നടൻ സുകുമാരന്റെ മകൻ എന്ന ലേബലാണ് സിനിമയിലെത്തിയെങ്കിലും ചുരുങ്ങിയ കാലംകൊണ്ട് മലയാളസിനിമയിൽ തന്റേതായ ഒരിടം നേടാൻ കഴിഞ്ഞ പൃഥ്വീരാജ് തമിഴിലും ഹിന്ദിയിലും ഇതിനോടകം സാന്നിദ്ധ്യമറിയിച്ചു കഴിഞ്ഞു.
സുകുമാരന്റെയും മല്ലിക സുകുമാരന്റെയും മകനായി 1982 ഒക്ടോബർ 16ന് തിരുവനന്തപുരത്ത് ജനിച്ചു. സഹോദരൻ ഇന്ദ്രജിത്തും അഭിനേതാവാണ്. എല്ലാവരും അഭിനേതാക്കളായ ഒരു കുടുംബത്തിലെ അംഗം എന്നു പറഞ്ഞാലും അതിശയോക്തിയില്ല.
പൂജപ്പുരയിലെ സെന്റ് മേരീസ് സെന്റർ സ്കൂളിലും കഴക്കൂട്ടം സൈനിക് സ്കൂളിലുമായാണ് സ്കൂൾ വിദ്യാഭ്യാസം നടത്തിയത്. ഓസ്ട്രേലിയയിലെ ടാസ്മാനിയ സർവ്വകലാശാലയിൽ വിവരസാങ്കേതികവിദ്യയിൽ ബിരുദ പഠനം നടത്തുമ്പോഴാണ് 2002ൽ രഞ്ജിത്തിന്റെ നന്ദനത്തിലൂടെ സിനിമയിൽ എത്തുന്നത്.
പിന്നീട് സിനിമയിൽ തന്നെ തുടരാൻ തീരുമാനിച്ച പൃഥ്വീരാജ് 2005ൽ കനാക്കണ്ടേൻ എന്ന ചിത്രത്തിലൂടെ തമിഴിലും അവതരിക്കപ്പെട്ടു. 2010ൽ പോലീസ് പോലീസ് എന്ന ചിത്രത്തിലൂടെ തെലുങ്കിലും 2012ൽ അയ്യ എന്ന ചിത്രത്തിലൂടെ ഹിന്ദിയിലും എത്തിയ പൃഥ്വീരാജ്, പുതിയ മുഖം എന്ന ചിത്രത്തിലൂടെ ഗായകനായും അരങ്ങേറ്റം കുറിച്ചു.
ഷാജി നടേശൻ, സന്തോഷ് ശിവൻ എന്നിവർക്കൊപ്പം ഓഗസ്റ്റ് സിനിമ എന്ന ബാനറിൽ നിർമ്മാണരംഗത്തും സജീവമാണ്.
മാദ്ധ്യമപ്രവർത്തകയായ സുപ്രിയയാണ് ഭാര്യ.