അടിയന്തിരാവസ്ഥയുടെ കാലത്തിറങ്ങിയ, ഇടതുപക്ഷസ്വഭാവമുള്ള ഒരു പൊളിറ്റിക്കല്‍ സിനിമ. പി എ ബക്കർ സംവിധാനം ചെയ്ത ചിത്രം നിർമ്മിച്ചത് സംവിധായകൻ പവിത്രനാണ്. 1976ലാണ് ചിത്രം പുറത്തിറങ്ങിയത്.
നക്‌സല്‍ വിപ്ലവകാരിയും പോലീസിന്റെ നോട്ടപ്പുള്ളിയുമായ ഗോപി തന്റെ ഒളിവു കാലഘട്ടത്തില്‍ അഭയം തേടി കേരളത്തിനു വെളിയില്‍ ജോലി ചെയ്തു തനിയെ ജീവിക്കുന്ന പൂർവ്വകാമുകി ശാരിയുടെ മുറിയിലെത്തുന്നു. ഒരുമിച്ചുള്ള കുറച്ചു നാളുകളില്‍ ശാരി പ്രണയ ചേഷ്ടകളോടെയും ഗോപി രാഷ്ട്രീയ ധൈഷണികതയോടെയും ഇടപെടുന്നു. സ്വാഭാവികമായ ശരീര ചോദനകളെ പ്രകടിപ്പിക്കാന്‍ ശ്രമിക്കുന്ന ശാരിയേയും ശരീരത്തേയും നിഷേധിച്ചുകൊണ്ട് ഗോപി ഉള്‍വലിയുന്നു. നിശ്ചിത സമയത്തിനു ശേഷം മറ്റൊരു താവളത്തിലേയ്ക്കു മാറുന്ന ഗോപിയ്ക്കു വേണ്ടി ശാരി തുടര്‍ന്നും സഹായങ്ങള്‍ ചെയ്യുന്നു. ശാരിയും പോലീസിന്റെ നിരീക്ഷണത്തിലാകുന്നു. അവള്‍ ചോദ്യം ചെയ്യപ്പെടുന്നു. സുരക്ഷിതമായ കുടുംബ ജീവിതമെന്ന മോഹ വാഗ്ദാനത്തെ തട്ടിത്തെറിപ്പിച്ച് നീണ്ട അവധിയെടുത്ത് നാട്ടിലേയ്ക്കു തിരിക്കാനിരിക്കുന്ന ശാരിയെ നടുക്കിക്കൊണ്ട് ഒരേറ്റുമുട്ടലില്‍ ഗോപി വെടിയേറ്റു മരിച്ചതായുള്ള വാര്‍ത്തയെത്തുന്നു.
മലയാളത്തിലെ നവതരംഗസിനിമകളില്‍ ആദ്യത്തേതെന്ന് വിശേഷിപ്പിക്കപ്പെടുന്നു.
സാങ്കേതികമായി രണ്ട് തവണ സിനിമ എഡിറ്റ് ചെയ്യപ്പെട്ടിട്ടുണ്ടെന്നാണ് ചരിത്രം. ചിത്രസംയോജകനായ കല്യാണസുന്ദരം വെട്ടിയുമൊട്ടിച്ചും തയ്യാറാക്കിക്കിയ പതിപ്പില്‍ പ്രേമത്തിന് കൂടുതല്‍ പ്രാധാന്യം വന്നിരിക്കുന്നു എന്ന പരാതിയുടെ അടിസ്ഥാനത്തില്‍ സംവിധായകന്‍ ബക്കര്‍ തന്നെ രണ്ടാമതൊരു തവണ എഡിറ്റ് ചെയ്യുകയുണ്ടായി. സിനിമയെ രാഷ്ട്രീയ പ്രാധാന്യമുള്ള ഒരു ചിത്രമാക്കി മാറ്റാന്‍ കൂടുതല്‍ സഹായിച്ചത് ആ ഇടപെടലാണ് . കര്‍ശനമായ മാധ്യമ വിലക്കിന്റെ കാലഘട്ടത്തില്‍ മൂന്നാമത്തെ എഡിറ്റിങ്ങ് നടക്കുന്നത് സെന്‍സര്‍ ബോര്‍ഡിന്റെ മേശപ്പുറത്താണ്, ഏകദേശം എണ്ണൂറ് അടിയോളം ഫിലിം മുറിച്ചു മാറ്റപ്പെട്ടത്രേ.
കബനിയുടെ ആദ്യ ഷെഡ്യൂൾ പൂർത്തിയാക്കിയശേഷം മദ്രാസ്സിൽ എഡിറ്റിങ് നടത്തിക്കൊണ്ടിരുന്ന സന്ദർഭത്തിൽ നിർമാമാതാവ് പവിത്രനെയും ബക്കറിനെയും അറസ്റ്റ് ചെയ്തു. മദ്രാസ്സിൽനിന്നും തിരിച്ചെത്തി കേരളത്തിൽ ചിത്രീകരണം തുടങ്ങിയ വേളയിൽ കോഴിക്കോട് വെച്ച് പവിത്രനെയും ബക്കറിനെയും വീണ്ടും പൊലീസ് അറസ്റ്റ് ചെയ്ത് കോഴിക്കോട് ലോക്കപ്പിൽ വെക്കുകയുണ്ടായി.
ഇതാ സിനിമയിലെ നല്ലൊരു വാചകം "മനുഷ്യർ പരസ്പരം സ്നേഹിക്കുകയും , ഓരോരുത്തരും അന്യന്റെ വാക്കുകൾ സംഗീതമെന്നോണം ആസ്വദിക്കുകയും ചെയുന്ന കാലം വരുമെന്ന് എനിക്ക് ഉറപ്പുണ്ട് ."
വയനാട്ടിൽ ഉണ്ടായിരുന്ന നക്സൽ പ്രവർത്തനങ്ങളിലേക്കു വെളിച്ചം വീശുന്ന ഒരു ചിത്രം.
2005-ൽ പഴയ കാല പൊലീസ് കോൺസ്റ്റബിൾ ആയിരുന്ന ആർ രാമചന്ദ്രൻ നായർ വെളിച്ചത്ത് കൊണ്ടുവന്ന 1970-ലെ നക്സൽ വർഗ്ഗീസ് കൊലക്കേസിനെ ആസ്പദമാക്കി നിർമ്മിച്ച ചിത്രം.
മുപ്പതു വർഷം മുൻപ് പൊലീസ് കോൺസ്റ്റബിൾ അയിരിക്കുമ്പോൾ താൻ ചെയ്ത, തന്നെ കൊണ്ട് ചെയ്യിപ്പിച്ച ഒരു കൊലപാതകം രവീന്ദ്രൻ പിള്ളയെ (ലാൽ) വേട്ടയാടുന്നു.
1970 -കളിൽ അന്നത്തെ നക്സൽ പ്രവർത്തനങ്ങളിൽ സജീവമായിരുന്ന ജോസെഫ് ( പൃഥ്വീരാജ്) എന്ന യുവാവ്. ഒറ്റുകാരുടെ ചതിയിൽ പെട്ട് പൊലീസ് പിടിയിലായ ജോസഫിനെ കൊല്ലാൻ ചെറുനെല്ലി പൊലീസ് സ്റ്റേഷൻ മേധാവി ഉത്തരവിടുന്നു. കാട്ടിലേക്കു കൊണ്ടുപോയ ജോസഫിനെ കൊല്ലാൻ രവീന്ദ്രൻ പിള്ളയെ ബലമായി നിയോഗിക്കുന്നു. തന്റെ മനസാക്ഷിക്കു വിരുദ്ധമായി പ്രവർത്തിച്ച രവീന്ദ്രൻ പിള്ളയെ ആ സംഭവം അലട്ടുന്നു. ഒരു മുഴുക്കുടിയനായി മാറിയ അദ്ദേഹത്തെ ഭാര്യയായ കാർത്ത്യായിനി ( രോഹിണി) സംശയത്തോടെ കാണുന്നു.
രവീന്ദ്രൻ പിള്ളയുടെ പഴയ കാമുകിയുമായുള്ള ബന്ധം പുനസ്ഥാപിച്ചു എന്നു കാർത്ത്യായിനി സംശയിക്കുന്നു. അവർ അദ്ദേഹത്തെ വിട്ടു പിരിയുന്നു.
മനസുഖം നഷ്ടപെട്ട രവീന്ദ്രൻ പിള്ള പുറം ലോകത്തോടു താൻ മുപ്പതു വർഷം മനസിലൊളിപ്പിച്ചു വച്ചിരുന്ന നിഗൂഢതകൾ മാധ്യമങ്ങൾ വഴി പുറത്തു കൊണ്ടുവരുന്നു.
അതിനെ തുടർന്നുണ്ടാകുന്ന സംഭവങ്ങളുമായി "തലപ്പാവു" നീങ്ങുന്നു.
