പുൽമാടമാണേലും പൂമേടയാണെലും

പുൽമാടമാണേലും പൂമേടയാണെലും
പൊന്നോടു മേയണ പൂനിലാവേ
നിന്നോടു ഞാനൊന്നു ചോദിച്ചോട്ടെ
(പുൽമാടമാണേലും... )

കാട്ടിക്കൊതിപ്പിക്കും പൊന്നിന്റെ മൂക്കുത്തി
കല്യാണനാളിൽ കടം തരാമോ - ഏനു
കല്യാണനാളിൽ കടം തരാമോ
(കാട്ടിക്കൊതിപ്പിക്കും... )

മാസത്തിൽ പത്തു നാൾ മാനത്തെച്ചളിയില്
മാണിക്യം വിതറണ കറുത്തവാവേ
വേലയ്ക്കു പോകുമ്പ  മാലയ്ക്കു കെട്ടുവാൻ
നാലഞ്ചു കല്ലു കടം തരാമോ -ഏന്
നാലഞ്ചു കല്ലു കടം തരാമോ
(പുൽമാടമാണേലും... )

മൂവന്തിപ്പെണ്ണിനു മുറുക്കിചുമപ്പിക്കാൻ
താമ്പാളം നീട്ടണ വെളുത്തവാവേ
താഴത്തെ മാരന്നു തിന്നാൻ കൊടുക്കുവാൻ
താമരവെറ്റ കടം തരാമോ - ഒരു
താമരവെറ്റ കടം തരാമോ

പുൽമാടമാണേലും പൂമേടയാണെലും
പൊന്നോടു മേയണ പൂനിലാവേ
നിന്നോടു ഞാനൊന്നു ചോദിച്ചോട്ടെ
(പുൽമാടമാണേലും... )