താജ്മഹൽ നിർമ്മിച്ച രാജശില്‍പ്പീ
ഷാജഹാൻ ചക്രവര്‍ത്തീ
അങ്ങയെ പ്രേമവിരഹിണികൾ ഞങ്ങൾ
അനുസ്മരിപ്പൂ നിത്യതപസ്വിനികൾ
താജ്മഹൽ നിർമ്മിച്ച രാജശില്‍പ്പീ
ആ നല്ല ഹൈമവത ഭൂമിയിലെ
അശ്രുവാഹിനീ തടത്തിൽ
മോഹഭംഗങ്ങൾ കൊണ്ടവിടുന്നു തീർത്തൊരാ
മൂകാനുരാഗ കുടീരത്തിൽ
ഒരു കണ്ണീരിന്നുറവയായ് ഒഴുകുകയാണിന്നും
എന്നിലെ ദുഃഖവും ഞാനും
താജ്മഹൽ നിർമ്മിച്ച രാജശില്‍പ്പീ
ആ നല്ല ചന്ദ്രമദരാത്രികളിൽ
അംശുമാലിനീതടത്തിൽ
ആദ്യരോമാഞ്ചങ്ങൾ പൊതിഞ്ഞു ഞാനാരുടെ
ആലിംഗനങ്ങളിൽ മയങ്ങി
അതിൻ സ്വർഗ്ഗാനുഭൂതികളെ തഴുകുകയാണെന്റെ
സ്വപ്നവും ദാഹവും ഞാനും
താജ്മഹൽ നിർമ്മിച്ച രാജശില്‍പ്പീ
ഷാജഹാൻ ചക്രവര്‍ത്തീ
അങ്ങയെ പ്രേമവിരഹിണികൾ ഞങ്ങൾ
അനുസ്മരിപ്പൂ നിത്യതപസ്വിനികൾ
താജ്മഹൽ നിർമ്മിച്ച രാജശില്‍പ്പീ
