കമ്മട്ടിപ്പാടം

മുംബൈയിൽ സെക്യൂരിറ്റി ഓഫീസറായി ജോലി നോക്കുന്ന കൃഷ്ണന് തന്റെ ബാല്യകാലസുഹൃത്തായ ഗംഗയുടെ ഫോൺ കോൾ ലഭിക്കുന്നു. ഗംഗക്ക് എന്തോ സഹായം ആവശ്യമുണ്ടെന്നും അവനെന്തോ അപകടം പറ്റിയിട്ടുമുണ്ട് എന്ന് മനസിലാക്കുന്ന കൃഷ്ണൻ കൊച്ചിയിലേക്ക് തിരിക്കുന്നു. എഴുപതുകളിൽ ഗംഗയും സഹോദരൻ ബാലനും കൃഷ്ണനും മറ്റ് കൂട്ടുകാരുമൊക്കെ ഒത്ത് ചേർന്ന് നടത്തിയ കള്ളവാറ്റ് കടത്തും മറ്റ് ഗുണ്ടാജീവിതവുമൊക്കെ ഫ്ലാഷ്ബാക്കിലൂടെ മിന്നിമറയുന്നു. 

വളരെ കുട്ടിക്കാലത്തേ കമ്മട്ടിപ്പാടത്തേക്ക് കുടുംബത്തോടൊപ്പം എത്തിച്ചേർന്ന കൃഷ്ണൻ അയൽവാസികളും കളിക്കൂട്ടുകാരനുമായ ഗംഗയുടെയും അനിതയുടേയും കുടുംബത്തോടൊപ്പം വളരുന്നു. തീരെച്ചെറുപ്പത്തിലേ വയലൻസിലേക്കും ക്രൈമിലേക്കും എടുത്തെറിയപ്പെടുന്ന ബാല്യമാണ് ഗംഗയുടേതും കൃഷ്ണന്റേതും. ഗംഗക്ക് അനിഷ്ടമുണ്ടെങ്കിലും ഗംഗയുടെ മുറപ്പെണ്ണായ അനിതയുമായി കൃഷ്ണൻ ഇഷ്ടത്തിലാണ്. 80പതുകളിലേക്ക് വികസിക്കുന്ന കഥയിൽ കുട്ടികളുടെയും യുവാക്കളുടേയും ഗുണ്ടാസംഘമായി വളർച്ച പ്രാപിക്കുന്ന കമ്മട്ടിപ്പാടത്തെ പിള്ളേർക്ക് സ്ഥലത്തെ പ്രധാനിയായി പയ്യെ വളരുന്ന സുരേന്ദ്രൻ ആശാനാണ് തുണ. ഗംഗയുടെ ചേട്ടൻ ബാലൻ തന്റേടിയും സംഘത്തിന്റെ നേതാവുമാണ്. പോലീസുമായുള്ള ഒരേറ്റുമുട്ടലിനിടെ ഗംഗയെ രക്ഷിക്കാൻ കൃഷ്ണൻ ഒരു പോലീസ് ഓഫീസറിനെ വെട്ടിക്കൊല്ലുന്നു, തുടർന്ന് ജയിലിലാവുന്നു. ജയിലിൽ നിന്ന് കുറച്ച് വർഷങ്ങൾക്ക് ശേഷം പുറത്തിറങ്ങുന്ന കൃഷ്ണന് പുതിയ കച്ചവടമേഖലകളിലേക്ക് വികസിച്ച കമ്മട്ടിപ്പാടം സംഘം നല്ല വരവേല്പാണ് കൊടുക്കുന്നത്. 

ഒരു ദിവസം ബാലേട്ടൻ കാറപകടത്തിൽ കൊല്ലപ്പെടുന്നു. കൂടെ സഞ്ചരിച്ചിരുന്ന കൃഷ്ണനും ബാലന്റെ ഭാര്യ റോസമ്മയും തലനാരിഴക്ക് രക്ഷപെടുന്നു. ബാലന്റെ മരണത്തിൽ ഗംഗ കൃഷ്ണനെ കുറ്റപ്പെടുത്തുന്നതോടൊപ്പം അവരുടെ സൗഹൃദത്തിൽ വിള്ളൽ വീഴുന്നു. കൃഷ്ണൻ ഒരു ട്രാവൽ ഏജൻസി നടത്തി രക്ഷപെടാൻ ശ്രമിക്കുന്നുവെങ്കിലും ഗംഗയും കൂട്ടരും ഒത്ത് ചേർന്ന് നടത്തുന്ന ഒരു കുറ്റകൃത്യത്തിൽ കൃഷ്ണനും പങ്കാളിയാവുന്നു.സുഹൃദ് ബന്ധം വീണ്ടെടുക്കുന്ന കൃഷ്ണനും ഗംഗയും ബാലന്റെ മരണത്തിനു പിന്നിൽ അബ്കാരി ജോണിയാണ് എന്ന് മനസിലാക്കി ജോണിയെ കുത്തിവീഴ്ത്തുന്നു, തുടർന്ന് ഗംഗയും കൃഷ്ണനും ഒളിവിൽ താമസിക്കുന്നു.അനിതയെ മറക്കാൻ ഗംഗ കൃഷ്ണനോട് ആവശ്യപ്പെടുന്നു. ഒളിവിൽ നിന്ന് പുറത്തിറങ്ങി കാമുകിയായ അനിതയുമൊത്ത് നാടുവിടാൻ ശ്രമിക്കുന്ന കൃഷ്ണനെ പോലീസ് അറസ്റ്റ് ചെയ്യുന്നു.  പോലീസിന്റെ അറസ്റ്റിലായ കൃഷ്ണൻ ഗംഗയെ ഒറ്റു കൊടുക്കുന്നില്ല. ഗംഗ അനിതയെ വിവാഹം കഴിക്കുകയും ജയിലിൽ നിന്ന് പുറത്തിറങ്ങുന്ന കൃഷ്ണൻ മുംബൈയിലെത്തിച്ചേരുകയും ചെയ്യുന്നു.

നിലവിലെ കാലഘട്ടത്തിലെക്ക് എത്തിച്ചേരുന്ന കഥയിൽ മൂംബൈയിൽ നിന്ന് നാട്ടിലെത്തുന്ന കൃഷ്ണൻ പഴയ സുഹൃത്തുക്കളുടെ അടുത്തും ഗംഗയുടെ വീട്ടിലും ഗംഗയുടെ വിവരങ്ങൾ തിരഞ്ഞിറങ്ങുന്നു. ജോണിയാണ് ഗംഗയുടെ തിരോധാനത്തിന്റെ പിന്നിലെന്ന് സംശയിക്കുന്ന കൃഷ്ണൻ ജോണിയുടെ ഗാംഗിനോട് ഏറ്റുമുട്ടുകയും കുത്തേൽക്കുകയും ചെയ്യുന്നു. ഗംഗയുടെ മൃതദേഹം കത്തിക്കരിഞ്ഞ നിലയിൽ കിട്ടി എന്ന് പോലീസോഫീസർ മാർട്ടിനിൽ നിന്ന് അറിയുന്ന കൃഷ്ണൻ അതീവ ദു:ഖിതനായി മാറുന്നു. ശേഷമുള്ള കഥ spoiler സെക്ഷനിൽ കാണാം.