അജയൻ(ഫഹദ് ഫാസിൽ) എന്ന ചെറുപ്പക്കാരൻ നഗരത്തിൽ വെച്ച് ഒരു വാഹനാപകടത്തിൽ ജീവിതത്തിനും മരണത്തിനുമിടയിലാകുന്നു. ആശുപത്രിയിൽ നിന്ന് അജയൻ പിന്നീട് തന്നെപ്പറ്റി പ്രേക്ഷകരോട് സംസാരിക്കുകയാണ്.
അജയൻ കേരളത്തിലെ എല്ലാ സാമൂഹിക വിപ്ലവങ്ങളും മാറ്റങ്ങളും സംഭവിക്കുന്നൊരു ഗ്രാമത്തിൽ നിന്ന് ബാംഗ്ലൂർ നഗരത്തിലെത്തിയ ചെറുപ്പക്കാരനാണ്. ‘ഒളിപ്പോരാളി’ എന്ന പേരിൽ അയാൾ ബ്ലോഗ് എഴുതിയിരുന്നു. സാമൂഹിക വിഷയങ്ങളെ അതിൽ പരാമർശിച്ചിരുന്നു. നഗരത്തിൽ അയാളെ അറിയാവുന്നത് റാണി(സുഭിക്ഷ)ക്കും അവളുടെ സുഹൃത്തുക്കളായ ബ്ലോഗേർസ് ക്ലച്ച്, ഗിയർ, ബ്രേക്ക് (അജുവർഗ്ഗീസ്, ബേസിൽ ) എന്നിവർക്കായിരുന്നു.
അജയൻ ആശുപത്രി കിടക്കയിൽ ആയതിനു ശേഷം ഈ ബ്ലോഗ് സുഹൃത്തുക്കൾക്ക് അജയന്റേതായി ഒരു ഫേസ് ബുക്ക് സന്ദേശം ലഭിക്കുന്നു. തനിക്ക് അപകടം പറ്റിയെന്നും ആശുപത്രിയിലാണെന്നും മാത്രമേ അതിലുള്ളു. പക്ഷെ അജയൻ എന്ന വ്യക്തി ആർ, എന്ത് എന്നൊക്കെയുള്ള വിവരങ്ങളൊന്നും ലഭ്യമല്ലാതിരുന്ന (അജയന്റെ ഒളിപ്പോരാളി എന്ന ബ്ലോഗ് നെയിമല്ലാതെ അജയൻ എന്ന യഥാർത്ഥ പേരു പോലും ഈ സുഹൃത്തുക്കൾക്ക് വ്യക്തമല്ല) ഈ സുഹൃത്തുക്കൾക്ക് അജയന്റെ അപ്പോഴത്തെ അവസ്ഥയെപ്പറ്റി അന്വേഷിക്കാൻ ആകുന്നില്ല. എന്നാൽ അന്നേ ദിവസം ഈ സുഹൃത്തുക്കളൊരുമിച്ച് നഗരത്തിൽ ഒരു ഷോ പ്ലാൻ ചെയ്തിരുന്നു. അജയൻ ആയിരുന്നു അതിന്റെ സ്ക്രിപ്റ്റ് റൈറ്റർ. അജയന്റെ കവിതകളും സാമൂഹിക നിരീക്ഷണങ്ങളും ചേരുന്ന ‘ഒളിപ്പോരു” എന്ന മ്യൂസിക് ഷോ. അജയൻ അതിനെത്തുമോ എത്തിയില്ലെങ്കിൽ ഷോ നടക്കുമോ എന്ന ആശങ്കയിലാണ് ഈ ബ്ലോഗ് സുഹൃത്തുക്കൾ.
അജയൻ ആശുപത്രിയിൽ നിന്നും തന്റെ ഭൂതകാലത്തെപ്പറ്റി പറയുന്നു. എഴുപതുകളിലും എൺപതുകളിലും തൊണ്ണൂറുകളുടെ തുടക്കത്തിലുമൊക്കെ കേരള സാമൂഹ്യ രാഷ്ട്രീയ മണ്ഡലങ്ങളിൽ ശക്തമായിരുന്നു പുരോഗമന രാഷ്ട്രീയ പ്രവർത്തനങ്ങളും മുന്നേറ്റങ്ങളുമായിരുന്നു അവ. അന്ധനായിരുന്ന തന്റെ അപ്പൂപ്പന്റെ സായാഹ്ന സവാരിക്കിടയിൽ അജയൻ അപ്പൂപ്പനെ നയിക്കുന്നതും അജയൻ അപ്പൂപ്പനെ പറ്റിക്കുന്നതുമൊക്കെ അജയൻ ഓർക്കുന്നു. പണമോ ലാഭമോ വേണ്ടാത്ത ജീവന്റെ വിപ്ലവങ്ങളെക്കുറീച്ച് അജയൻ സംസാരിക്കുന്നു.
ബാംഗ്ലൂരിലെ സുഹൃത്തുക്കൾ അപ്പോഴും അജയനുമായുള്ള ബ്ലോഗിലെ ബന്ധങ്ങളെക്കുറിച്ച് സംസാരിക്കുകയും അജയനെ കണ്ടുപിടിക്കാനാവാത്തതിൽ നിരാശയും പങ്കുവെയ്ക്കുന്നു. കൂട്ടത്തിലെ റാണിക്ക് അജയനുമായി ആത്മബന്ധമുണ്ട്. അതുകൊണ്ട് തന്നെ അജയന്റെ തിരോധാനത്തിൽ അവൾ കൂടുതൽ വേവലാതിപ്പെടുന്നു.
ആശുപത്രിയിലെ അജയന്റെ ശരീരത്തിനൊപ്പം കുമാരൻ(കലാഭവൻ മണി) എന്നൊരാൾ പിന്തുടരുന്നുണ്ട്. അജയന്റെ മുഖം അയാളിൽ എന്തോ ഓർമ്മകളുണർത്തുന്നുണ്ട്. അജയനോട് സംസാരിക്കാൻ ശ്രമിക്കുന്നുണ്ട്. ജീവിതത്തിനും മരണത്തിനുമിടയിലുള്ള അല്പ നിമിഷം കൊണ്ട് അജയൻ തന്റെ ജീവിതം അടയാളപ്പെടുത്താൻ ശ്രമിക്കുകയാണ്. ഒപ്പം കേരളത്തിന്റെ സാമൂഹിക രാഷ്ട്രീയ അവസ്ഥകളും..
