ഐസക് ന്യൂട്ടൻ s/o ഫിലിപ്പോസ്

കോട്ടൂർ ഗ്രാമത്തിലെ മാലാഖ ലൈറ്റ്സ് & സൌണ്ട്സ്-നു ഉടമകളാണ് ഫിലിപ്പോസും (നെടുമുടി വേണു) മകൻ ഐസക് ന്യൂട്ടണും(ലാൽ) മുപ്പതു വയസ്സു കഴിഞ്ഞ മകൻ ഐസക് ന്യൂട്ടൺ ഇതുവരെ വിവാഹം കഴിച്ചിട്ടില്ല. അതിനു കാരണവുമുണ്ട്. ഐസക് ന്യൂട്ടൺ ഇതുവരെ എസ് എസ് എൽ സി പാസ്സായിട്ടില്ല. മകൻ പത്താംക്ലാസ്സ് പാസ്സായിട്ടേ അവന്റെ വിവാഹം നടത്തൂ എന്ന് ഫിലിപ്പോസിനു നിർബന്ധമുണ്ട്. അതിനു ഫിലിപ്പോസിന്റെ ജീവിതം തന്നെയാണ് കാരണം. 32 വർഷങ്ങൾക്ക് മുൻപ്  ഒട്ടും വിദ്യാഭ്യാസമില്ലാത്ത ഫിലിപ്പോസിനെ നാട്ടിലെ പ്രമാണിയുടെ (ശ്രീരാമൻ) മകളു നല്ല വിദ്യാഭ്യാസമുള്ള സാറ (നിമിഷ) സ്നേഹിച്ച് വിവാഹം കഴിച്ചതാണ്. മറ്റൊരാളുമായുള്ള വിവാഹം നടത്താൻ സാറയുടെ അപ്പൻ നിശ്ചയിച്ചിരുന്നു. വിവാഹത്തിന്റെ തലേദിവസം സാറ ഫിലിപ്പോസുമായി ഒളിച്ചോടി രജിസ്റ്റർ വിവാഹം കഴിച്ചു. സാറയുടേ അപ്പനും ഇളയപ്പന്മാരും അതിനെ എതിർത്തെങ്കിലും ഫിലിപ്പോസിനെ തല്ലിച്ചതച്ചെങ്കിലും സാറ ഗർഭിണിയാണെന്നറിഞ്ഞപ്പോൾ അവർ സാറയെ ഉപേക്ഷിച്ചു. സാറ തന്റെ പ്രസവത്തോടെ മരിക്കുന്നു. മരിക്കുന്നതിനു മുൻപ് ഫിലിപ്പോസിനോട് പറഞ്ഞതാണ് മകനെ നല്ല നിലയിൽ പഠിപ്പിക്കണമെന്ന്. ആ വാക്കു പാലിക്കാൻ ഫിലിപ്പോസ് മകനെ എസ് എസ് എൽ സി എഴുതിക്കുന്നു. മുൻപ് പതിനേഴു പ്രാവശ്യം എഴുതിയിട്ടൂം ഐസക് ന്യൂട്ടൺ പരാജയപ്പെട്ടു. പതിനെട്ടാം തവണ പരീക്ഷ എഴുതാൻ തയ്യാറെടുത്തിരിക്കുകയാണ്. ഐസക് ന്യൂട്ടൺ. കൂടെ എന്തിനും തയ്യാറായി ന്യൂട്ടന്റെ സന്തത സഹചാരികളായ ജോമോനും (ധർമ്മജൻ ബോൾഗാട്ടി) ജോസുട്ടനുമുണ്ട് (റ്റിനി ടോം)

ഫിലിപ്പോസിന്റെ സുഹൃത്തായ ഔസേപ്പച്ചന്റെ (റ്റി ജി രവി) മകൾ ആനി(അഭിനയ)യുമായി ഐസക് ന്യൂട്ടൺ പ്രണയത്തിലുമാണ്. ഇരുവരുടേയും പ്രണയം വീട്ടുകാർക്ക് ഇഷ്ടവും വിവാഹം ഉറപ്പിച്ചതുമാണ്. എന്നാൽ ന്യൂട്ടൺ പത്താം ക്ലാസ്സ് പാസ്സായിട്ടേ വിവാഹം നടത്തൂ എന്ന വാശിയിലാണ് ഫിലിപ്പോസ്. ഗ്രാമത്തിലെ എല്ലാവർക്കും ഇരുവരുടേയും പ്രണയം അറിയാം. ഇതിനിടയിൽ ഇടവകയിലെ പള്ളിപ്പെരുന്നാൾ എത്തി. ആ വർഷം പെരുന്നാളിനു പണം മുടക്കുന്നതും നടത്തുന്നതും വിദേശത്തു നിന്നു നാട്ടിൽ എത്തിയ ജോർജ്ജ് ആയിരുന്നു. നാട്ടിൽ വലിയ ബിസിനസ്സും മറ്റുമുള്ള ജോർജ്ജിനു മറ്റെന്തെക്കൊയോ ഉദ്ദേശ്യങ്ങൾ ഉണ്ടായിരുന്നു. ഇടവകയിലെ പെരുന്നാളിനു ജോർജ്ജ് ആനിയെ കാണുന്നു. ആനിയെ സ്വന്തമാക്കണമെന്ന് ജോർജ്ജ് ആഗ്രഹിച്ചു.

കുറച്ചു ദിവസങ്ങൾക്കകം എസ് എസ് എൽ സി റിസൾട്ട് വരുന്നു. പ്രതീക്ഷിച്ചതിനു വിപരീതമായി ന്യൂട്ടൺ പരാജയപ്പെടുന്നു. ഇത് ഫിലിപ്പോസിനെ വിഷമിപ്പിക്കുന്നു. ആ കാരണത്താൽ അപ്പനും മകനും വഴക്കുണ്ടാകുകയും പിണക്കത്തിലാകുകയും ചെയ്യുന്നു. ഇരുവരുടേയും പിണക്കം തീർക്കാൻ ജോസുട്ടനും ജോമോനും ആനിയും ശ്രമിച്ചെങ്കിലും നടന്നില്ല. ഇതിനിടയിൽ ജോർജ്ജ് ആനിയെ സ്വന്തമാക്കാൻ ചില കരുക്കൾ നീക്കിത്തുടങ്ങി. അതിൽ ആനിയുടെ വീട്ടുകാരും പ്രലോഭിതരായി.