പ്രേമത്തിൻ ശീതളച്ഛായാതലങ്ങളിൽ

ആ..... 

പ്രേമത്തിൻ ശീതളച്ഛായാതലങ്ങളിൽ
താമസിച്ചെത്തുന്ന വിരുന്നുകാരീ -എന്റെ
വിരുന്നുകാരീ
ഉദ്യാനവിരുന്നിനു പൂപ്പന്തലൊരുക്കട്ടെ
നൃത്തമണ്ഡപങ്ങളുമൊരുക്കട്ടെ - ഞാൻ
നൃത്തമണ്ഡപങ്ങളുമൊരുക്കട്ടെ 
പ്രേമത്തിൻ ശീതളച്ഛായാതലങ്ങളിൽ
താമസിച്ചെത്തുന്ന വിരുന്നുകാരീ 

എന്നാത്മസങ്കല്പ ഗോപുരത്തിൽ നിന്നെ
എങ്ങിനെ എങ്ങിനെ സ്വീകരിക്കും - ഞാൻ
എങ്ങിനെ എങ്ങിനെ സ്വീകരിക്കും 
മന്ദാരതല്പത്തിൽ നീ വന്നിരിക്കുമ്പോൾ
എന്തെല്ലാമെന്തെല്ലാം ഒരുക്കി വയ്ക്കും - ഞാൻ
എന്തെല്ലാമെന്തെല്ലാം ഒരുക്കി വയ്ക്കും 
പ്രേമത്തിൻ ശീതളച്ഛായാതലങ്ങളിൽ
താമസിച്ചെത്തുന്ന വിരുന്നുകാരീ

ചുണ്ടത്തു സൂക്ഷിച്ച മുന്തിരിക്കുലകൾ ഞാൻ
ഒന്നൊന്നായ് ഒന്നൊന്നായ് പുറത്തെടുക്കും
മധുരിതസ്വപ്നങ്ങൾതൻ കലവറയ്ക്കുള്ളിൽ നിന്നും
മധുപാത്രമോരോന്നായ് നിരത്തി വെയ്ക്കും - മുന്നിൽ
മധുപാത്രമോരോന്നായ് നിരത്തി വെയ്ക്കും

പ്രേമത്തിൻ ശീതളച്ഛായാതലങ്ങളിൽ
താമസിച്ചെത്തുന്ന വിരുന്നുകാരീ -എന്റെ
വിരുന്നുകാരീ