മുന്നറിയിപ്പ്

ജേർണലിസം പഠിച്ചിറങ്ങി കരിയർ പതിയെ തുടങ്ങി വരുന്ന യുവ ജേർണലിസ്റ്റ് അഞ്ജലി അറക്കൽ. കൂലിയെഴുത്ത് അഥവാ ഗോസ്റ്റ് റൈറ്റിങ്ങ് പണ സമ്പാദന മാർഗ്ഗമാക്കി മാറ്റിയ അഞ്ജലിക്ക്, പത്രക്കാരുടെ ഒരു പാർട്ടിക്കിടെ ഒരു പോലീസുകാരന്റെ സർവ്വീസ് സ്റ്റോറി എഴുതാനുള്ള ഓഫർ ലഭിക്കുന്നു. ജയിൽ സൂപ്രണ്ടായ രാമ മൂർത്തിയെ ജയിലിൽ പോയി കണ്ട് അദ്ദേഹത്തിന്റെ ആത്മകഥയെഴുതുവാനുള്ള വിവരങ്ങൾ അഞ്ജലി ശേഖരിക്കുന്നു. ജയിലിൽ താൻ നടപ്പിലാക്കിയ പല പദ്ധതികളും വിവരിക്കുന്നതിനിടയിൽ, രാമ മൂർത്തി സി കെ രാഘവനെ അഞ്ജലിക്ക് പരിചയപ്പെടുത്തുന്നു. സ്വന്തം ഭാര്യയടക്കം രണ്ടു സ്ത്രീകളെ കൊലപ്പെടുത്തിയ കുറ്റത്തിനു ജീവപര്യന്തം തടവിനു ശിക്ഷിക്കപ്പെട്ട രാഘവൻ പക്ഷേ ശിക്ഷാ കാലാവധി കഴിഞ്ഞിട്ടും ജയിലിൽ നിന്നും പോയില്ല. താനാരെയും കൊന്നിട്ടില്ല എന്ന് രാഘവൻ അഞ്ജലിയോട് പറയുന്നു. അതോടെ രാമമൂർത്തിയുടെ ആത്മകഥ എഴുത്ത് പാതി വഴിയിൽ ഉപേക്ഷിച്ച് അവൾ രാഘവനെ കുറിച്ച് അന്വേഷണം ആരംഭിക്കുന്നു. അതിനിടയിൽ രാഘവൻ ജയിലിൽ വച്ച് എഴുതാറുണ്ട് എന്ന് മനസ്സിലാക്കുന്ന അഞ്ജലി, മൂർത്തിയുടെ ആത്മകഥക്കാണ് എന്ന പേരില്‍ അയാളുടെ കുറിപ്പുകൾ വാങ്ങുന്നു. അത് വായിച്ചവർ രാഘവൻ ഒരു നല്ല എഴുത്തുകാരനും ചിന്തകനുമാണെന്ന് പറയുന്നു. അതോടെ തന്റെ കരിയർ തന്നെ രക്ഷിക്കുവാനുള്ള ഒരു വഴി അവൾക്കു മുന്നിൽ രാഘവന്റെ രൂപത്തിൽ തുറക്കപ്പെടുന്നു. അയാളുടെ ഭാര്യയുടെ അമ്മയേയും കേസ് വാദിച്ച വക്കീലിനേയും കാണുന്ന അഞ്ജലി ഒടുവിൽ രാഘവനെ കുറിച്ച് ഒരു ലേഖനം എഴുതുന്നു. അത് ഏവരുടേയും ശ്രദ്ധയാകർഷിക്കുന്നു. അതോടെ രാഘവനും ശ്രദ്ധിക്കപ്പെടുന്നു. ബോബെ കേന്ദ്രമാക്കിയ ഒരു പ്രസാധക കമ്പനി രാഘവന്റെ കഥയെഴുതുവാനായി അഞ്ജലിയെ സമീപിക്കുന്നു. അതിനായി രാജീവ് തോമസ് അഞ്ജലിയെ വന്നു കാണുന്നു. അതിനിടയിൽ തന്റെ ആത്മകഥ എവിടെയും എത്താതെയാകുന്നതോടെ രാമമൂർത്തി അഞ്ജലിയോടും അതിനു കാരണക്കാരനായ രാഘവനോടും മുഷിയുന്നു. താമസിയാതെ രാഘവൻ ജയിലിൽ നിന്നും മോചിതനാകുന്നു. അതേ സമയം ദൽഹി ആസ്ഥാനമായ മറ്റൊരു പ്രസാധകർ ജയിൽപുള്ളികളെ ആധാരമാക്കി ഇറക്കുന്ന ബുക്കിന്റെ കേന്ദ്ര സ്ഥാനത്ത് രാഘവനെ നിശ്ചയിക്കുന്നു. അതോടെ ജയിൽ മോചിതനായ രാഘവനെ അഞ്ജലി, എഴുതാനായി എല്ലാ സൗകര്യങ്ങളും കൊടുത്ത് ഒളിവിൽ പാർപ്പിക്കുന്നു. അവിടെ വച്ച് അയാൾ തനിക്ക് ഭക്ഷണം എത്തിക്കുന്ന പയ്യനുമായി സൗഹൃദത്തിലാവുന്നു. അവനൊപ്പം കറങ്ങുന്ന രാഘവൻ പക്ഷേ ഒന്നും എഴുതുന്നില്ല. അഞ്ജലി ബോംബെയിൽ പോയി പുസ്തകത്തിനായി കരാർ ഒപ്പിടുന്നു. മുപ്പതു ദിവസമാണവർ അഞ്ജലിക്ക് നൽകുന്നത്. എന്നാൽ തിരിച്ചെത്തുന്ന അഞ്ജലി കാണുന്നത് ഒന്നും എഴുതാതെ, എഴുതാം എന്ന് പറഞ്ഞിരിക്കുന്ന രാഘവനെയാണ്. ഒളിവിൽ താമസിപ്പിക്കുന്നുവെങ്കിലും മറ്റേ പ്രസാധക കമ്പിനിയുടെ ലേഖക പ്രിയാ ജോസഫ് രാഘവനെ കണ്ടെത്തുന്നു. എന്നാൽ ആ സമയം അവിടെയെത്തുന്ന അഞ്ജലി അവർ തമ്മിൽ സംസാരിക്കുന്നത് തടയുന്നു. അഞ്ജലി രാഘവനെ മറ്റൊരു സ്ഥലത്തേക്ക് മാറ്റുന്നു. പുസ്തകം പൂർത്തിയാക്കാനുള്ള സമയ പരിധി അടുക്കും തോറും രാജീവ് തോമസ് അഞ്ജലിയിൽ കൂടുതൽ സമ്മർദ്ദം ചെലുത്തുന്നു. അഞ്ജലി രാഘവനെ കൊണ്ട് എഴുതിക്കാനായി സമ്മർദ്ദം തുടങ്ങുന്നു. കടുത്ത മാനസിക സംഘർഷത്തിലേക്കാണ് ഈ സാഹചര്യം അവർ ഇരുവരേയും തള്ളി വിടുന്നത്. സമയ പരിധിയുടെ സമ്മർദ്ദത്തിൽ അവർ ഇരുവരും കടന്നു പോകുന്ന മാനസികാവസ്ഥയിലൂടെയും അതിന്റെ പരിണാമത്തിലേക്കുമുള്ള ഒരു യാത്രയാണ് ചിത്രത്തിന്റെ ബാക്കി.