സ്വന്തം ഹൃദയത്തിനുള്ളറയിൽ

സ്വന്തം ഹൃദയത്തിനുള്ളറയിൽ - എന്റെ 
സ്വപ്നത്തെ അടക്കിയ കല്ലറയിൽ 
പുഷ്പചക്രം ചാർത്തുവാനായി
പൂന്തിങ്കൾ വീണ്ടും വന്നു 
സ്വന്തം ഹൃദയത്തിനുള്ളറയിൽ - എന്റെ 
സ്വപ്നത്തെ അടക്കിയ കല്ലറയിൽ 

മതങ്ങൾ കെട്ടിയ മതിലുകൾക്കുള്ളിൽ 
മർത്യൻ വീണു മരിച്ചപ്പോൾ
ആരുമറിയാതെൻ അനുരാഗസ്വപ്നത്തെ 
ആറടി മണ്ണിൽ അടക്കി - ഞാൻ 
ആറടി മണ്ണിൽ അടക്കി 
സ്വന്തം ഹൃദയത്തിനുള്ളറയിൽ 

കൊളുത്തിയില്ല താരകളന്നൊരു 
കൊച്ചു കൈത്തിരി വാനിടത്തിൽ 
കാവലിരിക്കുന്നു കണ്ണീർമഴയിലും 
കദനച്ചൂടിലും ഞാൻ മാത്രം 
കദനച്ചൂടിലും ഞാൻ മാത്രം 

സ്വന്തം ഹൃദയത്തിനുള്ളറയിൽ - എന്റെ 
സ്വപ്നത്തെ അടക്കിയ കല്ലറയിൽ 
പുഷ്പചക്രം ചാർത്തുവാനായി
പൂന്തിങ്കൾ വീണ്ടും വന്നു 
സ്വന്തം ഹൃദയത്തിനുള്ളറയിൽ - എന്റെ 
സ്വപ്നത്തെ അടക്കിയ കല്ലറയിൽ