ലേഖയുടെ മരണം ഒരു ഫ്ലാഷ് ബാക്ക്

പ്രശസ്ത ചലച്ചിത്ര താരവും ദേശീയ പുരസ്കാര ജേതാവുമായ ലേഖ (നളിനി) ആത്മഹത്യ ചെയ്യുന്നു. കേരളത്തിലെ ഒരു ചെറുഗ്രാമത്തിൽ നിന്നും മദിരാശിയിലെത്തി സിനിമാരംഗം പിടിച്ചടക്കിയ ഈ പെൺകുട്ടിക്ക് എങ്ങിനെ ഈ ദുരന്തമുണ്ടായി എന്നുള്ള അന്ന്വേഷണമാണു ചിത്രം

സിനിമയിൽ അഭിനയിക്കാൻ അവസരം തേടിയാണു ശാന്തമ്മ അമ്മ വിശാലാക്ഷിയമ്മയും (ശുഭ) അച്ഛൻ പണിക്കരും (ജോൺ വർഗ്ഗീസ്) മദിരാശിയിലെത്തുന്നത്. അവർക്കു അവിടെ ആകെ പരിചയമുണ്ടായിരുന്ന കുറുപ്പിനെ കാണാൻ ശ്രമിക്കുമ്പോഴാണു അയാൾ പെൺവാണിഭക്കാരുടെ ഏജന്റാണെന്നും ഇപ്പോൾ ജയിലിലാണെന്നു അറിയുന്നത്. അവസരം തേടിയലയുന്ന അവർ സഹസംവിധായകൻ പോൾരാജിനെ (നെടുമുടി വേണു) കണ്ടുമുട്ടുന്നു. താൻ സംവിധാനം ചെയ്യാൻ പോകുന്ന അടുത്ത ചിത്രത്തിൽ ശാന്തമ്മയെ നായികയാക്കാമെന്നു വിവാഹം ചെയ്യാമെന്നും അയാൾ വാക്കു കൊടുക്കുന്നു. പോൾ രാജ് കൊണ്ടുവരുന്ന സിനിമാ ലേഖകൻ വി എസ് കൊരട്ടൂർ (തിലകൻ) ശാന്തമ്മയെന്ന പേരു മാറ്റി ലേഖയെന്നാക്കുന്നു. സിനിമാ വാഗ്ദാനവും വിവാഹ വാഗ്ദാനവും നൽകി പോൾരാജ് പറ്റിക്കുകയാണെന്നു അവർ തിരിച്ചറിയുന്നു.

പ്രൊഡക്ഷൻ കൺട്രോളർ അൻസാരി (ലത്തീഫ്) വഴി ചിത്രങ്ങളിൽ ചെറിയ വേഷങ്ങൾ ലേഖയ്ക്കു ലഭിക്കുന്നു. സിനിമകളിൽ കാബറെ നർത്തകിയായ പുഷ്പയുമായി ലേഖ സൗഹൃദമാകുന്നു. ചെറിയ വേഷങ്ങളിലൂടെ ശ്രദ്ധിക്കപ്പെടുന്ന ലേഖയെ പ്രശസ്ത നടൻ പ്രേം സാഗർ (മമ്മൂട്ടി) പുതിയ ചിത്രങ്ങളിലേക്ക് ശുപാർശ ചെയ്യുന്നു. ലേഖ പ്രശസ്തയാകുന്നതോടെ പിണങ്ങിപ്പോയിരുന്ന പണിക്കർ തിരികെ വരുന്നു. അതു പോലെ നാട്ടിലുണ്ടായിരുന്ന വിശാലത്തിന്റെ അമ്മയും (അടൂർ ഭവാനി) സഹോദരൻ നാണുക്കുട്ടനും അവരുടെ കൂടെ താമസിക്കാനായി എത്തുന്നു. 

കലാമൂല്യമുള്ള ചിത്രങ്ങളുടെ സംവിധായകനായ സുരേഷ് ബാബു (ഗോപി) തന്റെ പുതിയ ചിത്രത്തിലേക്ക് നായികയായി ലേഖയെ ക്ഷണിക്കുന്നു. പ്രേം സാഗറിന്റെ എതിർപ്പിനെ അവഗണിച്ചു ലേഖ ആ അവസരം സ്വീകരിക്കുന്നു. ആ ചിത്രത്തിലെ അഭിനയത്തിനു ലേഖയ്ക്കു മികച്ച നടിക്കുള്ള ദേശീയ പുരസ്കാരം ലഭിക്കുന്നു. അവാർഡ് ലഭിക്കുന്നതോടെ ലേഖയ്ക്കു കൂടുതൽ വേഷങ്ങൾ ലഭിക്കുന്നു. മറ്റൊരു നടനായ കഷ്ണദാസ് (വേണു നാഗവള്ളി) ലേഖയെ വിവാഹം കഴിക്കാൻ താത്പര്യം കാണിക്കുന്നെങ്കിലും സുരേഷ് ബാബുവിനോടു കൂടുതൽ അടുക്കുന്ന ലേഖ അതു നിരസിക്കുന്നു. 

സ്വത്തും പ്രശസ്തിയുമായതോടെ വിശാലത്തിന്റെ സ്വഭാവത്തിൽ മാറ്റം വരുന്നു. തുടക്ക കാലത്ത് സഹായമായിരുന്ന അൻസാരിയും സഹദേവനും പുതുതായി നിർമ്മിക്കുന്ന ചിത്രത്തിൽ ലേഖയുടെ കോൾഷീറ്റ് ചോദിക്കുന്നെങ്കിലും ആവശ്യപ്പെടുന്ന അഡ്വാൻസ് നൽകാൻ പറ്റാത്തതിനാൽ വിശാലം സമ്മതിക്കുന്നില്ല. അതിന്റെ പേരിൽ അമ്മയുമായി വഴക്കിടുന്ന ലേഖ ആശ്വാസം കണ്ടെത്തുന്നത് വിവാഹിതനായ സുരേഷ് ബാബുവിലാണു. തന്റെ വസ്ത്രങ്ങളും ആഭരണങ്ങളും എടുത്തു ലേഖ സുരേഷ് ബാബുവിനോടൊപ്പം ഒരു വാടക വീട്ടിലേക്ക് താമസം മാറ്റുന്നു. അമ്മയും മറ്റു ബന്ധുക്കളൂം വന്നു വിളിച്ചിട്ടും ലേഖ പോകാൻ തയ്യാറാകുന്നില്ല.