ആയിരമായിരം കന്യകമാർ

ആയിരമായിരം കന്യകമാർ
അനുരാഗമലർവന സുന്ദരിമാർ
ജീവിതയാത്രയിലെന്നരികത്തായ്
ഈവഴിയെന്നും വന്നൂ
ഈവഴിയെന്നും വന്നൂ
ആയിരമായിരം കന്യകമാർ
അനുരാഗമലർവന സുന്ദരിമാർ

അതിലൊരുത്തി മാത്രം മനസ്സിനുള്ളിൽ
അനുവാദമില്ലാതെ വിരുന്നിനെത്തി
സങ്കൽപ്പസീമയിലെ മുന്തിരിക്കുടിലിങ്കൽ
സംഗീതം മൂളിമൂളി വിരുന്നിനെത്തി
ആയിരമായിരം കന്യകമാർ
അനുരാഗമലർവന സുന്ദരിമാർ

കണ്ടപ്പോൾത്തന്നെയാ കണ്ണിണകൾ
കരിനീലത്തുമ്പികളായ് പറന്നു വന്നൂ
മാമകസ്വപ്നങ്ങൾതൻ മാകന്ദവനങ്ങളിൽ
മാധുരി തേടിത്തേടി പറന്നുവന്നു
ആയിരമായിരം കന്യകമാർ
അനുരാഗമലർവന സുന്ദരിമാർ

പൂവുകൊണ്ടുള്ളോരി ചങ്ങലകൾ എന്റെ
ജീവന്റെ ജീവനെ വരിഞ്ഞുകെട്ടി
മറന്നാലും മറക്കാത്ത മായ്ചാലും മായാത്ത
മധുരമാം വേദനയിൽ വരിഞ്ഞുകെട്ടി

ആയിരമായിരം കന്യകമാർ
അനുരാഗമലർവന സുന്ദരിമാർ
ജീവിതയാത്രയിലെന്നരികത്തായ്
ഈവഴിയെന്നും വന്നൂ
ഈവഴിയെന്നും വന്നൂ