മാമാങ്കം പലകുറി -സുരേഷ്

മാമാങ്കം പലകുറി കൊണ്ടാടി

നിളയുടെ തീരങ്ങൾ നാവായിൽ

കേരളപ്പഴമ ചരിതമെഴുതിയൊരു

ഭാരതപ്പുഴതന്നരിയ മണൽത്തരികളേ

പറയുക പറയുക നിണമൊഴുകിയ കഥ

അമ്പേന്തി വില്ലേന്തി വാളേന്തിയും

തമ്പേറിൻ താളത്തിൽ പോരാടിയും

നിലപാടുനിന്ന തിരുമേനിമാര്‍

തല കൊയ്തെറിഞ്ഞു പടകൾ നയിച്ച കഥ

ഇന്നെന്റെ ചിന്തയ്ക്കു ചിന്തേരിടാൻ

അരിയ കണ്ണാടിച്ചില്ലൊത്ത തീരങ്ങളേ പറയു

സാമൂരിക്കോലോത്തെ മേൽക്കോയ്മയും

മങ്ങാത്ത മായാത്ത മലയാണ്മയും

നിണനീരിലന്നു മണലാഴിയിൽ

എഴുതാൻ തുനിഞ്ഞ പടനായകന്റെ കഥ

ഇന്നെന്റെ ഉണ്ണിയ്ക്കരങ്ങേറുവാൻ

ഇനിയാ മണ്ണിന്റെ മാറത്തെഴുന്നള്ളുമോ പറയു