തിരുവനന്തപുരം ജില്ലയിൽ കടയ്ക്കാവൂരിൽ 1950 ഇൽ ശ്രീകാന്ത് എന്ന എൻ. ശശിധരൻ ജനിച്ചു. അച്ഛൻ നടരാജഭാഗവതർ, അമ്മ പൊന്നമ്മ. ഒൻപതുമക്കളിൽ രണ്ടാമത്തെ മകനാണ്. ഹൈസ്കൂൾ വിദ്യാഭ്യാസം നേടിയിട്ടുണ്ട്. പത്താം ക്ലാസിൽ പഠിയ്ക്കുമ്പോൾ ആകാശവാണി യുടെ അഖിലേന്ത്യാ ലളിതഗാനമത്സരത്തിൽ ഒന്നാം സ്ഥാനം കരസ്ഥമാക്കി. പിന്നീട് ആകാശവാണിയിൽ പലതവണ പാടാൻ അവസരം ലഭിച്ചു. പ്രത്യേകിച്ചും എം. ജി. രാധാകൃഷ്ണൻ സംഗീതം നൽകിയ ഗാനങ്ങൾ.1973ൽ ദേവരാജനെ കാണുകയും അദ്ദേഹത്തിന്റെ ഉപദേശപ്രകാരം ബാലമുരളീകൃഷ്ണയുടെ കീഴിലും സോമശേഖരബാബുവിന്റെ കീഴിലും ശാസ്ത്രീയ സംഗീതം അഭ്യസിച്ചു. 1974ൽ റിലീസായ ‘ഭാര്യയില്ലാത്ത രാത്രി’ യിൽ ശ്രീകുമാരൻ തമ്പി എഴുതി ദേവരാജൻ സംഗീതമിട്ട “അഭിലാഷമോഹിനീ….’ എന്ന ഗാനം ആലപിച്ചുകൊണ്ട് സിനിമയിൽ തുടക്കമിട്ടു. അക്കൊല്ലം തന്നെ ഇറങ്ങിയ ‘ചുവന്ന സന്ധ്യകൾ‘ ഇലെ “ഇതിഹാസങ്ങൾ ജനിയ്ക്കും മുൻപേ” ഹിറ്റ് പാട്ടായി മാറി.

ആ സമയത്ത് ശശിധരൻ എന്ന പേരിൽ മറ്റൊരു ഗായകൻ ഉണ്ടായിരുന്നതിനാൽ വയലാർ രാമവർമ്മയുടെ നിർദ്ദേശപ്രകാരം പേർ ശ്രീകാന്ത് എന്ന് ആക്കുകയായിരുന്നു. ‘കൊട്ടാരം വിൽക്കാനുണ്ട്’ എന്ന ചിത്രത്തിലെ “ചന്ദ്രകളഭം ചാർത്തിയുറങ്ങും തീരം” പാടിപ്പഠിച്ച് റിഹേഴ്സലും കഴിഞ്ഞിരിക്കുമ്പോൾ നിർമ്മാതാവും സംഗീതസംവിധായകനും തമ്മിലുള്ള അഭിപ്രായവ്യ്ത്യാസത്താൽ കൈവിട്ടു പോയതാണെന്ന് ശ്രീകാന്ത് പറഞ്ഞിട്ടുണ്ട്. പി. ലീല, എസ്. ജാനകി, വാണി ജയറാം, മാധുരി, ജയച്ചന്ദ്രൻ എന്നിവരോടൊപ്പം ശ്രീകാന്ത് പാടിയിട്ടുണ്ട്. ഇപ്പോൾ നിരവധി റ്റി വി ചാനലുകൾക്ക് വേണ്ടി ശ്രീകാന്ത് പാടിക്കൊണ്ടിരിക്കുന്നു.

പ്രശസ്ത ഗായകന്‍ ശ്രീ എസ്‌ പി ബാലസുബ്രമണ്യത്തിന്‍റെ ഇളയ സഹോദരിയായ ശ്രീമതി എസ്‌ പി ശൈലജയുടെ ജന്മദേശം ആന്ധ്രാ പ്രദേശിലെ നെല്ലൂര്‍ ആണ്‌. 1978 ല്‍ "ശിവരഞ്ജിനി" എന്ന തെലുങ്ക്‌ ചിത്രത്തില്‍ പാടി പിന്നണി ഗാന ജീവിതം ആരംഭിച്ച ശ്രീമതി ശൈലജ കന്നഡ, തമിഴ്, ഹിന്ദി,മലയാളം തുടങ്ങി അനേകം ഭാഷകളിലായി അയ്യായിരത്തില്‍ അധികം ഗാനങ്ങള്‍ ആലപിച്ചു കഴിഞ്ഞിരിക്കുന്നു. ചലച്ചിത്ര ഗാന രംഗത്ത് മാത്രമല്ല,ഡബ്ബിംഗ്  ആര്‍ട്ടിസ്റ്റ്, നടി, നര്‍ത്തകി എന്നീ നിലകളിലും അവര്‍ തന്‍റെ കഴിവ്  തെളിയിച്ചിട്ടുണ്ട്. കമല്‍ ഹാസനോടൊപ്പം അഭിനയിച്ച "സാഗര സംഗമം" എക്കാലത്തെയും ഹിറ്റുകളില്‍ ഒന്നാണ്.

ആന്ധ്രായിലെ നെല്ലൂരിനടുത്തുള്ള കൊനോട്ടം പേട്ടയെന്ന ഗ്രാമത്തിലെ ഒരു ബ്രാഹ്മണ കുടുംബത്തില്‍ 1949 ജൂലൈ നാലിനാണ് എസ് പി ബി എന്ന എസ് പി ബാലസുബ്രഹ്മണ്യം ജനിച്ചത്. പ്രമുഖ ഹരികഥാ കലാകാരനായിരുന്ന പിതാവ് എസ് പി  സമ്പാമൂര്‍ത്തിയായിരുന്നു ബാലുവിന്റെ ആദ്യഗുരു. ഹാര്‍മോണിയവും ഓടക്കുഴലും വായിക്കാന്‍ പഠിപ്പിച്ചതും പിതാവ് തന്നെ.

 മദ്രാസ് കേന്ദ്രമാക്കി ഒരു തെലുങ്ക് സാംസ്കാരിക സംഘടന നടത്തിയ സംഗീത മത്സരത്തിലെ മികച്ച ഗായകനായി എസ് പി ബി തിരഞ്ഞെടുക്കപ്പെട്ടതോടെ ചലച്ചിത്രരംഗത്ത് അവസരങ്ങള്‍ തേടിയെത്തി.

1966 ല്‍ റിലീസ് ചെയ്ത ശ്രീശ്രീശ്രീ മര്യാദരാമണ്ണയാണ് എസ് പി ബി പാടിയ ആദ്യ ചിത്രം. പിന്നീട് ഇതുവരെയുള്ള സംഗീത ജീവിതത്തില്‍ 40000 നടുത്ത് ഗാനങ്ങള്‍ ആലപിച്ചു. തമിഴ്, തെലുങ്ക്, കന്നട, ഹിന്ദി, മലയാളം തുടങ്ങി ഇന്ത്യയിലെ അഞ്ച് പ്രമുഖ ഭാഷകളിലും പാടി. ഏറ്റവും കൂടുതല്‍ പാട്ടുകള്‍ പാടിയ പിന്നണി ഗായകനെന്ന നിലയില്‍ ഗിന്നസ് ബുക്ക് ഓഫ് വേള്‍ഡ് റെക്കോഡിലും അദ്ദേഹത്തിന്റെ പേരെത്തി.

കുടുംബം : ഭാര്യ സാവിത്രി  മക്കള്‍: പല്ലവി, ചരണ്‍.

മലപുറത്തുനിന്നുള്ള മലയാളത്തിന്റെ സ്വന്തം ഗസൽ ഗായകനാൺ റഫീക്കെന്ന ഷഹ്ബാസ് അമൻ . വ്യക്തിത്വത്തിലുള്ള നന്മകളും സുന്ദരമായ ഭാവങ്ങളും ചേർന്നാലൊരു ഗായകനെങ്ങിനെയാകുമൊ അതാൺ ഷഹ്ബാസ്. ചിത്രകാരനും  ഫുട്ബോൾ കളിക്കാരനും പ്രകൃതിസ്നേഹിയുമായ ഷഹ്ബാസിന്റെ സംഗീതം , തന്റെ എല്ലാ ഭാവങ്ങളുടെയും വ്യക്തിത്വത്തിന്റെയും കൂടിച്ചേരലാണെന്ന് അദ്ദെഹം തന്നെ പറയുന്നു. ബാങ്കുവിളിയിലും ഓത്തുചൊല്ലലിലും അതിലെ സംഗീതാത്മകത കണ്ടെത്തിയ ഷഹ്ബാസിൻ ഏതു ആൾക്കൂട്ടത്തിനു മുൻപിലും പാടാനുള്ള ചങ്കൂറ്റം കിട്ടിയതോ ഫുട്ബോളിൽ നിന്നും.

തന്നെ ഉറക്കാൻ സ്വയം പാട്ടുകൾ ഉണ്ടാക്കിയിരുന്ന ഉമ്മയുടെ പാട്ടുകളാൺ ഷഹ്ബാസിന്റെ മനസിൽ ആദ്യമുണ്ടായ സംഗീതാനുഭവം .  ഗുരുനാഥനായ കെ പി എ സമദിന്റെ അനുഗ്രഹത്തോടേ നടത്തിയ മൂന്നരമണിക്കൂർ നീണ്ട ഗസൽ പരിപാടി ഷഹ്ബാസിനെ ചിത്രകാരൻ എന്നതിൽനിന്നും ഒരു പാട്ടുകാരനാക്കി. ഗഫൂർ ഭായ് എന്ന ഹാർമോണിയ ഗുരുനാഥൻ പകർന്നു കൊടൂത്ത സംഗീതപാഠങ്ങളുമായി ജീവിതത്തിലേക്ക് സൂഫി സംഗീതവും ഗസലുകളും സ്വീകരിച്ചു.  സൂഫി സംഗീതവും സൈഗാളും റാഫിയും മുകേഷും നിറഞ്ഞ മനസിലേക്ക് പ്രണയത്തിന്റെ എല്ലാ ഭാവങ്ങളോടൂം കൂടി അനാമിക വന്നതോടെ ഷഹ്ബാസിന്റെ സംഗീതത്തിനൊരു പുതിയ തുടക്കമായി.‘ സോൾ ഓഫ് അനാമിക ഇൻ ബ്ലാക്ക് & വൈറ്റ് ‘ എന്ന പേരിൽ ആദ്യ ചിത്രപ്രദർശനം നടത്തിയ ഷഹ്ബാസിന്റെ ആദ്യ ആൽബത്തിന്റെ പേരും അതു തന്നെയായിരുന്നു.  ദുഖഭരിതവും ഭാവപൂർണ്ണവുമായ ശബ്ദവും, തന്റെ പ്രത്യേകതയുള്ള ആലാപനവുമായി   കഴിഞ്ഞ ഒരു ദശാബ്ദമായി ഷഹ്ബാസ് മലയാള സംഗീതത്തിൽ നിറഞ്ഞുനിൽക്കുന്നു. 

മലബാറി സോങ്ങ്സ് , സോള്‍ ഓഫ് അനാമിക ഇന്‍ ബ്ലാക്ക് ആന്‍ഡ് വൈറ്റ്, നീയും നിലാവും, ജൂണ്‍ മഴയില്‍, സഹയാത്രിക, അലകള്‍ക്ക്  തുടങ്ങിയവയാൺ ഷഹ്ബാസിന്റെ മലയാള അൽബങ്ങൾ . പകൽ‌നഷത്രം, പരദേശി, രാമാനം, ചോക്കളേറ്റ് തുടങ്ങിയ സിനിമകളിൽ ഷഹ്ബാസ് പാടിയിട്ടുണ്ട്

ടോമി ജോസഫിന്റെയും റാണിയുടെയും മകളായി 1983 സെപ്റ്റംബർ 22ന് കോട്ടയം ജില്ലയിലെ പാലായിൽ ജനനം. ലാൽ ജോസ് - ദിലീപ് സൂപ്പർഹിറ്റ് ചിത്രമായ മീശമാധവനിലെ വിദ്യാസാഗർ സംഗീതം പകർന്ന ചിങ്ങമാസം വന്നു ചേർന്നാൽ എന്ന് തുടങ്ങുന്ന സൂപ്പർ ഹിറ്റ്‌ ഗാനം ശങ്കർ മഹാദേവനൊപ്പം പാടിക്കൊണ്ടാണ് റിമി മലയാള ചലച്ചിത്ര ലോകത്ത് തുടക്കം കുറിച്ചത്. അവിടുന്നിങ്ങോട്ട് വളരെ അധികം പാട്ടുകൾ വിവിധ സംഗീത സംവിധായകർക്ക് വേണ്ടി പാടി. സിനിമകളിൽ മാത്രമല്ല നിരവധി ആൽബങ്ങളിലും സ്റ്റേജ് ഷോകളിലും റിമി പാടിയിട്ടുണ്ട്. നല്ലൊരു അവതാരക കൂടിയായ റിമി ഇപ്പോൾ ഏഷ്യാനെറ്റ്‌, മഴവിൽ മനോരമ തുടങ്ങി വിവിധ ചാനലുകളിൽ പരിപാടികൾ അവതരിപ്പിച്ചു വരുന്നു. 5 സുന്ദരികൾ,  തിങ്കൾ മുതൽ വെള്ളി വരെ, കുഞ്ഞിരാമായണം എന്നീ സിനിമകളിൽ അഭിനയിച്ചു. കൂടാതെ ബൽറാം vs താരാദാസ്, കാര്യസ്ഥൻ തുടങ്ങിയ  ചിത്രങ്ങളിലെ ചില ഗാന രംഗങ്ങളിലും  റിമി പ്രത്യക്ഷപ്പെടുന്നുണ്ട്.

ബിസിനസ്സുകാരനായ ഭർത്താവ് റോയ്സിനൊപ്പം  കൊച്ചിയിൽ ആണ് റിമി താമസിക്കുന്നത്.

സഹോദരങ്ങൾ : റിങ്കു ടോമി ,റിനു ടോമി