പകർന്നാട്ടം

വധശിക്ഷക്കു വിധിക്കപ്പെട്ട പ്രതിയാണ് തോമസ് (ജയറാം) അടുത്ത പുലർച്ചക്ക് വിധി നടപ്പാക്കുമെന്ന് തോമസിനോട് ജയിലർ അറിയിക്കുന്നു. തോമാസിന്റെ ഓർമ്മകൾ പിന്നോട്ട് പായുന്നു.

ഉത്തര മലബാറിലെ പ്രമുഖ രാഷ്ട്രീയപ്പാർട്ടിയുടെ പ്രവർത്തകനണ് തോമസ്.  ഉത്തരമലബാറിൽ കുടിയേറിയ പഴയ കൃസ്ത്യൻ കുടുംബാംഗമായ തോമസിനു പ്രായമായ അമ്മച്ചി മാത്രമേയുള്ളു. എൻഡോസൾഫാനിന്റെ ഇരകളായ കുട്ടികളെ ശുശ്രൂഷിക്കുന്ന “ഹോപ്പ്” എന്ന സാമൂഹ്യപ്രവർത്തക സംഘടനയുമായും മറ്റും ചാരിറ്റി - സോഷ്യൽ പ്രവൃത്തികളുമായി നടക്കുന്ന തോമസിനു ഒരു പ്രണയമുണ്ട്. മലബാറിലെ പ്രമുഖ നമ്പൂതിരി കുടുംബാംഗമായ മീര(സബിത ജയരാജ്)യാണ് തോമസിന്റെ കാമുകി. എൻഡോസൾഫാൻ വിരുദ്ധപ്രചരണാർത്ഥം നടത്തുന്ന നാടകത്തിലെ സഹ നടിയും കൂടിയാണ് മീര. രണ്ടു പേരുടേയും പ്രണയം നെരുദയുടെ കവിതകളിലൂടെ അവർ പങ്കുവെക്കുന്നു. തങ്ങളുടെ പ്രണയത്തെ പരസ്പരം പറയാൻ നെരുദയുടെ  വരികളെ അടിവരയിട്ട് പുസ്തകം കൈമാറുന്നു. മീരയുടെ പ്രണയ വാർത്ത വീട്ടിലറിയുന്നതോടെ ഇളയച്ഛന്മാർ എതിർക്കുന്നു. മീരയുടെ കോളേജ് പഠനം നിർത്തിവെക്കാൻ തീരുമാനിക്കുന്നു. എല്ലാ എതിർപ്പുകളേയും അവഗണിച്ച് തോമസും മീരയും വിവാഹം കഴിക്കാനും ഒരുമിച്ചു ജീവിക്കാനും തീരുമാനിക്കുന്നു. വിവാഹത്തിന്റെ തലേന്ന് തോമസിനോട് പാർട്ട് ഒരാവശ്യം ഉന്നയിക്കുന്നു. എതിർപ്പാർട്ടിയിൽ പെട്ട ഒരു നേതാവിനെ സ്ക്കൂൾ ബസ്സിൽ വെച്ച് ക്രൂരമായി കൊലപ്പെടുത്തിയത് പാർട്ടിയിലെ മറ്റൊരംഗം ആണെങ്കിലും അവനെ പാർട്ടിക്ക് പിന്നേയും ആവശ്യമാണെന്ന് കണ്ട്  ഈ കൊലപാതകത്തിന്റെ കുറ്റം തോമസിനോട് ഏറ്റെടുക്കാൻ പറയുന്നു. കുടുംബത്തേയും അമ്മയേയും പാർട്ടി സംരംക്ഷിച്ചുകൊള്ളൂമെന്ന് ഉറപ്പും നൽകുന്നു. തോമസിനെ പോലീസ് അറസ്റ്റ് ചെയ്ത് ലോക്കപ്പിലാക്കുന്നു. ഇതൊന്നുമറിയാതെ താൻ തോമസിനൊപ്പം ജീവിക്കാൻ പോകുകയാണെന്ന് അച്ഛന്‌ കത്തെഴുതി വെച്ച് മീര തോമസിനെ കാത്തു നിൽക്കുന്നു. പക്ഷേ, തോമസ് മീരയെ തേടിവന്നില്ല. മീരയുടെ വീട്ടൂകാർ മീരയെ വീട്ടു തടങ്കലിൽ പാർപ്പിക്കുന്നു. നീണ്ട അഞ്ചു വർഷത്തിനു ശേഷം തോമസിനു വധശിക്ഷ വിധിക്കുന്നു. അതോടേ മീരയെ വീട്ടു തടങ്കലിൽ നിന്നും മോചിപ്പിക്കുന്നു. അഞ്ചുവർഷത്തെ ഇരുണ്ട വാസത്തിനു ശേഷം പുറത്തു വന്ന മീര മുൻപത്തേക്കാളും ഇച്ഛാശക്തിയോടെ വീട്ടിൽ നിന്നും പുറത്തിറങ്ങുന്നു. നിരപരാധിയായ തോമസിനെ മോചിപ്പിക്കുവാൻ വേണ്ടി. വക്കീലുമൊത്തു മീര നടത്തുന്ന എല്ലാ വഴികളും അടയുമ്പോൾ മീരക്ക് ഒരേയൊരു വഴി മാത്രമേ മുന്നിലുണ്ടായിരുന്നുള്ളു. യഥാർത്ഥ കൊലപാതകിയെ കണ്ടുപിടിക്കുക എന്നത്. അതിനുവേണ്ടി മീര മുന്നിട്ടിറങ്ങുന്നു. ഒടുവിൽ മീര കൊലപാതകിയായ സുധി(വിജയ് വിക്ടർ)യെ കണ്ടുമുട്ടുന്നു.