ലളിതസംഗീതം

മാനസവീണയിൽ കൂടണഞ്ഞോരു പൂ-
ങ്കുയിലേ നീ പാടി മറഞ്ഞതെന്തേ?
ഓർമ്മകളായി വെൺതൂവൽ പൊഴിച്ചെങ്ങു-
മാരോടും മിണ്ടാതകന്നതെന്തേ, ഒന്നു
യാത്ര ചോദിക്കാതെ പോയതെന്തേ....?

അകലുന്ന നിന്റെ കാൽപ്പാടുകൾ കണ്ടൊരീ
പഥികർ തൻ മിഴി നിറയുമ്പോൾ
അവിടെ നിൻ സ്വരധാര നെയ്ത ഹൃദ്സ്പന്ദങ്ങ-
ളാത്മാവിലലിയുകയായിരുന്നു, നാവിൽ
തുള്ളിത്തുളുമ്പുകയായിരുന്നു

അന്നു നീ ഞങ്ങൾ തൻ ഹൃദയങ്ങളിൽ തളി-
ച്ചാശംസതൻ കുളുർനീർമണികൾ
ആ നിമിഷങ്ങളിൽ മാറോടു ചേർത്തു നീ
മീട്ടിയ ഗിത്താറായ് തേങ്ങി ഞങ്ങൾ, ഇന്നൊ-
രോർമ്മയായ് നീ ചേർന്നലിഞ്ഞു മണ്ണിൽ

അരികിൽ, ആ സ്വപ്നതീര,ത്തെനിക്കെന്റെ
കവിതകൾ പാടി എല്ലാം മറക്കുവാൻ...
അരിയ തിങ്കൾക്കൊതുമ്പുവള്ളം തുഴ-
ഞ്ഞനഘ നക്ഷത്ര പുഷ്പങ്ങൾ നുള്ളുവാൻ...
കോറുമീരടിത്തുണ്ടിലീണം ചേർത്തു
മെല്ലെയാലപിച്ചെല്ലാം മറക്കുവാൻ...
ഞാൻ വരും...! നാളെയെന്നെങ്കിലും സഖീ....
വീണമീട്ടി നീ കൂടെയുണ്ടാകണം...!
 
കേട്ടറിഞ്ഞൊരാ സ്നേഹത്തുടിപ്പുകൾ
എന്റെ നെഞ്ചോടു തൊട്ടറിഞ്ഞീടണം
പൊൽച്ചിലങ്കകൾ ചിന്നിച്ചിതറുമാ
വാക്കുകൾ എന്റെ കാതിൽ പൊഴിയണം
സന്ധ്യചാലിച്ചെഴുതിയോരക്കവിൾ
കണ്ടുകൊണ്ടങ്ങനെ നിന്നൊടുങ്ങണം..!
ഞാൻ വരും നാളെ...! എന്നെങ്കിലും സഖീ...

പാൽനിലാവൊളി തൂകും പഞ്ചമിച്ചന്ദ്രനും
പാതി വിടർന്നൊരു മുല്ലമൊട്ടും
പങ്കു വയ്ക്കുന്നതിന്നെന്തു രഹസ്യമോ
പങ്കുവയ്ക്കില്ലേ അതെന്നോടുമായ്?
 
ഞാനും നിങ്ങൾ തൻ സഖിയല്ലയോ.
 
രാവേറെയായിട്ടും രാപ്പാട്ടു പാടുന്നു
രാഗാർദ്രലോലനായ് രാപ്പാടി
രാഗിണിയാം ഇണക്കിളി അണഞ്ഞില്ലേ?
രാവിന്റെ പുളകമായ് പൂത്തില്ലേ - അവൾ
രാവിന്റെ പുളകമായ് പൂത്തില്ലേ?
 
കിളിയേ  എന്നോട് ചൊല്ലുകില്ലേ
ഞാനും നിൻ സഖിയല്ലേ.

മാലേയമണമോലും രാക്കാറ്റു വീശുന്നു
മേലാകെ കുളിരാട ചാർത്തുന്നു
കാമുകനാം പ്രിയനവനണയുന്നു
കരളിൽ കിനാവുമായ് കാത്തില്ലേ - ഇവൾ

പൂക്കൾതോറും പുഞ്ചിരിക്കും കൊച്ചു പൂമ്പാറ്റേ - നിന്റെ
പൂഞ്ചിറകിൻ വർണ്ണമേഴും ആരിതു തന്നൂ?

കൊച്ചു പൂക്കൾ തൻ അഴകിൽ മയങ്ങിയോ - നല്ല
പൂമണം പുൽകി മയങ്ങിയോ
പൂക്കൾ തോറും പാറിടുന്ന കൊച്ചു പൂമ്പാറ്റേ
പൂമ്പൊടിയും പൂന്തേനും നീ നുകർന്നുവോ? (പൂക്കൾ തോറും...)

മാനത്തെ മഴവില്ലിൻ ഭംഗിയോ
നൃത്തമാടീടും മയിലിന്റെ പീലിയോ
എങ്ങിനെ എങ്ങിനെയീ വർണ്ണജാലങ്ങൾ
എങ്ങു നിന്നെങ്ങു നിന്നു നേടി നീയെത്തി? (പൂക്കൾ തോറും ...)

ഒരുനാളാരോ ചൊല്ലി
നീയെന്റേതാണെന്ന്...
അതുകേട്ടെൻ മനസ്സും മൂളി
ഞാൻ നിന്റെതാണെന്ന്
ആ ചിരിയും ആ മൊഴിയും
എന്റെ സ്വന്തമാണെന്ന്
ആ പ്രണയ സുഗന്ധം എന്നും
എന്റെ മാത്രമാണെന്ന്......

പുസ്തകത്താളിൽ നിൻ
മുഖമല്ലോ കാണ്മൂ ഞാൻ
കസ്തൂരിമാൻ കണ്ണിൻ
മൈയല്ലോ കാണ്മൂ ഞാൻ
തുടിക്കുന്നു നെഞ്ചം നിന്റെ
സ്നേഹം കണ്ടറിഞ്ഞീടാൻ
പിടയ്ക്കുന്നു കാതും നിന്നിൽ
നിന്നും കേട്ടറിഞ്ഞീടാൻ
ഒരുവട്ടം ചൊല്ലില്ലേ
എൻ സ്വന്തമാണെന്ന്
പുഞ്ചിരിയോടെന്നെന്നും
എന്റെ മാത്രമാണെന്ന് (ഒരു നാൾ)
 
പ്രണയത്തിൻ കുളിരാദ്യം

ദേവദൂതികേ....
രാഗ സന്ധ്യയിൽ...
നീ വരൂ വിലോലമായ് 
പദങ്ങളാടുവാൻ...
പ്രണയമധുനിറയും....,
ഈ.... നിമിഷം.. 
രാഗ സന്ധ്യയിൽ.. അനു-
രാഗസന്ധ്യയിൽ (ദേവദൂതികേ....)

നിമിഷ സാഗരങ്ങൾ താ-
ണ്ടുന്നു മൂക ചന്ദ്രൻ
അകലെ നേർത്തലിഞ്ഞു, വിര-
ഹാർദ്ര കാമുകൻ (2)
വിവശമായ് വിതുമ്പി....
എവിടെയാണു നീ...
സാന്ത്വനം തേടുന്നൊരെൻ മൊഴി
നേർത്തലിഞ്ഞു പോയ്
താന്ത സന്ധ്യയിൽ, ഏ-
കാന്ത സന്ധ്യയിൽ (ദേവദൂതികേ....)

വാ....ടി വീ....ണൊരു
പൂ...വായിതാ
നിൻ....റ്റെ കാൽത്താരി
കാതോർക്കയായ് (2)
തരളമായ്.....

വൃശ്ചിക പൂങ്കാറ്റു തലോടും
മുടിയിഴയുമ്മ വച്ചൊരാൾ
കാതിൽ മെല്ലെ മൂളും
സ്നേഹം തുളുമ്പും
പിറന്നാളാശംസകൾ (വൃശ്ചിക)

പൊന്മണീ നിൻ കാലിൽ
ചിലമ്പൊലി ഉണരും പോലെ...
കണ്മണീ നിൻ കാതിൽ
കതിർമണി ഉലയും പോലെ…(പൊന്മണീ)
ആഘോഷമായ് നേരാം..
ആമോദമായ് പാടാം…
ആയിരമാശംസകൾ
പിറന്നാളാശംസകൾ (2)
വൃശ്ചിക പൂങ്കാറ്റു തലോടും…

കാറ്റായ് നിൻ കൈയിൽ
തരിവളയിളകി മെല്ലെ…
മേഘങ്ങൾ വന്നണഞ്ഞുവെൺ
കുടയായ് നിൻ മേലെ…(കാറ്റായ്)
നിൻ ജന്മനാൾ നേരാം…
സ്നേഹാർദ്രമായ് പാടാം…
ആയിരമാശംസകൾ
പിറന്നാളാശംസകൾ(2) (വൃശ്ചിക…)