ആറ്റു നോറ്റുണ്ടായൊരുണ്ണി

ആറ്റുനോറ്റുണ്ടായൊരുണ്ണി അമ്മ

കാത്തുകാത്തുണ്ടായൊരുണ്ണി

അമ്പോറ്റിക്കണ്ണന്റെ മുമ്പിൽ അമ്മ

കുമ്പിട്ടു കിട്ടിയ പുണ്യം

ചോടൊന്നു വെയ്ക്കുമ്പോൾ അമ്മക്കുനെഞ്ചിൽ

കുളിരാം കുരുന്നാകും ഉണ്ണി [ആറ്റുനോറ്റുണ്ടായൊരുണ്ണി ]

കൊഞ്ചുന്ന കിങ്ങിണികെട്ടിത്തരാമമ്മ

മോതിരമിട്ടുതരാം

നാക്കത്തുതേനും വയമ്പും തേച്ചമ്മ

മാറോടു ചേർത്തുറക്കാം

കൈവളരുന്നതും കാൽവളരുന്നതും

കണ്ടോണ്ടമ്മയിരിക്കാം[ആറ്റുനോറ്റുണ്ടായൊരുണ്ണി ..]

വീടോളം നീ തെളിഞ്ഞുണരുണ്ണി

നാടോളം നീ വളര്‌

മണ്ണോളം നീ ക്ഷമിക്കാൻ പഠിക്കുണ്ണി

അമ്മയോളം നീ സഹിക്ക്‌

സ്നേഹം കൊണ്ടൊരു തോണിയുണ്ടാക്ക്‌

കാലത്തിനറ്റത്തു പോകാൻ[ആറ്റുനോറ്റുണ്ടായൊരുണ്ണി ..]