നിന്നുമി
ന്നാരോമൽഹംസമേ നീ വന്നൂ
വെറ്റില തിന്നു ചുവന്ന ചുണ്ടിൽ
ഇത്തിരി താമരയല്ലിയുമായ്
തൂവെള്ളിത്തൂവലും തുള്ളിത്തുള്ളി
ആരുടെ ദൂതുമായ് നീ വന്നു
(ആരുടെ മാനസ...)

തൊട്ടേനെ ഞാനെന്ന പാട്ടുമായ് നിൻ
ചുറ്റുമിന്നെൻ മനം തുള്ളിടുന്നു
ഒന്നുമറിയാത്ത മട്ടിലെന്തേ
തെന്നിത്തെന്നി നീ മാറുന്നു
(ആരുടെ മാനസ...)

മാതളച്ചുണ്ടുകൾ നീട്ടി നീയീ
താമരത്താളിൽ വരച്ച ചിത്രം
ഞാനറിയാതെയൊന്നുമ്മ വെച്ചൂ
നാണമാണാരോടും മിണ്ടിയില്ല
(ആരുടെ മാനസ...)