ആദാമിന്റെ മകൻ അബു

മലബാറിലെ ഒരു ഗ്രാമത്തില്‍ അത്തറും ധന്വന്തരം ഗുളികളുമൊക്കെ വിറ്റു നടക്കുന്ന ദരിദ്രനായ വൃദ്ധന്‍ അബുവും(സലീം കുമാര്‍) ഭാര്യ ഐഷുമ്മ(സറീനാ വഹാബ്)യും. രണ്ടു പേരുടേയും ജീവിതാഭിലാഷമാണ് ഒരിക്കലെങ്കിലും ഹജ്ജിനു പോകണമെന്നത്. ജീവിതം കഷ്ടതകളും പ്രാരാബ്ദവും നിറഞ്ഞതെങ്കിലും ആഗ്രഹം പൂര്‍ത്തിയാക്കാന്‍ ഓരോ നാണയത്തുട്ടൂം നിധിപോലെ കാത്തു സൂക്ഷിക്കുന്ന അബുവിനും ഐഷുമ്മക്കും ഹജ്ജിനു പോകാനുള്ള അവസരം വന്നെത്തുന്നു. മഹല്ലിലെ ഹാജ്യാരുടെ ശുപാര്‍ശയില്‍ പട്ടണത്തിലെ ട്രാവല്‍ ഏജന്‍സിയിലെത്തുന്ന അബുവിനു ട്രാവല്‍ മാനേജര്‍ അഷ്റഫ് (മുകേഷ്) എല്ലാ സഹായങ്ങളും വാഗ്ദാനം ചെയ്യുന്നു. അതു പ്രകാരം ഇരുവരും പാസ്പോര്‍ട്ടിനു അപേക്ഷിക്കുകയും ഹജ്ജിനു പോകാനുള്ള പണം സ്വരൂപിക്കാനുള്ള ശ്രമം തുടരുകയും ചെയ്യുന്നു. അബുവിന്റെ എല്ലാ നന്മകള്‍ക്കും സഹായമായി അയൽവാസിയും സുഹൃത്തുമായ സ്ക്കുള്‍ അധ്യാപകനും (നെടുമുടി വേണു) ഭാര്യയും (അംബികാ മോഹന്‍) കുടുംബവുമുണ്ട്. നാട്ടിലെ ചായക്കടക്കാരന്‍  ഹൈദരും (സുരാജ് വെഞ്ഞാറന്മൂട്) അബുവിനോട് സ്നേഹവും കരുണയും ഉള്ള സുഹൃത്താണ്. 

ഹജ്ജ് യാത്രക്കുള്ള പണം ഉണ്ടാക്കുന്നതിനു വേണ്ടി തങ്ങളെ പോറ്റാന്‍ തയ്യാറാവാത്ത ഏക മകന്‍ സത്താറിനെ ആശ്രയിച്ചാലോ എന്ന ഐഷുമ്മയുടെ നിര്‍ദ്ദേശം അബു തള്ളിക്കളയുന്നു. ഉറുമ്പ് ധാന്യമണികള്‍ ശേഖരിച്ച് വെക്കുന്ന പോലെ, ഒരായുസ്സുകൊണ്ട് സമ്പാദിച്ച് കൂട്ടിയ പണവും യാത്രക്ക് തികയുന്നില്ലെന്ന് കണ്ട് ഇക്കാലമത്രയും  തങ്ങളുടെ  വീടിനും (വാര്‍ദ്ധക്യത്തിനും) മീതെ പച്ചക്കുടനിര്‍വര്‍ത്തി തണല്‍ വിരിച്ചു നിന്ന പ്ലാവ് (പിലാവ്) മറ്റൊരു സുഹൃത്തായ തടിക്കച്ചവടക്കാരന്‍ ജോണ്‍സനു (കലാഭവന്‍ മണി) വില്‍ക്കാന്‍ തീരുമാനിക്കുന്നു. അതു പോലെ അവർ മക്കളെ പോലെ വളർത്തിയ പശുവിനേയും കിടാവിനേയും വിൽക്കുന്നു. ഹജ്ജിനു പോകാനുള്ള പണം തയ്യാറായതോടെ അബുവും ഐഷുമ്മയും സുഹൃത്തുക്കളോടും യാത്ര ചോദിക്കാൻ ആരംഭിക്കുന്നു. മുമ്പൊരിക്കൽ അബുവുമായി വഴക്കുണ്ടായ സുലൈമാനോടു (ഗോപകുമാർ) പോലും അബു പോയി യാത്ര ചോദിക്കുന്നു.
അബുവിന്റേയും ഐഷുമ്മയുടെയും പരിശുദ്ധ ഹജ്ജ് യാത്ര സഫലമാകുമോ എന്നുള്ളതാണ് പിന്നീട്.....