സ്വർഗ്ഗത്തിൽ വിളക്കു വെയ്ക്കും

സ്വർഗ്ഗത്തിൽ വിളക്കു വെയ്ക്കും
സ്വർണ്ണമല്ലിപ്പൂക്കളേ
സൗഖ്യമെന്ന സാമ്രാജ്യത്തിൻ
കാവൽദീപങ്ങളേ
സുപ്രഭാതം സുപ്രഭാതം
നിങ്ങൾക്കു സുപ്രഭാതം
(സ്വർഗ്ഗ...)

വർണ്ണശബളമാം വാർമഴവില്ലും
വസന്തചുംബിത വനവും
എന്നുമെന്നും കാണാൻ മാത്രം
കണ്ണുകളരുളീ ദൈവം - നിങ്ങൾക്കു
കണ്ണുകളരുളീ ദൈവം
(സ്വർഗ്ഗ...)

കന്മഷമെന്തെന്നറിയാതുള്ളൊരു
നൈർമ്മല്യങ്ങൾ നിങ്ങൾ
കനവിൽ പോലും പൊടിപുരളാത്തൊരു
കാട്ടുപൂവുകൾ - നിങ്ങൾ കാട്ടുപൂവുകൾ
(സ്വർഗ്ഗ...)