ലളിതസംഗീതം

പാതിരാമയക്കത്തിൽ പാട്ടൊന്നു കേട്ടേൻ
പല്ലവി പരിചിതമല്ലാ(2)
ഉണർന്നപ്പൊഴാ സാന്ദ്രഗാനം നിലച്ചു
ഉണർത്തിയ രാക്കുയിലെവിടെ എവിടെ.. (പാതിരാ..)

പഴയ പൊന്നോണത്തിൻ പൂവിളിയുയരുന്നു
പാതി തുറക്കുമെൻ സ്മൃതിയിൽ (2)
നാദങ്ങൾക്കിടയിൽ വേറിട്ടു നിൽക്കുമാ
നാദം ഇതു തന്നെയല്ലേ
കുയിലായ് മാറിയ കുവലയലോചനേ
ഉണർത്തുപാട്ടായെന്നോ വീണ്ടും നീ
ഉണർത്തുപാട്ടായെന്നോ  (പാതിരാ..)

എന്തും മറന്നേക്കാമെങ്കിലുമാരാത്രി
എന്നെന്നും ഓർമ്മിക്കും ഞാൻ
ജീവനെ പുൽകിയ മുഗ്ദ്ധവസന്തത്തെ
നോവാതെ നോവിച്ചു ഞാൻ (എന്തും....)

ഉത്രാടമായിരുന്നന്നു വീടാകെയും
പൊട്ടിച്ചിരിച്ചു നിന്നൂ
മുറ്റത്തും ആ നടുമുറ്റത്തുമമ്പിളി
പട്ടു വിരിച്ചിരുന്നൂ
നിരവദ്യയൗവനനിധിപോലെന്നോമന
നിലവറയ്ക്കുള്ളിൽ വന്നു
നിൻ കൈയ്യിൽ പൂ പോലെ നിന്ന പൊൻ കൈത്തിരി
എന്തിനായ് ഞാനണച്ചു (എന്തും...)

കൈവല്യരൂപനാം കാർമേഘവർണ്ണാ കണ്ണാ
ഞാനൊന്നു ചോദിച്ചോട്ടേ
കരുണ തൻ കടലായിരുന്നിട്ടും നീയെന്തേ
കാമിനി രാധയെ കൈവെടിഞ്ഞൂ (കൈവല്യ...)

ഉത്സവബലിദർശനം എങ്ങും
ഉത്സാഹ വസന്താരവം
തിമിലകളുണർന്നു പൂമലയുയർന്നൂ
ഭക്തി തൻ തിരകളിലമർന്നു ക്ഷേത്രം
ഭക്തി തൻ തിരകളിലമർന്നു (ഉത്സവ..)

മന്ത്രങ്ങളുരുവിടും തന്ത്രിയിൽ പോലും
സംഭ്രമമുളവാക്കി നിൻ മഞ്ജുരൂപം(2)
ദേവന്മാർക്കൊക്കെയും
വിരുന്നു നൽകുന്നൊരാ വേദിയിൽ
ദേവിയായ് നീ മിന്നി നിന്നു (2)          (ഉത്സവ...)

വിരുന്നിനു വിളിക്കും മിഴികളുമായ്
തിരക്കിലാ മലർമുഖം എന്നെയും തേടി(2)
ദേവനാക്കേണ്ട നീ
അസുരനാണിന്നു ഞാൻ
വിസ്മൃതി നമ്മുടെ വിജയമാണിപ്പോൾ(2)   (ഉത്സവ..)

കോളു നീങ്ങും വാനം
കോടി മാറും തീരം
ഭാരം താങ്ങിത്തളർന്നൊഴുകും
പഴയ കെട്ടുവള്ളം
ഓണമായ്...പൊന്നോണമായ്..
നീയറിഞ്ഞില്ലേ തോണിക്കാരാ തോണിക്കാരാ (കോളു നീങ്ങും..)

കരളിലും മുറ്റത്തും പൂവാരി നിരത്തി
കണ്ണിലെണ്ണയൊഴിച്ചവൾ കാത്തിരിപ്പില്ലേ
അകലേ..അകലേ...
അക്കരെയക്കരെ മാടത്തിന്നരികത്ത്
വഞ്ചിയടുക്കുന്ന നേരവും കാത്തവൾ
നെടുവീർപ്പിടുന്നില്ലേ
ഓണമായ്...പൊന്നോണമായ്..
ഓർമ്മയില്ലേ  തോണിക്കാരാ തോണിക്കാരാ (കോളു നീങ്ങും..)

ഉണ്ണിക്കരങ്ങളാൽ പൂക്കളം നെയ്യും നിൻ
ഉണ്ണിയെ ഞാനിന്നു കണ്ടൂ
കണ്ണെടുക്കാതെ ഞാൻ നോക്കി നിന്നു
മാഞ്ഞ വർണ്ണങ്ങൾ വീണ്ടും തെളിഞ്ഞു (ഉണ്ണി..)

പുതിയ പടിപ്പുര താണ്ടി ഞാൻ മുറ്റത്തൊ
രതിഥിയെപ്പോൽ വന്നു നിന്നു(2)
മണ്ണിൽ മനസ്സിലെയോർമ്മ പോൽ നിൻ പാദ
ഭംഗി കൊഴിഞ്ഞു കിടന്നു (ഉണ്ണി....)

തഴുകും തളിർതെന്നൽ നീ തേയ്ക്കുമെണ്ണ തൻ
നറുമണം പേറി നടന്നു(2)
വാതിലിൻ പിന്നിൽ നിൻ കണ്ണുകളാം ദുഃഖ
നാളങ്ങൾ മെല്ലെയുലഞ്ഞു (ഉണ്ണി..)

ചിങ്ങം പിറന്നല്ലോ
പൊന്നും വയൽക്കിളിയേ
എങ്ങുപോയ് എങ്ങുപോയ് നീ
എന്റെ പകൽക്കിളിയേ (ചിങ്ങം..)

സ്വർണ്ണക്കതിർമണത്തിൽ നിന്റെ
ചുണ്ടിൻ മണമില്ല
പൊങ്ങുന്ന പൂവിളിയിൽ നിന്റെ
കൊഞ്ചലറിഞ്ഞില്ല
എന്നെ മറന്നോ നീ
എന്റെ പാട്ടും മറന്നോ നീ
ഒന്നിച്ചു നാം കണ്ട സ്വപ്നം
എല്ലാം മറന്നോ നീ (ചിങ്ങം...)

മേടക്കുളിരകറ്റാൻ തന്ന
കീറക്കമ്പടത്തിൽ
നാളെത്ര പോയാലും
എന്റെ മാറിലെ ചൂടുറങ്ങും
പാതിയിടവത്തിൽ കാറ്റത്തു
പാതിയും ചത്തവളേ
പിന്നെ മിഥുനത്തിൽ എന്റെ
പ്രാണനും തിന്നവളേ (ചിങ്ങം..)

എൻ ഹൃദയപ്പൂത്താലം നിരയെ നിറയെ
മലർ വാരി നിറച്ചു
വരുമോ രാജാവേ
പൂക്കണി കാണാനെൻ മുന്നിൽ (എൻ ഹൃദയ...)

പൂക്കാലം പോയാലും താലം നിറയും
എൻ കണ്ണും നിറയും
പൂക്കണിയായെൻ ദുഃഖം നിന്നെത്തേടും
നീ എങ്ങായാലും (പൂക്കാലം ...)
മിഴികൾ പൂട്ടാതെ പനിമതിയും അറിയാതെ
കാതോർക്കും എൻ കുടിൽ നിൻ
കാലടിയൊച്ചക്കായ് (എൻ ഹൃദയ...)

നിൻ മുരളീരവമൊഴുകും സ്വരമാലിനിയിൽ
ആ കല്ലോലിനിയിൽ
എൻ നെടുവീർപ്പലിയുന്നു കാറ്റലയായി
അല തന്നുറവായി (നിൻ മുരളീ..)
യമുനാതീരത്തെ ദ്വാരക നീ മറന്നാലും
രാധയ്ക്കാ വനമാലി എന്നും ദൈവം താൻ (എൻ ഹൃദയ..)

ഒരു കൊച്ചു ചുംബനത്തിൻ മണിപുഷ്പപേടകത്തിൽ
ഒരു പ്രേമവസന്തം നീയൊതുക്കിയല്ലോ
അതിനുള്ളിൽ തുളുമ്പിയ  മകരന്ദകണങ്ങളിൽ
അഭിലാഷസാഗരങ്ങൾ തുളുമ്പിയല്ലോ (ഒരു കൊച്ചു..)

ഒരു വിരൽത്തുമ്പു കൊണ്ടെൻ  സിരകളിലനുഭൂതി
ത്തിരമാലയൊഴുക്കുവാൻ കഴിയുവോളേ(2)
ഒരു കളിവാക്കു കൊണെന്നനുരാഗ ചിന്തകളിൽ(2)
സ്വരരാഗഗംഗയായി പൊഴിയുവോളെ (ഒരു കൊച്ചു...)

തരളമാം നിൻ മിഴി തൻ മൃദുലമാം മർദ്ദനത്തിൽ
തകരുന്നു ഞാൻ പഠിച്ച തത്ത്വചിന്തകൾ (2)
പുനർജ്ജന്മമെന്ന സത്യമുണർത്തിയ ചിന്തകന്റെ(2)
പുണ്യപാദപുഷ്പങ്ങളെ വണങ്ങുന്നു ഞാൻ (ഒരു കൊച്ചു...)

ഓണം പൊന്നോണം പൂമല
പൊങ്ങും പുഴയോരം പൈങ്കിളി
പാടുന്നു ഉണരുണരൂ
ഉള്ളിൽ ഞാൻ കെട്ടിയ പഴയൊരു
വില്ലിന്റെയപശ്രുതിയോടീ
പാണൻ കോർത്തിടുന്നു
പഴയ ശീലിൻ ഇഴകൾ (ഓണം...)

നിൻ താളം താലോലിച്ച പൂഞ്ചോലകൾ
നിൻ കുളിരേ പൂവായ് ചൂടിയ പൂങ്കാവുകൾ
തിരയുകയായ് നിന്നെ കരയുകയാണല്ലോ ഞാൻ
കരിയുകയാണെന്നിൽ നീ നട്ട
പൂത്തുമ്പക്കണ്ടങ്ങൾ വീണ്ടും (ഓണം..)

നിൻ കണ്ണിൽ ദീപം തേടിയ പൊന്നമ്പലം
ഒളി കാണാതിരുളിൽ കേഴും നിന്നമ്പലം
തിരയുകയായീ നിന്നെ ഇരുളല മൂടിയെന്നെ
കൊഴിയുകയാണെന്നിൽ നാമ്പിട്ട
മലർദീപമുകുളങ്ങൾ വീണ്ടും (ഓണം..)