കാക്കോത്തിക്കാവിലെ അപ്പൂപ്പൻ താടികൾ

മുറ്റത്ത് നിന്ന് കളിച്ചു കൊണ്ട് നിന്ന കൊച്ച് കുട്ടികളായ സഹോദരിമാരിൽ ഒരാളെ (റാസി) ഒരു ഭിക്ഷക്കാരൻ ഉവ്വാച്ചു (വി കെ ശ്രീരാമൻ) തട്ടിക്കൊണ്ട് പോകുന്നു. വെള്ളം ചോദിച്ച് വന്ന ഭിക്ഷക്കാരണ് ചേച്ചി (കാവേരി) വെള്ളമെടുക്കാൻ പോയ സന്ദർഭത്തിലാണ് ഇത് സംഭവിക്കുന്നത്. സിനിമയുടെ തുടക്കം ഇപ്രകാരമാണെങ്കിലും പിന്നീട് പ്രേക്ഷകർക്ക് മുന്നിലേക്ക് മുരളി എന്ന കുട്ടിയും അവന്റെ കഷ്ടപ്പാടുകളുമാണ് എത്തുന്നത്. കാളവണ്ടിക്കാരനും ഭാര്യയും എടുത്ത് വളർത്തുന്ന അനാഥനായ മുരളിക്ക് സ്കൂളിൽ നിന്നും ദുരനുഭവങ്ങളാണുണ്ടാവുന്നത്. വീട്ടിലെ പീഡകൾ സഹിക്കുന്നതവസാനിപ്പിച്ച് അവൻ കാക്കോത്തിയമ്മയുടെ കാവിലെ ഭിക്ഷക്കാരുടെ സംഘത്തോടൊപ്പം ചേരുന്നു. മുരളിക്ക് പാട്ടുകൾ പാടാൻ കഴിവുണ്ട് എന്ന് തിരിച്ചറിയുന്നതോടെ ഭിക്ഷാസംഘത്തിലെ മിടുക്കിയായ കാക്കോത്തി (രേവതി) അവനെ തന്റെ കൂട്ടാളിയായി മാറ്റുന്നു. പഠിക്കാൻ നിർവ്വാഹമില്ലാതെ സ്കൂളിൽ നിന്ന് പുറത്ത് പോയ മുരളിയെ ക്ലാസ് ടീച്ചർ വൽസലക്ക് (അംബിക) അവന്റെ കഷ്ടതകളറിഞ്ഞപ്പോൾ അവനെ എങ്ങനെയെങ്കിലും സ്കൂളിലേക്ക് തിരികെ കൊണ്ടു വരണമെന്നുണ്ട്.ഒരു ദിവസം അവർ മുരളിയെ തന്റെ വീട്ടിലേക്ക് കൂട്ടിക്കൊണ്ട് വരുന്നു. മുരളി തന്റെ ടീച്ചറിന്റെ സ്നേഹത്തോടെയുള്ള പെരുമാറ്റവും മറ്റും കാക്കോത്തിയെ അറിയിക്കുന്നു. ഒരു ദിവസം മുരളിയെ തിരക്കി വൽസല ടീച്ചറിന്റെ വീട്ടിലെത്തുന്ന കാക്കോത്തി തന്റെ വീടും കുട്ടിക്കാലത്തെ ഫോട്ടോയും ഒക്കെ തിരിച്ചറിയുന്നു. പഴയ സംഭവങ്ങൾ ഒന്നൊന്നായി കാക്കോത്തി ഓർത്തെടുക്കുന്നുവെങ്കിലും സങ്കടത്തോടെയവൾ കാക്കോത്തിക്കാവിലേക്ക് ഓടിയകലുന്നു. സർക്കസിനും മറ്റും ഉപയോഗിച്ച് പീഡിപ്പിച്ചിരുന്ന ഉവ്വാച്ചുവിന്റെ കയ്യിൽ നിന്ന് കാക്കോത്തിയെ കുട്ടിക്കാലത്ത് രക്ഷപെടുത്തിയത് അവൾ അച്ഛൻ എന്ന് വിളിക്കുന്ന വൃദ്ധൻ (സുരാസു) ആണ്.