നാടകഗാനങ്ങൾ

 

മകരവിളക്കേ തിരി തെളിക്കൂ എന്റെ
മനസ്സൊരു ശ്രീകോവിലാക്കി മാറ്റൂ

വൃശ്ചികവ്രതം നോറ്റു പച്ചിലക്കാടുകൾ
പുഷ്പതാലമുഴിയുമീത്തിരുമുറ്റത്തിൽ
ഭക്തിഗീതം പാടി നിൽക്കുമീ ദാസിയെ
തൃച്ചേവടികളിൽ സ്വീകരിക്കൂ
സ്വാമി സ്വീകരിക്കൂ


കാർത്തിക ദീപജാലം കസവൊളിമാലകൾ
ചാർത്തുമീപ്പൊൻ ഗോപുരപ്പടിവാതിലിൽ
മുട്ടി വിളിക്കുന്നൊരീ മാളികപ്പുറത്തിനെ
തൃക്കണ്ണു തുറന്നു നീ അനുഗ്രഹിക്കൂ
സ്വാമി അനുഗ്രഹിക്കൂ

 പാത്തുമ്മാബീവി തൻ പുന്നാരമോള്

പാർത്താലഴകുള്ള സീനത്ത്
ഓർത്തോർത്തു നടക്കുമ്പം ഓരോ നിമിഷവും
പൂക്കുന്നു ഖൽബിൽ  മുഹബ്ബത്ത്
പൂക്കുന്നു ഖൽബിൽ മുഹബ്ബത്ത്

മുത്താണ്...
മുത്താണവൾ ഞമ്മഹ്ഹ് മുത്തുനബി തന്ന
സ്വത്താണവൾ കരിമ്പിൻ സത്താണ്
എത്തിപ്പിടിക്കാനാവാത്ത കൊമ്പത്ത്
പൊട്ടി വിരിഞ്ഞ കനിയാണ്
പൊട്ടി വിരിഞ്ഞ കനിയാണ്


കണ്ണാണ്.....
കണ്ണാണവൾ ഞമ്മക്ക് ഞമ്മളെ മയക്കിയ
പെണ്ണാണവൾ തെളിഞ്ഞ പൊന്നാണു
ഒന്നാകാൻ കൊതിക്കണ ഞങ്ങടെ മനസ്സില്
ഒന്നിച്ചു വിരിഞ്ഞു കിനാവുകള്
ഒന്നിച്ചു വിരിഞ്ഞു കിനാവുകള്

 

കറുത്ത വാവിന്റെ മുഖപടം നീങ്ങി
വെളുത്ത പക്ഷത്തിൻ ചിരി തുടങ്ങി
ഇനിയും ഒരു രാവുറങ്ങാതിരുന്നാൽ
ഇവളുടെ പ്രേമത്തിൻ പൗർണ്ണമിയായ്


പ്രണയാർദ്ര മനസ്സിൽ തെളിനീർസരസ്സിൽ
വിരിയുന്ന വെള്ളാമ്പൽ പൂമൊട്ടുകൾ
അതിലൊന്നു വിടർത്തി പൂ ചൂടി നിൽക്കും
പ്രിയ സഖീ നിനക്കഭിനന്ദനം

ഇനി വരും ഉഷസ്സുകൾ ഇനി വരും സന്ധ്യകൾ
ഇവളുടെ മോഹങ്ങളെ ലാളിക്കുമ്പോൾ
അതിലൊരു പൂമഞ്ചം വിരിക്കാൻ കൊതിക്കും
പ്രിയസഖീ നിനക്ക് സുഖസ്വപ്നങ്ങൾ

 

പച്ചോലക്കിളികളേ ചോലപ്പനം കിളികളേ
നൃത്തമാടി നൃത്തമാടി പറക്കും കളമൊഴികളേ
ചെഞ്ചോരത്തുള്ളി കൊണ്ടു മൂക്കുത്തി മുത്തണിഞ്ഞു
കൊഞ്ചിക്കൊഞ്ചി നിങ്ങൾ പാടും പാട്ടേതാണോ
കവിയായ് മാറിയ മലവേടനു വേണ്ടി പണ്ട്
കിളിമൊഴിയിൽ നിങ്ങളു പാടിയ രാമായണമോ
ധർമ്മയുദ്ധ ഭൂമിയിലെ ദുഃഖിതനാം അർജ്ജുനനെ
ധർമ്മഗീതം കൊണ്ടുണർത്തിയ ഗീതാമൃതമോ
കറ്റ കൊയ്യും കൈകൾക്കും കയർ പിരിക്കും കൈകൾക്കും
ശക്തി നൽകും വിപ്ലവത്തിൻ ഗാനമാണോ
പകലന്തിപ്പണിയെടുത്തു തളരും തൊഴിലാളിക്ക്
പുതുയുഗത്തിൽ വഴിയൊരുക്കും കാഹളമാണോ

 

ജിംജിലം ജിം ജിലം ജിം ജിലം താരോ
ജിം ജിലം താരോ
തക്കിട്ട തക്കിട്ട താളത്തിലാടും
ജിം ജില താരോ
മാനത്തിനു മുത്തം നൽകുന്ന മാമല
മേലാകെ പൂത്തുണരും പൂമല
മാമലയ്ക്കു മേലേ പൂമലയ്ക്കു മേലേ
മണ്ണിനെ നോക്കി കണ്ണെറിയും പൊങ്കല
ചന്ദ്രക്കല മണ്ണിൽ വീണാടും പോലെ
ചന്ദനശില പെണ്ണായിട്ടാടും പോലെ
ആട്ടമാടെടീ പെണ്ണേ
പാട്ടു പാടെടീ പെണ്ണേ
ആരോമൽ ചെറുക്കനായ് ആടടീ പെണ്ണേ

മലവാഴും തമ്പുരാനു മാമയിലാട്ടം
മുകൾ വാഴും തമ്പുരാനു കുറത്തിയാട്ടം
പെണ്ണൂ കാണാനെത്തുന്ന പുതുമണവാളനു
സ്വർണ്ണഫണം വിടർത്തിയ പാമ്പിൻ നൃത്തം

 

മലയടിവാരങ്ങളേ മലരണിക്കാടുകളേ
മറക്കുമോ നിങ്ങൾ പാവമൊരീ
മലവേടപ്പെണ്ണിനെ
നിനക്കു ചൂടാൻ പൂക്കളമൊരുക്കാൻ
എത്ര വസന്തം വിടർത്തീ നീ
എനിക്ക് കുളിക്കാൻ കുളിരരുവികളിൽ
എത്ര വട്ടം ചന്ദനം കലക്കീ

പേരറിയാത്തൊരെൻ മോഹത്തിന്നുറങ്ങാൻ
പൂവണിക്കിടക്ക നിവർത്തീ
എന്റെ പ്രിയതമൻ എന്നെ വരിക്കാൻ
കല്യാണമണ്ഡപമൊരുക്കീ
പച്ചിലമണ്ഡപമൊരുക്കീ