പൊറിഞ്ചു മറിയം ജോസ്

1985ലെ തൃശൂർ പട്ടണമാണ് കഥാപശ്ചാത്തലം. സ്കൂൾ കാലഘട്ടം മുതൽ, ഉറ്റ ചങ്ങാതിമാരായ കാട്ടാളൻ പൊറിഞ്ചു, ആലപ്പാട്ട് മറിയം, പുത്തൻ പള്ളി ജോസെന്നിവരാണ് കേന്ദ്ര കഥാപാത്രങ്ങൾ. പണക്കാരനും പലിശക്കാരനുമായ ആലപ്പാട്ട്  വർഗ്ഗീസിന്റെ മകളായ മറിയവും പണക്കാരനല്ലാത്ത പൊറിഞ്ചുവും തമ്മിൽ സ്കൂൾ കാലഘട്ടം മുതലുള്ള പ്രണയം സിനിമയിലുടനീളം നിർണായകമാണ്. അപ്പന്റെ മരണശേഷം ചട്ടയും മുണ്ടും ധരിച്ച് തന്റേടിയായും പലിശക്കാരിയുമായി രംഗത്തിറങ്ങുന്ന സുന്ദരിയായ മറിയവും പ്രത്യേകിച്ച് പണിയൊന്നുമില്ലെങ്കിലും ജീവിതം ആഘോഷമാക്കി നടക്കുന്ന നിഷ്ക്കളങ്ക ഹൃദയമുള്ള പുത്തൻ പള്ളി ജോസും,  സ്ഥലത്തെ പ്രധാന റൗഡിയും ഇറച്ചിവെട്ട് തൊഴിലാക്കിയ, കാരിരുമ്പിന്റെ കരുത്തുള്ള പൊറിഞ്ചുവിന്റേയും ജീവിതമാണ് സിനിമയുടെ ഇതിവൃത്തം. പള്ളിപ്പെരുന്നാളും ബാന്റ്മേളവും അടിപിടിയുമൊക്കെയായി പിന്നിടുന്ന കഥയിൽ സംഘർഷഭരിതമായ രംഗങ്ങൾ കൂടിയെത്തുന്നതോടെ കഥ കൂടുതൽ വികാസം പ്രാപിക്കുന്നു.